Potchefstroom Studentegemeente

02/06/2026

31/05/2026

Ons het vanaand krag vir die week ontvang in die erediens en lekker geëet en gekuier by ons Stir-fry braai 😁 Nou is ons as studente reg vir die week wat voorlê! 🗓

31/05/2026

Erediens Sondag 31 Mei 2026

God se belofte: "Ek is by jou."

Enjoy the videos and music you love, upload original content, and share it all with friends, family, and the world on YouTube.

29/05/2026

PINKSTERWEEK DAGSTUKKIES
DAG 5

Lees: Handelinge 11 vers 19 tot 30

Reg deur die Bybel kan ons keer op keer die werking van die Gees van God beleef. Die Gees van God versterk mense, lei mense en ondersteun mense. Mense kom tot geloof deur die kragtige invloed van die Heilige Gees.

Hierdie gedeelte wat ons saam gelees het begin deur te vertel van die vervolging van die vroeë gelowiges. Stefanus is gestenig weens sy geloof. Hierna beleef die vroeë gelowiges drukkende vervolging. Hulle beleef die hardheid en die wreedheid van hierdie wêreld. Die vroeë gelowiges word uitmekaar gejaag.

Van hierdie gelowiges kom in Antiogië en beleef die werking van die Heilige Gees. Daar kom mense tot geloof en vorm ‘n gelowige gemeenskap. Vers 26 vertel vir ons dat hier in Antiogië is die gelowiges vir die eerste keer Christene genoem.

Barnabas word na Antiogië gestuur en werk voluit saam met hierdie gelowiges. Daar word aan ons gedeel dat hy vol van die Heilige Gees was. Barnabas het nie net in die gemeente nie maar ook in sy eie lewe die werking van die Gees beleef.
Wanneer ons lees van die eerste gelowiges en die werk wat hulle gedoen het beleef ons die duidelike werking van die Heilige Gees. Die Gees van God het saam met die gelowiges gewerk. Die Gees het die ore en die harte van de mense bereik en duisende mense het tot bekering gekom.

Selfs waar die vroeë gelowiges uitdagings beleef het, het hulle soveel te meer die werking van die Heilige beleef.

Ons as gelowiges beleef ook die uitdagings van die wêreld. Ons beleef ook tye van nood, tye van druk en selfs tye hartseer. Maar soos die vroeë gelowiges het ook ons die voorreg om die Heilige Gees te beleef. Ons kan elke dag beleef dat ons God deur Sy Gees in en deur ons werk.

Gebed
Here laat my asseblief elke dag die kragtige werking en leiding van U Gees beleef en laat my leef vervul met U Gees.
Amen.

28/05/2026

PINKSTERWEEK DAGSTUKKIES
DAG 4
Lees: Johannes 3 vers 1 tot 21

Ons kan die Gees van God ontmoet en ontvang. Ons kan God se Gees ten dele leer ken maar ons sal nooit werklik die Gees van God kan verstaan nie.

Ons sal nooit God se heiligheid, Sy almagtigheid, Sy alwetendheid, Sy genade, Sy liefde kan verstaan nie. Ons sal nooit die Drie-Eenheid, die werking van die persone van God die Vader, God die Seun en God die Heilige Gees kan verstaan nie.
Ons leer vanuit die woord van God net dit wat nodig is om genoeg te kan verstaan sodat ons kan glo en vertrou.

Soos wat Nikodemus moes beleef en besef dat hy kan nie verstaan nie. Hy kan net glo en vertrou. Nikodemus was deel van die Fariseërs, juis hulle wat kennis en insig gehad het rakende die geloof en geloofsleer. Verder was hy deel van die Joodse Raad wat bewys dat hy ‘n geleerde en gerespekteerde man was.

Die Here Jesus sê aan Nikodemus dat hy nie verbaas moet wees oor wat Hy leer nie. Jesus leer dat ‘n mens uit water en uit die Gees gebore moet word. Jesus leer dat die werking van die Heilige Gees vergelyk kan word met die wind. Ons kan nie bepaal waarvandaan die wind kom of waarheen die wind gaan nie. Ons weet nie waar begin of eindig die wind nie. Ons kan wel die wind voel. Ons kan die wind beleef.
Net so moet ons bewus wees van die werking van die Heilige Gees, nie om te verstaan nie maar om te beleef en te ervaar.

In vers tien vra Jesus “Jy is die bekende leermeester van Israel en jy verstaan dit nie?” As ‘n bekende leermeester van Israel dit nie verstaan het nie, kan ek en u ook nie verwag om te verstaan nie.

Hebreërs 11 vers 1 leer ons: “Om te glo, is om seker te wees van die dinge wat ons hoop, om oortuig te wees van die dinge wat ons nie sien nie.”

