Gereformeerde Kerk Ontdekkers, h/v Philips/en Teaterstraat 11, Roodepoort (2026)

11/06/2026

Donderdag 11 Junie
Tema: NET die Heilige Gees kan my weer LEWEND maak! (Joh.3:1-8)

Luister, luister fyn as Jesus leer: As ‘n gebore sondaar nie op God se manier deur sy Gees na Jesus toe kom en Hom volg nie, kan die sondaar dit nie in eie krag doen nie. Op ons eie is en sal ons altyd dood wees vir God. Op ons eie kan ons uiters godsdienstig wees. Ons kan tot baie naby Jesus kom, maar in ons harte sal die eie EK altyd weer koning kraai. Later bevestig die apostel Paulus wat Jesus ons hier leer as hy vir die gelowiges in Korinte skryf: *“Maar 'n niegeestelike mens aanvaar nie wat van die Gees van God kom nie; vir hom is dit immers dwaasheid, en hy kan dit nie begryp nie, omdat dit slegs geestelik beoordeel kan word.”* (1Kor.2:14; vgl. 1Pet.1:23)

Net soos ons nie altyd weet waar die wind vandaan kom nie, maar tog kan sien hoe die wind bome laat waai en blare laat fladder, so werk die Gees in elke uitverkore kind van God. Net soos in die geval van Nikodemus. Lank voordat jy nog by die punt kom waar jy in aanbidding en vewondering voor Jesus neerval, het Hy al baie in jou omstandighede en in jou lewe gewerk om jou tot by daardie punt te bring… EN NET HY KAN DIT DOEN.

Soos ek reeds gesê het, kan ons met goeie rede glo dat die Heilige Gees die wedergeboorte in Nikodemus bewerk het. Presies wanneer Nikodemus tot die besef gekom het, weet ons nie, maar ná Jesus se sterwe aan die kruis, in die helder lig, vir almal om te sien, toe versorg hy die dooie liggaam van ons Here en help hy om Jesus se liggaam in die graf neer te lê. Na die kruis het dit nie meer vir hom saak gemaak wat die ander Fariseërs en kerkleiers d**k nie.

Die Waarheid waarby die Gees ons elkeen altyd sal uitbring. Die punt waar ‘n vuil bloedlyn wat vir ewig verlore moes gaan, ‘n koninklike bloedlyn word wat vir ewig saam God as sy kind en in sy koninkryk lewe … *IS DIE PLEK WAAR JESUS SE BLOED VIR ONS GEVLOEI HET… BY DIE KRUIS!*

Christus moes sterwe aan 'n kruis,
Hy moes sy bloed laat vloei.
Hemel en aarde, die heelal,
is só met God versoen. (Lb.468:6)

Ds. HJ Stoltz
Gereformeerde Kerk Ontdekkers

10/06/2026

Woensdag 10 Junie
Tema: NET die Heilige Gees kan my weer LEWEND maak! (Joh.3:1-8)

In die oorlog wat op die oomblik in die Midde-Ooste woed, hoor ons gereeld van die Israeliese geheimediensagentskap Mossad wat op ‘n uitnemende manier die vyande van Israel fnuik. Van daardie agente is al jare terug in die taal, kultuur en godsdiens van die vyand opgelei. Hulle gaan woon en werk soos normale burgers in ‘n vyandelike staat… bv. Iran. Op die oog af, is dit ‘n Moslem Iranees wat in Teheran bly, maar in werklikheid is die agent ‘n gebore Jood… sy pa en ma is ‘n Jood. Uiterlik kan jy alles aan die agent verander om die vyand te fnuik, maar na sy bloedlyn is hy ‘n Jood.

• Die waarheid is: Ons bloedlyn verbind ons aan Adam en Eva. Soos elke ander mens is ons in sonde ontvang en gebore. Nie een van ons het aandeel in ons eie fisiese geboorte gehad nie.
• Die hele gedagte van gebore word, sluit in dat dit IETS IS WAT MET JOU GEBEUR. JY IS PASSIEF. Nie een van ons kan op ons eie ons self van hierdie sonde bloedlyn losmaak nie.

