NG Kerk Standerton-Wes

31/05/2026

Balanseer jou Lewenskaal ! / ?
Preekopname 31 Mei 2026
Efesiers 5:8-17

Ons leef in ’n wêreld van “maak gou”. Alles moet vinniger gebeur – van ons werk en ontspanning tot selfs ons verhouding met die Here. Hierdie gejaagde leefstyl lei dikwels tot uitbranding, moegheid, spanning en verbrokkelde verhoudings.

Paulus herinner gelowiges in Efesiërs 5 dat ons as mense van die lig anders moet leef. Ons moet voortdurend toets of dit waarmee ons besig is vir God aanneemlik is. Baie van ons probleme ontstaan omdat ons aanhou byvoeg sonder om iets weg te neem. Ons laai ons lewens voller en voller totdat die balans verlore gaan.

Die sleutel tot ’n gebalanseerde lewe lê in twee eenvoudige beginsels:

Die skaal moet balanseer – As jy iets byvoeg, moet jy iets wegneem. Balans beteken dat ons nie eindeloos verantwoordelikhede, aktiwiteite en verpligtinge opstapel nie.
Toets wat jy byvoeg – Alles wat ons tyd, energie en aandag vra, moet die toets slaag: Is dit goed, reg, waar en tot eer van God? Indien nie, is dit moontlik ’n vrugtelose praktyk wat ons net moeg maak.

Jesus self het hierdie balans uitgeleef deur gereeld tyd weg van mense te neem om te rus, te bid en by sy Vader te wees. Ook God se skeppingsorde leer ons ritme en balans: werk en rus, inspanning en ontspanning, aktiwiteit en stilte.

Die oproep van die preek is om ons lewens eerlik te evalueer. Hoe lyk jou lewenskaal? Is daar dinge wat weggevat moet word? Of is daar betekenisvolle dinge wat bygevoeg moet word? Kinders van die lig maak die beste gebruik van hulle tyd deur voortdurend te vra: “Is dit vir die Here aanneemlik?”

Wanneer ons volgens God se ritme leef, vind ons weer die balans wat Hy vir ons bedoel het.

Preekopname 31 Mei 2026Efesiers 5:8-17Ons leef in ’n wêreld van ...

24/05/2026

ONTKLOTTER #4 Weg met Ontevredenheid
Pinkster 2026
Pinksterfees Nagmaalsdiens
Skriflesing: 1 Timoteus 6

Paulus waarsku dat geld maklik ’n mens se baas kan word en selfs mense van die geloof kan wegtrek. Ware tevredenheid word nie gevind in aardse rykdom nie, maar in ’n lewe wat deur God se Gees vervul is.

Gelowiges het reeds ’n onskatbare geestelike rykdom in Christus ontvang — liefde, genade, geloof, familie, geloofsvriende en die gemeente. Hierdie seëninge het ewigheidswaarde en kan nie met geld gemeet word nie. Verder leer Paulus dat ons tevrede behoort te wees wanneer God in ons basiese behoeftes voorsien: kos, klere en onderdak.

Ware tevredenheid groei ook wanneer ons vrygewig en mededeelsaam leef. God se seëninge moet geestelike dividende lewer deurdat ons ander help en in God se koninkryk belê. Die oproep is om nie jou tevredenheid aan jou bankbalans of ander mense te meet nie, maar om jou vreugde en vrede in God se voorsiening en geestelike rykdom te vind.

Pinkster 2026Pinksterfees NagmaalsdiensSkriflesing: 1 Timoteus 6...

24/05/2026

ONTKLOTTER #3 Weg met Bekommernis
Pinkster 2026
Bekommernis is deel van die lewe, maar God wil nie hê dat ons gees moet oorheers word daardeur nie. Jesus self erken in Matteus 6 dat elke dag sy eie moeilikhede bring. Bekommernis kom spontaan, maar dit word gevaarlik wanneer ons dit “kos gee” deur voortdurend daaroor te tob totdat dit groei tot angstigheid en ons gedagtes oorneem.

