Henry Pike

Henry Pike •Believer•Husband•Father•Pastor• Worshiper •Radio Presenter•Column Writer

30/05/2026

Ons voordeel in Christus, is nie net 'n beter lewe hier nie, maar die sekerheid van die toekoms. Ons is burgers van 'n ander koninkryk. Die dood is nie die einde nie, maar die begin van die werklike lewe. Dit verander jou prioriteite en jou perspektief op aardse verliese."Want ons weet dat as ons aardse tentwoning afgebreek word, ons 'n gebou van God het, 'n huis nie met hande gemaak nie, ewig in die hemele." (2 Korintiërs 5:1). Dit bevry ons van die liefde van materialisme en vrees vir die dood. Onthou ook dat ons aardse lewe net voorbereiding is vir die onverganklike heerlikheid wat wag.

29/05/2026

Die grootste vraag van die mensdom is "Waarom ly ek?" Die wêreld sê lyding is sinloos. Die gelowige weet dat God se voorsienigheid oor alles regeer. Selfs in ons pyn werk God aan 'n groter plan. Niks is toevallig nie. "En ons weet dat vir dié wat God liefhet, alles ten goede meewerk..." (Romeine 8:28).Onwrikbare hoop beteken jy kan in die middel van 'n storm staan, met die wete dat jou Vader aan die stuur is. God se soewereiniteit is die troos van elke gelowige.

28/05/2026

Die wêreld is besig met "inligting," maar die gelowige het "openbaring." Deur die Woord en die Gees het ons 'n lens waardeur ons die werklikheid verstaan. Ons hoef nie in 'n waas van moralistiese verwarring te leef nie. Ons het die “mind of Christ” deur die Skrif. "Maar die Gees van die waarheid... sal julle in die hele waarheid lei." (Johannes 16:13). Vrede in 'n verwarde wêreld. Jy het 'n vaste anker in die Woord van God. Die Bybel is nie 'n opsie nie, maar ons enigste gids vir die lewe.

27/05/2026

Voor bekering was ons slawe van sonde. Die voordeel van 'n Christen wees is nie net dat ons vergewe is nie, maar dat ons bevry is. Die Heilige Gees werk in ons om ons wil te verander, sodat ons begin liefkry wat God lief het."Want dit is God wat in julle werk om te wil sowel as om te werk na sy welbehae." (Filippense 2:13). Sonde verloor sy monster greep op ons. Jy groei in die vermoë om God werklik te gehoorsaam. Heiligmaking is nie menslike poging nie, maar die werking van die Gees wat ons na Christus se beeld verander.

26/05/2026

In die wêreld is jy dalk 'n werknemer, 'n nommer of 'n statistiek. In Christus is jy 'n kind. Die God van die heelal, is nou jou Vader. Dit beteken dat jou lyding en uitdagings nie sonder betekenis is nie, dit is die tugtiging van 'n liefdevolle Vader wat jou vorm. "Want julle het nie 'n gees van slawerny ontvang om weer te vrees nie, maar julle het die Gees van aanneming tot kinders ontvang..." (Romeine 8:15). Jy het vrymoedigheid by die troon van genade. Jy is nooit alleen nie. God se grootste doel is om Homself te verheerlik en dit gebeur wanneer ons ware geluk, liefde, aanvaarding en veiligheid in Hom vind as ons Vader.

25/05/2026

Baie godsdienste bied 'n pad na God toe deur prestasie, maar die Christendom begin by die voltooide werk van Christus. As 'n gelowige is jou posisie voor God nie gegrond op jou wisselvallige prestasie nie, maar op Christus se volmaakte geregtigheid wat aan jou toegereken is. "Want Hy het Hom wat geen sonde geken het nie, sonde vir ons gemaak, sodat ons geregtigheid van God in Hom kan word." (2 Korintiërs 5:21). Jy leef nie meer vir aanvaarding nie, maar uit aanvaarding. Dit is die einde van godsdienstige angs want die Evangelie is nie "doen dit nie", maar "dit is reeds gedoen."

23/05/2026

Om die Woord te "behou" (Openbaring 3:10) in ’n wêreld wat Jesus verloën, is menslik onmoontlik. As jy probeer om heilig te lewe uit eie wilskrag, gaan jy óf moeg word óf wetties word. Geesvervuldheid skuif jou van "probeer" na "vertrou." Dit stel jou in staat om Jesus as Soewereine Here te dien, nie omdat jy moet nie, maar omdat die Gees ’n "beter Liefde" in jou hart uitgestort het. Dit gee jou die krag om te bly staan wanneer die res van die wêreld (selfs kerke) voor die kultuur buig.

22/05/2026

Die Heilige Gees word die "Gees van die Waarheid" genoem. Wanneer jy Geesvervuld is, "ruik" jy die kompromie lank voordat dit jou gedrag beïnvloed. Dit gee jou die vermoë om te onderskei tussen ware genade wat vrymaak en die valse genade wat sonde regverdig.

21/05/2026

Die mense waaroor Judas 1:4 waarsku, is "goddeloos" omdat hulle die fokus van God na die "self" verskuif. Hulle gebruik die kerk om hul eie begeertes te bevorder. Vandag sien ons dit in leringe wat sê God bestaan bloot om jou drome waar te maak, mense ryk te maak ens. Het jy geweet dat gierigheid homself kan weg steek agter die woord “visie”? As ek die woord leer, konfronteer dit die motiewe van my hart, openbaar my tekortkominge, dit herbelyn my toewyding aan God, openbaar Sy groot genade en liefde en as ek uit die kerk stap beleef ek Sy teenwoordigheid in my lewe.

20/05/2026

Om Jesus te verloën (deny) beteken nie noodwendig om te sê Hy bestaan nie. In die konteks van Judas beteken dit om Sy Soewereiniteit te verloën. Jy verloën Hom wanneer jy Sy Naam bely, maar weier dat Hy die laaste sê oor jou finansies, jou huwelik, jou seksualiteit, jou waardes, of jou karakter. Om Hom te verloën is om Hom as "Verlosser" te wil he (vir die hemel), maar Hom as "Heer" te verwerp (vir die aarde). Jy kan nie Jesus as jou Redder hê as Hy nie jou Heerser ook is nie. As jy die Een is wat die reëls van jou lewe maak, is jy besig om Hom te verloën.

Address

Bellville

Opening Hours

Monday 09:00 - 16:00
Sunday 08:00 - 12:00

Website

Alerts

Be the first to know and let us send you an email when Henry Pike posts news and promotions. Your email address will not be used for any other purpose, and you can unsubscribe at any time.

Shortcuts

Share

Category