NG Gemeente Onrusrivier

13/03/2026

Vrydag refleksie - 13 Maart

Dit was een van die warmste weke in 'n lang tyd. Woensdag was die ergste. Soos iemand gesê het: die ergste koue is nou gebreek. 'n Vriend van my het altyd, wanneer dit so warm was, gesê ons moet maar twee-twee buite rondbeweeg want as ou "Spike" (die son) jou alleen kry, brand hy jou dood.

Ja nee, hierdie Afrika-sonnetjie kan nogal warm word. Ek onthou daai hitte in die bosveld en die karoo wat so uit die grond uit opslaan. En die dodelike hitte op die paradegrond in die weermagdae. En tog is dit een van die dinge wat Suid Afrikaners mis as hulle in ander lande gaan woon.

In Jona se verhaal gaan sit Jona onder 'n komkommerplant en wag dat Nineve vergaan (Jona 4). Dan stuur die Here 'n warm wind wat die komkommerplant laat doodgaan. Die koelte is weg; Jona sit nou in die son. Dis dodelik warm – net soos gister. Ons lees die son het hom "op sy kop gesteek en hy het baie swak geword" (Jona 4:8). My vriend sou gesê het ou "Spike" het hom alleen betrap en hom seergemaak.

Dit was vir Jona so erg dat hy gewens het hy gaan dood. Dis hoe die lewe is sonder koeltes en koeltebome. Dis dodelik. Dis nie lekker nie. D**k net hoe die aarde sou wees sonder koeltebome. Daar is niks so lekker soos die koelte op so 'n warm dag. Ons almal soek graag die koeltes van koeltebome, sonsambrele en gazebo's.

Ek d**k God is soos 'n koelteboom. Jy kan by Hom kom skuil. Jy kan kom sit en afkoel - tot rus kom. Wegkruip. Asemhaal. Tot rus kom.

Die kerk moet ook soos 'n koelteboom wees; en elkeen van ons ook. Ons hoor gereeld dat die aarde al hoe warmer word (globale verwarming); ook op 'n ander vlak word die wêreld warmer deur oorloë, armoede, siektes,ens.

Mag jy vandag sommer net vir iemand koelte wees. Skadu. Rus. Skuiling. 'n Koel briesie. En mag jy self in God se skadu vertoef en ander innooi in sy koelte...

Mooi dag!
Coenie

06/03/2026

Nog net twee weke!!!

06/03/2026

Vrydag refleksie - 6 Maart

Hier is 'n bietjie humor na 'n moeilike week:

"Ek sluit mos vir 'n bietjie ekstra geld die begrafplaas se hek oop, vroeg in die oggend en weer toe, laat in die aand. Vanaand kom daar 2 ou tannies aan en hulle vra my of ek nie wil saam stap nie, want hulle wil iemand finaal gaan groet voor hulle die volgende dag weer land uit vlieg. Hulle sê hulle is vreeslik bang om so alleen in die begrafplaas rond te stap. Ek sê toe ja ek stap met graagte saam en voeg by: "Ek was ook altyd bang om alleen in 'n begrafplaas te loop toe ek nog geleef het."
(As iemand weet wie hulle is kan hul my laat weet, ek het hulle kieries en vals tande by my!")

Ons almal is bang vir iets. Meeste mense is bang vir spoke (soos die twee tannies). Party mense is bang vir spinnekoppe; ander vir slange. Kleintyd was ek doodbang vir 'n tandarts - ek is nogsteeds net so bang. En ek is bang vir weerlig - ek kruip weg vir swaar weer. Maar my grootste vrees is om voor 'n kerk vol mense te staan en nie voorbereid te wees nie, of láát. Ek droom dit amper elke Saterdagaand - dis my grootste nagmerrie.

Vrees is nie altyd sleg nie. 'n Goeie vriend, wat geduik het en ook valskerm gespring het, het eendag gesê dat as jy nie meer bang is om te duik nie, moet jy nie meer duik nie. As jy mak raak vir valskerm spring, moet jy dit nie meer doen nie. Ek d**k dat as jy nie meer bang is om te preek nie, moet jy dit nie meer doen nie. Dis 'n groot verantwoordelikheid.

