EG Kerk Pietersburg Emmanuel

EG Kerk Pietersburg Emmanuel 'n Toevlug vir verlorenes, 'n Tuiste vir kinders van God.

13/09/2026

Teksvers: Hooglied 2:11 “Want kyk, die winter is verby, die reëntyd is oor, dit het verbygegaan.”

Toe Jesus aan die kruis gesterf het, het Hy gesê: “Dit is volbring,” en Jesus het dit bedoel. Sy reddingswerk was voltooi. Vir elke sondaar wat ná die kruisiging na Hom toe sou kom vir verlossing van sonde en om vergifnis en reiniging van die hart te vind, is die winter verby. Ja, as u waarlik Jesus lief het en Hom volg in gehoorsaamheid is u winter ook verby, want jou naam is in die Boek van die Lewe geskryf en jy kan uitsien na ’n hoopvolle toekoms. Jeremia 29:11 “Want Ék weet watter gedagtes Ek aangaande julle koester, spreek die HERE, gedagtes van vrede en nie van onheil nie, om julle ‘n hoopvolle toekoms te gee.”

Ek wil u ook bemoedig, indien u ’n moeilike tyd in u lewe beleef of tye van teëspoed ervaar, soek die Here en neem hierdie kosbare belofte uit Sy Woord aan: (Jesaja 64:4) “Van ouds af tog het niemand dit gehoor of verneem nie, geen oog het ‘n God gesien wat werksaam is vir wie op Hom wag nie, behalwe U.”

Ek en my gesin het onlangs ’n dringende behoefte gehad aan ’n oplossing en uitkoms in ’n baie groot saak en ons het gebid en gebid en blykbaar het niks gebeur nie. Tot op ’n dag, so twee weke gelede, toe die Here uit ’n onverwagte bron ons gebede verhoor het, want God was werksaam en sekere dinge moes eers in plek val, en daar was Sy uitkoms! Ons was oorweldig in ons dankbaarheid en het al die lof en eer aan Hom gegee. Jesaja 64:4 het werklik waar geword. Prys Sy Naam!

Vertrou op Hom, Hy sal jou nooit teleurstel nie.

Seëninge.
Yvonne Slabber

12/09/2026

Teksvers: Psalm 40:12(b) “... laat u goedertierenheid en u trou my altyddeur behoed.”
2020 Vertaling “Laat u troue liefde en waarheid my altyd veilig hou (bewaar).”

Dawid getuig dat God se liefde (goedertierenheid) en trou vir hom altyd wys wat reg en verkeerd is. Ek het onlangs ’n onaangename ervaring gehad toe ’n sakeman my geskakel en ’n saak met my bespreek het. Kort ná ons gesprek het ’n dame van sy sakeonderneming my geskakel omdat hy sowaar letterlik alles wat ek hom op sy vrae geantwoord het, totaal en al verdraai en ’n totale ander scenario geskep het. Ek was vir etlike dae lank in my gees ontstig totdat ek sy kantoor gekontak het en die saak, soos dit die waarheid is, aan hulle verduidelik het. Dit is die wêreld waarin ons woon. Die waarheid in ALLE sake is uiters skaars.

Ons moet ALTYD die waarheid praat, ongeag wat die gevolge mag wees. Jongmense soek na die waarheid en ek begryp dit nou beter omdat ons in ’n leuenagtige wêreld lewe. God verwag ook van elke Christen-ouer om aan hulle kinders, selfs wanneer hulle kleuters is en ook wanneer hulle in hul tienerjare is, te wys dat ons altyd ’n reguit pad stap in alle aspekte van ons lewe. En ons moet ons kinders leer, dit inskerp, dat “leuens nie betaal nie.”

Ons moet, deur ons leefwyse ons geestelike norme duidelik uitlewe, veral wanneer jy in ’n kantoor of instansie werk waar die Here nie gedien en geëer word nie.

Ek wil vandag aan u ’n uitdaging stel om op te staan vir Christus, hetsy in u huisgesin of besigheidstransaksies, en om in elke saak God se ligdraer van die waarheid sal wees.