OP ONS EIE kan ons drup van uiterlike godsdienstigheid. Ek kan vir almal ‘n rat voor die oë draai en voorgee dat ek ‘n Christen is, maar as my sondige bloedlyn, my kliphart, nie deur God die Heilige Gees, verwyder word, en *HY… HY aan my ‘n nuwe hart gee nie*, sal ek die koninkryk van God nie sien nie. Om ‘n opregte Jood soos Nikodemus te kon wees, moes hy ‘n suiwer Joodse bloedlyn gehad het. Om ‘n burger in die koninkryk van God te wees, moet ek ‘n suiwer bloedlyn hê wat my die reg gee om ‘n kind van God te wees.

OP ONS EIE.. net soos ek nie self kon besluit om in my moeder se skoot in te gaan nie, NET SO MIN kan ek my eie dooie vuil sondige hart só na Jesus vat sodat God nie anderste kan as om my sy kind te maak nie.

WIE BEWERK DIE WEDERGEBOORTE? Kom ons luister weer na Jesus se antwoord: *“Amen, amen, Ek sê vir jou: As iemand nie van bo gebore word nie, kan hy die koninkryk van God nie sien nie.”* Hierdie uitdrukking “Amen, amen, Ek sê vir jou… Dit verseker Ek jou” - NAV) sal jy 22 keer in die evangelie volgens Johannes kry. Dit is asof Jesus, die Seun van God wat mens geword het en onder ons kom woon het, elke keer as Hy hierdie woorde gebruik vir ons sê: *‘Ek belowe jou!’* Hoor die Goddelike gesag… Die Goddelike gewig, die Goddelike onveranderlike Rotsvastigheid as Jesus sê: *“As iemand nie* (opnuut/weer – NAV) *van bo gebore word nie, kan hy die koninkryk van God nie sien nie.”*

‘n Wonderwerk moet in die hart van die mens gebeur, en die Krag wat hierdie nuwe geboorte bewerk, is “van bo”. Nie van binne nie, nie van hier nie, maar “VAN BO”. Die mens kan dit nie self bewerk nie, dit is God die Heilige Gees ALLEEN wat hierdie werk kan doen. Hy laat dit met my gebeur.

O Heil'ge Gees, o God in ons,
ons wil u krag besing:
Die krag wat Jesus op laat staan
en lewe in ons bring.
Maak ons oorwinnaars in die stryd
wat ons ook nou moet stry.
O Gees van God, getuig in ons,
dat ons u kinders bly. (Lb.439:1)

Ds. HJ Stoltz
Gereformeerde Kerk Ontdekkers

09/06/2026

Dinsdag 9 Junie
Tema: NET die Heilige Gees kan my weer LEWEND maak! (Joh.3:1-8)

Die Heilige Gees het reeds sy eerste werk in Nikodemus begin doen en later in hierdie evangelie gaan hy eers die Fariseërs aanmoedig om Jesus regverdig te behandel (vgl Joh.7:50-51), EN na die dood van Jesus, is dit Nikodemus wat saam met die Josef van Arimatea die dooie liggaam van ons Here versorg en begrawe het (vgl. Joh.19:38-42). Dis iets wat destyds jou lewe kon kos as jy ‘n liggaam van iemand wat deur die Romeinse regering gekruisig is, sou wou begrawe. Die eerste winde van die Heilige Gees het reeds deur die hart van Nikodemus begin waai. Daarom as hy nog uit vrees dat sy eie mense hom sal vervolg in die nag by Jesus opdaag, voel ‘n mens dit aan dat hy Jesus met ‘n … heilige respek behandel… as hy Hom aanspreek as *“Rabbi, ons weet dat u ‘n leermeester is wat van God gekom het, want niemand kan hierdie tekens verrig wat u verrig as God nie met hom is nie.”*

