Gereformeerde Kerk Ontdekkers

Gereformeerde Kerk Ontdekkers Die Gereformeerde Kerk Ontdekkers is geleë op die H/v Phillips str en Teater straat 11 in Florida-Park, Roodepoort IS JY N WAPENDREAR? Is jy n wapendraer?

Oggenddiens is om 9:30 en Aanddiens om 18:00
Almal is welkom ! Die Gereformeerde Kerk Ontdekkers is geleë op die H/v Phillips str en Teater straat 11 in Florida-Park, Roodepoort.

09/09/2026

Woensdag 9 September
TEMA: Wees nie onsteld nie, die beste kom nog! (Joh.14:1-6)

As Jesus vir sy dissipels sê: *“Laat jou hart nie onsteld word nie”*,vat Hy hulle en ons aandag van alle wêreldse omstandighede, enige moontlike situasie of mag wat ons moontlik kan onstel af weg en Hy vestig dit op God met die woorde: *“glo in God, glo ook in My.”* Jesus praat van God die Vader en van Homself in dieselfde asem. Dis iets wat ons vanaf die eerste verse in die evangelie volgens Johannes kry. In al die “Ek is” uitsprake in dié evangelie, asook in al Jesus se lering in die evangelie volgens Johannes, leer Jesus ons dat Hy doen net wat Hy God sien doen (5:19; 7:16-18; 12:49) Vir wat Jesus verder gaan sê, is dit belangrik dat ons moet GLO, IN DIE GOD WAT HOM IN CHRISTUS DEUR SY WOORD EN GEES AAN ONS BEKENDMAAK. (vgl. Joh. 17:21).

Toe ons kinders was en in die huise van ons ouers gebly het, kon jy nie maatjies vir ‘n naweek oorgenooi het, sonder om jou ouers in die saak te ken nie. Jy moes jou ouers geken het in die saak. God die Vader, God die Seun en die Gees moet ook EEN wees oor wie in die Vaderhuis mag woon en wie nie. Enige onsteltenis kan net verdwyn, of word draaglik, as die Gees my hart oorweldig met die Waarheid oor wie God die Vader is en wie die Seun, Jesus Christus waarlik is. Dis altyd die oogmerk van die Heilige Gees.

Hy’t die hele Bybel laat opskryf sodat ons die VADER kan leer ken vir wie Hy waarlik is. Ook dat ons die SEUN kan leer ken as die Gestuurde Verlosser wat van God kom, dat Hy ten volle God is en dat Hy deur sy kruisiging en opstanding ALLES uit die weg uit geruim het sodat ek met vrymoedigheid na die Vaderhuis toe kan gaan. Die Gees wil nie dat ons die geringste twyfel in ons harte moet hê nie. Daarom, as Jesus sê: *“glo in God, glo ook in My.”*, dwing dit ons harte om ‘n besluit te maak... oor wie God is en wie Jesus is. Sonder hierdie geloof in ons harte, is dit onmoontlik om uit te sien na dit wat God in Christus aan ons belowe (vgl. Heb.11:6).

Die Heilige Gees het reeds baie gedoen en Hy gaan nie ophou om nog soveel meer in ons harte te doen sodat ons met ‘n kinderlike geloof in God… kan antwoord: EK GLO!

Enigste Here, enkele Wese,
ons glo in U met ons hele hart.
Heerlik bely ons, vry-uit getuig ons:
U is vir ewig God en Heer.

U, onbegryplik, U is onsienlik,
altyd dieselfde, oneindig groot.
U is almagtig, wys en regverdig,
U is die bron van alle goed.

Ons eer U, Vader, U is vol liefde;
Ons eer U, Jesus, ons Heiland, Heer;
Ons eer U, Heil`ge Gees, U maak ons lewe nuut;
Drie-enig God, aan U ons eer! (Sb.12-3:1-3)

Ds. HJ Stoltz
Gereformeerde Kerk Ontdekkers

08/09/2026

Dinsdag 8 September
TEMA: Wees nie onsteld nie, die beste kom nog! (Joh.14:1-6)

