08/08/2026
In die afgelope weke gesels ons oor die Klein Jakkalsies en iemand vra: "nou wat van die wolwe"😜❓
En al wat ek aan dink is as wolwe skaapsklere aangetrek het,dan is 'n wolf baie gevaarlik en kan geweldige skade aanrig erger as die van die klein jakkalsie.
Dus,wat 'n WAARSKUWING AAN DIE GEMEENTE,DIE LIGGAAM VAN CHRISTUS.
Die kerk se krag word baie kere nie van buite die kerkgrense afgebreek nie, maar van binne word dit aangeval en verswak wanneer ons as lidmate self geestelik vals beginne optree en voorgee. Hierdie vermaning vra nie net: "Wie in die kerk is gevaarlik?" nie, maar: "Here, is ek dalk die skuldige een wat die skade aanrig en hoe gemaak as ek skuldig is?
Van die eerste gevaartekens is as volg:
1. *Wanneer erkenning van mense vir my belangriker word as die goedkeuring van God*
Dis wanneer ek net dien en dinge doen as mense dit kan sien – ek sing, bid hardop of help, of gee net solank iemand my naam kan noem en dankie sê voor ander.
EGTE / OPREGTE geloof dien egter getrou agter die skerms of jy nou gesien word of nie.
Daar waar net God sien moet voldoende wees vir die kind van die Here.
2. *Wanneer ons die Bybel ken, maar niks DOEN wat dit vra nie.*
Ons ken die regte antwoorde tydens byeenkomste, ons kan ander selfs teregwys en op hulle plek sit met ons skrifkennis, maar tuis lewe jy eintlik maar 'n dubbele lewe.
Geestelike volwassenheid is nie hoeveel jy weet nie, maar gaan eerder oor hoeveel jy gehoorsaam is aan God.
3. *Wanneer ons vinnig praat en stadig vra om verskoning en vergifnis.*
Dis die mees algemene gewoonte om maklik oor ander se foute te praat, maar jy sal nooit na hulle toe gaan en verneem hoe jy kan help nie.
'n Getroue lidmaat gebruik eerder sy woorde om op te bou,in stede daarvan om ander af te breek.
4. *Wanneer ons verdeeldheid veroorsaak*
Dis wanneer ons skinderstories aanstuur op WhatsApp, kante kies wanneer daar konflik is,party is vir Paulus ander weer vir Apollos, veral in 'n rusie, of jy vorm 'n kliek wat ander sien as 'n bedreiging en is net ons wat reg is,hulle is verkeerd,terwyl ons almal een is in Christus.
'n Geesvervulde lidmaat bewaak die eenheid van die Gemeente van God, selfs wanneer daar verskil word,want God gebied Sy seën waar daar eensgesindheid is.
5. *Wanneer ons geestelik lyk, maar geen vrug dra nie*
Ons kan elke Sondag kerk bywoon, hande ophef en aanbid en selfs "Amen" sê, maar by die huis is ons vol ongeduld, bitterheid en hardnekkigheid om te buig voor God en die Waarheid uit die Woord.
Want die "EK" kan nooit getem word nie,die "EK" moet gekruisig word saam met Christus.
God soek nie 'n mooi vertoning nie, maar Hy soek die vrug wat die Helige Gees oplewer in ons alledaagse lewens, dit wat sigbaar word in ons verhoudinge met God en mens.
6. *Wanneer ons die waarheid verdraai*
Dis wanneer ons 'n halwe waarheid vertel, 'n Bybelteksvers uit verband ruk om ons eie gedrag en optrede te regverdig, of ander met ons eie opinies wil beindruk en doelbewus wil mislei.
'n Getroue en Geesvervulde lidmaat bly eerlik en getrou, toegewy aan God en Sy Woord, selfs al kos dit hom iets,want Christus het met Sy Alles betaal.
Hierdie paar gedagtes dwing ons tot ons knieë om in gebed tot God te gaan en toe te laat dat die Heilige Gees aan ons openbaar hoe ons lyk.
Is jy daardie wolf, bely dan en vra die Here om jou te vergewe en jou te verander, jou die wedergeboorte te skenk, sodat jy van Sy egte Skape kan word.
Wees eerder 'n lam soos ons voorbeeld Jesus Christus.
Blessings Ds.Willie
