EG Kerk Pietersburg Emmanuel

EG Kerk Pietersburg Emmanuel 'n Toevlug vir verlorenes, 'n Tuiste vir kinders van God.

12/06/2026

Teksvers: Psalm 46:11 & 12 “Laat staan en weet dat Ek God is; Ek sal hoog wees onder die nasies, hoog op die aarde. Die HERE van die leërskare is met ons; die God van Jakob is ‘n rotsvesting vir ons. Sela (Laat dit so wees).” ’n Engelse vertaling lui: “Be still and know that I am God.”

Sedert verskillende lande betrokke geraak het in die huidige oorlog het daar oorweldigende nuusberigte in die media geskyn. Ek stem een honderd persent saam dat ons moet weet wat om ons, asook in die wêreld gebeur, maar as kind van God moet ons waak om nie vreesbevange te word en daardeur ons vertroue en geloof in die krag van God te verloor nie.

Psalm 46:11 se woorde: “Laat staan en weet dat Ek God is ...” (“Be still and know that I am God.”) moet elke kind van God aanspoor om ons oë op die wolke te hou en Hom te verwag. Ons moet ook tyd uitkoop (maak) om op die Here te fokus.

Persoonlik glo ek dat ’n “stiltetyd” ’n noodsaaklike deel van elke dag moet uitmaak. ’n Tyd om die Bybel te lees, te bid en God se goedheid en guns (Psalm 23:6) te bepeins en ons eie te maak.

Wanneer ons, soos die skrywer van Psalm 46, die realiteit beleef dat “God is vir ons ‘n toevlug en sterkte; as hulp in benoudhede is Hy in hoë mate beproef (Psalm 46:2)” verdryf dit die onrus en vrese en dit rig ons fokus weg van die wêreld se bedreiginge, en dit laat ons in God se vrede, deur geloof, rus. Dit laat ons besef dat God in beheer is (vers 10).

Dit maak nie saak hóé chaoties die wêreld om ons raak nie, ons KAN in stilte in Sy krag, in Sy liefde rus.

Wanneer ons daagliks stil word en na Hom luister wanneer Hy deur Sy Woord praat, sal ons genade vind om Hom te verwag. Amen! Kom Here Jesus ... miskien vandag? Laat ons gereed wees wanneer ons Sy stem hoor: “Daar kom die Bruidegom!”

Seëninge.
Yvonne Slabber

11/06/2026

Teksvers: Númeri 14:9(b) “... en die HERE is met ons. Wees nie bevrees vir hulle nie!”

Ek lees die getuienis van ’n vrou wat vertel dat haar man ’n goeie bevordering gekry het, maar dit het behels dat hulle na ’n ander land moes verhuis. Sy sê sy was te bang om hul huis en familie agter te laat. Sy sê: “My vrees het veroorsaak dat my man ’n uitstekende geleentheid tot welvaart van die hand moes wys.” Vandag wonder sy steeds waarheen die lewe hul sou gelei het as sy nie so bang was nie. Wat het hulle moontlik misgeloop?

Die Israeliete het toegelaat dat vrees vir die reuse in die “land wat oorloop van melk en heuning” hulle verhinder het om God se plan vir hulle te verwesenlik. Hulle het na die vreesbevange bespieders geluister en GEKIES om nie die land in te neem nie – wat ’n ramp! Josua en Kaleb het egter by hulle aangedring om die Here te vertrou en hulle het gesê: “Die HERE is met ons, wees nie bevrees vir hulle nie.” Wyle Ds. Saunders het gesê dat Josua en Kaleb het die reuse gesien as sprinkane terwyl die ander bespieders die sprinkane gesien het as reuse.

Die dame wat getuig het oor die vrees wat haar man teruggehou het van bevordering, het nie ’n opdrag gehad soos die Israeliete om na ’n ander land te trek nie. Nogtans was sy later spyt oor die gevolge wat haar vrese vir hulle gesin tot gevolg gehad het.

Hoewel die Israeliete terdeë begryp het dat die (groot) mense van Kanaän oorweldigend voorgekom het, het hulle die belofte van God gehad dat Hy met hulle was en dat hulle op Hom kon vertrou.