U medewerkers, asook u gesin, sal u respekteer wanneer u altyd en oral God se ligdraer is en wees verseker, u sal, onwetend, ’n siel van die verderf red.

Mag u genade vind om soos Josua standpunt in te neem. Josua 24:15 “... kies dan vir julle vandag wie julle wil dien ... maar ek en my huis, ons sal die HERE dien.” Leef dan daagliks hierdie keuse uit in u daaglikse lewe, optrede en gesprekke.

Mag God u help.
Yvonne Slabber

11/09/2026

Teksvers: Filippense 4:6 “Wees oor niks besorg nie, maar laat julle begeertes in alles deur gebed en smeking met danksegging bekend word by God.”

Bekommernis lei tot spanning. My kinders terg my dikwels omdat ek bekommerd raak oor onseker sake. Dan sê hulle vir my: “Mamma moenie só bekommerd wees nie.” Ongelukkig is bekommernis nie ’n eenvoudige skakelaar wat afgeskakel kan word en dan verdwyn dit nie. Wanneer daar ’n lysie op die bedkassie lê met die opskrif: “Om te doen,” dan bekruip bekommernis my ongemerk en voordat ek presies weet wat gebeur, vind ek myself in ’n kolk van bekommernis.

Paulus laat dit só eenvoudig klink: “Wees oor niks besorg nie, maar laat julle begeertes in alles deur gebed en smeking met danksegging bekend word by God.” Uit my eie lewenservaring kan ek getuig dat hierdie teksvers die volle waarheid bevat.

Psalm 46:11 “Laat staan en weet dat Ek God is ...” Amplified Vertaling: “Let be and be still and know (recognize, understand) that I am God.” King James Vertaling: “Be still, and know that I am God.” Die geheim in hierdie saak lê in die “stil wees en vertrou.”

Bekommernis benadeel jou en my liggame. In die gemeente waar ek aanbid kom die kinders van die Here Sondagaande bymekaar om oor ernstige sake rakende die gemeente en die saak van God, te bid. Verlede week het ’n man die biduur bygewoon. Die onderwerp van bespreking was “Bekommernis en woede doen groot skade wanneer dit in ’n Christen se lewe toegelaat word.” Hy het die opmerking gemaak dat wanneer iemand regtig kwaad word, daal sy IK, daarom kan iemand, wanneer hy terugkyk ná ’n woede-uitbarsting, self nie sy eie dwase optrede glo nie! Dieselfde kan gesê word van bekommernis. Iemand het onlangs die opmerking gemaak: “Benoude katte maak benoude spronge,” en o wee, dan volg daar haastige, onwyse besluite wat geneem word.

Die Woord sê uitdruklik in Matthéüs 11:28 “Kom na My toe, almal wat vermoeid en belas is, en Ek sal julle rus gee.” Eers moet ons rustig en stil word in verootmoediging voor die Here en in onderwerping aan Sy wil, na Hom toe kom en dié bitter swaar las wat ons dra, by Sy voete neersit en moenie weggaan voordat jy Sy vrede in jou hart ervaar nie. Johannes 14:27 “Vrede laat Ek vir julle na, my vrede gee Ek aan julle; nie soos die wêreld gee, gee Ek aan julle nie. Laat julle hart nie ontsteld word en bang wees nie.”

Is jy bereid om jou hart stil te maak en in geloof en vertroue na Jesus, ons enigste Hulp, te gaan? Dan sal Hy jou nooit teleurstel nie en jy sal Sy vrede, die vrede wat net IN Hom is, in jou hart sien werk.

Vrede vir u!

Seëninge.
Yvonne Slabber

10/09/2026

Teksvers: 1 Thessalonicense 5:17 “Bid sonder ophou.”

Gebed is die belangrikste deel van ’n kind van God se lewe. Dit is moontlik om gedurig te bid en ek wil u aanmoedig om vandag te bid, veral wanneer dinge nie goed gaan nie. Die Woord sê in Jeremia 33:3 “Roep My aan, en Ek sal jou antwoord en jou bekend maak groot en ondeurgrondelike dinge wat jy nie weet nie.”