Die Heilige Gees leer ons dat ons bekommernis anders moet hanteer. Volgens 1 Petrus 5:7 moet ons al ons bekommernisse op God werp, omdat Hy vir ons sorg. Die eerste geloofsbeginsel is om God as ons Versorger te vertrou. Wanneer ons aanhou bekommer, wys dit dikwels op ’n gebrek aan vertroue dat God vir ons sal sorg soos ’n liefdevolle Vader vir sy kinders sorg.

Die tweede beginsel is om bekommernis doelbewus vir God te gee. Die woord “werp” beteken om dit weg te gooi — nie stadig vas te hou nie, maar doelbewus aan God oor te gee. Gebed is die manier waarop ons dit doen. In Filippense 4 leer ons dat ons deur gebed ons bekommernisse vir God gee, en dat sy vrede dan oor ons harte en gedagtes wag hou.

Ons moet nie ons gees met bekommernis vol maak nie, maar dit deur gebed leeg maak, en in vertroue op God se sorg te leef.

Pinkster 2026Bekommernis is deel van die lewe, maar God wil nie hê dat ons gees moet oorheers word daardeur nie. Jesus self erken in Matteus 6 dat elke dag s...

24/05/2026

ONTKLOTTER #2 Weg met Vrees
PINKSTER 2026
2 Timoteus 1:7 herinner gelowiges daaraan dat God nie vir ons ’n gees van vrees gegee het nie, maar van krag, liefde en selfbeheersing. Die Heilige Gees wil ons lewens “ontklotter” deur die vrees wat ons harte en denke oorheers, weg te neem sodat daar plek kan wees vir Jesus se Gees.

Vrees is ’n werklikheid waarmee almal worstel — of dit nou vrees vir die toekoms, siekte, verwerping of dood is. Soos Timoteus deur vrees verlam geraak het, kan vrees ook ons geloof en gehoorsaamheid verswak. Paulus wys egter vir Timoteus dat vrees nie ontken moet word nie, maar in geloof gekonfronteer moet word.

Die sleutel tot oorwinning oor vrees lê daarin om te onthou wie ons is: kinders van God. Wanneer vrees ons wil oorweldig, moet ons onthou dat God groter is as enige storm of bedreiging. Die Heilige Gees vervang dan vrees met:
Krag om moed te hê,
Liefde om veilig en vasgehou te voel,
Selfbeheersing om wys en reg op te tree onder druk.

Die troosvolle waarheid is dat gelowiges nie slawe van vrees is nie, maar kinders van God wat deur Sy Gees gevul en gelei word.

PINKSTER 20262 Timoteus 1:7 herinner gelowiges daaraan dat God n...

24/05/2026

ONTKLOTTER #1 Weg met die Oue

Pinkster 2026 het begin met die tema: “Weg met die Oue”. God het ’n droom vir elke gelowige — nie net om gered te wees nie, maar om al meer soos Jesus te word. Soos ouers groot drome vir hul kinders het, droom God daarvan dat sy kinders Hom sal weerspieël in hulle woorde, optrede, denke en liefde.

Efesiërs leer dat ware geestelike verandering begin wanneer ons gees en gedagtes nuut word deur die Heilige Gees. Ons binneste raak dikwels “geklotter” / verstop met dinge soos moedeloosheid, vrees, ontevredenheid en negatiwiteit, en dit beïnvloed hoe ons leef en optree. Sonde is dikwels die simptoom van ’n gees wat vol geraas en swaar is.

Pinkster gaan daarom oor meer ruimte vir Jesus se Gees in ons lewe. Wanneer die Heilige Gees ons vul, begin Hy ons verander om meer soos Jesus te leef. God nooi ons om toe te laat dat sy Gees ons binneste leegmaak van die oue en vul met die lewe en karakter van Christus.

Pinkster 2026 begin met die tema: “Weg met die Oue”. God het ’n dr...