Geagte leser, hoe lyk dit in u lewe? Klop ’n vreesaanjaende situasie aan u deur? Het u met die smarte van die dood wat jou huis besoek het, te doen? Is u bang vir die toekoms? Indien wel, wees dan verseker dat die Here by jou is en jou sal lei. Sy onbeskryflike liefde vir u en my is nimmereindigend, daarom kan ons in geloof vorentoe beweeg.

Iemand het geskryf: “Vrees kan verlam, maar geloof dring ons om God te volg.”

Mag God se Goeie Hand u lei en bewaar en mag Sy Woord vir u die Lig van u lewe wees.

Seëninge.
Yvonne Slabber

10/06/2026

Teksvers: Romeine 6:11 “So moet julle ook reken dat julle wel vir die sonde dood is, maar lewend is vir God in Christus Jesus, onse Here.”

Ek verstom my oor waar legendes hulle oorsprong het. In Massachusetts, Amerika, staan ’n kerk langs ’n heuwel. In die graniet langs die kerk, is daar ’n vreemde merk, amper soos ’n spoor van ’n vreemde wese. Volgens die inwoners, bestaan daar ’n legende (’n wolhaarstorie) dat die bekende evangelis George Whitfield in 1740 op ’n dag in dié kerk baie kragtig gepreek het en dat die duiwel wat op die kerktoring gesit het, baie benoud weggevlug en op die granietblad sy spoor gelos het! Hoewel dit ’n legende is, herinner dit ons aan die waarheid in God se woord in Jakobus 4:7 “Onderwerp julle dan aan God; weerstaan die duiwel, en hy sal van julle wegvlug.”

Die teëstander van die kinders van God is die duiwel en hy soek wie hy kan verslind (1 Petrus 5:8) maar God gee aan Sy kind die krag om hom te weerstaan wanneer hy kom om ons te versoek, om werklik teen hom op te staan. In Romeine 6:14 verklaar die Woord dat: “Want die sonde sal oor julle nie heers nie ...” God het aan elkeen van Sy kinders krag gegee om die duiwel te weerstaan, deur die krag van Christus Jesus en ook om staande te bly. Niks wat ons in hierdie lewe in die gesig staar, kan Hom oorwin nie, omdat “Hy het die wêreld oorwin.” (Johannes 16:33)

Wanneer ons ons hart en lewe algeheel aan God onderwerp, in algehele oorgawe en gehoorsaamheid aan Sy Woord, sal Hy ons help om die vyand te weerstaan en “hy sal julle wegvlug.”

Hierdie volle oorgawe vereis van ons dat ons, volgens Romeine 6:11 “So moet julle ook reken dat julle wel vir die sonde dood is ...” en dat jy nou in Jesus verborge is. Dan sal Jesus elke keer wanneer die vyand aan die deur van jou hart en lewe klop, hom oorwin. Jesaja 59:19 (2020 Afrikaanse Vertaling) “So sal hulle die Naam van die HERE vrees van die weste af en sy heerlikheid van die opgang van die son af. Wanneer die vyand soos 'n vloed inkom, sal die Gees van die HERE 'n banier teen hom ophef.”

Mag jy vandag geloof en krag van God ontvang om die duiwel te weerstaan, want dan sal hy van jou af wegvlug “want die gebed van die swakste heilige sal satan vul met vrees.” Oswald Chambers.

Seëninge.
Yvonne Slabber

09/06/2026

Teksvers: Sagaria 3:4 “Daarop het Hy aangehef en gesê aan die wat voor Hom staan: Neem die vuil klere van hom weg. Toe sê Hy vir hom: Kyk, Ek het jou skuld van jou weggeneem, en Ek beklee jou met feesklere.”

Toe my kinders klein was, het hulle dit geniet om in die modder te speel. Vir hul eie beswil, en vir die beswil van my vloer, het ek hulle klere by die deur uitgetrek en hulle in handdoeke toegedraai voordat ek hulle in die bad gesit het. Hulle het gou van vuil na skoon, met die hulp van seep, water en drukkies, verander.