Gebed
Here dankie dat ek nie hoef te verstaan nie maar net mag glo. Amen.

27/05/2026

Sondag aand 31 Mei by die Potchefstroom Studentegemeente gaan ons saam in die Naam van ons Here bymekaar kom. Ons gaan ook as geloofsgemeenskap saam kuier na die erediens.

27/05/2026

PINKSTERWEEK
DAGSTUKKIES

DAG 3
Lees: Galasiërs 5 vers 13 tot 26

Wanneer ons die Heilige Gees ontmoet en ontvang beleef ons die werking van die Gees van God in ons lewens. Nou is dit tyd om die Gees van God te leer ken. Ons sal die Gees van God nooit ten volle kan ken nie maar elke dag wat ons in verhouding met die Gees leef en werk sal ons die Gees beter kan leer ken.

Deur die woord van God leer ons die Here en so ook die Gees van God ken. Wanneer ons die woord van die Here lees, leer ons van die verskillende mense en hoe hulle die Here beleef het. Ons leer deur die gebeure in die mense se lewens hoe God in hulle lewens gewerk het en deur hulle tot ander gewerk het.
In Galasiërs leer ons die Gees van God ken deur die vrug van die Gees uit te leef. Wanneer die Gees van God in ons leef en werk sal die vrug van Hom wat in ons leef en werk duidelik sigbaar wees.

Hierdie vrug word dikwels verwoord as verskillende vrugte. Die gedagte vorm dat ons as gelowiges ‘n keuse het rakende watter vrugte van die Gees ons wil uitleef. Wanneer ons in diepte fokus op die woorde in Galasiërs sien ons dat een vrug beskryf word. Hierdie vrug kan vergelyk word met ‘n nartjie. Een vrug met verskillende dele of dan ook skywe.

Ons leer die Gees van God ken deur te fokus op die skywe van die vrug wat in Galasiërs aan ons genoem word naamlik: Liefde, Vreugde, Vrede, Geduld, Vriendelikheid, Goedhartigheid, Getrouheid, Nederigheid, Selfbeheersing.
Laat ons as gelowiges die volledige vrug van die Gees leer ken en uitleef in hierdie honger wêreld.

Gebed
Here help my om elke dag bietjie meer van U Gees te leer ken. Help my om nader aan U te leef. Gee dat ander die vrug van U Gees in my en deur my lewe kan sien.
Amen.

26/05/2026

Sterkte aan ons Studente met julle Eksamens 🗓 🙏
Potchefstroom Studentegemeente

26/05/2026

PINKSTERWEEK DAGSTUKKIES
DAG 2
Lees: Handelinge 2 vers 1 tot 13

Van die begin van die Skepping af ontvang die mens die Gees van God en is die mens gevul met die Gees van God.

Daarom is dit belangrik om te besef dat mense reeds in die Ou Testament die Gees van God ontvang het. So word Josua genoem in Numeri 27 vers 18. Sommige van die Rigters word genoem onder andere Rigters 14 vers 6 en ook van die konings, Dawid word genoem in 1 Samuel 16 vers 13.

Ons lees vroeg in die Evangelies dat nadat Jesus gedoop is het die Heilige Gees sigbaar op Hom neergekom. So word aan die mense wat dit aanskou het bevestig dat Jesus die Gees van God ontvang.

In Handelinge 1 vers 5 en vers 8 sê Jesus aan die dissipels dat ook hulle sal die Heilige Gees ontvang. In Handelinge 2 se eerste verse gebeur dit presies so. Die dissipels ontvang die Heilige Gees.

Dit is opmerklik dat die dissipels nie dieselfde bly nie. Daar kom verandering, verbetering en vernuwing die oomblik wat hulle die Gees van God ontvang.
Vervul met die Heilige Gees is die dissipels toegerus vir die werk wat hulle moet doen. Die groot opdrag om die Blye Boodskap van God aan alle mense te verkondig.

Die Gees van God lei mense en ook ons wat die Gees van God ontvang het om daadwerklik op te tree en die wil van die Here uit te leef.

Dit is ook belangrik om na te d**k oor die woorde van vers 13. Daar was steeds mense wat gespot het. Daar was steeds mense wat, alhoewel hulle gesien het, nie geglo het nie. In hierdie wêreld sal daar altyd die wees wat nie glo nie. Deur die werking van die Heilige Gees bly dit voortdurend ons as gelowiges se taak om God se liefde en genade aan elkeen te verkondig en aan hulle te deel.

Gebed
Here dankie dat ook ek U Heilige Gees ontvang het. Dankie dat ek mag leef met die wete U Gees leef in my en werk deur my.
Amen.