Nederduitsch Hervormde Kerk Groeneweide

04/06/2026

ROEP HOM AAN

PSALMS 18:7
[7] In my angs het ek tot die Here geroep, tot my God geroep om hulp. In sy heiligdom het Hy geluister; my hulpgeroep het Hy gehoor.

Roep vandag tot die Here Jesus Christus - Hy sal jou uit die dieptes van jou nood hoor. Roep Sy Naam aan en Hy sal vir jou sorg.

Ek is goed bekend met wanhoop. Ek het dit al baie keer in my lewe ervaar. Toe ek pas tot bekering gekom het, het 'n vuur op ons plaas gedreig om na 'n groot denneplantasie toe te spring. Ek was doodsbenoud. Toe onthou ek die Here het gesê: "Roep na My wanneer jy beangs is." Ek het in die stof op my knieë gegaan en gebid: "Here, help my, asseblief." En wat het toe gebeur? Die wind het van rigting verander, sagte reën het uit die Suide gekom en die Here het daardie vuur geblus.

Die Here sal vandag ook vure in jou lewe blus. Miskien is dit 'n siek kind, miskien 'n werksituasie, miskien 'n finansiële krisis. Roep vandag Sy Naam aan.

Onse Vader, Here en Heilige Gees, dankie vir U lewende Woord en dié boodskap en leiding uit U Woord. Here, U ken ieder en elk van ons se bekommernisse en vrese. Dankie vir dié geleentheid om U aan te roep wanneer ons in nood is. Here, ons roep U aan vanmôre, gryp in, in ons lewens en verander die wind rigting en stuur sagte mildelike reën om die vure in ons lewens te blus. Here, ons dank U vir die ingryping en al U liefde en genade in oormaat. Amen

04/06/2026

03/06/2026

ALLE DINGE DEUR CHRISTUS

2 TIMOTEUS 1:7
[7] Want God het ons nie ’n gees van lafhartigheid gegee nie, maar van krag, liefde en selfbeheersing.

In 1956 is Paul Anderson Australië toe om aan die Olimpiese Spele deel te neem. Dit was feitlik 'n uitgemaakte saak dat hy die goue medalje vir gewigoptel sou wen, maar toe hy in Australië aankom, het hy siek geword. Hoewel hy 'n hoë koors ontwikkel het, wou hy egter nie opgee nie. Met die eerste opstelslag het hy misluk. Dieselfde het met die tweede keer gebeur. Toe het hy God se teenwoordigheid in sy lewe erken en homself opnuut aan God toevertrou. Hy het gebid dat God hom in sy derde probeerslag sou help. En God het. Paul het daardie dag die goue medalje verower.

Waarmee worstel jy vandag? Paul Anderson het gesê: "Ek is al die sterkste man op aarde genoem, maar ek kan nie een dag sonder Jesus Christus oorleef nie." God bring dikwels een of ander toets op ons pad en gee vir ons die geleentheid om Hom aan te roep. Die Bybel sê in Filipense 4:13: "Ek kan alles doen deur Hom wat my krag gee."

Vertrou vandag op die Here. Hy sal jou nie in die steek laat nie.

Onse Vader, Here en Heilige Gees, dankie vir dié bemoedigende boodskap en leiding uit U lewende Woord. Here, dankie dat U vir ons 'n gees van krag, liefde en selfbeheersing gegee het en dan bekragtig U dit deur te sê dat ons alles kan doen deur U wat ons krag gee. Here, ons is geseënd in oormaat en het geen verskoning om elke dag voluit te leef vir U nie en U evangelie te verkondig. Dankie vir al U liefde en genade in oormaat. Amen

02/06/2026

'N DANKBARE HART

1 KRONIEKE 16:8
[8] Dank die Here, roep sy Naam aan. Laat die nasies weet wat Hy gedoen het.

FILIPPENSE 1:21
[21] Want vir my is die lewe Christus, en die sterwe wins.

As Christene moet ons dankbaar wees vir alles wat God vir ons gegee het en die seëninge begin raaksien wat Hy ons daagliks skenk. Party van ons is so besig om 'n bestaan te probeer maak dat ons lewe by ons verbygaan en ons meer tyd bestee aan kritiek en om op negatiewe dinge te fokus as om God te dank vir al die goeie dinge wat ons het.

