10/06/2026
Dit is met groot hartseer dat ons kennis neem van die afsterwe van ons geliefde broer, Br Griffith Olivier.
Br Griffith was vir baie jare 'n toegewyde en aktiewe lidmaat van ons gemeente. Hy het met oorgawe voorheen as hulp-Tesourier en Sondagskoolonderwyser gedien, hy was ons huidige Katkisasiemeester en het ook getrou sy pligte as hulp-Skriba verrig.
By gemeente aktiwiteite was hy dikwels die seremoniemeester wat met sy warmte, humor en wysheid mense op hul gemak gestel het.
Veral die kinders sal hom onthou vir sy besondere vermoë om Bybelse waarhede deur eenvoudige, leersame stories tydens die kinderboodskap oor te dra. Hy het 'n merkwaardige gawe gehad om jong en oud te inspireer en die liefde van Christus op 'n praktiese wyse uit te leef.
Ons dank die Here vir sy getroue diens, sy vriendelikheid en die groot bydrae wat hy tot die opbou van ons gemeente gelewer het. Sy nalatenskap sal nog lank in die harte van ons gemeente voortleef.
Ons innige meegevoel gaan aan sy ma Sus Rosie Olivier en familie, asook sy bree vriendekring, oud-kollegas en geliefdes. Mag die Here julle vertroos en dra in hierdie tyd van verlies.
"Ek het die goeie stryd gestry; ek het die wedloop voltooi; ek het die geloof behou." 2 Timoteus 4 vers 7
Rus sag, Br Griffi. Jou werk op aarde is voltooi, maar jou invloed sal voortleef. 🕊️