17/05/2026

PINKSTER 2026
ʼn Warm uitnodiging aan enigiemand en almal na NG-WES se Pinksterdienste:
Maandag 18 Mei
tot
Woensdag 20 Mei
om 18:00.
Kombersies is beskikbaar vir die koue bene.
ʼn Heerlike verskeidenheid van sop na die dienste.
Nooi gerus u vriende en familie.

Tema: "ONTKLOTTER"- Die Heilige Gees skep ruimte vir Jesus

Toegang: Kos, Klere, Komberse of Kontant, ten bate van minder bevoorregtes

Ons sluit die reeks af Sondag 24 Mei, met ʼn Nagmaaldiens om 9:30 die oggend.

14/05/2026

Geliefde gemeente

Op hierdie Hemelvaartsdag herdenk ons met dankbaarheid dat ons Here Jesus Christus opgevaar het na die hemel, nie om ons te verlaat nie, maar om as Koning te regeer, vir ons in te tree en sy Kerk deur sy Gees te lei.

Die hemelvaart van Christus beteken dat ons Verlosser leef, regeer en alle mag in die Hemel en op die Aarde ontvang het. Daarom hoef ons nie moedeloos of vreesbevange te leef nie. Ons hoop is nie vas in die onsekerhede van hierdie wêreld nie, maar in die verhoogde Christus wat aan die regterhand van die Vader sit.

"Aangesien julle saam met Christus uit die dood opgewek is, moet julle strewe na die dinge daarbo waar Christus is, waar Hy aan die regterhand van God sit."
— Kolossense 3:1

Mag hierdie dag u opnuut herinner dat ons Here nie afwesig is nie, maar teenwoordig regeer. Hy sien sy kinders raak, Hy dra sy Kerk, en Hy sal weer kom in heerlikheid.

Mag die vrede van die opgestane en verhoogde Christus met u en u huisgesin wees.

Geseënde Hemelvaartsdag.

11/05/2026

Baie Dankie aan die persone wat MOEDERSDAG so besonders gemaak het vir WES se MOEDERS 🙌🏻

Ons is bederf met julle 😇

🫶🏻

10/05/2026

Geloof van Geslag tot Geslag

Moedersdag 2026
Preekopname
2 Timoteus 1: 1-14

Die Evangelie van Jesus Christus leef deur geslagte voort. Paulus herinner Timoteus aan die “opregte geloof” van sy ouma Loïs en sy moeder Eunice — ’n geloof wat later ook in Timoteus sigbaar geword het. God bou dikwels deur gewone, getroue mense sy Koninkryk uit.

In die lig van Paastyd word die gemeente herinner dat ons geloof leef omdat Christus opgestaan het. Die opstanding beteken dat die dood oorwin is en dat gelowiges met ewige hoop kan leef. Daarom rus die diepste hoop van Christen-ouers nie in wêreldse sukses nie, maar daarin dat kinders Christus sal leer ken.

Met Pinkster wat nader, word aan die werking van die Heilige Gees herinner. Ware geloof kan nie bloot deur tradisie of opvoeding geskep word nie, slegs die Heilige Gees kan harte verander en geloof lewend maak. Gelowige ouers, grootouers en die kerk word geroep om getrou te bid, die Woord te leef en kinders na Christus toe te lei.

Die boodskap beklemtoon verder dat kinders nie net luister na wat volwassenes sê nie, maar kyk hoe hulle leef. Egte geloof, liefde, gebed en volharding laat ’n blywende geestelike erfenis. Uiteindelik wys ware Christen-liefde altyd verder as onsself; na Jesus Christus, die opgestane Here.

Die oproep is dat die gesin en die gemeente ’n plek sal wees waar geloof van hart tot hart en van geslag tot geslag oorgedra word, deur die krag van die Woord en die Heilige Gees.

Moedersdag 2026Preekopname2 Timoteus 1: 1-14Die Evangelie van Jesus Christus leef deur geslagte voort. Paulus herinner Timoteus aan die “opregte geloof” van ...