01/06/2026
#5751 | Net een dag
11 Gee ons die porsie brood wat ons vir vandag nodig het. Mat. 6:11 (NLV)
Die bede, “Gee ons vandag ons daaglikse brood” beteken dat hierdie gebed daagliks gebid sal word. (Ja, Jesus het letterlik bedoel dat ons die Ons Vader daagliks sal bid.) Ons bid duidelik hier vir net een dag se behoeftes – nie vir elke dag nie. Bid dus elke dag – dit hou jou verhouding met God lewend.
Elders sê Jesus dat ons ons nie oor môre se brood moet kwel nie, want elke dag het genoeg van sy eie uitdagings. As ons vandag al angstig is oor môre, of die res van die jaar, of sommer die hele toekoms, sal die las ondraaglik word. Bid dus vandag vir vandag se behoeftes, en môre vir môre s’n. Môre sal die Here wéér brood gee. Onthou, gister is onherroeplik verby en môre bestaan nog nie. Al wat ons het is die hede. Leef VANDAG!
Ewige God, wat die verlede betref, ek vergewe myself en ander vir wat gebeur het. Wat môre betref, U is in beheer – môre sal U weer voorsien. Vandag is egter ’n gawe, ’n kosbare geskenk. Help my om vandag vry te LEEF in die wete dat U sal voorsien – vandag EN môre. Amen.
♦ © 2026 DAAGLIKSE STILTE deur Jimi le Roux.
♦ ‘Share’ gerus ons plasings – in die geheel, sonder wysigings.
♦ Ontvang jy al ons gratis oordenkings as 'n e-pos? Kliek hier: https://www.subscribepage.com/s3g6l8
♦ Volledige inligting oor hierdie bediening is by www.jimileroux.com