Dié woorde van Jesus… *“LAAT julle hart nie ontsteld word nie; glo in God, glo ook in My.”*... bring ons uit by die aand voor sy kruisiging waar Jesus en sy binnekring dissipels saam die Pasga gevier het, maar ook waar Jesus die eerste nagmaal ingestel het. Elkeen van hierdie dissipels het ongeveer drie jaar vantevore, toe Jesus met sy amptelike bediening begin het, alles wat hulle in hulle lewens gedoen het, net so gelos en vir Jesus begin volg. Die wondertekens wat Jesus gedoen het en die woorde waarmee Hy hulle geleer het, het hulle só vas laat glo dat Jesus die lang verwagte Messias is. Soos enige ander opregte Jood het hulle die sterk verwagting gehad dat Jesus weer die koninkryk van Dawid gaan oprig en dat Hy weer van die Jode ‘n sterk nasie gaan maak, EN… waar hulle as belangrike amptenare aan sy linkerhand en regterhand gaan sit en saam met Hom regeer (vgl.Mat.20:21-23; Mrk.10:37-40)

Daardie aand, toe hulle aangeleun het om te eet, het Jesus hulle voete gewas en hulle beveel om hom hierin na te volg; Waarna Jesus die eerste bom gebars het deur te sê dat een van hulle gaan Hom verraai waarop Hy dan ook vir Judas Iskariot uitgewys en hy die nag ingevlug het; Asof hierdie gebeurtenis nie genoeg onsteltenis onder Jesus se dissipels bewerk het nie, gaan Jesus verder. Hy bars nog ‘n bom as Hy vir sy dissipels sê dat Hy weggaan en dat hulle nie saam met Hom kan kom nie (13:33); Dit was nie die laaste bom nie. Nadat Jesus hulle baie duidelik die opdrag gegee het om mekaar lief te hê, waarsku Hy vir Petrus, een van die binnekring drie, dat die haan dieselfde nag nog nie sal kraai voordat Petrus Hom drie keer verloon het nie; Wat ons ook nie moet vergeet nie, is dat Jesus voorheen alreeds drie maal vir sy dissipels dit baie duidelik gestel het dat Hy na Jerusalem moet gaan om daar deur die priesterhoofde en volksleiers doodgemaak te word (Mat.16:21; 17:22-23; 20:17-19).

Stel jou vir ‘n oomblik in Petrus of enige ander dissipel se skoene. Vir drie jaar volg hulle vir Jesus. Hulle het alles agtergelaat, hulle het soms saam met Jesus honger geword en hulle was baie in gevaarlike omstandighede soos wat die vyandskap van die kerk- en volksleiers teen Jesus begin opbou het. Hulle het soveel verwagtinge gehad en in wat ‘n besonderse Pasgaviering moes wees, word ‘n aand waarin al hulle drome en verwagtinge plat geslaan word…

Dis terwyl Jesus die verontwaardiging, die vrees, die onsteltenis, dalk ook woede, in al elf se gesigte sien, wat Hy sê: *“LAAT JULLE HART NIE ONSTELD WORD NIE”* Of anders gestel: Moet nie dat die gebeure van die oomblik, julle harte intimmideer en oorweldig nie.

Wat is daar NOU in jou hart en gedagtes wat jou onstel? Wat bewerk NOU verkeerde emosies, of seer gevoelens op hierdie oomblik in jou hart? Wie of wat steel die vrede wat ons in Christus het, NOU van jou? Deur sy Woord lei die Gees ons ook om by Jesus te kom sit. Ongeag al die dinge wat jou dalk NOU mag onstel, vertroos en bemoedig die Gees ons met Jesus se eie woorde: *“Laat jou hart nie onsteld word nie”*

Hoe groot is, HEER, u seënstrome
vir wie opreg van gees
wil wandel in u vrees!
Hoe groot die vreugde van die vrome,
as almal klaar bemerk het
die heil wat U bewerk het. (Ps.31:15)

Ds. HJ Stoltz
Gereformeerde Kerk Ontdekkers

07/09/2026

Maandag 7 September
TEMA: Wees nie onsteld nie, die beste kom nog! (Joh.14:1-6)

Hoe ouer ek raak, hoe meer nostalgies raak ek oor die goeie ou dae wat was. Buiten dat ek soms wonder wat van die tyd geword het, kom die vraag wat Bok van Blerk in sy liedjie ‘Was” vra, ook soms in my eie hart op. As jy vandag al jou jongmens drome en verwagting in gedagte sou hou… drome van ‘n beroep, ‘n huweliksmaat, kinders, kleinkinders, finansies… ja, as jy al dié dinge in ag neem EN waar jy jouself op *hiérdie dag en datum* bevind: ‘IS DIT TOE NOU WAAR JY WIL WEES?’