Nikodemus ag Jesus hoog as ‘n leermeester, dalk ‘n profeet. Hy kon tog nie stry teen die wondertekens wat hy met sy eie oë gesien het nie. God moet in deur Jesus werk. TOG IS DAAR IETS WAT NOG KORT BY NIKODEMUS. Hy noem Jesus nog net “Rabbi”, maar nog nie “My Here en my God” nie (vgl.20:28)

Dis die groot ellende waarin godsdienstigheid so baie mense in dompel. GELOOF IN JESUS CHRISTUS ALLEEN is net nooit genoeg nie. Godsdienstiges hou van Jesus. Hy is nodig, maar so ook…
… EK wat my hart vir Hom gee en op hierdie dag en datum gedoop is;
… Ek wat lidmaat van die kerk is en nooit ‘n maand mis om my dankoffer te gee nie;
… Ek wat gebaadjie en gedas hou by al uiterlike kerklike tradisies soos 100 jaar terug.

Dit is en sal altyd die probleem van uiterlike godsdienstigheid wees. Dit kan my so naby aan Jesus bring, en tog so vêr, *met die eie ek in die middel.* D**k maar aan die ryk jongman in Markus 10. Godsdienstig was hy uitnemend. Hy kom tot by Jesus, maar toe die opdrag kom: *“En jy, kom hier, volg My”* (Mrk.10:21), het hy bedroef van Jesus af weggegaan.

Vir elkeen van ons sal dit altyd so wees. *Op my eie sal ek altyd die EIE EK kies. Op my eie sal my hart altyd dood wees vir Jesus* (vgl.Ef.2:1-3) DAAROM MOET ONS WEER GEBORE WORD?

Wat geskep is deur u hande -
dit was heilig, rein en goed;
maar die sonde bring die skande,
bring die seer in ons gemoed.
Ons verstand is swak en klein,
ook ons strewe is onrein.
Ons is, Heer, in skuld gebore -
sonder U is ons verlore. (Lb.231:2)

Ds. HJ Stoltz
Gereformeerde Kerk Ontdekkers

08/06/2026

Maandag 8 Junie
Tema: NET die Heilige Gees kan my weer LEWEND maak! (Joh.3:1-8)

Een van die eienskappe van die evangelie volgens Johannes, is dat die apostel Johannes net vir Jesus aan die praat wil kry. Gedryf deur die Heilige Gees wil die apostel dat ons moet IN luister, dat ons ook by die voete van Jesus moet sit en FYN luister, NA WAT HY LEER. Elke woord, komma en punt wat Jesus sê en leer, dra Goddelike gewig. Kom ons gaan sit in… kom ons luister fyn na Jesus, die volmaakte Leermeester, wat in gesprek met Nikodemus… “dié leermeester van Israel” is… Want as jy fyn luister en oplet, sal jy agterkom dat hierdie is verseker een van die belangrikste gesprek wat Jesus ook met jou het …

Hoe gereeld hoor ons nie die opmerking: *Ek* is ‘n wedergebore Christen; *Ek* het op daardie dag of datum my hart vir Jesus gegee; *Ek* is toe weer gedoop… In ‘n Amerika het dit byna ‘n gewilde ding onder die sogenaamde ‘celebrities’ geword om dit skierlik op sosiale media uit te blaker dat ek ‘n ‘born again Christian’ is, dat ek gedoop is, maar dat ek voortgaan om te veg vir LGBTQ regte, of om aan te gaan met my werk as aktrise in pornografiese films…

Dat gelowiges “weer gebore” moet word, is iets wat al die apostels leer en hulle praat maar net vir Jesus na. (vgl. Tit.3:5; 1Pet.1:23; Jak.1:18; 1 Joh.3:9; 4:7; 5:1, 4, 18). Want ons het reeds saam gelees hoe Jesus ons leer dat dit iets is wat met elke gelowige moet gebeur anderste sal jy NIE die koninkryk van God sien nie. Dit is dus van ewig lewende belang dat ons mooi moet luister en verstaan wat Jesus ons hier oor die wedergeboorte leer.

