NG Gemeente Port Shepstone Dolerend

NG Gemeente Port Shepstone Dolerend ...om te lewe soos Hy dit wil... Erediens Tye:
Port Shepstone 08h30
Hibberdene elke 2de en 4de Sondag van die maand 10h00

12/06/2026

Gedagte vir die dag
Vrydag

Titus 3:9: “Maar jy moet jou nie inlaat met dwase strydvrae en geslagsregisters en met getwis en stryery oor die wet van Moses nie, want dit is nutteloos en sinloos.”

Die week het ons gekyk na tekste in die Nuwe Testament wat ons teen dwaallering, twisvrae en slim praatjies waarsku. Ons het ontdek dat dit die fokus van dit wat saak maak wegvat en tyd en energie op onbelangrike dinge laat verkwis.

Ons het ook geleer dat ons aktief betrokke moet wees in die uitdra van die Evangelie en ‘n lewe van dankbaarheid tot eer van God moet leef.

Gebed: Here Jesus, al my tyd en energieë wil ek net aan U saak spandeer. Lei my hierin dat dit vrugbaar en effektief tot eer van U Naam sal wees. Amen

11/06/2026

Gedagte vir die dag
Donderdag

2 Pet 3:17: “Geliefdes, julle weet dit nou vooruit. Wees dus op julle hoede dat julle nie meegesleep word deur die dwaling van beginsellose mense en so van julle eie standvastigheid beroof word nie.”

Petrus sluit sy brief af met 'n baie direkte waarskuwing aan gelowiges om op hulle hoede te wees sodat hulle nie hulle eie vastigheid (ankers) verloor nie.

Nou wonder ek net of ons nie juis in die tye waarin ons leef, erns hiermee moet maak nie. Ons siens mense kom weg met verkeersoortredings, dan maak ons ook maar so. Ons sien ons kan gouer regkom, daarom betaal ons ook maar die omkoopgeld.

Ons standvastigheid is daarin dat Jesus Christus ons kom red het en nou ons stuur om sout en lig in en vir die wêreld te wees.

Gebed: Grote Koning, lei ons deur U Gees om in die see van dwalinge nog steeds tot eer van U Naam te swem. Amen.

10/06/2026

Gedagte vir die dag
Woensdag

Heb 13:9: Moet julle nie laat meevoer deur allerhande vreemde leringe nie. Die goeie is daarin geleë dat die hart deur genade versterk word, nie deur eetgebruike nie. Dié wat hulle aan hierdie gebruike gehou het, het niks daarby gebaat nie.

Mag jy kos eet wat ‘n Halaal teken het (kos en drank wat vir Moslems toelaatbaar is)? Mag Christine varkvleis eet? Hierdie is maar enkele vrae waarmee baie gelowiges worstel.

Die skrywer van Hebreërs beklemtoon dat ons verhouding met die Here nie van ons eet en drink afhang nie, maar gebou is op God se genade en barmhartigheid. Jesus sê immers: “Nie wat in die mond ingaan, maak die mens onrein nie; maar wat uit die mond uitgaan, dit maak die mens onrein.” (Matt 15:11)

Gebed: Here, laat my meer fokus om wat uit my uitgaan is dit wat in my gaan, want ek wil U vereer Amen.

09/06/2026

Gedagte vir die dag
Dinsdag

1 Tim 6:3-5: "As iemand 'n ander leer verkondig en nie hou by die gesonde woorde van ons Here Jesus Christus en by die leer van die ware godsdiens nie, is hy verwaand en weet hy niks nie. Hy het 'n sieklike beheptheid met strydvrae en woordewisselinge. Daaruit ontstaan afguns, twis, lasterlike taal, slegte agterdog en aanhoudende getwis van mense wat verstandelik verward en van die waarheid beroof is."

In die NG Kerk is daar vandag baie strydvrae en woordewisselinge oor hoe moet ons die Bybel verklaar. Die spanning, verdeeldheid en onsekerheid wat dit tot gevolg het, is iets waarmee God se kerk verseker kon klaarkom.

Paulus spreek Timoteus direk aan oor mense wat gekskeer met "strydvrae" en "woordewisselinge" wat niks met die gesonde leer van Jesus te doen het nie.

Gebed: Here, lei my in U waarheid, sodat ek nie deur strydvrae en woordewisselinge verwar word nie. Amen.

08/06/2026

Gedagte vir die dag
Maandag

Kol 2:8: “Pas op dat niemand julle van Hom af wegvoer deur teorieë en argumente wat misleidend is nie. Dit is dinge wat berus op die oorlewering van mense, op wettiese godsdienstige reëls en nie op Christus nie."