Hoe het alles vir jou uitgewerk? As iemand nou jou lewensverhaal vir jou sou voorlees, sal jy met ‘n tevrede glimlag daarna kan luister? Of aan ons jongmense kan ons vra: Wat is joú hoogste drome? Hoe hoop en bid jy moet jou lewensverhaal eendag klink? Kan jy vandag saam met Dawid sing: *“Die meetsnoere het vir my in lieflike plekke geval, ja, my erfenis is vir my mooi.”* (Ps.16:6)?

Of het die lewe sy eie loop geneem, soveel so dat dit wat in jou hart opkom eerder beskryf word met woorde soos... baie seer, telleurstelling, selfs bitterheid, jy raak sommer onsteld as jy aan sekere waarhede in jou lewe dink...! Br/sr… soos jy nou daar sit: Is alles toe nou soos wat jy gehoop en gebid het dit moet uitwerk… of is daar ‘n onsteltenis in jou hart?

As Jesus, die aand net voor sy kruisiging agterkom dat sy dissipels erg onsteld is, sê Hy vir húlle… die Gees het dit vir ons deur die apostel Johannes laat neerpen, sodat Jesus dit ook vir elkeen van ons sê: *“LAAT julle hart nie ontsteld word nie; glo in God, glo ook in My.”* (v.1)

My hart, ontroer deur mymering,
sal lieflik van 'n Koning sing.
My tong, deur digvuur aangedryf,
is soos 'n pen wat vaardig skryf.

U 's skoon! Geen skoon wat daarby haal.
Bevalligheid van trek en taal
is oor u lippe uitgestort -
U wat deur God geseën word. (Ps.45:1+2)

Ds. HJ Stoltz
Gereformeerde Kerk Ontdekkers

04/09/2026

Vrydag 4 Maart
TEMA: Die reënboog is en sal altyd die simbool van God se genade wees! (Gen.8:18-9:18)

Elke keer as ons ‘n reënboog sien, of as ons iewers reënboog kleure sien wat deur mense vir hulle eie doeleindes misbruik word, ONTHOU DAT DIE REËNBOOG AAN GOD BEHOORT. Raak stil in jou hart met ‘n diepe ontsag voor die lewende God. Die God wie ons in Christus en deur sy Gees kan ken en liefhê.

Besef dat elke asemteug wat ek gee, dat ek kan leef en werk, dat ek kan liefhê en liefde van mense kan ontvang, NET moontlik is omdat God op grond van sy belofte my genadig is. Alles wat ons is en het, is genade. Besef dat elke dier op land, lug en see, ook die ongelowige kan net eet, leef en lewe, op grond van God se belofte van genade aan Noag.

…Laat die reënboog jou ook weer daaraan herinner dat God ons hier geplaas het om die lewe met alles in ons te beskerm. Daarom is God se kinders besorg oor die skepping, dat mens en dier volhoubaar kan lewe;
…Getrou aan God se Woord, verkondig en handhaaf ons God se instellings van die huwelik, sy voorskrifte oor die seksuele, oor geslagte, want ek kan die lewe in oorvloed net geniet as volgens God se manier lewe;
Vol hoop kan ons voortbeur, want elke keer as ons ‘n reënboog sien, ontmoet ons oë en God se oë mekaar. In ons harte word die hoop net sterker en sterker en sien ons uit na die dag wanneer ons Verlosser en Koning weer op die wolke kom.

Elke REËNBOOG is God se teken van GENADE… LEWE en HOOP. Moet nie toelaat dat dit jou aan enige iets anders laat dink nie.

Die hemel loof, o HEER, u wonderbare mag;
die eng'le prys u trou en waarheid dag en nag.
Want in die hemel is daar niemand U gelyk nie;
geen seraf wat voor U die vleuel nie moet stryk nie.
U's groteliks gedug en eind'loos in vermoë,
u onverbreekb're trou omring U voor hul oë. (Ps.89:3)

Ds. HJ Stoltz
Gereformeerde Kerk Ontdekkers

03/09/2026

Donderdag 3 September
TEMA: Die reënboog is en sal altyd die simbool van God se genade wees! (Gen.8:18-9:18)

God sê:*“MY BOOG PLAAS EK IN DIE WOLKE”*. God praat nie van ‘‘n boog’ of ‘die boog’ nie, maar *“MY BOOG”*. As ek en jy ‘n reënboog sien, kan ons elke keer met ontsag dit uitroep… *‘DIT IS GOD SE REËNBOOG’*. Dit behoort aan geen mens of organisasie of groep… veral nie as hulle nie ontsag vir God het nie. God gee sy reënboog vir ons as teken dat Hy uit die dood uit lewe aan ‘n nietige mens kan skenk. Dink maar hoe Noag en sy gesin vir meer as ‘n jaar soos in ‘n yslike groot doodskis op die water aan die lewe gehou is, en hoe God hulle ‘n nuwe lewe geskenk het toe hulle uit die ark gekom het.