In die gedeelte waarna ons geluister het, IS JESUS IN ‘N MIDDERNAG GESPREK MET NIKODEMUS
In v.1 het ons gehoor dat Nikodemus, *”uit die geledere van die Fariseërs… ‘n leier van die Jode”*, in die nag na Jesus toe gekom het. Jesus sê ook later in die gesprek dat hy *“dié leermeester van Israel”* is.
Nikodemus is letterlik op die kruin van sy lewe: Hy is ‘n gerespekteerde leier by wie die leiers van die volk advies kom vra; Die kerkleiers kom kry by hom meer insig in die OT… die Bybel van destyds; Meer mag en status kon geen Jood in sy tyd in Jerusalem gehad het nie… hy het letterlik alles in die lewe bereik.

Tog is daar ‘n leemte in sy hart, wat net Jesus kan vul! Dis die skooonheid van hierdie gebeure waarna ons geluister het. Jesus leer ons van die wedergeboorte, terwyl dit wat Jesus leer, in die praktyk besig is om in die hart van Nikodemus te gebeur. (Meer hieroor in die week wat kom)

Halleluja, ons loof U, Heer;
U, Gees, daal uit die hemel neer,
maak onder mense woning.
U wil ons troos en leer en lei,
reeds hier op aarde voorberei;
gereedmaak vir ons Koning. (Lb.449:3)

Ds. HJ Stoltz
Gereformeerde Kerk Ontdekkers

05/06/2026

Vrydag 5 Junie
TEMA: Ware verootmoediging bring my uit by God! (Joël 2)

By monde van die profeet Joël belowe God aan sy kinders: Dat Hy hulle vyande uit hulle midde sal verwyder (2:18-20); Dat Hy hulle landerye en oeste weer sal herstel (2:21-27). Deur die geskiedenis was daar tye waar God hierdie beloftes vir sy kinders laat waar word het, maar daar het ook weer slegte tye gekom waar God hulle weer na Hom toe wou terugbring. In hierdie bedeling voor Jesus se terugkoms sal God altyd ons omstandighede gebruik om ons na Hom toe terug te bring.

Hy is by vêrre meer besorg oor ons harte en dat ons by ons ewige bestemming saal aankom, as wat Hy nou vir ons hemel op aarde wil gee. Juis daarom maak Hy in v.28 ook die belofte: *“NÁ HIERDIE DINGE SAL EK MY GEES UITSTORT OP ALLE MENSE”* As God vir sy kinders ‘n vaste hoop gee, belowe Hy aan hulle dat Hy sy Heilige Gees “op alle mense” gaan uitstort. In die hele OT stort God elke keer sy Gees net uit in ‘n individu, ‘n leier soos Moses, ‘n Rigter soos Simson, ‘n Profeet soos Samuel, of ‘n koning soos Dawid, of ‘n profeet soos Joël. Die mens se sondige hart kon nooit ‘n woonplek vir die Heilige Gees gewees het nie. Tog gee God hier vir hulle hoop. ‘n Vaste hoop dat daar ‘n tyd gaan kom waar Hy deur sy Gees in *“alle mense”* gaan kom woon. Hoe kon God so ‘n belofte maak? Het Hy dan nie self deur die geskiedenis geleer dat ons harte is net te bedrieglik en heeltemal te ongeneeslik nie?

As God ons na Hom toe roep op grond van WIE HY IS, roep Hy ons na Christus toe. Hy is *“die beeld van die onsigbare God… want God het dit goedgevind om met die hele volheid”* van wie Hy is… sy GESED liefde, in Hom te woon. God doen dit VIR EEN REDE: *“om deur Hom alles, ja, alles op aarde en in die hemel, met Homself te versoen, deurdat Hy vrede gebring het deur sy bloed aan die kruis.”* (Kol.1:15-20)

Ware verootmoediging…
… hoop en bid in die eerste plek nie dat daardie slegte ou of daardie moeilike omstandigheid moet verander nie;
… hoop en bid dat God my hart so deur sy Heilige Gees sal vernuwe dat ek elke dag meer en meer al my hoop, al my geloof en liefde op Christus sal fokus. In Hom alleen is al my geloof en vertroue. Want aan die kruis het Hy het my reeds met sy belofte van ewige liefde en trou omvou.

