29/07/2026
Alleentyd met God
Genesis 32:24 Jakob het alleen daar agtergebly, en 'n man het tot dagbreek met hom gestoei.
Matteus 14:23 Nadat Hy (Jesus) die mense weggestuur het, het Hy alleen na die berg toe gegaan om te bid. Toe dit aand word, was Hy daar alleen.
Psalm 131:2-3 Ek het rus en kalmte gevind. Soos 'n kindjie wat by sy moeder tevredenheid gevind het, so het ek tevredenheid gevind. Wag op die Here, Israel, nou en vir altyd.
Alleentyd saam met God:
Dit is nie dringend nie, dit kan nie in rand en sent bereken word nie, dit kom nie voor op jou CV nie.
Dit is die plek waar jy, geborge in Sy arms, opnuut bewus raak van wat regtig belangrik is. Dit is daar waar jy weer die hartklop van die Vader duidelik hoor, die fluistering van die Gees fyner onderskei, waar die Woord in jou verstand, hart en lewe kom lê. Dit is daar waar die gedwarrel van die lewe weer tot rus kom en die gebeure in perspektief kom.
Daar, in jou alleentyd met God, verdof dit wat mense oor jou sê. Dit is vanuit jou alleentyd met God dat omstandighede dalk nog jou léwe kan indring, maar nie jou hárt nie. Dit is daar waar die dringendheid om te moet verstaan oorweldig word deur die geborgenheid in die arms van die Vader.
Alleentyd met God is nie iets wat jy moet doen nie, dit is iets wat jy nie kan bekostig om te mis nie. Dit is nie net die kompas tyd vir jou hart, vir jou denke en jou lewe nie, ... dit is “waar jy behoort”.
Klaagliedere 3:22-23 deur die liefde van die Here het ons nie vergaan nie; daar is geen einde aan sy ontferming nie, dit is ELKE MôRE nuut.