Gesonde vrees is deel van ons lewens. Dis goed om bang te wees vir spoed, hoogte, skeiding, natuurelemente en die dood. 'n Mens kan natuurlik ook 'n oordrewe of ongesonde vrees hê - oor die toekoms, gesondheid, finansies, ens.

Vrees laat 'n mens dikwels roep na God. Ons soek outomaties hulp en skuiling by Hom as ons bang is - lees maar Dawid se psalms. Mens bid meesal wanneer jy bang is. D**k maar aan die dissipels, daardie aand in die storm. Die storm was erg. Hulle was doodbang. Hulle kom roep vir Jesus. "Here, help ons!" En Hy hoor hulle. Hy sien hulle vrees. Dan maak Hy die storm stil.

Roep na Hom as jy bang is - Hy maak steeds storms stil...

Mooi dag!
Coenie

27/02/2026

Vrydag refleksie - 27 Februarie

Dit gons omtrent oor Vreemde vlieënde voorwerpe (UFO's), "aliens" en buite-ruimtelike wesens. Verskeie Amerikaanse leiers het al te kenne gegee dat hulle kennis dra van vreemde besoeke aan die aarde. President Trump het onlangs belowe dat inligting hieroor gedeklassifiseer gaan word en beskikbaar gestel word aan die publiek.

Hierdie gissings kom al baie jare. Ek onthou dat daar kleintyd al 'n program op die TV was oor Vreemde vlieënde voorwerpe. Daar is tans 'n magdom dokumentêre videos op die internet beskikbaar hieroor. Daar is selfs spesiale ondersoek-eenhede in sommige lande.

Daar is natuurlik ook mense wat beweer dat daar al sulke verskynsels in die Bybeltyd was en dat die wiel en wesens in Esegiël op so 'n besoek van buite dui. Daar is ander mense wat 'n ooreenkoms sien tussen "aliens" en die nefilim (reuse) in Gen 6:1-4.

Die groot vraag vir ons as gelowiges is natuurlik of God lewe op meer as een planeet geskep het. As Hy die enigste Skepper is, is Hy ook die Skepper van alles (en almal) daar buite. En as Hy lewe op ander planete geskep het, wonder 'n mens of daardie lewe net soos hierdie lewe lyk - sou daar iewers anders ook "beeld van God" wees. Die Bybel antwoord nie hierdie vrae nie.

In my hart is daar baie nuuskierigheid maar ook baie vrede. God is groter as ons aarde en ons sonnestel en dit wat aan ons bekend is. Hy is ook God van die onbekende. Hy heers nie net hier nie - Hy heers oor Sy hele skepping - oor alles en almal wat mag bestaan. Sy almag en heerskappy is groter as wat ons tot nou toe ged**k het.

Mag ons bewondering vir Hom nog groter word...

Mooi dag!
Coenie

26/02/2026

*Verguising - Donderdag 26 Februarie*

Verguising was deel van Jesus se lydenspad. Dit het veral plaasgevind net voor en tydens sy kruisiging. Verskeie mense het daaraan deelgehad: soldate, gewone mense, leiers asook mede-kruiselinge. Hulle het Jesus op meer as een manier verguis.

Die soldate: Nadat Pilatus vir Jesus oorgelewer het om gekruisig te word, het die hele afdeling soldate in hul militêre hoofkwartier ‘n bespotting van Jesus gemaak. Ons lees in Mat 27:28-30 dat hulle ‘n helderrooi mantel om Hom gehang het, ‘n kroon van gevlegde doringtakkies op sy kop gesit het, en ‘n riet in sy regterhand. Toe het hulle voor Hom gekniel en met Hom die spot gedryf: “Gegroet, koning van die Jode!” Hulle het op Hom gespoeg en die riet geneem, en Hom herhaaldelik op sy kop geslaan.