In ’n visioen wat aan Sagaria gegee is, sien hy Josua, ’n hoëpriester, met vuil klere aan wat sonde en ongeregtigheid voorstel (Sagaria 3:3). Maar die Here maak hom skoon, verwyder sy vuil klere en die Bybel sê: “Ek beklee jou met feesklere.” Die tulband (vers 5) en die skoon klere is ’n verwysing na die Here wat sy sonde vergewe en van hom weggeneem het.

God bied aan elke verlore sondaar, ongeag sy titel of amp (soos Josua ’n hoëpriester was) vergifnis en reiniging en verlossing van alle sondes. As gevolg van Sy dood aan die kruis kan die “modder” van sonde wat aan ons vasklou, weggespoel word, wanneer Hy ons met Sy bloed reinig. 1 Johannes 1:7 “... en die bloed van Jesus Christus, sy Seun, reinig ons van alle sonde.” Dan word aan hierdie persoon ’n nuwe kleed gegee, ’n kleed van God, dit is die getuienis dat hy/sy ’n nuwe mens geword het. 2 Korinthiërs 5:17 “Daarom, as iemand in Christus is, is hy ‘n nuwe skepsel; die ou dinge (modder van sonde) het verbygegaan, kyk, dit het alles nuut geword.” Johannes 1:12 “Maar almal wat Hom aangeneem het, aan hulle het Hy mag gegee om kinders van God te word, aan hulle wat in sy Naam glo.”

Nie meer word ons geoordeel deur die dinge wat ons verkeerd gedoen het nie (soos lieg, skinder, steel of enige moedswillige sonde) maar ons is vrygespreek deur Sy reddende genade wat Hy aan ons bewys het, en dit alles is ’n geskenk van God – gratis! Ja, ons is gereinig en totaal vernuwe en vry.

Mag elke leser vandag na God soek, om bevry, vergewe en verlos te word en ja, deur God beklee te word – met die blye versekering: 1 Johannes 4:4 “Julle is uit God, my kinders, ... omdat Hy wat in julle is, groter is as hy wat in die wêreld is.”

Ten slotte: Dra die kleed van God. 1 Johannes 5:13 “Dit het ek geskrywe aan julle wat glo in die Naam van die Seun van God (deur God geklee), sodat julle kan weet dat julle die ewige lewe het ...”

Mag God u vul met Sy seëninge.

Seëninge.
Yvonne Slabber

08/06/2026

Teksvers: Johannes 1:7 “Hy (Johannes) het tot ‘n getuienis gekom om van die lig te getuig, sodat almal deur hom sou glo.”

Hofverrigtinge sonder getuies is leeg en doelloos. Getuies in ’n hof is nie net toeskouers nie – hulle getuig (vertel) wat hulle gesien en ervaar het. Dieselfde is waar van ons getuienis vir Christus. Ons moet getuig van Sy dood en opstanding want dit het vir ons die ewige lewe gebring.

Toe Johannes die Doper die mense van Jesus vertel het, het hy gesê wat hy geweet het. Johannes 1:29 “... Dáár is die Lam van God wat die sonde van die wêreld wegneem!” Maar hy het ook gesê (vers 30) “Dit is Hy van wie ek (vir julle) gesê het: Ná my kom ‘n man wat voor my geword het, want Hy was eerder as ek.” Johannes het geen eer vir homself geneem nie. Hy het AL die eer aan Jesus gegee. Hy sê duidelik in Johannes 1:14 “... en ons het sy heerlikheid aanskou, ‘n heerlikheid soos van die Eniggeborene wat van die Vader kom—vol van genade en waarheid.”

Paulus het hierop uitgebrei toe hy vir die jong Timótheüs gesê het in 2 Timótheüs 2:2 “en wat jy van my gehoor het onder baie getuies, vertrou dit toe aan getroue manne wat bekwaam sal wees om ook ander te leer.”

As Christene word ons ook na die hofsaal van die wêreld gebring om aktief as getuies vir Jesus te getuig. Ons is nie net toeskouers nie, ons getuig van die waarheid en van Sy dood en opstanding en oor Sy verlossing van ons sonde wat ons ervaar het. Ons stemme kan en moet in ons werksplek, buurt, kerk en onder ons familie en vriende gehoor word. Ons kan lewende en aktiewe getuies wees wat aan almal met wie ons in aanraking kom, deur ons lewenstyl en gedrag en optrede, van die werklikheid van Jesus in ons lewe vertel.