’n Tyd gelede was my dogter, ’n musiek onderwyseres, besig om baie laat in die nag aan ’n moeilike taak vir Unisa te werk, toe haar rekenaar onverwag “oppak” en o wee, baie ure se werk was blykbaar daarmee heen. Sy was verslae en het gebid en dié dringende saak aan die Here oorgegee en gaan slaap. Toe sy die volgende oggend vroeg opstaan en die rekenaar aanskakel, het dit honderd persent gewerk en al haar ure se harde werk het op die skerm verskyn! Is onse God nie groot nie? Prys Sy Naam!

Jesus woon in die hart van elke kind van God. Waar ons ook al vandag mag gaan, laat ons in volle geloof en vertroue op Hom, lewe. Die boer plant net die saad – die Here laat dit groei.

Mag die Here jou vandag seën en waarheen jy ook al vandag gaan, onthou dat die Here met jou gaan want Hy leef in jou. Jy hoef niks te vrees nie. Romeine 8:31 “Wat sal ons dan van hierdie dinge sê? As God vír ons is, wie kan teen ons wees?”

Neem vandag Sy wonderlike belofte met u saam. Psalm 56:10(b) “... dit weet ek dat God aan my kant is.”

Sterkte en seëninge.
Yvonne Slabber

09/09/2026

Teksvers: Jesaja 26:3 “U sal ‘n standvastige gesindheid in volle vrede bewaar, want hulle vertrou op U.”

Mense plaas hul vertroue op verskillende dinge. Sommige vertrou op hulle goeie, sterk bankbalans. Boere vertrou dikwels op die goeie oes wat hulle ingesamel het. Ander op ’n gesonde en florerende sakeonderneming. In ’n radio-onderhoud het iemand onlangs laat blyk dat hy op sy IK vertrou. Indien wel, skaats jy op dun ys.

God sê vandag aan u en my: “Vertrou op My en Ek sal jou volmaakte vrede gee.” (Psalm 9:11) Fokus jou hart en gedagtes op die Here en vertrou op Hom met jou hele wese en Hy sal dinge laat gebeur en sal jou nooit verlaat nie. Psalm 9:11: “En hulle wat u Naam ken, sal op U vertrou, omdat U die wat U soek, nie verlaat nie, o HERE!” Ons kan niks doen sonder die Here se krag en Sy seën nie.

Dikwels moet ons moeilike situasies aanvaar, sonder dat ons al die antwoorde ken. Maar die Here wat van alle dinge en omstandighede bewus is, sien ook nou hierdie saak raak. In Génesis 16:13 sê Hagar: “U is ‘n God wat sien. Want sy het gesê: Het ek hier ook gesien na Hom wat my sien?”

Moenie dat die vyand in u en my hart twyfel werk omdat ons nie vandag alles verstaan en begryp wat met ons, of om ons, gebeur nie. Vind uit presies wat die Here wil hê jy moet doen en doen dit dan met jou hele hart en laat die gevolge aan ons getroue Vader oor. Dan sal ons volmaakte vrede ervaar.

Mag God ons elkeen bewaar en seën.
Yvonne Slabber

08/09/2026

Teksvers: Matthéüs 5:39 “Maar Ek sê vir julle dat julle ‘n slegte mens nie moet weerstaan nie; maar as iemand jou op jou regterwang slaan, draai ook die ander een na hom toe.”

Daar bestaan baie stories rondom die tyd toe ons jongmanne in ons land, ná skool, weermag toe gegaan het. Een ware verhaal vertel van ’n jong Christen seun wat by ’n regiment aangesluit het waar etlike ervare, veteraan manne betrokke was. Hulle sersant was ’n rowwe man wat sy lewe lank ’n professionele soldaat was. Sy taalgebruik was dikwels nie mooi nie en hy was ’n strawwe drinker.