By die kruis het hulle saam met ander die spot gedryf en gesê: “As jy die koning van die Jode is, red jouself!” (Luk 23:36-37).

Die verbygangers: Ons lees in Mat 27:39-40 dat verbygangers vir Jesus gelaster het, terwyl hulle hulle koppe skud en sê: “Jy wat die tempel afbreek en in drie dae opbou – as jy die Seun van God is, red jouself, en kom af van die kruis!”

Die leiers: Leierpriesters, skrifkenners en familiehoofde het ook die spot gedryf en gesê: “Ander het hy gered, homself kan hy nie red nie. Hy is die koning van Israel, laat hy nou afkom van die kruis, en ons sal in hom glo” (Mat 27:42).

Die mede-kruiselinge: Ook die mede-kruiselinge het vir Jesus op dieselfde manier beledig (Mat 27:44). In Lukas se weergawe word berig dat een van hulle wel vir Jesus se onskuld opgekom het en die ander een, wat aangehou laster het, berispe het (Luk 23:40-41).

Om verguis te word is nie maklik nie. Om verguis te word terwyl jy onskuldig is, soos Jesus, is nog erger. Tog het Jesus stilgebly. Hy het nie teruggepraat nie, want Hy het Homself as offer gegee in jou en my plek.

Dank Hom daarvoor!

Gerhard

"Frankly, I stand amazed at the unfathomable complexity of God’s wisdom and God’s knowledge. How could man ever understand his reasons for action, or explain...

25/02/2026

*Vervolging - Woensdag 25 Februarie*

Nog ‘n moment op Jesus se lydenspad was toe Hy ‘n goeie daad gedoen het, maar die mense Hom as gevolg daarvan wou vervolg het. Dit was waar Jesus ‘n man by die bad van Betesda gesond gemaak het. Ons lees daarvan in Joh 5:1-18.

Dié betrokke man het al agt-en-dertig jaar lank aan sy siekte gely. Hy het niemand gehad om hom betyds in die water te sit nie. Wanneer die water geroer is, en hy nog besig was om nader te gaan, het iemand anders voor hom ingegaan. Jesus sê vir hom: “Staan op, tel jou slaapmat op en loop” (2020-vertaling). Dadelik het die man gesond geword en begin loop. Die Jode is toe moeilik daaroor, nie oor die genesing nie, maar oor die slaapmat. Hulle sê vir die man: “Dit is Sabbat – dit is nie vir jou toelaatbaar om jou slaapmat te dra nie”. Toe hulle daarná hoor dat dit Jesus is wat vir hom die opdrag gegee het om sy slaapmat te dra, het hulle hul visier op Jesus gerig. Hulle wou Jesus vervolg, lees ons in vers 16, omdat Hy dit op ‘n Sabbat gedoen het. Jesus antwoord hulle: “My Vader is tot nou toe aan die werk, en Ek is ook aan die werk”. Hulle het hieroor nog harder probeer om Hom dood te maak – omdat Hy nie net die Sabbatsgebod verbreek het nie, maar boonop God sy eie Vader genoem en Hom so aan God gelykgestel het. Vir hulle was laasgenoemde godslastering en moes dit met die dood gestraf word.

Die haat en teenstand teen Jesus, veral van die Fariseërs en skrifkenners se kant, was aan die toeneem. By baie geleenthede daarna wou hulle vir Jesus vervolg. Dit het Hom egter nie laat ontspoor van sy roeping nie. Hy het telkens gesê dat sy tyd (“die uur”) nog nie aangebreek het nie. Hy sou self sy lewe aflê. “Niemand neem dit van My af weg nie, maar Ek lê dit uit Myself af”, het Hy by geleentheid gesê (Joh 10:18).

Terwyl Jesus telkens goed gedoen het, is Hy daaroor vervolg. Tog het Hy enduit die pad gestap. Loof Hom daarvoor!

