NG Kerk Gordonsbaai

06/09/2026

https://youtu.be/vT5JgWgJhqc?si=9EuOTgBGXL554TWR

06/09/2026

Ons gemeente het 'n splinternuwe dominee!

Ons sê baie welkom aan ds. Heinrich Niehaus, wat vanoggend as ons nuwe leraar bevestig is.
Ons sê ook hartlik welkom aan sy vrou, ds. Mareli, wat hom so pragtig in alles ondersteun.

Ds. Heinrich het die dag begin met 'n preek by Kusweg, waar hy deur die koor, onder leiding van ons orreliste, Ronelle Hoogenhout, toegesing is.

Sy amptelike bevestiging en intreepreek is by die Lofsentrum gehou, waar talle gemeentelede – en 'n paar besoekers – die kerk volgepak het om ds. Heinrich te verwelkom.

Ds. Mareli het die formulier voorgelees en ds. Heinrich het met 'n "Ja, met my hele hart" belowe om ons gemeente met woord en daad as leraar te bedien ... en om bo alles die Here te dien en Sy Woord uit te dra.

Vyf predikante het ds. Heinrich met hul handoplegging geseën, voordat hy sy preek uit Hebreërs 2:14-18 gelewer het.

Die program was vol hoogtepunte, met heerlike sang en samesyn. Die Lofsentrum se sanggroep het ds. Heinrich met 'n spesiale lied verwelkom, waarna almal kon smul aan die heerlikste eetgoed.

Daar is vandag vele dankies om te sê. Ons mag dalk iemand oorslaan, maar ons wil veral ons dank uitspreek teenoor die volgende mense:
Ons kerkraadsvoorsitter, Herman Lourens, wat ds. Heinrich verwelkom het, en saam met die kerkraad die beroep uitgebring het.
Ds. Mareli wat die bevestiging hanteer het.
Karin van der Westhuizen wat die aankondigings gedoen het. Sy was ook die voorsitter van die Pre-advies kommissie, wat die beroepingsproses so goed hanteer het.
David Herbst en sy tegniese span, asook die tegniese span van Kusweg.
Edie Henn wat met haar skitterende orkes en sangroep, die lofprysing hanteer het.
Ronelle Hoogenhout vir haar skone orrelklanke, en Kusweg se koor vir hul begeesterde sang.
Ds. Jako Visser, wat ds. Heinrich names die NG Kerk se ring verwelkom het.
'n Groot dankie aan elke persoon wat eetgoed voorberei, aangedra en bedien het.
Ons sê dankie vir ons spanne by die deure, vir die pragtige blomme, en almal wat bygedra het om die verrigtinge so geseënd te laat afloop.
'n Spesiale dankie aan Sanette Strydom en Charmaine Crous van die kerkkantoor, vir al hulle reëlings.
Ons sê ook dankie aan almal wat van dag 1 af help bid het vir die beroepingsproses, en aan elkeen wat vir ds. Heinrich en Mareli gebid het ... en steeds bly bid.
Maar bo alles dank ons ons Hemelse Vader wat vir Gordonsbaai 'n nuwe predikant uitgesoek en gestuur het.
Aan Hom veral, gee ons al die lof, eer en dank!

05/09/2026

Tjaart Scheepers is op Sondag 30 Augustus tydens die diens in Kusweg as kerkraadslid bevestig.
Ds. Gert Vorster het hom verwelkom en Dr. Coenie Burger het meer vertel oor die Getuienis Diensgroep wat Tjaart gaan lei.
Ons bid dat ons Vader vir Tjaart mildelik sal seën in sy nuwe amp. Ons vertrou dat die diensgroep van krag tot krag sal gaan onder sy begeesterde leiding.

05/09/2026

Op Sondag 30 Augustus het ons Bybelsondag gevier. In die voorportaal van die kerk in Kusweg was daar 'n uitstalling van 'n groot versameling Bybels. Dit was roerend om 'n Bybeltjie uit die Anglo-Boereoorlog te sien, wat deur 'n krygsgevangene in Ceylon bewaar is. Verder was daar 'n Statebybel, 'n Bybel wat terugdateer na die Franse Hugenote, en verskeie ander antieke en unieke Bybels.
Die verskillende vertalings van die Bybel in Afrikaans (vanaf 1933 af) is ook met trots uitgestal.
Die uitstalling is deur Wieneke Greeff saamgestel, en sy het ook die pragtige proteas rangskik wat by die uitstalling gepryk het.
Voor in die kerk het die Kanselbybel deel gevorm van nog 'n treffende rangskikking.
Ons loof en eer ons Vader dat ons die Woord in ons eie taal kan lees.
Mag ons u Woord nie vergeet nie.

04/09/2026

08h30 - Klassieke Diens, Kusweg
09h30 - Lofkids, Lofsentrum
10h00 - Familiediens, Lofsentrum
17h00 - Tienerkerk, Lofsentrum

04/09/2026

GEBEDSTEMA
Sondag 6 September – Koninkrykstyd
Die heuglike dag van ds Heinrich Niehaus se intreepreek by sy ontvangs in ons gemeente.

Hebreërs 2:14-18
Die Boodskapvertaling in 'n "Ons gebed"

Here Jesus, ons almal is kinders in die familie van God en ons is net mense en daarom is dit logies dat U, Jesus, ook mens geword het.
Op dié manier kon U ook doodgaan om so die duiwel wat ons mense doodmaak, op sy plek te sit.
So het U, Jesus, ons mense vrygemaak van die vrees wat ons nog altyd vir die dood gehad het.
Ons weet goed dat U nie al die moeite gedoen het om die hemelse wesens te help nie. U het dit gedoen om ons mense te help.
Daarom was dit nodig dat U, Jesus, in elke opsig ’n mens moes word, net soos ons, u broers en susters.
So het U regtig namens ons mense die diens aan God bewys wat God verwag.
U is die hoëpriester wat simpatie met ons mense het en wat ons belange op die hart dra.
So het U daarvoor gesorg dat ons mense se sondes vergewe is en nie meer teen ons gehou word nie.
Juis omdat U self ervaar het hoe dit voel om swaar te kry en nee te moet sê vir versoekings, kan U ons mense wat ook in sulke situasies beland, baie goed help.

04/09/2026

Ons sien baie uit na die bevestiging van Ds. Heinrich wat Sondag gaan plaasvind.
Let asb. daarop dat hy om 08:30 by Kusweg die diens gaan lei.
Hy preek daarna om 10:00 by die Lofsentrum, waar hy amptelik as ons nuwe leraar bevestig gaan word.
Almal is welkom om sy intreepreek en inseëning saam te kom beleef ... of woon sommer albei die dienste by!
Hierdie Sondag se verrigtinge gaan 'n onvergeetlike deel word van ons gemeente se ryke geskiedenis.

30/08/2026

https://youtu.be/9FoOsfWLQP0

28/08/2026

28/08/2026

Ds. Gert nooi jou uit na Sondag se eredientse by Kusweg en die Lofsentrum. Sien julle daar!