Gereformeerde Kerk Krugersdorp

07/06/2026

Tema: Die Bybel – Klein Profete: Hosea, Joël, Amos en Obadja
Hosea, Joël, Amos en Obadja verkondig almal God se oordeel én genade. Hosea beeld Israel se ontrouheid uit deur sy huwelik met Gomer, maar wys dat God sy volk steeds liefhet en sal herstel. Joël beskryf die “Dag van die Here” as oordeel en oproep tot ware bekering, met die belofte van God se Gees en ’n herstelde skepping. Amos fokus op sosiale onreg, huigelary en afgodery in Israel, en waarsku oor komende oordeel, maar eindig met hoop op die herstel van Dawid se koninkryk. Obadja veroordeel Edom se hoogmoed en verraad teen Israel, maar wys ook dat God se koninkryk uiteindelik oor alle nasies sal strek. Saam wys hierdie profete dat God geregtigheid bring, maar ook genadig herstel en ’n nuwe toekoms skep vir sy volk en die wêreld.

07/06/2026

OGGENDDIENS SONDAG 7 JUNIE – Prof Herrie van Rooy
Wanneer praat ons die waarheid oor God, ook wanneer ons in ons eie lewe met ernstige probleme worstel? Job laat ons hieroor nadink. Hy het immers op God vertrou, en kyk wat het nie alles met hom gebeur nie – hy het amper alles verloor. In die inleiding tot die boek kom die verhaal aan die orde. Daarna volg drie rondtes gesprekke tussen Job en sy drie vriende. Daarna kom ʼn vierde vriend aan die woord. Hierna kom God aan die woord en antwoord Hy Job. Job het algaande al hoe driftiger gepraat – en al hoe harder dinge teen God gesê. Job het nooit insig gehad oor die dinge waarvan die inleiding praat nie, die gesprekke tussen God en die satan. God sê Job se vriende het nie die waarheid oor God gepraat nie. Hulle oplossing was eenvoudig: Job het gesondig en God straf hom. Hy moet sy sonde bely, en dan sal alles regkom. Job het dit nie aanvaar nie, en al hoe harder selfs teen God uitgevaar. Die vriende se eenvoudige antwoord was verkeerd. Job het egter daarmee volhard om met God te praat. Hy het met God geworstel – en God sê Job se worsteling was in ʼn sekere sin reg. Hy het die verkeerde vrae gevra, maar God het die man agter die vrae geantwoord. Dit was die antwoord wat Job nodig gehad het – en daarmee was hy tevrede. Ons kan steeds met ons vrae en worsteling na God toe gaan – en weet dat Hy die antwoorde gee op grond van wat Jesus Christus vir ons gedoen het.

03/06/2026

So 'n paar hoogetepunte van ons 130-jaar feesnaweek

31/05/2026

Die skakel hier gee toegang tot die Musiekkonsert wat Vrydagaand 29 Mei 2029 in die Kerk plaasgevind het.

Musiekkonsert tydens die 130 jarige vieringe van die Gereformeerde Kerk Krugersdorp Geskiedenis-video aan einde van Video met beelde tydens die inwyding van ...

31/05/2026

NAGMAAL SONDAG 31 MEI – Dr De Wet Saaiman
Skrifgedeeltes: Esegiël 42:1- 43:12
Teksverse: Esegiël 43:4-5, 7a
Tema: Nagmaal (1): In God se teenwoordigheid is daar vir ons ’n nuwe en blywende toekoms!
God se heerlikheid het hierdie gemeente deur 130 jaar gedra en wek vandag steeds dankbaarheid, heiligheid en hoop in Christus. As gemeente kyk ons terug en sien hoe die HERE getrou gebly het deur geslagte heen, selfs in tye van verlies en beproewing. Soos in Esegiël 43 sien ons hoe God se teenwoordigheid weer sy volk vul met sy heerlikheid en lewe gee aan sy kerk. Die Nagmaal herinner ons aan Christus se offer, roep ons tot selfondersoek en lei ons tot ’n lewe van gehoorsaamheid en toewyding. God se teenwoordigheid vorm ons as gemeente in die hede en rig ons oë op die ewige toekoms wat Hy in Christus belowe. Daarom leef ons met dankbaarheid en verwagting, terwyl die Woord en sakrament ons roep om heilig te leef en Christus sigbaar te weerspieël in die wêreld. In die Woordverkondiging let ons op God se teenwoordigheid. In God se teenwoordigheid:
a) ONTDEK ons weer Sy trou,
b) word ons GEROEP tot heiligheid; en
c) ONTVANG ons ewige hoop deur Christus.


NABETRAGTINGSDIENS – Dr De Wet Saaiman
Skrifgedeelte: Esegiël 42:1- 43:12
Teksvers: Esegiël 43:5a
Tema: Nabetragting (2): Die heerlikheid van die HERE verander ons!
God se heerlikheid staan sentraal in die gemeente se 130 jaar van genade. Ons is as gemeente diep bewus daarvan dat die HERE deur geslagte heen getrou bly en sy volk dra. Die begrip van sy heerlikheid (kavod JAHWE en Doxa Deo) wek dankbaarheid, eerbied en verwondering in Christus se offer, wat weer opnuut sigbaar word in die Nagmaal. Soos Jesaja en Esegiël reageer gelowiges met heilige ontsag, nederigheid en selfondersoek wanneer God se teenwoordigheid naby kom. Hierdie heerlikheid bring nie net bekering nie, maar vorm ook ’n lewe van gehoorsaamheid en dankbare diens, waarin gelowiges al meer die beeld van Christus weerspieël deur die werking van die Gees. In die nabetragting let ons op die heerlikeid van God wat ons verander en bring ons:
a) tot dankbare EERBIED en AANBIDDING
b) tot dankbare NEDERIGHEID en BEKERING; en
tot ’n danbare lewe wat Hom VERHEERLIK.

28/05/2026

Die ontstaan van Krugersdorp gemeente (Video deel van 100 jarige bestaan video) - nou vier ons 130 jaar bestaan deur die Genade van God!

24/05/2026

BYBELSKOOL SONDAG 24 MEI – Dr De Wet Saaiman
Tema: Die Bybel - Profete: Esegiël en Daniël
Die boeke Esegiël en Daniël speel af tydens Israel se Babiloniese ballingskap en wys hoe God steeds in beheer bly te midde van oordeel en lyding. Esegiël fokus op God se heerlikheid, Israel se sonde en die hoop op herstel. Hy waarsku dat Jerusalem en die tempel vernietig sal word, maar verkondig ook dat God nuwe harte en sy Gees aan sy volk sal gee. Sy visioene van die droë bene en die nuwe tempel beklemtoon herstel en nuwe lewe. Daniël vertel van Daniël en sy vriende wat getrou aan God bly in Babilon. Deur drome en visioene openbaar God dat aardse koninkryke tydelik is, maar dat sy ewige koninkryk uiteindelik sal oorwin. Beide boeke bring ’n boodskap van hoop en volharding.