Deur al die eeue fokus God daarop dat sy kind tot bekering moet kom en dat sy kind Hom met sy hele hart sal liefhê. En Hy sal alles doen, Hy sal sy kerk, ‘n denominasie soos die GKSA, selfs sy kind in die ellendigste omstandighede dompel om ons te laat omdraai na Hom toe. In Christus vul Hy deur sy Gees ons harte met ‘n geloof, ‘n hoop en ‘n liefde wat net op Hom gerig is, soveel so dat ons met alles in ons kan uitsien na die dag van ons Here, na die dag wat Hy op die wolke gaan kom om ons na Hom toe te neem EN waar Hy met al God se vyande gaan afreken.

Deur sy Woord en Gees, kom God ook VANDAG na elkeen van ons en Hy skud ons wakker… Hy stroop ons van alle skynheiligheid en hoop in valse dinge as Hy vir elkeen van ons sê: *“Skeur julle harte, en nie julle klere nie, draai om na die Here julle God…”* As ons vandag sy roepstem hoor, laat ons nie huiwer nie, *WANT in Christus is God*…
…ons genadig en net in Hom kan ons uitsien na die dag wat ons Here weer terugkom wanneer ons vir ewig by Hom gaan wees;
…ons barmhartig en gee Hy ons elke dag oneindig meer as wat ons verdien. Deel hiervan is ons goue skat van belydensskrifte en eeue oue tradisisie van Skrif lees en Skrif verstaan;
…so geduldig met ons sonde gebrokenheid, sodat ons vandag, elke dag na Hom toe gaan met die bede: *“Wees my genadig, o God, volgens u troue liefde; wis my oortredings uit volgens u groot ontferming.”* (Ps.51:3)

Laat wie U soek, o God, my hulp in nood,
met almal wat u heil ervaar
in sielsangs en in doodsgevaar,
nou sing en sê: "Die HEER alleen is groot!"
Al is ek arm, ellendig,
Hy d**k aan my bestendig.
Hy is die HEER by wie
daar redding is vir my.
U 's tot my hulp naby.
My God, vertoef tog nie! (Ps.40:8)

Ds. HJ Stoltz
Gereformeerde Kerk Ontdekkers

04/06/2026

Donderdag 4 Junie
TEMA: Ware verootmoediging bring my uit by God! (Joël 2)

As ek in die nood is, of as ek bang en benoud is, kan ek na baie dinge toe draai vir hulp; ek kan hoop dat mense en hulle gesindhede moet verander; ek kan hoop en bid dat my omstandighede moet verander, SODAT ek geluk in my hart kan hê. God Almagtig weet dat deur die eeue was en is en sal daar altyd goeie en slegte tye wees. Maar Hy weet ook dat sy kind net waarlik vrede sal ken, dat ek net waarlik gelukkig sal wees as ek met my hele hart na Hom toe draai, *na Wie Hy Is… “GENADIG EN BARMHARTIG, GEDULDIG EN OORVLOEDIG IN TROUE LIEFDE”*

God het Homself so vir die eerste keer aan Moses en Israel bekendgemaak net nadat hulle ‘n goue kalf gemaak het en dit in die plek van die ware God aanbid het (Eks.32-34). Deur die hele OT as God sy kinders na Hom toe terugroep, gee Hy byna elke keer hierdie bekendmaking van Homself as die rede hoekom hulle moet terugkom. God wil dat ons met ons hele hart na HOM toe moet terugdraai.