Een aand het hierdie sersant saam met ’n klompie jong soldate gaan drink. Toe hulle terugkom tref hulle dié jong man op sy knieë langs sy bed aan, besig om sy Bybel te lees en tyd met die Here deur te bring. Hulle het hom geterg en beledig. Die besope sersant het sy weermagstewels uitgetrek en verwoed na die jong man gegooi. Een van die staal punte het hom teen die agterkop getref en die wond het vreeslik gebloei. In sy dronkenskap het die sersant net daar omgeval en aan die slaap geraak. Toe die sersant vroeg die volgende oggend wakker word, was die eerste dinge wat hy onthou het hoe hy die vorige aand sy stewels na die jong Christen soldaat gegooi het. Hy het gewonder waar sy stewels was en toe hy afkyk staan hulle netjies lang sy bed, gepolitoer en blink gevryf. Toe besef hy dat die jong Christen dit gedoen het. Hy het in trane uitgebars en het langs dié jongman op sy bed gaan sit en vir hom gesê: “Seun, vertel my van jou Jesus, ek wil Hom ook volg.”

Was u al in u lewe sleg of onregverdig behandel? Is u onskuldig beskuldig van ’n saak waarin u geen aandeel gehad het nie? Nie? Dan wil ek vir u sê dat u nog net nie lank genoeg geleef het nie!

Elkeen wat hierdie oordenking vandag lees het sekerlik so ’n ervaring beleef. My vraag aan u vandag is: “Hoe sal u optree, of wat was u reaksie in die verlede, toe só ’n onregverdige situasie opgeduik het?”

Selfverdediging is ons normale reaksie, maar God sê deur die woorde van Jesus self: “... as iemand jou op jou regterwang slaan, draai ook die ander een na hom toe.” Dit is verseker nie ’n maklike opdrag om uit te voer nie, maar uit eie ervaring kan ek u verseker dat God diegene beloon wat op Hom vertrou en die ander wang draai.

Mag God ons help om in elke saak aan Hom gehoorsaam te wees.

Seëninge.
Yvonne Slabber

07/09/2026

Teksvers: 1 Samuel 3:3 ..”toe die lamp van God nog nie doodgegaan het nie en Samuel lê en slaap in die tempel van die HERE waar die ark van God was, het die HERE na Samuel geroep en hy het geantwoord: Hier es ek” vers 6 – 8 “Verder het die HERE Samuel weer geroep en Samuel het opgestaan en na Eli gegaan en gesê: Hier is ek, want u het my geroep, maar hy antwoord: ek het nie geroep nie, maar Samuel het die HERE nog nie geken nie en die HERE het Samuel weer geroep, die derde maal en hy het opgestaan en na Eli gegaan en gesê: Hier is ek, want u het my geroep.”

’n Dame vertel dat sy op ’n internasionale lughawe geland het, toe sy skielik oor die luidspreker haar naam hoor: “Paging Anne Cetas – paging Anne Cetas.” Sy dink toe dat sy seker êrens iets vergeet het en toe sy navraag doen by ’n dame wat vloer diens doen, is sy na ’n rooi telefoon verwys. En toe sy aan die operateur sê dat sy geroep is, antwoord hy dat hulle nie haar naam geroep het nie – hy ontken twee keer dat sy geroep was. Sy het nooit uitgevind waarom haar naam oor die luidspreker geroep was nie.

’n Jong seun, met die naam, Samuel, het sy naam gehoor, nie oor ’n luidspreker nie, maar deur God Self. Drie keer. Die Skrif sê dat “Samuel het die HERE nog nie geken nie.” So, toe moes die priester hom help om te begryp Wie hom geroep het. Daarna het God Sy wil geopenbaar, wat Sy plan met Samuel se lewe was.

God het ook ’n Plan vir elke lewe. Soms ken iemand nie die stem van die HERE nie, net soos Samuel en dan sê Hy: “Kom na My toe, almal wat vermoeid en belas is. Ek sal julle rus gee.” Dit is Sy stem wat elke mens roep om na Hom te kom vir verlossing en vergifnis.

