Amanzimtoti Gemeenskaps Kerk

10/06/2026

*Sien die onsigbare (10 Junie 2026)*

Ek lees vir die eerste keer vandag hierdie “iets” raak in ‘n skynbare eenvoudige teks, en Heilige Gees leer my ‘n kosbare les. Lees Hebreërs 11:27 (Afr ‘53):*“Omdat hy geglo het, het Moses Egipte verlaat sonder om hom deur die woede van die koning te laat afskrik. Hy het volgehou soos iemand wat sy oog op die onsienlike gevestig hou.”*
‭‭
Moses het volgehou, aangehou glo en vertrou in God, soos iemand wie se oë gevestig was op iets onsigbaars - sien jy dit raak! Eerstens steur hy hom nie aan dit wat hy kan sien, naamlik die koning se woede, nie. Dit wat ‘in your face’ is en ervaar kan word, dit verag hy. Maar tweedens AG hy die onsienlike, hy gee meer waarde en inspraak daaraan - dit wat hy nie kan ervaar nie - en dan lewe hy daarvolgens. Hy jaag as te ware ‘n onsigbare doel na. En ek wonder so by myself hoe vestig jy jou oë op iets waarop jy nie jou oë kan vestig nie. Maklik: vir Geesvervulde kinders van God is die mos nou nie moeilik nie: jy GLO!

Ek hoor hoe Heilige Gees my antwoord: die geloofs-oog sien God se realiteit en dit is meer sigbaar, skyn helderder en beïndruk vêr meer as enige iets wat sigbaar is. En waar kry jy hierdie realiteit van God - ek is bly jy vra - in die Woord! Jesus Christus is die Woord en die Waarheid en het ons die geskrewe Woord gegee sodat ons ‘n beeld (die onsienlik, sigbare) het waarvolgens ons hierdie lewe kan inrig. Ons oog - net soos Moses - vasgenael op hierdie Goddelike realiteit en niks anders nie.

As dit dan jou begeerte is om in die oorwinnings lewe en oorvloed te lewe, dan is hierdie ‘n sleutel so reg uit Heilige Gees se hart vandag!

Goedheid en guns!

*LLF Bedieninge*

09/06/2026

08/06/2026

"Deel hierdie met iemand wat bemoediging nodig het." ❣️

08/06/2026

*Sagmoedigheid (8 Junie 2026)*

Ek is gereeld in vergaderings en besigheids-besluite betrokke. In die sekulêre wêreld sowel as in die kerkwêreld vind ek dat ‘sagmoedigheid’ as ‘n swakheid beskou word. Mense kyk nie noodwendig neer op jou weens jou sagmoedigheid nie, maar ek het gereeld gevind dit tel teen jou wanneer jy opgemeet word om sekere outoriteits posisies te beklee of sekere besluite te neem. Nou, ek is so ‘n sagmoedige mens en ek eer God daarvoor. Lees in Numeri 12:3 (Afr ‘53): *“Maar die man Moses was baie sagmoedig, meer as al die mense op die aardbodem.”* Hier lees ek van een van die grootste en bekendse leiers ooit - Moses! Dieselfde man wat die Egiptenaar dood geslaan het en dieselfde man wat ongeveer vier miljoen Jode vir 40 jaar deur die woestyn gelei het. Daardie selfde Moses word beskryf as die mees sagmoedige man op aarde! Heilige Gees troos my dadellik hiermee dat my sagmoedigheid alles behalwe ‘n swakheid is.
‭‭

Ek word herinner hoe mense blykbaar rustigheid en kalmte ervaar wanneer ek in gesprekke betrokke raak. Iemand het eenmaal gesê hulle hoor my net op ‘n aanlyn vergadering en ervaar die kalmte wat ek saambring. En terwyl ek so hieroor mediteer vat Heilige Gees my na Galasiërs 5:22 toe: *“Maar die vrug van die Gees is liefde, blydskap, vrede, lankmoedigheid, vriendelikheid, goedheid, getrouheid, sagmoedigheid, selfbeheersing. Teen sulke dinge is die wet nie.”*
‭‭
En skielik besef ek - dit is wanneer Heilige Gees neerslag vind in my vlees, dat sagmoedigheid na vore kom want dit is Sy vrug. Die Gees van die Here was op Moses daarom kon die mees sagmoeige man op aarde ‘n magtige leier wees. En nog ‘n wysheid word aan my bevestig - oorgawe aan EN totale heerskappy onder Heilige Gees oor my, is die pad van oorwinning en oorvloed.

Goedheid en guns!

*LLF Bedieninge*

07/06/2026

Nuwe Verbond is Beterrrrr...

06/06/2026

❓ Waar kry jy gratis liefde, hoop, vergifnis én goeie geselskap? 🤔 Nie by Checkers nie...
⛪ By die kerk hierdie Sondag!