Om met my hele hart na God toe te draai, beteken nie NET dat ek van die sonde in my lewe gaan wegdraai nie, maar ek gaan dit ook haat, verafsku. In my hart gaan daar ‘n diepe berou wees dat ek ooit kon glo dat sonde vir my mooi beloftes kon inhou. Want dit is ‘n leuen waarmee die duiwel ons oor en oor mee uitvang. Onbekeerde sonde kan NET een pad stap, die pad van God se oordeel, die ewige dood. Ek kan nooit met my hele hart na God toe draai, terwyl ek vrede maak met die sonde in my lewe nie, of terwyl ek met ‘n lang lys van goeie verskonings doelbewus daarmee voortgaan nie. Agter elke sonde sit ‘n skynheilige liefde, sit ‘n valse geloof, sit ‘n valse hoop wat my van die ware God vervreem.

Om na God toe te draai, beteken ook nie om ‘n nuwe ooreenkoms met God aan te gaan nie. Ware verootmoediging beteken om by God op te daag met ‘n leë hart, met bedelaarshande, en te vra: ‘Wie is ek Here, dat U u aandag vestig op ‘n ellendige sondaar soos ek?’ (vgl. 2 Sam.9:8)

Om dan van God te hoor: My hart is al lankal ook op jou gefokus, want…
…In my groot *GENADE* gee ek jou NIE wat jy verdien nie. In plaas van ewig verlore wees, gee Ek aan jou die ewige lewe;
…In my groot *BARMHARTIGHEID* gee Ek jou oneindig baie wat jy ook nie verdien nie. Elke dag versorg ek jou en lei jou in al jou weë op so ‘n manier dat ons vir ewig saam kan wees;
…Met jou sonde gebrokenheid is ek so *GEDULDIG*, want ek ken jou by die naam, jy is MYNE. Van voor die skepping af het ek jou al lief en ek sal aan jou getrou bly tot in ewigheid… NIKS kan my liefde vir jou ongedaan maak nie, maak nie saak wat nie.

Ek pleit, o HEER, op u barmhartigheid.
Bly met u liefde en trou om my,
want ramp en onheil is naby
en om my heen. En in my hart is stryd.
Die sonde uit ver verlede
oorval my matte skrede;
my oog het g***s nòg gloed.
Hoe groot 's my sondes al!
hoe eind'loos in getal!
In my 's geen krag, geen moed. (Ps.40:6)

Ds. HJ Stoltz
Gereformeerde Kerk Ontdekkers

03/06/2026

Woensdag 3 Junie
TEMA: Ware verootmoediging bring my uit by God! (Joël 2)

Ware verootmoediging begin altyd in my eie hart! God gebruik ook ons goeie en slegte omstandighede om tot ÓNS harte deur te dring. Daarom praat God deur sy Woord en Gees met elkeen van ons persoonlik as Hy beveel: *“SKEUR JULLE HARTE, EN NIE JULLE KLERE NIE, draai om na die Here julle God; want Hy is genadig en barmhartig, geduldig en oorvloedig in troue liefde, Hy het berou oor die onheil wat Hy bring.”*

God se kinders het geweet waar is die fout. Hulle moes besef het dat hulle hul verbondsverhouding met God versaak het. Daarom beleef hulle terugslag op terugslag. Die ontberinge – sprinkane, mislukte oeste, bedreiging deur die nasies – is immers dinge wat uitgespel is as strawwe van die verbond (Deut. 28). Dit weet hulle goed.

Soos iemand wat in moeilike tye ontvlugting van sy probleme soek in drank (vgl.1:5), het God se kinders hulle hoop op valse gode, vreemde konings en in die verandering van hulle omstandighede gestel. Hulle hoop was op leuens, op alles en nog wat, behalwe in die God wat Homself met belofte van ewige liefde en trou aan hulle verbind het. Om geheel en al, met hulle harte weer net God in sy innige verbondsverhouding op te soek en om daar hulle geloof, hoop en liefde, net op Hom te rig, was om een of ander rede vir God se kinders net te moeilik. Hulle het geweet dit is nodig en daarom het hulle voortgegaan met ‘n hartelose godsdienstigheid.