Sal u vandag ’n getuie wees van Jesus se reddings-krag en wat Hy vir ons gedoen het en wat Hy elke dag vir u beteken? Sal u dit elke dag doen?

Mag God u help en seën.

Seëninge.
Yvonne Slabber

07/06/2026

Teksvers: Hebreërs 13:15 “Laat ons dan gedurig deur Hom aan God ‘n lofoffer bring, dit is die vrug van die lippe wat sy Naam bely.”

Onlangs het ’n jongman in ’n sekere gemeente verneem dat hy besig was om sy sig te verloor. Hy ken die Here en dit het almal verbaas toe hy sê: “Ek gaan aanhou om God elke dag te loof want Hy het sóveel vir my gedoen.”

Jesus het vir ons, en vir dié jongman, ’n grondige rede vir ons nimmereindigende lof gegee. Matthéüs 26 vertel vir ons dat Jesus die Laaste Avondmaal (of Pasga-maal) met Sy dissipels gedeel het, die nag voordat Hy gekruisig is. Vers 30 wys hoe hulle dié ete afgesluit het: “En nadat hulle die lofsang gesing het, het hulle uitgegaan na die Olyfberg.” Hulle het “die lofsang” gesing. Jesus het kort tevore vir hulle gesê dat Hy gaan sterwe. Dit was nie net enige lied wat hulle dié nag gesing het nie – dit was ’n loflied. Vir baie jare het die Jode ’n versameling Psalms genaamd “Die Hallel” tydens Paasfees gesing. Hallel is die Hebreeuse word vir “lof.” Ons lees die pragtige lofliedere in Psalms 113 – 118. Wanneer u en ek deur donkerte gaan (teëspoed of wanneer die dood ons huis besoek) dan voel ons nie om ’n loflied te sing nie.

Ons kan wel die Here loof en prys met ’n loflied omdat Hy ons gered het. Psalm 118:21 “Ek wil U loof, omdat U my verhoor het en my tot heil geword het.” Vers 19 “Maak oop vir my die poorte van die geregtigheid; ek wil daardeur ingaan, ek wil die HERE loof.” Wanneer die Here Sy goedheid op ons uitstort, ongeag ons omstandighede, kan ons sing (Psalm 118:24) “Dit is die dag wat die HERE gemaak het; laat ons daaroor juig en bly wees.”

Toe Jesus saam met Sy dissipels tydens die Paasfees-maal gesing het, het Hy vir ons al die rede gegee om ons oë bo ons onmiddellike omstandighede op te hef. Ons kan Hom vandag loof en prys, ’n loflied aan Hom toebring, omdat Hy ons só lief gehad het dat Hy ons sondes en siektes aan die kruis gedra het. Loof Hom vir Sy getrouheid. Halleluja!

Seëninge.
Yvonne Slabber

06/06/2026

Teksvers: Johannes 5:39 & 40 “Julle (Fariseërs) ondersoek die Skrifte, omdat julle meen dat julle daarin die ewige lewe het; en dit (Skrifte) is dié wat van My getuig. En julle wil nie na My kom om die lewe te hê nie.”

Wanneer ons met ’n nuwe projek of nuwe idees na vore kom en na baie aanbevelings luister en oorweeg, vra ons: “Wat sê die kenners?” ’n Bekende koerantrubriek skrywer het gesê: “Kenners besit die vermoë om ongemaklike en ingewikkelde sake hopeloos mis te tas en is dikwels verkeerd in hul opsomming daarvan.”

In 1928 het Henry Ford gesê dat hedendaagse regerings te intelligent is om ooit weer in oorloë betrokke te raak,” hy was duidelik totaal verkeerd! Talle “kenners” is verkeer bewys deur die praktyk.

Daar is net Een Persoon Wie se woorde altyd betroubaar is, te alle tye en dit is Jesus Christus, onse HERE. Hy het in sterk bewoording en krag die “kenners” teëgestaan. Die godsdienstige leiers in Jesus se dae het met sterk bewoording aangedui dat “hulle weet” wat die waarheid is. Hierdie teologiese leiers het gemeen dat hulle alles weet omtrent die Messias, wat hulle gemeen het, nog sou kom. Hulle het ywerig verkondig dat die Messias wat sou kom, ’n sterk politieke leier sou wees wat sy volk polities sou bevry.