‘n Reënboog ontstaan gewoonlik na ‘n storm as die donker wolke iewers opklaar en oopmaak. Dit laat ‘n sonstraal iewers deurbreek. Dis die helder lig wat die prisma effek veroorsaak en dan sien ons al die kleure van die God se reënboog. Vir die hele skepping is dit ‘n teken van God se algemene genade. Dat Hy mens en dier uit die dood gered het en weer aan ons die lewe gee… Uit die storm red God… dis lewe uit die dood. Sien julle ook die skaduwee van die kruis?

Vir God is dit ‘n herinneringsteken. Dit laat Hom onthou om sy almag in te perk sodat Hy die sondige mens regoor die aarde genadig kan wees; sodat Hy vir mens en dier lewensasem kan gee; sodat sy groot plan van verlossing in Christus sy loop kan neem; sodat sy Gees elke uitvekore kind van Hom tot geloof in Christus kan bring; Sodat elke gelowige soos uit die dood, weer vir God kan lewe, net op grond van Christus se bloedoffer aan die kruis; sodat as al die die uitverkorenes tot geloof gekom, Christus kan terugkom om God se finale oordeel tot uitvoer te bring.

Die reënboog moet ONS ook daaraan herinner dat God eenmaal sy oordeel uitgevoer het. As Hy belowe dat Jesus weer terug gaan kom om al sy kinders na Hom te neem en om diengene wat Christus verwerp het, vir ewig te veroordeel, moet ons dit ter harte neem.

Van goedertierenheid sal ek vir ewig sing,
en aan u trou, o HEER, altyd my hulde bring;
want soos 'n tempel wat op vaste grond verrys het,
so rys die eewge guns wat U aan ons bewys het;
en soos die hemelboog nooit uit sy stand sal wyk nie,
so seker sal u trou nooit wankel of beswyk nie. (Ps.89:1)

Ds. HJ Stoltz
Gereformeerde Kerk Ontdekkers

02/09/2026

Woensdag 2 September
TEMA: Die reënboog is en sal altyd die simbool van God se genade wees! (Gen.8:18-9:18)

Let fyn op dat God se genadeverbond, waarvan die reënboog die teken is, dat dit ‘n belofte aan ALLE mense en diere is. Kry die agtergrond oor hierdie gedeelte ook in jou kop reg:
…God het so pas sy oordeel oor die hele aarde voltrek;
…Net Noag, sy gesin en die diere wat in die ark is, het hierdie oordeel oorleef en stap uit op droëgrond;
…Noag bring brandoffers aan God EN nou moet hy en sy seuns aangaan.
…As God vir Noag en sy seuns in hfst.9 seën, hulle toekoms vir hulle uitlê, hulle duidelik vertel wat hulle nou te doen staan, beveel Hy: ““Wees vrugbaar, vermeerder en vul die aarde.”* (9:1).
… Met ander woorde: Noag, Sem, Gam en Jafet, SPRING AAN DIE WERK! Laat die geskiedenis sy loop neem! Die mens moet voortgaan om as rentmeesters die hele skepping te bewerk, ook al die diere, voëls en die visse in die see, die hele skepping gee God oor in die hande van die mens (v.3).

En dan… UITERS BELANGRIK… lê God die belangrikste etiese beginsel waaraan alle etiese besluite van die mens aan moet voldoen: DIE LEWE VAN DIE MENS AS BEELDDRAER VAN GOD MOET MET ALLES IN ONS BESKERM WORD! As ‘n dier ‘n mens doodmaak, sal God dit van die dier eis; As ‘n mens ‘n mens doodmaak, gaan God die lewe van die mens van hom eis.

Die tragiese waarheid is dat die mens voor die vloed en die mens na die vloed “deur en deur sleg voor God” (Gen.6:11) is en dat ons die waarheid van God en sy duidelik bevel… beskerm die lewe van elke mens as beeldraer van God… dat ons sonder ophou die Waarheid van God onderdruk, en dat ons met goddeloosheid en verkeerde dade NIE die lewe van die mens beskerm nie (Rom.1:18).