God gebruik hulle uiters slegte omstandighede om sy kinders na HOM toe terug te roep. Let fyn op, God gee nie vir sy kinders ‘n “sondelysie” wat hulle eers moet gaan regstel nie. *Al wat hulle moet doen is om met hulle harte na Hom toe terug te kom, op grond van WIE HY IS.* Dan sal God self met die sonde in hulle harte deel. God wil dat sy kinders met hulle harte NA HOM toe moes terugkom, *“want Hy is genadig en barmhartig, geduldig en oorvloedig in troue liefde, Hy het berou oor die onheil wat Hy bring.”* (v.13) Hier kom ons weer by daardie baie belangrike woord in die OT uit, naamlik die woord GESED (Onthou julle 2 weke terug met Mefiboset aan Dawid se tafel – 2 Sam.9).

Die hart van hul wat U bely,
sal in u Naam standvastig bly.
Dié wat U soek in stil vertroue,
is by U veilig en behoue.

O oordeel vol geheimenis,
wat meld dat God regverdig is!
Hoe raak verstrik in eie nette
wie geen ontsag het vir Gods wette! (Ps.9:7+12)

Ds. HJ Stoltz
Gereformeerde Kerk Ontdekkers

01/06/2026

https://youtu.be/mmcIdo2QxEo

01/06/2026

Maandag 1 Junie
TEMA: Ware verootmoediging bring my uit by God! (Joël 2)

Die spanning in die GKSA oor die rol van die vrou in die amp (VIDA);
Die krisis van stygende lewenskostes as gevolg van die oorlog in die Midde-Ooste; EN
Die ellende waarin die volgehoue korrupsie en misdaad in ons regering en in ons regstelsel ons in dompel;
Het ons kerkverband daartoe gebring om vandag as ‘n dag van verootmoediging uit te roep.

As God bymonde van die profeet Joël ons ook vanoggend ALMAL bymekaar roep met die woorde: *“Roep die volk byeen, heilig die geloofsgemeenskap, versamel die oudstes, maak die kinders bymekaar, ook die suigelinge. Laat die bruidegom uit sy kamer kom, die bruid uit haar bruidskamer.”* (v.16), ja, as God oud en jonk ALMAL bymekaar roep, sou ons as ons in die tyd van Joël gelewe het, ALMAL vanoggend *opgedaag het met…*:
… vuil sakkerige klere (sackcloths) om ons lywe gedraai wat ons lywe gekrap en gekasty het, EN waarvan veral die gedeelte voor ons harte oop geskeur is. Dit sou ‘n sigbare teken wees dat ons harte stukkend is;
… as op ons koppe, en hier voor die preekstoel sou ons ook in as kom sit het om te wys ons is maar net stof en op ons eie keer ons maar net terug tot stof;
… ‘n gehuil en terwyl ons op ons knieë buig en klaagliedere oor hoe ellendig dit met ons gaan, hard gesing het.

Verootmoediging in die tyd van Joël was sigbaar, dit was luidrugtig, dit was vir almal om te sien. Die groot probleem egter was, dat so baie van God se kinders het hartelooos deur al die uiterlike rituële gegaan en as die tyd van verootmoediging verby was, het hulle maar net weer aangegaan asof niks gebeur het nie. Verootmoediging voor God, ook vanoggend in Ontdekkers… kan so maklik ook maar net NOG ‘n stukkie skynheilige godsdienstigheid wees.

Vandaar die profeet se oproep: *“Skeur julle harte, en nie julle klere nie, draai om na die Here julle God; want Hy is genadig en barmhartig, geduldig en oorvloedig in troue liefde, Hy het berou oor die onheil wat Hy bring….. Skeur julle harte…”* Meer hieroor in die week wat kom.