Gerhard

“Do you want to be healed?” Inspired by John 5, this buzzed-about scene from Episode 4 marks the emotional and spiritual turning point of The Chosen Season 2...

24/02/2026

*Valse bewering - Dinsdag 24 Februarie*

Valse beweringe is erg. Dit ontstel. Dit maak ‘n mens kwaad. Dit laat jou magteloos voel. Dit was ook deel van Jesus se lydenspad. By meer as een geleentheid is valse beweringe oor Hom gemaak. Hoe het Hy daarop gereageer?

Een so ‘n geleentheid was toe die Fariseërs gesê het dat Jesus demone uitdryf alleen met die behulp van Beëlsebul, die aanvoerder van die demone. Ons lees daarvan onder andere in Mat 12:22-32. Dit was nadat Jesus iemand wat deur ‘n demoon besete was, en blind en stom was, gesond gemaak het. Die man kon daarna sien en praat. Al die mense was uit die veld geslaan en het gesê: “Is hierdie man nie dalk die Seun van Dawid nie?” Die benaming Seun van Dawid, ‘n titel vir Christus, berus op die belofte aan Dawid dat ‘n nakomeling van hom se koningskap vir altyd sal bestaan (2 Sam 7:12-16). Die Fariseërs het duidelik nie genoeë geneem met hierdie opmerking van die mense nie. Hulle het presies die teenoorgestelde gesê, naamlik dat dit deur die krag van Satan was en nie deur die krag van God dat die demoon uitgedryf was.

Dit was ‘n ernstige aantyging teen Jesus. Hoe reageer Jesus daarop? Deur beeldspraak sê Jesus dat elke koninkryk, dorp of huis wat teen homself verdeeld is, nie staande sal kan bly nie. As Satan teen homself verdeeld is, sal sy koninkryk eweneens nie staande kan bly nie. Verder sê Jesus dat niemand die huis van ‘n sterk, goed bewapende man kan beroof voordat iemand sterker as hy, hom oorrompel nie (Luk 11:21-22). Moontlik het Jesus op die naam Beëlsebul gesinspeel, toe Hy die beeld van die sterk man gebruik het. Die naam Beëlsebul beteken “heer van die huis”. Jesus sê dat Hy die demone deur die “vinger van God” uitdryf (Lukas se weergawe). Die “vinger van God” is ‘n beeld van die krag van God (Eks 8:19).

Jesus het valse aantygings teen Hom weerstaan en weerlê. Hy hét die duiwel oorwin. Aanbid Hom! Vertrou op Hom!

Gerhard

1. How deep the Father’s love for us,How vast beyond all measure,That He should give His only SonTo make a wretch His treasure.How great the pain of searing ...

23/02/2026

Pad van Lyding - 23 Februarie

Verwerping

Ons is nou in Lydenstyd van die kerkjaar. In hierdie tyd d**k ons in besonder oor die lyding en sterwe van Christus.

Christus se lydenspad was nie net die Via Dolorosa nie. Die Via Dolorosa (Latyn vir “Pad van Lyding”) is die roete in die Ou Stad van Jerusalem wat volgens Christelike tradisie die pad aandui wat Jesus geloop het van sy verhoor tot by sy kruisiging. Christus se lyding was egter nie beperk tot daardie paar uur nie. Dit het lank reeds vroeër al begin. Ons gaan hierdie week by ‘n paar momente daarvan stilstaan. Een so ‘n moment was toe die mense van Nasaret, die dorp waar Hy grootgeword het, Hom verwerp het. Ons lees daarvan onder andere in Luk 4:16-30.

Jesus het by geleentheid weer in Nasaret gekom. Hy gaan, soos sy gewoonte was, op die Sabbat na die sinagoge. Hy lees op dié betrokke dag ‘n gedeelte uit Jesaja, waar die “genadejaar” van die Here aangekondig word. Jesus sê toe vir die hoorders dat daardie Skrifgedeelte, ‘n Messiaanse profesie, op daardie dag vervul is terwyl hulle daarna geluister het. Aanvanklik was hulle opgewonde oor sy woorde, maar kort daarna het hulle opgewondenheid omgeswaai in woede. Hulle idee van die Messias was in skerp kontras met wat Jesus daarna vir hulle voorgehou het.