Jesus het hulle vermaan: “Julle ondersoek die Skrifte ... en dit is dié wat van My getuig. En julle wil nie na My kom om die lewe te hê (ontvang) nie.” Hy het die “hart van die Evangelie” wat hulle misgekyk het, aan hulle uitgewys: “Julle wil nie na My kom om die lewe te hê (ontvang) nie.”

Ons is reeds halfpad deur die jaar 2026 en daar het sedert 1 Januarie talle voorspellings deur teologiese leiers uitgegaan en ook deur politici, maar die vraag is: “Wat sê die Bybel?” Die Woord is baie duidelik en spreek onomwonde – dieselfde woorde wat Jesus aan Nikodemus, ’n fariseër en owerste van die Jode, gesê het: Johannes 3:3 “Jesus antwoord en sê vir hom: Voorwaar, voorwaar Ek sê vir jou, as iemand nie weer gebore word nie, kan hy die koninkryk van God nie sien nie.” Dan tas hierdie owerste en fariseër Jesus se woorde heeltemal mis want hy sê: (vers 4) “Nikodémus sê vir Hom: Hoe kan ‘n mens as hy oud is, gebore word? Hy kan tog nie ‘n tweede keer in die skoot van sy moeder ingaan en gebore word nie?” Vers 5 “Jesus antwoord: Voorwaar, voorwaar Ek sê vir jou, as iemand nie gebore word uit water (natuurlike geboorte is uitwater) en Gees (deur die werking van die Heilige Gees wat in jou kom woon) nie, kan hy in die koninkryk van God nie ingaan nie.”

Wanneer ’n verlore sondaar na Jesus kom vir redding en verlossing, sê Jesus Self in Johannes 6:37 “... Ek sal hom wat na My toe kom, nooit uitwerp (wegstuur) nie.”

Wanneer iemand na Christus kom, in berou en sondebelydenis, belowe 1 Johannes 1:9 “As ons ons sondes bely, Hy is getrou en regverdig om ons die sondes te vergewe en ons van alle ongeregtigheid te reinig.”
1 Johannes 1:7 “... en die bloed van Jesus Christus, sy Seun, reinig ons van alle sonde.”
Johannes 1:12 “Maar almal wat Hom aangeneem (ingenooi) het, aan hulle het Hy mag gegee om kinders van God te word, aan hulle wat in sy Naam glo.”
1 Korinthiërs 3:16 “Weet julle nie dat julle (nou) ‘n tempel van God is en die Gees van God in julle woon nie?”
Dan getuig die Gees van God wat in jou woon: 2 Korinthiërs 5:17 “Daarom, as iemand IN Christus is, is hy ‘n nuwe skepsel; die ou dinge het verbygegaan, KYK, dit het alles nuut geword.”

Dit is wedergeboorte. Wanneer die Gees in ons kom woon en AL die ou dinge verbygegaan het en dit sigbaar word. Mense sal die verskil dadelik opmerk want niemand is dieselfde ná wedergeboorte nie.

Seëninge.
Yvonne Slabber

05/06/2026

Teksvers: 2 Petrus 1:3 “Immers, sy goddelike krag het ons alles geskenk wat tot die lewe en godsvrug dien, deur die kennis van Hom wat ons geroep het deur sy heerlikheid en deug.”

C.K. Chesterton was ’n Christelike skrywer en kunstenaar in Engeland (1874-1936). Sy kunswerke het bestaan uit prente wat hy met gekleurde bordkryt op bruinpapier geskets het. ’n Artikel vertel dat hy een middag besig was met ’n belangrike skets, toe hy skielik hardop uitbars van die lag. Hy was besig om in die veld te skets. Hy het kort tevore ontdek dat die wit bordkryt opgebruik was en hy het dit dringend nodig gehad om sy kunswerk te voltooi. Hy het gefrustreerd opgestaan en weggestap van die esel en teruggekyk en toe begin hy lag. Die artikel meld dat koeie wat daar naby gewei het, verskrik opgekyk het. Chesterton het skielik besef dat die grond onder sy voete poreuse kalksteen was – die aarde se ekwivalent van wit bordkryt. Hy het ’n stukkie afgebreek en sy tekening hervat en dit voltooi.