Daar is altyd iets om voor dankbaar te wees. Is dit nie verstommend dat alles in die lewe wat regtig die moeite werd is, nie deur geld gekoop kan word nie? Kom ons besluit om 'n goddelike ingesteldheid te hê en die Here te dank vir al die goeie dinge wat ons het. Gaan vandag uit met nuwe oë - oë van geloof - en mag jou dag wonderlik wees.

Onse Vader, Here en Heilige Gees, dankie vir dié boodskap en leiding uit U lewende Woord. Here, ons is dankbaar vandag vir al die seëninge wat ons uit U hand ontvang en die voorreg om U kinders te wees en te weet dat wanneer ons lewe, lewe ons vir U en as ons sterf gaan ons huis toe om by U te wees in die hemel. 'n Dubbele wen. Here, laat ons lewens getuig van U en laat ons alles waardeer wat U vir ons doen en gee. Dankie Here vir al U liefde en genade in oormaat. Amen

01/06/2026

LEEF VIR VANDAG

HEBREËRS 13:5
[5] Hou julle lewe vry van die honger na geld. Laat wat julle het, vir julle genoeg wees. Onthou dat God die versekering gegee het: “Ek sal jou nie los nie. Ek sal jou nie in die steek laat nie.”

Die vreugde van die lewe kan in elke oomblik gevind word - ons moet die toekoms in God se hande laat. Die tragedie is dat ons dikwels so gefokus is op môre dat ons nie vandag geniet nie. Wanneer ons dag vir dag begin leef, kan ons uitdagings hanteer wat oor ons pad kom.

Dis die "aangryp" van die lewe, en nie die uiteinde nie, wat die Here verheerlik. Wanneer ons die klein dingetjies in die lewe begin geniet, sal ons die sonsopkoms elke oggend begin waardeer, die seëninge van familie en vriende, nuwe geleenthede wat elke dag aan ons gegee word. Die Here gee ons die krag om een dag op 'n slag te leef. Ons kan elke dag geniet as ons onsself dissiplineer om ons nie altyd oor die toekoms te bekommer nie.

Wanneer ons dit doen, sal ons goeie dissipels van die lewende God word. Jesus het immers 30 jaar in 'n timmerman se winkel deurgebring ter voorbereiding van Sy drie jaar van diens - en dit het die wêreld verander!

Onse Vader, Here en Heilige Gees, dankie vir dié boodskap en leiding uit U lewende Woord en dié bevestiging dat U ons nie sal los of in die steek laat nie. Here, ons vertrou en maak staat op U alleen en daarom sal ons nie bekommerd wees oor môre nie. Help ons en lei ons om een dag op 'n slag te lewe en U te dien. Dankie vir al U liefde en genade in oormaat. Amen

29/05/2026

HERLEWING IS AANSTEEKLIK

JESAJA 57:15
[15] So sê die hoë, verhewe Een wat vir altyd bestaan, wie se Naam die Heilige is: “Ek woon in ’n hoë, heilige plek, maar ook saam met die mens wat berouvol en nederig is. Ek gee nuwe krag aan dié wat nederig is en aan dié wat verdruk word, en nuwe krag aan dié wat berouvol is.

John Wesley het gesê die definisie van herlewing is "mense wat met God deurdrenk is". John Blanchard het eenkeer gesê: "Die mense kan net so min 'n herlewing organiseer as wat hy die wind kan beheer." 'n Herlewing het geen perke nie; daar is geen rassegroeperings nie; dit het geen gunsteling nie - dus presies soos 'n veldbrand. Herlewing is aansteeklik.

God beweeg op maniere wat ons nooit sal verstaan nie. Ek glo dat God elke hoekie van die land, elke sektor en etniese groep sal aanraak en die vrede sal bring wat ons so desperaat nodig het.

Onse Vader, Here en Heilige Gees, dankie vir dié boodskap en leiding uit U lewende Woord. Here, laat U Heilige Gees deur ons werk en herlewing bring in ons huise, en laat die herlewing aansteeklik wees en versprei soos 'n veldbrand deur ons werksplekke en gemeenskappe. Laat U Heilige Gees en lewende Woord ons lei om U evangelie te versprei. Dankie Here vir al U liefde en genade in oormaat. Amen