Dikwels roep God Sy kinders weg van hul daaglikse bekende omgewing – soms na ’n ander werksplek waar Hy hul nodig het om vir Hom te getuig en arbei. Soms roep God iemand tot voltydse diens. Wanneer ek vandag God se stem hoor as Hy my roep, waar ek ook-al is, mag ek, soos Samuel sê: Hier is ek. Jesaja het gesê: Hier is ek, stuur my”. Miskien wil God vir my sê: Ek wil hê jy moet net hier bly – volg jy My.”

Ou Engelse lied lui:
Jesus calls me – I must follow
Follow Him to-day
When His tender voice is pleading
How can I delay?

Seëninge!
Yvonne Slabber

06/09/2026

Teksvers: Johannes 13:17 “As julle hierdie dinge weet, salig is julle as julle dit DOEN.”

Bruce Wilkenson skryf in een van sy boeke dat dit relatief maklik is om iemand te vind om te preek, organiseer, leiding te neem en opdragte uit te deel, maar wanneer jy iemand probeer vind wat gewillig is om voete te was, sal jy vind dat daar ’n tekort aan werkers is.

Gehoorsaamheid, nederigheid en diensbaarheid (ten alle koste) is nie populêr nie, selfs in godsdienstige kringe. God belowe vreugde en saligheid aan diegene wat in nederigheid dien (Johannes 13:17). God belowe eenheid in Christus. Hy belowe ook krag om soos Jesus te lewe (Johannes 13:15).

Nêrens in die Bybel belowe die Here dat Sy kinders altyd in rustige, kalm waters in die veiligheid van ’n hawe sal wees nie, maar Sy wil is dat ons in geloof sal uitvaar na die diep waters sodat ons ervaring in ’n geestelike sin, kan opdoen. Hy wil ook dat ons Sy krag ontvang om staande te bly. Hy wil aan ons wysheid in elke moeilike situasie, krag om aan te hou tot aan die einde en geloof om Hom selfs vir dié dinge wat onmoontlik is by mense te vertrou gee. Hy wil hê ons moet dit van Hom bid EN ontvang.

Hoe sal ek weet dat God die onmoontlike kan doen as ek nie die onmoontlik na Hom bring en uitkoms en antwoord ontvang nie? Die Skrif sê: “Gehoorsaamheid is beter as offerande.”

Ons moet waak om nie terug te gaan na ons ou lewenstyl, gedagtes en gewoontes nie, want Hy het alles nuut gemaak (2 Korinthiërs 5:17). As God jou en my roep om Hom te glo en volg, selfs in sake wat onmoontlik blyk te wees, sal Hy Sy kind wat ten volle Hom vertrou, nooit beskaamd laat nie (Jesaja 49:23b).

In die gemeente waar ek aanbid, is ’n bejaarde dame wat met kanker in haar rug gediagnoseer was. Sy het vir ’n geruime tyd behandeling ontvang wat haar baie siek, naar en kragteloos gelaat het. Toe die geneeshere in ’n stadium sê dat hulle eers gaan kyk wat gebeur, het sy vir voorbidding gevra en baie onlangs het die medici verstom gesê: “Die kwaadaardigheid is weg! Dit bestaan nie! Jy is skoon, tannie.” Prys die Here! Onse God is getrou en Hy eer dié wat Hom eer deur volkome op Hom te vertrou.

Wanneer ’n kind van God gewillig is om gehoorsaamheid saam met diensbaarheid in sy hart en lewe aan mekaar te bind, sal dié kind van die Here geestelike rykdomme en seëninge ontvang wat sy (en andere) se verstand te bowe gaan, al sou dit beteken dat hy “voete moet was.” Om aan hierdie gewilligheid van hart toegang te bied, moet ek my ten volle aan die wil en leiding van die Here en die leiding van die Heilige Gees oorgee en ek moet gewillig word om die ankers van my gemaklike lewe te lig en uit te vaar na die diep waters van die geestelike lewe, want Hy wag daar in die diep waters vir Sy kind om hom/haar te lei, bewaar en beloon, tot Sy eer.

