20/04/2026
NHKA Ring van Klerksdorp Bybel projek
Die Ring van Klerksdorp het op 19 April 'n besondere aand van liefde en omgee by die Daphne Lee-huis beleef, waar 50 Bybels aan die inwoners gegee is. Hierdie huis bied 'n veilige en sorgsame tuiste aan volwassenes wat spesiale ondersteuning en versorging ontvang.
Wat hierdie projek nog meer besonders gemaak het, is hoe vinnig dit gebeur het. Binne net twee weke het lidmate van die Ring al 50 Bybels geskenk! Dit wys iets van ons gemeenskap se oop harte en bereidheid om te gee.
Die aand het (soos elke Sondag aand by Daphne Lee) begin met 'n erediens. Daar is 'n kort boodskap gedeel, saam gebid en saam gesing. Dit het 'n rustige en warm atmosfeer geskep waarin almal saam voor God kon stil word.
Daarna is die Bybels een vir een aan die inwoners oorhandig. Elke Bybel is meer persoonlik gemaak met 'n plakker voor in, waarop die inwoner se naam en 'n unieke Bybelvers verskyn. Hierdie klein detail het die geskenk meer persoonlik gemaak.
Die vreugde en dankbaarheid was duidelik op die inwoners se gesigte. Dit het ons almal diep geraak. Die Bybels is met groot liefde oorhandig deur twee predikante, 'n ouderling en twee lidmate van die Ring van Klerksdorp.
Ons wil graag aan elkeen wat bygedra het tot hierdie projek sê baie dankie. Sonder julle sou dit nie moontlik gewees het nie. Julle het gehelp om Bybels te gee, sowel as hoop en bemoedig. Om God se liefde met ander te deel. En ons is so dankbaar teenoor elkeen van u!
Hierdie aand herinner ons daaraan hoe God se liefde sigbaar word wanneer ons dit met ander deel...opreg en uit die hart!
Weereens, so so baie dankie!
Vriendelike groete
Ds Tanya Maartens
(Skriba: NHKA Ring van Klerksdorp)
(Die inwoners se gesigte is "geblur" ter wille van privaatheid)
