30/05/2026
Liewe Pitstop met God Familie en Life FM SA
Met groot dankbaarheid in ons harte wil ons vandag vir 'n oomblik stilstaan en die Here eer vir Sy goedheid en getrouheid.
Vir bykans ses jaar reeds het die radiobediening op LifeFM die voorreg gehad om die evangelie van Jesus Christus uit te dra. Wat begin het as 'n klein saadjie van gehoorsaamheid en geloof, het deur God se genade gegroei tot 'n gevestigde bediening waardeur talle mense bereik, bemoedig en geestelik opgebou word.
Hierdie bediening strek vandag verder as net die radiogolwe. Deur Facebook en ander platforms sien ons hoe die Here steeds harte aanraak en mense trek na 'n dieper wandel van heiligmaking en toewyding aan Hom. Die behoefte aan die suiwer Woord van God is groot, en ons is dankbaar dat Hy ons die geleentheid gee om deel van Sy Koninkrykswerk te wees.
Aan God alleen kom al die eer toe. Dit is Hy wat die deur oopmaak, Hy wat die saad laat ontkiem en Hy wat die groei gee. Ons erken met nederigheid dat niks hiervan sonder Sy genade moontlik sou wees nie.
Maar ek wil ook vandag vir jou dankie sê.
Dankie vir jou gebede. Dankie vir jou getrouheid. Dankie vir jou ondersteuning van die gemeente en die bediening. Dankie dat jy saam met ons die visie dra en deel vorm van dit wat God besig is om te doen. Jou betrokkenheid, meelewendheid en opoffering vorm die ondersteuningsbasis waarop hierdie bediening kan voortgaan.
Ons waardering strek ook uit na die span van LifeFM vir hul ondersteuning en samewerking deur die jare.
Aan elke luisteraar op die radio, aan elke kyker op Facebook, aan elke persoon wat 'n boodskap deel, kommentaar lewer of bloot getrou inskakel – baie dankie. Julle is deel van hierdie geestelike familie wat die Here saamgebind het rondom Sy Woord.
Kom ons vier saam wat God reeds gedoen het, maar kom ons kyk ook met verwagting vorentoe na dit wat Hy nog gaan doen. Mag ons aanhou om saam ligdraers te wees in 'n wêreld wat Christus nodig het.
Baie dankie vir elkeen van julle.
Aan God alleen die eer!
Seën en vrede,
Ds. Willie Henning
Agapé Gemeente Potchefstroom
"Pitstop met God" – LifeFM