Mag God ons help, seën en lei.

Seëninge.
Yvonne Slabber

05/09/2026

Teksvers: Handelinge 19:18 – 20 “En baie van die wat gelowig geword het, het belydenis kom doen en hulle dade bekend gemaak; en verskeie van die wat met towery omgegaan het, het die boeke bymekaargebring en voor almal verbrand; en hulle het die waarde daarvan bereken en gevind dat dit vyftig duisend silwerstukke was. So het die woord van die Here met krag gegroei en sterk geword.”

Wat ’n groot vuur moes dit nie gewees het toe hierdie mense God gevind het en hulle bekeer het van hul sondige lewe nie. Boonop was Éfese ’n goddelose stad. Ons lees in verse 24 en 25 dat Demétrius, ’n silwersmid, ’n maker van silwertempeltjies van Diana, ’n aansienlike verdienste aan ambagsmanne verskaf het en toe hy sien wat gebeur het en die groot vuur wat duisende sikkels silwer se waarde verbrand het, het hy opstandig geword en die ander werkers aangehits om Paulus te vervolg en dood te maak. Volgens Handeling 19: 31 & 32 en ook 20:1, het sy optrede veroorsaak dat sy vriende Paulus aangeraai het om weg te gaan omdat sy lewe in gevaar was.

Maar God was aan die werk! Daarom het hierdie nuwe bekeerlinge so drasties getuig, ook deur hulle dade, deur die dinge van hul ou lewe (boeke, beelde ens.) te verbrand. Die wêreld kon nie die werk wat God in ’n mens se hart doen begryp nie. Hulle verstaan byvoorbeeld ook glad nie wanneer ’n strawwe drinker hom tot God bekeer en hy nooit weer alkohol inneem nie. Maar dit is hoe God in die ou tyd, en vandag steeds, werk. 2 Korinthiërs 5:17 “Daarom, as iemand in Christus is, is hy ‘n nuwe skepsel; die ou dinge het verbygegaan, kyk, dit het alles nuut geword.”

Dit is hartseer dat mense ’n besluit neem om Jesus te volg, maar hulle maak nie, soos die mense daardie dag in Éfese, al hul ou werke en gewoontes, selfs onheilige stokperdjies, tot niet nie.

Verdra my asseblief as ek vir u vertel dat ek op 12-jarige ouderdom, onder wyle Ds. Saunders se bediening op 24 November 1954, my hart en lewe vir God gegee het. Nadat ek onder sy leiding my sonde bely en die bloed van Jesus my sonde weggewas en ek Jesus aangeneem het as my Here en Verlosser, het hy nie vir my gesê dat ek restitusie moes doen oor dinge wat ek verkeerd gedoen het nie, maar GOD HET. Omtrent ’n jaar of wat tevore het ek vir ’n onderwyseres ’n leun vertel toe ek nie geleer het vir ’n toets nie. Ek het na die juffrou gegaan en dit bely en gesê dat ek vir haar gelieg het en het haar om verskoning gevra. Ander dinge wat ek as 12-jarige verkeerd gedoen het, het ek gaan bely teenoor die persone wat ek te na gekom het. Daarna het ek, as jong kind, die vrede van Jesus en die versekering dat Hy my gered het, in my hart gevind.

Ware verlossing breek die bande van die “ou dinge” van die lewe voor Christus beheer geneem het. Die bloed van Jesus reinig ons van alle sondes, ook die sondes van die verlede (1 Johannes 1:7 en 9).

Het u waarlik gebreek met u “ou lewe?”

Mag God aan elke Christen wat Sy koms verwag, genade skenk om sy hart, sy geestelike huis, skoon te maak en tot Sy eer te lewe.

God gee Sy krag aan elke opregte, eerlike hart om gereed te maak, want “miskien kom Hy vandag” en elkeen sal voor God staan om loon te ontvang. Dit is die moeite werd om gehoorsaam te wees aan die Heilige Gees se stem.

