Paarl-Vallei Gemeente - NGK

14/06/2026

Ingenooi tot gasvryheid – aan engele, die Here sélf...

10/06/2026

Die jaarlikse 𝐖𝐢𝐧𝐭𝐞𝐫𝐤𝐥𝐚𝐧𝐤𝐞-konsert het op 5 en 6 Junie weer bewys hoeveel talent, toewyding en gemeenskapsgees binne die gemeente skuil. Die konsert, wat vanjaar vir die vyfde agtereenvolgende jaar aangebied is, het ontstaan as ’n fondsinsamelingsinisiatief vir die gemeente en het oor die jare gegroei tot ’n geliefde hoogtepunt op die gemeentekalender.

Wat Winterklanke besonders maak, is dat dit grootliks deur die gemeente se eie lidmate aangebied word. Onder leiding van musikale regisseur Laurinda Hofmeyr het sangers, instrumentaliste, die manskwartet en talle ander betrokkenes hul tyd en talente beskikbaar gestel om van die geleentheid ’n sukses te maak.

Die konsert is meer as net ’n fondsinsameling. Dit is ’n geleentheid waar gemeentelede saamwerk, mekaar ondersteun en iets van hulself met die breër gemeenskap deel. Van die voorbereiding agter die skerms tot die optredes op die verhoog, getuig Winterklanke van die bereidwilligheid van mense om hul gawes in diens van die gemeente te gebruik.

Die gehoor is bederf met optredes deur die Sunset-kwartet, die gemeente se manskwartet onder leiding van Christelle Hamman, asook verskeie sangers, instrumentaliste en gaskunstenaars. Tog was dit veral die gevoel van samehorigheid en die sigbare betrokkenheid van soveel gemeentelede wat die aand besonders gemaak het.

Die gemeente spreek sy opregte dank uit teenoor die borge, Mediclinic en In And Out Events, asook Haudio vir die professionele tegniese versorging van die produksie. Dank word ook uitgespreek teenoor almal wat bygedra het deur skenkings vir die veiling beskikbaar te stel, en sodoende gehelp het om die fondsinsamelingsdoelwitte van die geleentheid te ondersteun.

Met vyf jaar van Winterklanke agter die rug, het die konsert ’n mooi tradisie geword wat nie net fondse insamel nie, maar ook die sterk bande, diensbaarheid en samewerking binne die Paarl-vallei Gemeente vier.

10/06/2026

Dit was vir die Paarl-vallei Gemeente ’n voorreg om op Vrydag 29 Mei gasheer te wees vir 𝐍𝐚𝐭𝐚𝐧𝐢𝐞̈𝐥 𝐢𝐧 𝐊𝐨𝐧𝐬𝐞𝐫𝐭.

Met Charl du Plessis op klavier het Nataniël die gehoor vermaak met sy kenmerkende humor, stories en musiek, en die kerkgebou gevul met warmte en waardering vir die kunste.

Dankie aan Paarl Arts Hub, Nataniël en almal wat hierdie besonderse aand moontlik gemaak en bygewoon het.

07/06/2026