05/06/2026

*Tel jou seëninge (5 Junie 2026)*

Ek onthou vanoggend hierdie ou koortjie: _Tel jou seëninge, tel hul een vir een, seëninge jou deur God geskenk! Tel hul almal, kyk wat God verleen, en jy sal verbaas staan oor wat God jou skenk!_ My Vroutjie het iewers gelees hoe ons dit kan regkry om met hierdie tiepe houding te lewe: neem elke skeinbare negatiewe situasie of ervaring en vind die positiewe daarin, byvoorbeeld: indien jou motor ‘n papwiel kry, dank God dat jy ‘n motor het waarmee jy elke dag kan ry, dank God dat jy kinders het om te gaan aflaai, ‘n werk om heen te ry ensovoorts. Ons kan die teendeel ongelukkig ook doen - en ongelukkig is dit die roete wat meeste mense kies, ook kinders van God: as ek net ‘n nuwe motor kon ry, as ek net meer geld gehad het, eendag as my skip kom…

As die laasgenoemde bekend klink, belei en laat staan. Dit getuig net van een ding naamlik dat jy gekondisioneer is deur die wêreld wat nooit tevredenheid kry nie. Daardie mooi teks in Hebreërs 13, vers 5 waar God belowe Hy sal ons nooit ooit verlaat nie, begin met ‘n belangrike waarskuwing: *“Julle gedrag moet vry van geldgierigheid wees. Wees tevrede met wat julle het, want Hy het gesê: Ek sal jou nooit begewe en jou nooit verlaat nie.”* Met ander woorde, moenie jouself soos die wêreld gedra wat net heeltyd meer geld soek nie, vertrou eerder op God vir alles deur in Sy rus te wees met jou alles.
‭Jesus waarsku dan ook in Lukas 12:15 (Afr’53): *“En Hy sê vir hulle: Pas op en wees op julle hoede vir die hebsug, want iemand se lewe bestaan nie uit die oorvloed van sy besittings nie.”*
‭‭
Jy kan dus heeltemal skatryk wees aan alles wat oop en toe maak - al die bells en whistles hê, soos die Engelsman sê, maar jy kan brandarm wees as gevolg van jou ontevredenheid (ondankbaarheid) Òf jy kan maar min hê en skatryk wees as gevolg van die tevredenheid wat jy IN Heilige Gees kry. Ek glo vas dat die oorwinnings lewe absoluut te vind is in die rus, die tevredenheid om met Heilige Gees, by Heilige Gees, onder leiding van Heilige Gees, IN Heilige Gees te lewe elke oomblik van elke dag. Doen dus moeite om jou seëninge te tel, daar is baie meer as wat jy sommer so ligtelik d**k!

Goedheid en guns!

*LLF Bedieninge*

04/06/2026

*Kies die klank (4 Junie 2016)*

Ek vind baie troos daarin om na ‘n lang dag net in my gemakstoel te sit en geestelike musiek aan te sit. Ek draai die volume lekker op, sodat dit alle ander geluide uitdoof. Dit het die ideale uitwerking op my moeg gewerkte liggaam, op ged**kte brein, en pootuit emosies. Soos ek daar sit kom ‘n swaer en hartseer saak gisteraand in my gedagtes op en ek besef hoe dit net soos ‘n storm is in die natuur. Die wind kan opkom, die wolke kan saamkom en dit kan sommer donker raak gedurende die dag. Die donderweer kan slaan en die blitse kan fl***er en om buite te wees is dan niks lekker nie. Inteendeel, dit wek selfs vrees op by mense. En ek besef net weer, ek het nie beheer oor die dinge van buite nie. MAAR ek kan kies om in my stoel te kom sit, in die beskermde veiligheid van my woning, warm en veilig EN ek kan kies waaraan ek myself blootstel, ek kan kies wat ek sien en ek kan kies wat ek hoor.

Ek lees in Psalm 56:4 (Afr’53): *“Die dag as ek vrees, sal ék op U vertrou.”* en ek besef dit is wat ek kies om te doen wanneer die storms van die lewe my kant toe kom. Ek het nie beheer daaroor dat storms in my finansies, gesondheid, verhoudings en ander aspekte van my lewe opdaag nie. Ek kan wel kies dat ek nie sal vrees nie. Ek kan wel besluit tot watter mate ek my daaraan gaan blootstel, hoeveel ek daarvan gaan ervaar of nie gaan ervaar nie. Ek kan die blootstelling verruil vir veiligheid, ek kan die sien daarvan verruil vir wat ek aansit en kyk, ek kan die aanhoor daarvan verruil vir wat ek aansit om te hoor. Die storms kan kom ja, maar ek het beheer oor myself. Ek kies dus om myself veilig by God te skaar deur my liggaam, oë en ore bloot te stel aan Sy Waarheid aangaande my en my situasie. En soos ek my by God skaar, so kry ek rus vir my siel. Die Boodskap het dit so vertaal: *“As ek begin bang word, Here, besluit ek net daar om op U te vertrou.”*
‭‭
Deel van die oorwinning oor storms lê dus daarin om te besluit op Wie jy vertrou en stappe te neem in daardie rigting!

Goedheid en guns!

*LLF Bedieninge*