19/08/2026
MAQAA ABBAA KAN ILMAA KAN AFUURA QULQULLUU WAAQA TOKKO AMEEN!
“Biftisaas Fuula Isaanii Duratti Ni Jijjiirame. Fuulli Isaas Akka Biiftuu Ife. Uffanni Isaas Akka Ifaatti Addaate” Maat.17:2
TV Sagalee Dhugaa: Hagayya 13,2018 B.A.
TULLUU TAABOR (DABRA TAABOR)
Tulluu Taabor (Dabra Taabor) jechuun Gooftaan keenya Iyyasuus Kiristoos Wangeela Maatewoos 17:1-13 irratti:- Yaa’iiqoob, Yohaannisiifi Pheexiroosiin fudhatee gara Tulluu Taaboritti erga isaan geessee booda, achitti Ifa Waaqummaasaa kan itti mul’ise, akkasumas Museefi Eeliyaasiin waamee Waaqa warra jiraatotaafi warra du’anii ta’uusaa kan itti mul’ise, ayyaanota gurguddoo Gooftaa keenyaa Iyyasuus Kiristoos saglan keessaa tokkodha. Mana Kiristaanaa keenyattis sirnoota gara garaa raawwachuudhaan nikabajama.
Ayyaana Dabre Taabor irratti sirnoota amantiifi aadaa dhalootaa irraa dhalootatti darbu keessaa, kanneen akka:-Buheefi Qaccee Iyyisiisuu; Guca bobeessuufi Daabboon maal jechuu akka ta’eefi maal akka agarsiisan haa ilaallu.
Buhee jechuun ifa calaqqisaa jechuudha. Akka hiika maqaa isaarraa hubannutti, ayyaanni kun guyyaa Gooftaan keenya Ifa Waaqummaasaa itti mul’ise waan ta’eef, maqaan Buhee jedhu kan ifaafi calaqqisa jedhun hiikaama.
Dabalataanis, Buhee jechuun yeroo Bonaafi Gannaa gidduu ce’umsa ta’ee, dukkanni Gannaa darbee yeroo ifni Birraa itti dhufu, samiinis duumessaafi dukkanarraa gara ifaatti jijjiiramu waan ta’eef, Buhee yookaan Ifa jedhameera.
Seenaa Daabboo qopheessuu, guyyaa Gooftaan keenya Ifa Waaqummaasaa itti mul’ise, naannoo Tulluu Taaboritti tiksoonni Ifa Gooftaa keenyarraa ka’ee guyyaan waan hin dukkanoofne isaanitti fakkaatee, Gooftaan keenya naannoo sanaa hanga Tulluu Armooniyeemitti ifaan guutee waan tureef, looniifi hoolota isaanii tiksaa achuma turan.
Maatiin isaanii yeroon darbee dhi’uusaa yeroo arganii, Guca Ifu qabatanii ijoollee isaanii bira dhaqan; akkasumas daabboo isaan nyaatan qabatanii akka isaan bira dhaqan kan lallabudha. Kanaaf, nutis fakkeenyota kana yaadachaa ayyaana kana kabajna.
Akkasumas, ijoolleen akka Duuka Bu’ootaa ta’anii:- oduu gammachiisaa nutti himuuf, Wangeela nutti lallabuuf, balbala keenya irra dhufanii “Faaruu” ni faarfatu, daabboo isaan nyaatan ni kennamaaf. Kunis bu’uura Kitaaba Qulqulluu qaba. Gooftaan keenya bartootasaa, “Mana kamiyyuu yeroo galtan, waan isiniif dhiyaatu nyaadhaa” jedhee isaan barsiiseera (Maat.10:12).
Kanaaf, yeroo ijoolleen ayyaana Gooftaa labsuuf dhufan daabboo kennuun aadaa qofa osoo hintaane, hiika Afuuraafi bu’uura kitaaba qulqulluu qaba. Ijoolleen kunis fakkeenya bartoota Gooftaati. Faaruun isaan faarfatan immoo fakkeenya Wangeela oduu gammachiisaati. Akkuma Duuka Bu’oonni biyya seenan hundatti barsiisanii, cuuphan; ijoollee faarfatanii, galata galchu.
BOBEESSUU
Gucni: Ifa Waaqummaa Gooftaa keenyaa kan agarsiisudha. Gooftaan keenya Tulluu Taabor irratti Waaqummaasaa yeroo mul’isutti, ifni naannoo sana guutee ture. Kana yaadachuufis yeroo galgalaa’utti guca qabsiifnee, Waaqa keenya galateeffanna.
Ayyaana Tulluu Taabor irratti qaccee fo’anii sagaleesaa dhageessisuun:-
Tokkoffaa: Yeroo sagalee Qaccee sana dhageenyu, dhugaa ba’umsa Abbaa waa’ee Ilmasaa dubbatedha. Kana malees, yeroo Gooftaan keenya ulfinasaa mul’isetti sagalee akka bakakkaafi qaqqaweessi guddaa dhaga’ame sana nu yaadachiisa. Lammaffaa: Gooftaan keenya guyyaa Jimaataa reebicha, gidiraafi dhiphina isarra ga’e akka yaadannu nutaasisa.
Walumaagalatti
Ayyaanni Tulluu Taabor: barumsa icciitiifi hiika afuuraa akkasii qabu kun, dhalootarraa dhalootatti aadaafi amantaa keessatti daddarbaa dhufe har’a ga’eera. Nutis aadaafi amantaa kana osoo hindhiisin dhaloota itti aanuuf dabarsuun nurra jira.
Eebbi Ayyaana Tulluu Taabor hunda keenya waliin haata’u!
Galannii Waaqayyoof haata’u! Ameen!
