29/05/2026
ባህርያት ፈሪሳዊ፡ ብክርስቶስ ኢየሱስ’ዩ ዝሓዊ
ብስም ኣቦን ወድን መንፈስ ቅዱስን ሓደ ኣምላኽ። ኣሜን!
መንፈሳዊ ዝመስል ፈሪሳውነት፡ ብብዙሕ መሊኡ’ሎ ኣብ ክርስትያናዊ እምነት። ፈሪሳዊ ኴንካ ክትመጽእ ናብ እምነት፡ ዘሎ ዓቐበት፡ ዘድሊ ትብዓት ድማ ቀሊል ኣይኮነን። ፈሊጥካን ሓቁነቱ ተረዲኡካን ከሎ፡ ነቲ እትሰምዖ ቃል ዘይምእዛዝ ድማ ካብ ዘለኣለማዊ ህይወት ክትፍለ ይገብረካ እዩ። ሎሚ በዚ ቤተክርስትያን ነዚ ሰሙንዚ ክንዝክሮ ሰሪዓቶ ዘላ ገርና፡ ኣገልግሎትና ክንፍትሽ፡ ካብ ፈሪሳዊ ባህሪ ነፍስና ናጻ ምዃናን ዘይምዃናን፡ መንፈሳውነትና ክንምርምር ተተባብዓና ኣላ። ከም ንቆዲሞስ፡ ነቲ ዘይተረደኣና ጐይታ ክገልጸልና፡ ንበይንና ብብሕትና ኣብ ቃላቱ ምምርማር ግዜ ከነሕልፍ፡ ካብቲ ብዙሕ ንኽብሪ ስጋን ዝናን ዝምችእ ነፍስና ኣትሕት ኣቢልና፡ ካብቲ ትሑት ጐይታ ክንመሃር፡ ነፍስና ንእኡ ከነግዝእ፡ ከምኡ ድማ፡ ንኢየሱስ “ረቢ፡ ብጀካ እቲ ኣምላኽ ምስኡ ዝዀነ ሰብ፡ ነዚ ንስኻ እትገብሮ ዘሎኻ ተኣምራት ኪገብሮ ዚኽእል የልቦን እሞ፡ ንስኻ መምህር ኴንካ ካብ ኣምላኽ ከም ዝመጻእካ፡ ንፈልጥ አሎና፡” ንስኻ ኣብ ትምህርቱ ጒድለት ዘይብሉ ፍጹም መምህር ህይወት ምዃንካን ንባዕልኻውን ህይወት ምዃንካን ንእመን ኣሎና ክንብሎ፡ እዚ ምዃኑ እንተ ፈሊጥና ድማ፡ ናይ ህይወትና ሕቶ እቲ መልሲ ንሱ ምዃኑ ክንረኽቦ ኢና። (ዮሃ 3፡2)። ኣሕዋተየ፡ ኣብ ህይወት ዘሎና ሕቶታት ዝምልሰልና መምህር ንደሊ ኢና፡ ኣብዚ ዓለም እዚ ዘለዉ መምህራን ኣብ ኵሉ ነገሮም ጒድለት ኣለዎም፡ ፍጹማን ኣይኮኑን፡ ንባዕላቶምውን ዘይተመለሰ ሕቶ ሒዞም ዝጐዓዙ እዮም፡ እንተ ሓተትናዮም መልሲ ክህቡና ኣይክእሉን። ንዅሉ ሕቶታትና መልሲ ዘለዎ ንበይኑ ግና ኢየሱስ ክርስቶስ ጥራይ እዩ። ብዛዕባ ሓቅነት ህይወት ክትፈልጥ እንተ ደሎኻ፡ እቲ ሓቅን ህይወትን መገድን ዝኾነ ኢየሱስ ድለ። (ዮሃ 14፡6)።