Net soos Chesterton besef het dat hy “op ’n pakhuis van bordkryt sit,” het kinders van die Here ten alle tye God se onbeperkte geestelike, goddelike krag en hulpbronne binne hulle bereik. “Immers, sy goddelike krag het ons ALLES geskenk wat tot die lewe en godsvrug dien ...” God gee dit as “geskenk” aan dié wat Hom vrees en in gehoorsaamheid volg en dien.

Ons voel só dikwels dat iets ontbreek in ons geestelike lewe, in ons geestelike toerusting. Miskien voel jy dat jou geloof swak is of dat jy wysheid, geduld en genade kortkom om te volhard in jou geestelike roeping waarvoor God jou geroep het – ook in die alledaagse take in jou beroep. As jy Christus waarlik ken en in ’n verhouding met Hom lewe, dan het jy alles “in Sy goddelike krag” en Hy gee dit aan elkeen wat daarvoor bid, want Christus het reeds voorsiening gemaak om elke behoefte in ons hart en lewe, te vervul. Filippense 4:19 “En my God sal elke behoefte van julle vervul na sy rykdom in heerlikheid deur Christus Jesus.”

Deur Christus Jesus het jy toegang tot die Vader. Die Een wat genadiglik alle dinge in Sy hande hou en dit aan Sy kinders (as geskenk) gee.

Neem vandag vrymoedigheid om na die Vader te kom want Hy sal aan jou gee wat jy nodig het – ook die begeertes van jou hart. Hebreërs 4:16 “Laat ons dan met vrymoedigheid na die troon van die genade gaan, sodat ons barmhartigheid kan verkry en genade vind om op die regte tyd gehelp te word.”

Seëninge.
Yvonne Slabber

03/06/2026

Teksvers: Filippense 3:8 “Ja waarlik, ek ag ook alles skade om die uitnemendheid van die kennis van Christus Jesus, my Here, ter wille van wie ek alles prysgegee het en as drek beskou, om Christus as wins te verkry.”

Herwinning van rommel en “weggooigoed” is blykbaar ’n baie gewilde, maar sensitiewe stokperdjie of selfs beroep want baie verbeelding, kennis, toewyding en vaardigheid word vereis. Ek lees van ’n man, genaamd Adam Winter, wat die wêreld deurkruis op soek na rommel wat hy kan hernieu en in “iets anders” en “iets mooi en bruikbaar” kan omskep. Hy omskep hierdie waardelose goed, soos koperdraad, plastiek, selfs ou lappe, in iets nuttig en bruikbaar.

Nadat Paulus sy lewe aan die Here oorgegee het, het hy besef dat al sy vorige sogenaamde “goeie dade” eintlik waardeloos was. Hy noem dit selfs “drek” wat beteken dit is eintlik vuil en afstootlike dinge. In Filippense 3:7 sê hy: “Maar wat vir my wins was, dit het ek om Christus wil skade geag.” Die 1983 Vertaling lui: “... Ter wille van Hom het ek alles prysgegee en beskou ek dit as verwerplik sodat ek Christus as enigste bate kan verkry.”

Paulus was in die Joodse reg opgelei en was ’n gewelddadige man wat nie geskroom het om Christene te vervolg en te pynig nie (Handelinge 9:1 & 2). Maar ná sy ontmoeting met Christus self, op die pad na Damaskus, was hy ’n veranderde mens, want sy hart is in en deur Christus vernuwe.

1 Korinthiërs 5:17 & 18 “Daarom, as iemand in Christus is, is hy ‘n nuwe skepsel; die ou dinge het verbygegaan, kyk, dit het alles nuut geword. En dit alles is uit God ...” Paulus se deurmekaar, gewelddadige verlede was omskep, heeltemal nuut gemaak, in die lewe en liefde van Christus. Hy skryf in 2 Korinthiërs 5:14 “Want die liefde van Christus dring ons.” Kan dit dieselfde Paulus (Saulus) wees wat die Christene só erg vervolg het? Lees gerus weer vers 17 “... kyk, dit het alles nuut geword.” Nie alleen was Paulus se hart vernuwe nie, maar ook sy uiterlike lewe – dit het in ’n stroom van liefde verander.