Seker een van die moeilikste uitdagings vir ons as kinders van die Here vandag, nie ons geloof te verloor nie. Ons samelewing is multikultureel en daar is soveel godsdienstige groeperinge. Ons leef in ‘n demokrasie waar almal gelyk is en ‘n filosofie van relativisme ontken die konsep van absolute waarheid.

Al hierdie uitdagings kan dal k tot gevolg hê dat ons ons geloof kan afwater, vermeng of selfs verloor. Daarom die vermaning, ”pasop”

Gebed: Here, ek wil glo soos ‘n kind, help my daarom soos ‘n groot mens my die gevare raak te sien. Amen.

05/06/2026

Gedagte vir die dag
Vrydag

Gal 6:9: "Laat ons dan nie moeg word om goed te doen nie, want as ons nie verslap nie, sal ons op die bestemde tyd die oes insamel."

Die week het ons gefokus op hoe ons daagliks bloot gestel word aan uitdagings, stressors en kommer. Die deurlopende druk van die lewe kan 'n mens geestelik en emosioneel "moeg" maak, wat daartoe lei dat jy wil tou opgooi of bloot ophou omgee (verslap).

Hierdie teks is 'n bemoediging om vas te byt en te onthou dat jou geestelike fokus en volharding op die regte tyd vrug sal dra. Hoekom? Jy is in God geanker. Die Een wat nie wankel, sluimer of slaap nie.

Gebed: Here, al gaan ek deur donker dieptes, U kies om by my te bly. In U vind en troos, krag en hoop. Amen

04/06/2026

Gedagte vir die dag
Donderdag

Ef 5:15-16: "Wees baie versigtig hoe julle lewe: nie soos onverstandige mense nie, maar soos verstandiges. Maak die beste gebruik van elke geleentheid, want ons lewe in 'n bose tyd."

Om midde al ons uitdagings geestelik gefokus te bly, gebeur nie vanself nie. Daarom moet ons "baie versigtig" en “verstandig” lewe. Ons weet dat die Here elke dag ‘n doel vir ons het, daarom moet ons dit soek en uitleef. Ons weet dat die bose tye waarin ons leef, ons geestelik traag wil maak, daarom wil ons vandag ‘n verskil maak.

Gebed: Vandag weet ons dat U weer voor sal loop, Here, daarom sal ons U volg. Gee asseblief die krag om met U taak vandag besig te wees. Amen.

03/06/2026

Gedagte vir die dag
Woensdag

Fil 4:6-7: "Moenie oor alles besorg wees nie, maar gee julle begeertes in alles deur gebed en smeking met danksegging aan God bekend. En die vrede van God wat alle verstand te bowe gaan, sal oor julle harte en julle gedagtes die wag hou in Christus Jesus."

Waaroor is jy die meeste bekommerd vandag? Wat laat jou stres? Waaroor lê en peins jy in die nag?

Nou dat jy dit bedink het, die volgende vraag. Praat jy met jou Here en God hieroor? Kom jou hart tot bedaring en ervaar jy ‘n stuk vrede wat alle verstand te bowe gaan? Ruil jy jou sorge in vir gebed, jou kommer vir God se rus, jou vrae vir Sy vrede?

Gebed: Here, by U alleen vind ek rus en vrede. Dankie Here. Amen.

02/06/2026

Gedagte vir die dag
Dinsdag

Matt 6:33: "Nee, beywer julle allereers vir die koninkryk van God en vir sy wil, en Hy sal al hierdie dinge vir julle bygee."

Hierdie teks fokus direk op ons prioriteite. Die daaglikse lewe van sorge oor môre, kos, of klere (die dinge wat Jesus net voor hierdie vers noem), is soms so oorweldigend dat dit ons geestelik uitgeput laat. Dit laat ons soekend, ontnugter, bekommerd en frustreer, maar daar is ‘n antwoord.

Deur doelbewus God se koninkryk eerste te stel, Hom toe te laat dat Hy die prioriteit in ons lewe raak, val die res van die lewe se druk weg en kry ons weer perspektief.

Gebed: Laat my weer by U kom skuil o Here. Dit is hier waar ek rus en vrede soek sodat ek staande kan bly. Amen.

Address

Unity Road
Port Shepstone
4240

Opening Hours

Monday 08:00 - 15:30
Tuesday 08:00 - 15:30
Wednesday 08:00 - 15:30
Thursday 08:00 - 15:30
Friday 08:00 - 13:00
Sunday 08:30 - 09:30

Telephone

+27396820266

Website

Alerts

Be the first to know and let us send you an email when NG Gemeente Port Shepstone Dolerend posts news and promotions. Your email address will not be used for any other purpose, and you can unsubscribe at any time.

Shortcuts

Share

Category