04/02/2026
PANANGMATMAT ITI KRUS
April 2, 2026
Awanen ti nakaskas-ang pay a panagsagaba iti pakasaritaan ti lubong no di ti panagsagaba ni Jesucristo iti krus. Ti panangisalaysay manen no ania ti inibturanna ket saan laeng a panangbisita manen iti nakalkaldaang a pannakapapatay na, no di ket ti panagtakder tayo a sipapakurang iti sango ti Anak ti Dios a situtulok a nangipatli ti biagna tapno maisalakan ti sangatauan manipud iti basolna. Ti krus ket saan a simbolo ti liwliwa iti umuna a siglo. Maysa dayta nga instrumento ti panagtutuok, pannakaibabain, ken in-inut nga ipapatay. Ngem kaskasdi nga inabrasa ni Jesus dayta gapu iti basolko, gapu iti basolmo, ken gapu iti basol ti intero a lubong.
Awisennatayo ti Biernes Santo nga agtakder a siuulimek iti sakaanan ti krus tapno intayo manen lagipen no ania ti inibturan ni Jesus para kadatayo. Saan laeng a basta lugar ti ipapatayna iti krus. Lugar dayta ti kinaranggas, pannakaibabain, saem, ken di mailadawan nga ayat.
Naliputan, naakusaran iti inu-ulbod ni Jesus, nauy-uyaw, nakabkabil, ken nailaksid. Nasapsaplit agingga a napirpirsay ti lasagna. Maysa a korona a siit ti naiyipit iti ulona. Tinuptupraan dagiti soldado Isuna, kinabkabilda Isuna, ken kinatkatawaanda Isuna. Daydiay immay mangisalakan iti lubong ket natratar iti kinaulpit babaen ti mismo a lubong nga ummayna subboten.
Kalpasanna, inturongda Isuna idiay Kalbario. Agsalsalungay-ngay, nasugsugatan, ken daradara, Inawitna ti krus iti sidong ti dagsen ti gura ti tao ken ti dagsen ti basol ti tao. Sadiay, naipaluk dagiti lansa kadagiti ima ken sakana, ket naipangato tapno maimatangan ti sangalubongan ti panakaibabainna. Nagbalin a panagsagaba ti tunggal kanito ken panagangesna idiay krus. Kaskasdi Nagtalinaed Isuna sadiay.
Nagtalinaed isuna iti krus saan a gapu ta awan ti gawayna, no di ket gapu iti ayatna kadatayo. Saanna laeng nga inawit ti pisikal nga ut-ot, no di pay ket ti dagsen ti basoltayo, ti panagrebeldetayo, ken ti kinamanangukomtayo. Nagtakder ti awan basolna nga Anak ti Dios iti lugar dagiti managbasol. Inibturanna ti maikari a para kadatayo tapno maawattayo ti mabalinna nga ited nga Isuna laeng ti makaited,pammakawan, asi, ken talna iti Dios.
Iti Biernes Santo, saantayo laeng a lagipen a natay ni Jesus. Lagiptayo koma no kasano a natay Isuna, situtulok, nagtutu-ok, ken nagsakripisio. Iparangarang dagiti sugatna ti kinakaro ti basol tayo, ngem ad-adda pay, saritaenda ti kinadakkel ti ayatna. Ti krus ipasimudaagna no kasano ti kinadagsen dagiti basbasoltayo, ngem kaskasdi a dakdakkel ti ayatna kadatayo, urayno saan tayo a maawatan.
Ita, saantayo koma nga agdardaras a lumabas iti Kalbario. Kitaentayo manen ti Mangisalakan a nasugsugatan gapu kadagiti kinadakestayo ken naduyok gapu kadagiti salungasingtayo. Agruknoytayo koma a sipapakumbaba, siyayaman, ken sipapakurang tayo nga agdaydayaw KENKUANA. Ta iti dayta a krus, inawit ni Jesus ti basol ti lubong, ken inawitna ti basbasoltayo. NASULIMNI A BIERNES SANTO TAY AMIN!