…Vanaf die sondeval is ons elkeen daartoe geneig om God se Waarheid… sy duidelike voorskrifte in die Bybel teen te staan. Die hele skepping sug onder die vernietigende hand van die mens en ons swak bestuur van die skepping bring voedselsekerheid in gedrang vir baie;
…In ons denke het ons so sinloos geword en in ons harte so donker (Rom.1:21), dat die geslag wat God vir elke mens bepaal het, dat die seksuele en die huwelik wat God geskep het en dit met duidelike riglyne vir ons as mens gegee het, deur ons onderdruk word, omgekeer word asof ons die eerste en laaste sê oor hierdie dinge het;
…Daagliks word duisende babatjies doodgemaak agv. aborsie;
…Die ergste van alles is, dat die kleure van die reënboog as simbool gebruik word vir die mens wat God se duidelike voorskrifte onderdruk.

God moes geweet het dat daar in Noag se hart ‘n erge stryd moes gewees het: God het so pas die hele skepping deur ‘n vloed veroordeel en vernietig omdat die mens sleg is. Nou gee God vir Noag en sy seuns opdrag om voort te gaan, vrugbaar te wees, die aarde te bestuur en te bewerk. Hulle nageslag gaan net so sleg wees soos diegene voor die vloed. HOE MOES NOAG WEET DAT GOD NIE WEER OP ‘N DAG GAAN KOM EN ALLES VERNIETIG NIE?

Daarom sluit God ‘n verbond … Hy maak ‘n belofte aan die mens wat Hy sal nakom, ongeag wat die mens se optrede gaan wees. Hierdie verbond ontspring in God se hart vol liefde en dit laat Hom genadig wees teenoor mens en dier.

HEER, waar U my hoog laat word het,
maar in toorn my neergestort het,
is ek soos 'n plant wat kwyn,
en my dae - skaduskyn.
Maar U, HEER, U is onendig,
u gedagt'nis bly bestendig;
mensgeslagte gaan verby,
maar u roem sal ewig bly. (Ps.102:5)

Ds. HJ Stoltz
Gereformeerde Kerk Ontdekkers

01/09/2026

Dinsdag 1 September
TEMA: Die reënboog is en sal altyd die simbool van God se genade wees! (Gen.8:18-9:18)

Die oomblik toe Noag voet op droë grond gesit het en al die diere uit die ark is en hulle gang gegaan het, het hy ‘n altaar gebou waarop hy BLOEDOFFERS vir God gebring het. God se reaksie op hierdie brandoffers van Noag, word beskryf met: *“Die Here het die geurige offer geruik, en die Here het IN SY HART gesê: “Ek sal nooit weer die grond vervloek vanweë die mens nie, alhoewel die mens se hart van sy jeug af neig na wat boos is. Ek sal nooit weer alles wat lewe tref, soos Ek gedoen het nie.”* God en sy hartsbesluit as Hy die reuk van BRANDOFFERS ruik… loop altyd maar altyd uit op genade op genade op genade...

Deur die geskiedenis sou Abraham, Jakob, Moses al die geloofshelde in die OT God nog met bloedoffers opsoek, en hulle sou nog oorweldig word met God se liefde en genade. Daar is niks wat God se hart van liefde en genade so oop en toeganklik maak vir die mens as ‘n BLOEDOFFER nie. Al die bloedoffers van die OT wys heen na God wat net betrokke is met sy skepping, met sy kinders, op grond van die volmaakte bloedoffer van Jesus aan die kruis. As ons Gen.8-9 mooi lees, en weer lees, en weer fyn kyk, sien jy die skaduwee van ‘n kruis…

Want as die bloedoffers van Noag die Heilige God wat so pas sy oordeel afgehandel het, se hart so kan bedaar dat sy liefde en genade kan oorvat, dan kan Hy met die mens wie se hart net boos is voortgaan. DINK NET…wat het in God se Vaderhart gebeur na Jesus se volmaakte bloedoffer aan die kruis? Nadat Jesus die volle woede van God oor ons sondes aan die kruis deurstaan het en uitgeroep het: “Dit is volbring” (Joh.19:30)? Hoeveel genade en liefde moes dit nie in God se Vaderhart opgewek het nie?

Noag bring brandoffers voor God, en God gaan aan OM IN SY GROOT GENADE ‘N GENADEVERBOND MET DIE HELE AARDE TE SLUIT. Die geskiedenis moes voortgaan want God was op pad na die kruis… God kon net in genade met ‘n gebroke mensdom voortgaan met die kruis reeds in die oog!