Die gevolg was dat hulle vir Jesus uit die dorp gedryf het. Hulle het Hom geneem tot op die rand van die berg waarop die dorp gebou was, om Hom daar af te gooi. Maar Hy het tussen hulle deur geloop en weggegaan.

“Maar Jesus gaan nie heeltemal weg nie,” skryf iemand. “Sy goeie nuus word (daarna) in Kapernaum gehoor (4:31), die eerste stasie op die lang en triomfantelike bevrydingsaksie. Dit is ‘n weg waarop Hy gáán – nie wéggaan nie, maar voortgaan en voorgaan, waarop Hy dissipels insluit en gebruik.”

Dank Hom dat Hy nie “wéggegaan” het nie!

Gerhard

“Light of the World” is an original Christian hymn that celebrates Jesus Christ as our guiding light, hope, and refuge in every season of life. Written in a ...

13/02/2026

Vrydag refleksie - 13 Februarie

Ons was die hele dag sonder krag (elektrisiteit) - van 6uur vanoggend tot net voor ses vanaand. Op ' n stadium, so paar jare gelede, was ons gewoond daaraan en gereed daarvoor. Deesdae is ons nie meer so gereed daarvoor nie.

Die moeilikste deel van so 'n kragtelose dag is dat die internet ook ophou werk. Die modem gaan ook na 'n paar ure af; ek vermoed ons toring se noodkrag raak ook klaar want die selfoon vang geen sein meer op nie. Die gebrek aan kommunikasie is vir my erger as die gebrek aan elektrisiteit.

Ons is bederf met selfone, hoë-spoed internetverbindings, data-oproepe, WhatsApp, eposse en sosiale media. Dis moeilik om ons lewens in te d**k sonder al hierdie hulpmiddels. Jare gelede was dit anders: jy moes wag tot jy by 'n telefoon kom om te laat weet dat jy veilig gery het. Tydens ons weermagdae moes jy ure in 'n ry staan om vir jou vrou te laat weet hoe dit gaan. Ja, ons is bederf.

D**k maar aan ou Jakob oppad na sy oom Laban in 'n ander land (Gen 28:5) - sonder 'n selfoon. Of Josef wat in Egipte verkoop is (Gen 39:1) - geen taal of tyding. D**k aan die pa van die verlore seun (Luk 15) - nie 'n idee of sy seun nog lewe nie...maar hy wag. D**k aan Paulus op sy sendingreise - geen kontak met die mense tuis...behalwe briewe wat eers maande later arriveer.

Jy kan d**k hoe kosbaar elke briefie moes wees - dis al wat hulle gehad het. En as dit nie was vir daardie paar briefies nie, het ons twee derdes van die Nuwe Testament nie gehad nie. Ek dank die Here vir hierdie kosbare briewe. Ons kan dit selfs lees terwyl die krag nog af is.

Die krag is vanaand weer aan. Ek waardeer vanaand opnuut weer die geluid van die yskas, die ligte in die huis, die modem en die internet. Dis ook genade - daar is baie mense wat dit nie het nie. En die voorreg om gou-gou my kinders te kon bel en vriende se foto's op Facebook te kyk. Ek is so geseënd!

'n Mens besef nie wat jy het totdat jy dit nie het nie...

Mooi dag!
Coenie

12/02/2026

Donderdag 12 Februarie

Ek is baie bang vir weerlig en donderweer. Ek het dikwels, as die blitse en donderslae in Potchefstroom so erg was, in die gang gaan wag dat dit verbygaan. Ek voel bietjie veiliger in die gang want daar is nie vensters nie.

