AGS Nuwe Lewe, Van Dyk Park

04/09/2026

Ons sien uit daarna om julle te ontmoet.

03/09/2026

Elkeen moet die genadegawe wat hy ontvang het, gebruik om mekaar te dien.”
— 1 Petrus 4:10

02/09/2026

Midweek Manna (02 September): Geestelike groei en gesonde gewoontes

Saam met opsetlikheid, kort geestelike groei ook gesonde gewoontes. Jesus en sy dissipels was op pad na die Olyfberg toe (sien Lukas 22:39-46). Hulle het daarheen gegaan om te gaan bid. Hulle het soontoe vertrek om te gaan afsonder. Let egter mooi op wat Lukas 22:39 vir ons sê. Daar staan: “Jesus het die stad verlaat en volgens gewoonte Olyfberg toe gegaan...” (NV).

Het jy dit opgemerk? Christus het “volgens gewoonte” afgesonder. Hy het “volgens gewoonte” onttrek om tyd saam met die Vader deur te bring. Ons lees iets soortgelyks in Lukas 4:16-21. Of dit nou was om persoonlik af te sonder (Lukas 22:39-46), of om saam ander gelowiges bymekaar te kom (Lukas 4:16-21) – die HERE het dit gedoen volgens gewoonte.

As daar al ooit iemand op hierdie aarde was wat sonder hierdie gesonde gewoontes sou kon klaarkom, was dit Christus. Tog lees ons dat Hy hierdie geestelike dissiplines beoefen het “volgens gewoonte”. As Hy sulke gesonde gewoontes gehandhaaf het, wie is ons om te dink ons kan sonder dit geestelike groei? Geestelike groei kort gesonde gewoontes.

As ons ernstig is daaroor om geestelik te groei, gaan ons moet aandag gee aan ons gewoontes in hierdie opsig. Ons gaan doelbewuste veranderinge moet maak om konsekwent te raak. Hoekom? Want gesonde, geestelike gewoontes dra by tot gesonde geestelike groei. Volg Jesus se voorbeeld en sonder af volgens gewoonte. Volg sy voorbeeld en kom onder die geklank van die Woord.

Tot volgende week, groete en baie seën.

29/08/2026

Kom met verwagting! Sien julle môre!!

27/08/2026

“Dood en lewe is in die mag van die tong.”
— Spreuke 18:21

26/08/2026

26/08/2026

Midweek Manna (26 Augustus 2026): Geestelike groei is opsetlik.

Voordat Jesus uitgegaan het om te bedien (sien Markus 1:36-39), het Hy eers iets anders gedoen. “Nog voor dagbreek die volgende oggend het Jesus opgestaan en alleen op ’n stil plek gaan bid” (Markus 1:35). Voordat Christus uitgegaan het in die wêreld om te gaan preek en bose geeste uit te dryf, het Hy Hom eers afgesonder om saam met die Vader te wees.

Voordat Hy gaan doen het wat Hy gekom het om te doen (Markus 1:38), het Hy eers tyd gemaak om te onttrek. Kom ek stel dit so: Before Christ went out into this world, He first withdrew from it. Hierdie was egter nie ‘n eenmalige gebeurtenis nie. Daar is ‘n hele paar voorbeelde hiervan in die ander Evangelies ook (sien Matteus 14:13 en 23; Lukas 4:42, 5:16 en 6:12).

Christus het opsetlik tyd saam met die Vader deurgebring. Dit was beplan. Dit was doelbewus. Jesus het tyd gemaak om sy Gees te voed. Hieruit leer ons iets belangriks rondom geestelike groei. Dit kom nie vanselfsprekend nie. Dit gebeur nie sommer maar net nie. As ons geestelik wil groei, gaan ons Christus se voorbeeld in hierdie opsig moet volg.

Ons gaan met ander woorde ook opsetlik moet begin raak; doelgerig om tyd saam met die Here deur te bring. As Christus dit gedoen het, hoeveel te meer het ons nie nodig om dit ook te doen nie? Hoor daarom vandag die waarheid – as jy geestelik wil begin groei, begin om opsetlik en doelgerig daaroor te raak! Onttrek voordat jy uitgaan. In die Naam bo alle name, amen.

Tot volgende week, groete en baie seën.

20/08/2026

“Julle is die sout van die aarde.”
– Matteus 5:13

19/08/2026

Midweek Manna (19 Augustus 2026): Die etiket en die inhoud.

Aan die begin van Matteus 5:13 het Jesus gesê: “Julle is die sout van die aarde.” Hierdie woorde is soveel meer as net ’n etiket (of ’n “label”) wat die Here op Sy dissipels geplaas het. Dit is ’n leefwyse. Dit is ’n verantwoordelikheid. Wat my egter bekommer, is die feit dat so baie mense se etiket sê “sout”, maar die inhoud stem nie ooreen nie. Ons het verlede week gehoor dat ons uit die soutpotjie uit moet kom, en soms gebeur dit.

Soms word die potjie geskud en dit wat aan die binnekant is, kom dan uit. Dit wat egter uitkom, stem dan glad nie ooreen met die etiket nie. Ons plaas Jesus op ons statusse en ons plak Bybelverse oral op sosiale media, maar ons skinder, sê mense sleg, breek mense af, lieg en bedrieg, vloek, steel, pleeg bedrog, slaap rond, ensovoorts. Die etiket en die inhoud stem nie ooreen nie.

Dit is ’n probleem, want dit rig ernstige skade aan die beeld van Christus! Dit is ’n probleem, want die Here het self in hierdie opsig gesê: “Elke boom word aan sy eie vrug geken...” (Lukas 6:44). Ek weet hierdie vers gaan oor vrugte, maar die kruks bly dieselfde – die etiket en die inhoud moet ooreenstem. Net soos wat jy “nie druiwe van ’n doringbos af pluk nie”, net so is daar nie veronderstel om peper uit ’n houer uit te kom wat “sout” sê nie.

“Dit kan tog nie so wees nie” (sien Jakobus 3:8-12). Ek wil jou daarom vandag opreg aanspoor, my boetie en sussie in die Here – lê die ou mens eens en vir altyd af en word beklee met die nuwe mens (Efesiërs 4:21-24). Laat die etiket en die inhoud ooreenstem. Lewe volkome soos die Here wil hê jy moet en wees heilig. In die Naam van Jesus Christus, amen.

Tot volgende week, groete en baie seën.