Seëninge.
Yvonne Slabber

04/09/2026

Teksvers: Filippense 2:5 “Want hierdie gesindheid moet in julle wees wat ook in Christus Jesus was.”

Om na ’n ander land te verhuis en daar te gaan woon, moet jy dié land se grens oorsteek. Soms is dit tot voordeel van die emigrant om na ’n ander land te verhuis, maar dikwels keer hy terug en kom liewer weer in sy eie land woon.

Jesus het Sy Vader se huis in die hemel verlaat om in ’n sondige, verlore wêreld te kom woon. Hy het Sy regte as Koning verruil om as ’n dienskneg in armoede te lewe. Wat ’n dramatiese verskil was dit nie vir Hom, Jesus Christus, die Sondelose Seun van God, om in ’n wêreld te kom woon wat deur sonde deurdring en beheer word, met die kruis in Sy gedagte nie. Johannes 3:17 lui “Want God het sy Seun in die wêreld gestuur nie om die wêreld te veroordeel nie, maar dat die wêreld deur Hom gered kan word.” Wat ’n keuse was dit nie vir die Seun van God nie! Johannes 3:16 “Want so lief het God die wêreld gehad, dat Hy sy eniggebore Seun gegee het, sodat elkeen wat in Hom glo, nie verlore mag gaan nie, maar die ewige lewe kan hê.”

O, wat ’n gewillige offer was Jesus nie bereid om te bring nie! Hy het as ’n gehoorsame Dienskneg gekom om die wêreld, ja jou en my, van die verdoemenis te red.

Jesus het nie alleen na die aarde gekom om vir die verlore mensdom ’n weg na die hemel moontlik te maak nie, maar Hy het ook gekom om Sy bruid voor te berei sodat sy gereed sal wees wanneer Hy weer kom om Sy kinders te kom haal.

Eerstens kom Hy, deur die Heilige Gees, in ons harte woon en dan plant Hy Sy gesindheid en liefde in ons hart sodat ons net soos Hy sal lewe. Net so afgesonder vir God (heilig), net so gehoorsaam aan God se stem, soos Hy aan Sy Vader se stem gehoorsaam was. Hy plant Sy “gesindheid” (Filippense 2:5) in ons gemoed en dan leer Hy Sy kinders om Sy wil te doen sodat ons kan bid dat Sy wil in ons lewe geskied “soos in die hemel, net so ook op die aarde.”

As u bereid is om nou te kniel en Sy Gees, die Heilige Gees, toe te laat om in u hart en gemoed “dieselfde gesindheid wat in Christus was” in u hart en gemoed in te plant en dan uit te gaan en as Sy getuie te lewe soos Jesus gelewe het, ook in ’n tyd soos vandag, altyd en oral Sy gesindheid te openbaar, sal Hy u help om Sy Vader se hart te verbly.

Dit is moeilik om Sy gesindheid te openbaar wanneer ’n mens deur ander verkeerd en onregverdig behandel word. Dit is nie maklik om iemand wat jou erge skade aandoen te vergewe nie, of om altyd te vra: “Wat sou Jesus gedoen het?” nie. Dit is nie altyd maklik om die werke van die bose te herken en hom te weerstaan nie, maar ’n kind van God kan altyd verseker wees van sy Hemelse Vader se sterke hand om Hom/haar vas te hou en reg te lei.

Mag u en ek vandag genade vind om die woorde van die ou Hallelujalied te sing en uit te lewe:
“Waar Hy lei, daar sal ek meegaan x 3
Gaan ek met Hom, met Hom, tot die end.”

Mag die Here vandag u lei sodat die meetsnoere vir u in lieflike plekke sal val.

Seëninge.
Yvonne Slabber

Address

108 De Meer Street, Eduan Park
Polokwane
0699

Telephone

+27824595329

Website

Alerts

Be the first to know and let us send you an email when EG Kerk Pietersburg Emmanuel posts news and promotions. Your email address will not be used for any other purpose, and you can unsubscribe at any time.

Contact The Place Of Worship

Send a message to EG Kerk Pietersburg Emmanuel:

Shortcuts

Share

Category