Vir ewig staan u trou,
dis sonder wankeling.
U liefdesdade, Heer,
sal ek altyd besing;
u trou verkondig ek
vir komende geslagte.
U hou u eed, o Heer,
met Dawid in gedagte;
U het dit self gesê:
Vir ewig sal dit vasstaan,
ook vir die nageslag
sal dit bly geld en voortgaan. (Ps.89-2:1)

Ds. HJ Stoltz
Gereformeerde Kerk Ontdekkers

29/05/2026

Vrydag 29 Mei
TEMA: God se liefde is die dryfkrag agter my dankbaarheid. (Rom.12:1-2; 9-21)

Dankoffers aan God, beteken om lief te hê. In eie krag is dit onmoontlik. Deur die krag van God se Gees, is dit moontlik! Want waar die Gees werk, laat Hy my nuut d**k, nuut kyk en doen. Daar kan God se kind doelbewuste besluite neem om in die lig van die Bybel lief te hê. Besluite wat soms teen my natuur ingaan, ander kere druis dit teen my vurige persoonlikheid in, ander kere storm my besluit lynreg teen die hele wêreld in, MAAR ek weet dat dit... die God wat alles vir my opgeoffer het... dat dit sy hart blymaak.

God se volmaakte liefde vir jou... wat ons verlede week aan die Koning se tafel kon oord**k... waar bring dit jou vanmôre? Waarheen gaan dit jou heen lei in die dae... die weke... die maande wat kom? Gaan jou hart sagter word... jou oë meer vol deernis... jou woorde meer vol liefde maak ... omdat jy besef ... hoe groot God se genade oor jou is.

Of is die prys wat God vra… my hart… is dit nog te veel gevra, omdat ek nog nie werklik besef watter prys God vir my aan die kruis betaal het nie? Of sukkel ek om omdat ek te veel in eie krag probeer om ‘n godsdientige lewe te lei? ‘n Godsdienstige lewe wat presies weet wat reg en verkeerd is... maar vir God en sy grenslose liefde... ken ek nie.

Biddend, deur die krag van die Gees kan Christus se liefde soos ‘n vrug in my hart groei. Hy stort die liefde van Christus in my hart uit sodat ek nie net gewillig kan wees nie, maar ook bekwaam kan wees om God se liefde uit te leef. Dan eers doen ek wat vir God *“goed en aanneemlik en volmaak is.”*. En as die Gees my kan vernuwe, kan Hy dit ook met my vyand doen.

Deur die geloof vat God ons vandag terug na Christus die gekruisigde... die Hoogtepunt van God se ontfermde genade. Deur sy Woord en Gees verseker Hy ons van sy alles gee liefde vir elkeen van ons. Die rede? God se liefdesoffer vir my moet die dryfkrag word agter my liefdesoffer vir Hom.

God vra nie my goed nie, nie eers die beste van my goed nie. Hy vra my hart... my alles. Die vraag is net: Is EK bereid om dit met ‘n volle oorgawe vir God te offer? Of is daar nog te veel dinge wat my terug hou.

Ons Koning by wie se tafel ons verlede week kon aansit, doen ‘n ernstige beroep op elkeen van ons: *“op grond van die barmhartigheid van God roep ek julle dus nou op om julle liggame beskikbaar te stel as 'n offer wat lewend en heilig is, en vir God aanneemlik.”*

Neem my lewe, laat dit, Heer,
U gewy wees meer en meer.
Laat my hart gedurig juig
en van dankbaarheid getuig.

Neem my hande, maak hul sterk
diensbaar in u goeie werk.
Neem my voete, skoei hul, Heer,
met bereidheid tot u eer. (Lb. 308:1+2)

Ds. HJ Stoltz
Gereformeerde Kerk Ontdekkers

Gereformeerde Kerk Ontdekkers

11/06/2026

10/06/2026

09/06/2026

08/06/2026

05/06/2026

04/06/2026

03/06/2026

01/06/2026

01/06/2026

29/05/2026

Address

Telephone

Website

Alerts

Contact The Place Of Worship

Shortcuts

Share

Category