14/10/2026
Liewe familie en vriende van NG Florauna,
As ek terugkyk oor die jare – veral die afgelope drie jaar waar ek die voorreg gehad het om hand aan hand as dominee saam met julle te stap – oorstroom my hart net van diep, opregte dankbaarheid. Om as diensleraar beroep te word by dié kerk waar ek al sedert 1989 tuis is, was vir my 'n ongelooflike genade en 'n groot eer.
Julle het my en Suretha met soveel liefde, aanvaarding en genade omring. Die bande wat ons hier gevorm het, sit diep in ons harte; dit is bande wat 'n leeftyd hou en nooit gebreek sal word nie. Julle is en bly vir altyd deel van ons geloofsfamilie, en ons sal elkeen van julle vir altyd koester.
Die lewe bring egter nuwe paaie, en dit is tyd vir ons om 'n bietjie nader aan Johannesburg te beweeg om ons daaglikse pendel te vergemaklik. Ons is nog in die proses om te besluit tussen twee gemeentes wat op ons pad gekom het, en ons vra nederig dat julle ons in hierdie tyd biddend sal bystaan, soos julle altyd gedoen het.
Ek is van plan om steeds voort te gaan met ons stukkies van geloof🙏🏼.
Baie, baie dankie vir elke gebed, elke glimlag en elkeen van julle se kosbare vriendskap. Mag die Here elkeen van julle ryklik seën met Sy liefde, vreugde en vrede.
In groot liefde en dankbaarheid in ons Here Jesus Christus,
Erick & Suretha 🙏🏼🤍