Sodra ons ons lewe in volkome oorgawe aan Hom oorgee, sal mense “kyk en sien” hoedat ons harte, optrede, dade, woorde, ons totale lewe, nuut geword het want Christus maak alles nuut.

Voel jou lewe waardeloos, nutteloos en, soos Paulus, ’n wrak? Kom na Christus en Hy sal “alles nuut maak” vir Sy koninkryk en Hy sal aan jou die ewige lewe gee.

Mag jy, soos Noag, genade vind in die oë van die Here.

Seëninge.
Yvonne Slabber

02/06/2026

Teksvers: Hebreërs 13:6 “Daarom kan ons met alle vrymoedigheid sê: Die Here is vir my ‘n Helper, en ek sal nie vrees nie; wat sal ‘n mens aan my doen?”

Wat ’n wonderlike getuienis! Wat ’n wonderlike Helper!

Ek het onlangs ’n dame in die sorgeenheid van ’n aftreeoord besoek. Haar herhaalde woorde aan my was: “Ag, as my omstandighede net nie so sleg was nie!” Ek het haar probeer bemoedig deur haar te verseker dat God ons, en vir haar in besonder, nooit sal begewe of verlaat nie en ek het haar aangemoedig om haar daarop toe te lê om tevrede te wees met wat sy het. Sy het wonderlike versorging ontvang. Sy kan ook self na die eetsaal stap. Sy kan haarself versorg en self was en aantrek, terwyl ander in dieselfde sorgeenheid deur die personeel versorg moes word. Haar gesigsuitdrukking was duidelik: “Wat wil jy vir my sê?” Hebreërs 13:6 gee vir ons die antwoord, uit God se Woord, uit God se hart: “Daarom kan ons met alle vrymoedigheid sê: Die Here is vir my ‘n Helper ...”

Wanneer iemand God vrees, hoef hy/sy vir niks daarbuite te vrees nie. Die teksvers lui wel: “... wat sal ‘n mens aan my doen?” maar dit kan ook vir ons beteken: “wat kan die ‘lewe’ aan ons doen?” Ons moet ons vasmaak aan Sy beloftes want “God is geen man dat Hy sou lieg nie; of ‘n mensekind dat dit Hom sou berou nie. Sou Hy iets sê en dit nie doen nie, of spreek en dit nie waar maak nie?” (Númeri 23:19)

Om vergenoeg te wees, met ander woorde tevrede, is om ‘vol vrede’ te wees. Aanpassing by nuwe omstandighede kom nie natuurlik nie. Paulus verklaar duidelik in Filippense 4:11 “... want ek het geleer om vergenoeg te wees met die omstandighede waarin ek is.”

Om “te leer” is om iets te wete te kom of iets “aan te leer” wat ek nie voorheen gedoen het nie. Met ander woorde, ek moet iets “beoefen.” Vergenoegdheid kan slegs verkry word deur onderwerping, toegewing en aanvaarding, en dit kan slegs deur oefening bereik word. Oefening beteken om dieselfde ding by herhaling te doen. Dissipline is ook baie belangrik.

’n Groot vyand van vergenoegdheid is selfbejammering en dit kan alleen oorkom word deur lofprysing en aanbidding. Wanneer jy God loof deur sang of dank-gebed, wyk selfbejammering. Dit alles moet deur ’n keuse geskied: “Ek sal nie meer toegee aan hierdie gees van onvergenoegdheid nie.”

Mag God ons help om Hom te eer deur te bid: “Dankie, Here, vir wat U my gegee het. Ja, vir wat ek het.”

Seëninge.
Yvonne Slabber

Address

108 De Meer Street, Eduan Park
Polokwane
0699

Telephone

+27824595329

Website

Alerts

Be the first to know and let us send you an email when EG Kerk Pietersburg Emmanuel posts news and promotions. Your email address will not be used for any other purpose, and you can unsubscribe at any time.

Contact The Place Of Worship

Send a message to EG Kerk Pietersburg Emmanuel:

Shortcuts

Share

Category