Hy het gedink aan sy genade,
sy trou aan Isr'el nooit gekrenk;
dit slaan die wêreldeindes gade
nou onse God sy heil ons skenk.
Juig voor die HEER met blye galme,
o ganse aarde, juig van vreug!
Meld vrolik in verhewe psalme:
dit is Gods heil wat ons verheug. (Ps.98:2)

Ds. HJ Stoltz
Gereformeerde Kerk Ontdekkers

31/08/2026

Maandag 31 Augustus
TEMA: Die reënboog is en sal altyd die simbool van God se genade wees!

‘n Ruk gelede het ek in ‘n predikante samekoms my misnoë daaroor uitgespreek dat die LGBTQ+ beweging die reënboog vir hulle agenda opgeslurp het. Een van my kollegas het my onmiddelik aangemoedig om, in plaas daarvan om onsteld te wees, elke geleentheid eerder te gebruik om met iemand oor die Waarheid van die reënboog te praat. Wat onmiddelik die vraag by my laat opkom het: MAAR WAT IS DIE WAARHEID OOR DIE REËNBOOG?

Die reënboog behoort aan God EN dit sal altyd die teken van God se genade oor alle mense en diere wees. Ons praat van God se algemene genade wat die son oor gelowig en ongelowig laat skyn; wat die oeste van gelowig en ongelowig seën; wat Hom oor mens en dier ontferm ongeag wie of waar jy is.

Waar net Noag en sy gesin in Gen.6:8 deur God begenadig is en God hom die ark laat bou het, sy vrou en kinders en al die dier spesies daardeur gered het, kom God ná die vloed, nadat Hy alles met sy heilige oordeel van die aarde af vernietig het, en Hy gaan voort met die geskiedenis… is Hy op pad na die kruis… deur sy algemene genade aan die hele aarde te belowe. Sonder hierdie genade, kon die geskiedenis voor die Heilige God nie voortgaan nie.

DIE GEBEURE IN GENESIS 8 EN 9 bring ons uit by die oomblik toe Noag vir die eerste keer in meer as ‘n jaar (371 dae) voet op droëgrond plaas. Van uiterste belang is om te onthou hoekom Noag, sy gesin en al die diere in die ark was. Die rede word in Gen.6:11-12 beskryf met: *“Die aarde was deur en deur sleg voor God; die aarde was vol geweld. God het gekyk na die aarde, en kyk, dit was deur en deur sleg; want alle mense het 'n verderflike pad geloop op die aarde.”* Waarop God besluit dat Hy ‘n einde aan alles gemaak, behalwe Noag en sy gesin is deur God begenadig (Gen.6:8)

Kry die REGTE prentjie in jou gedagtes. Die vloedverhaal gaan nie oor wat so baie Bybelboekies vir kinders leer oor ‘n klomp gelukkige diertjies op ‘n bootjie nie. Dit gaan oor die Heilige God wat die onheiligheid van die mens nie meer kan verduur nie en daarom mens en dier met sy volle oordeel geheel en al van die aarde af spoel. Die EERSTE Waarheid wat ons vir mekaar moet sê as ons die reënboog sien, of wanneer sy kleure elders verkeerdelik gebruik word, is dat die Heilige God nie huiwer om die sondaar te veroordeel nie. As ons ‘n reënboog sien, moet dit ‘n diepe ontsag vir die lewende God in ons aanwakker, die God wat Homself in Christus en deur sy Woord en Gees aan ons bekendmaak.

U goedheid, HEER, is hemelhoog;
u waarheid tot die wolkeboog;
u reg sal nooit begewe,
maar staan soos berge, vas van voet;
u oordeel is 'n diepe vloed;
U sorg vir al wat lewe.
Hoe kost'lik is u guns, o God!
Hoe vlug die mensekinders tot
u vleuels vir beskerming!
Hul smaak die vette van u huis;
U laaf hul uit 'n stroom wat bruis
uit dieptes van ontferming. (Ps.36:2)

Ds. HJ Stoltz
Gereformeerde Kerk Ontdekkers

Address

H/v Philips/en Teaterstraat 11
Roodepoort
1711

Telephone

+27116723810

Website

Alerts

Be the first to know and let us send you an email when Gereformeerde Kerk Ontdekkers posts news and promotions. Your email address will not be used for any other purpose, and you can unsubscribe at any time.

Contact The Place Of Worship

Send a message to Gereformeerde Kerk Ontdekkers:

Shortcuts

Share

Category