'n Paar jare gelede het ons gesinnetjie die Giant's Cup staproete in Natal gestap. Die vydfag roete begin by Sani Pas in die Drakensberge en eindig by Boesmansnek. Terwyl ons bo-op die berge stap het daar 'n hewige donderstorm uitgebreek. Dit was net ons vier - geen skuiling of wegkruipplek. Angswekkend. Een van die benoudste oomblikke in my lewe.

Johannes skryf dat hy op 'n dag 'n visioen gesien het. Hy het voor die troon van God in die hemel gestaan. Dan skryf hy: "Daar het weerligstrale, dreunings en donderslae van die troon af gekom" (Ope 4:5). Dis nie hoe ons meesal die troon van God voorstel nie.

Hierdie prentjie maak my bang. Die mense in die antieke tye was nog banger as ek vir weerlig. Weerlig en blitse was boodskappers van die gode. Dikwels is weerlig geassosieer met oordeel van die gode. Hierdie prentjie moes vir Johannes erg wees. Maar hierdie prentjie help hom onthou Wie God is.

Hy is nie ons maatjie nie. Hy is groot en heilig. Ons trek hom nie af tot op ons vlak nie. Ons maak Hom nie mak nie. Ons draai nie Sy arm of druk Hom in 'n hoek nie. Hy is die magtige God wat die weer laat dreun (Ps 29:3). Hy laat Sy stem uit die onweer hoor (Job 40:4). Sy stem is soos 'n donderslag (Job 37:4). Jy kan nie Vir Hom wegkruip in die gang nie...

My ouma het altyd gesê jy moet respek hê vir die weerlig. Dis nog meer waar van God: nie vrees nie, maar respek. Die donderweer herinner my dat ek respek en heilige eerbied vir Hom moet hê...

Mooi dag!
Coenie

CREDITS:Lyric video: Piet Smit Composer & Author: Piet Smit Music Production: Producer; Piet Smit Mixing Mastering engineer and Arranger; Johan Rautenbach Vo...

11/02/2026

Woensdag 11 Februarie

Coenie de Villiers sing: "Ruik jy katbos en kambro as dit reën in die Kleinkaroo...". Ek glo die mense in die Klein Karoo ruik hierdie week katbos en kambro na die lekker reën. Maar die vreugde is wyer as die Klein Karoo. Dit het hierdie week ook in die Tankwa en die Karoo self gereën.

Ons het een jaar deur die Karoo gery terwyl daar plasse (selfs damme) water weerskante van die teerpad was. Dis 'n mooi gesig. Dis nie iets wat jy elke dag sien nie. Hier by ons raak ons soms gewoond aan reën - ons weet eintlik dit sal reën op die regte tyd. In die Karoo bly eke reënbuitjie 'n wonderwerk. Genadewater, soos wat iemand gesing het. Jy raak nooit gewoond daaraan nie. Dis nie vanselfsprekend nie.

In Jesaja 35:6 lees ons "strome water sal uit die woestyn uit bars; daar sal riviere loop in die droë wêreld". Riviere in 'n droë wêreld bly altyd 'n wonderwerk. En tog laat God dit gebeur. Hy het dit in Jesaja se tyd gedoen; Hy doen dit ook in ons tyd. Hy het dit hierdie week weer gedoen.

Hy doen wat ons nie kan doen nie. Hy doen die onwaarskynlike, selfs die onmoontlike. Hy kan droë riviere laat vloei. Hy kan ook die droogte in jou lewe verander; Hy kan jou woestyn in iets moois verander. Hy verander "dor land in fonteinwêreld" (Jes 41:18b). Hy kan die vaalste kol in jou lewe mooi maak. Hy kan jou grootste gebed verhoor.

Mag die Here jou droë land in fonteinwêreld verander. Mag die plasse water weerskante van jou pad lê. Mag jy katbos en kambro ruik. Mag jy dans saam met die boere in die Karoo...

Mooi dag!
Coenie

Touch of Class se liedjie "Dans in die reen". Dans in die reen is die debuut liedjie vanaf Touch of Class se nuutste album "Koffiefontein".Touch of Class wor...