ጐይታ ዝበሎ ብዛዕባ ባህርያት ፈሪሳውነት፡ እስከ ንርኣዮ ብቓሉ መሰረት። ከም ሎሚ መንፈሳውያን ኣገልገልቲ ኣይበዝሐን፡ በቢዘለዎ ኵሉ ኣገልግሎት ይሰርዕ ኣሎ፡ ግን ከኣ ከም ሎሚ ገይሩ ዝበዝሕ እውን ኣብ ግቡዝ መንፈሳውነት ዝነብር የሎን። ንወንጌል ኣብ ልቢ ደቂ ሰብ ከየቐመጠ፡ ንባዕሉ ኣብ መንበር ዝተቐመጠ ኣገልጋሊ እንተሎ፡ ንሱ ፈሪሳዊነትን ዝዓብለሎ መንፈሳውነት ዘለዎ ሰብ እዩ። እዚ ግበር፡ ከምዚ ድማ ድገም እናበለ፡ ባዕሉ ሓሊፉ ብህይወቱን ብቓሉን ኣርኣያ ዘይኸውን እንተሎ፡ ንሱ ፈሪሳዊ እዩ። ከቢድ ጾር ዘጽውን፡ ሸከም እተን ክጓስየን ዝተዋህቦ ኣባጊዕ ዘየዕርፍ፡ ብቓል ኣምላኽ ምሕረቱን ፍቕሩን ምሂሩ፡ ብንስሓ ዘየቕርብ፡ ንገዛእ ክብሩ እምበር፡ ንመኣዲ ጐይታ ክቕበላ ዘይገብር፡ ግበሩ እምበር ንባዕሉ ገይሩ ኣብነት ዘይከውን ኣገልጋሊ እንተሎ፡ ንሱ ፈሪሳዊ እዩ። ሰብ ምእንቲ ክርእየሉ፡ ኣብ ቅድሚ ሰብ ሞጐስ ክረክብ ዝጽዕር፡ ኣውራ ነገር ሓዲጉ ኣብ ልብስን ኣቃውማን፡ ኣብ ጸጒርን ኣቀማቕማን ኣዝዩ ዝግደስ፡ ኣብ ልቡ ዝተቐመጠ ሳእኒ ዘየውጽአ፡ ነቲ ኣብ እግሪ ዝውደ ጫማ ምውጽኡን ዘይምውጽኡን ዝግደስ ኣገልጋሊ እንተሎ፡ ንሱ ፈሪሳዊ እዩ። ኣብ ቤተክርስትያን ኣባጊዑ ብመንፈስ ናብ ላዕሊ ክስቀላ፡ ብመንፈስ ምስ ኣምላኸን ክራኸባ ከይገበረ፡ ንባዕሉ ክረኣየሉ ኣብ ዝኽእል ክቡር መንበር ዝደሊ ኣገልጋሊ፡ ንሱ ፈሪሳዊ እዩ። መምህር እናተባህለ፡ ሰባት ኣየ እዚ መምህር እዚ እናበሉ ክንእድዎ ዝደሊ ደኣምበር፡ ነቲ ኣብ መስቀል ዝተሰቕለ ክርስቶስ ከመስግንዎ ዘይገብር ኣገልጋሊ እንተሎ፡ ንሱ ፈሪሳዊ እዩ። ብዛዕባ ኣበዓዕላ መስቀልን፡ እቲ ዕንጨይትን ኣዝዩ ዝግደስ፡ ነቲ ብሰንኪ ክርስቶስ ክረኽቦ ዘለዎ መስቀል ተሰኪሙ ክስዕብ ዘይደሊ ኣገልጋሊ እንተሎ፡ ንሱ ፈሪሳዊ እዩ። (ማቴ 23፡1-12)።
እቶም ፈሪሳዊ ዓይነት ባህሪ ዘለዎም ኣገልገልቲ፡ ነታ ብክርስቶስ እትርከብ ህይወትን መንግስትን ንባዕሎም ዘይኣትውዋ፡ ሰባት ድማ ንክርስቶስ ከይፈልጡ መገዲ ክዓጽዉ፡ ስሙ እናጸውዑ ብስሙ ዝሽቅጡ፡ ኣብ ቤቱ እናነበሩ ቤት ኣምላኽ ቤት ጐሓላሉን ቤት ንግድን ዝገብሩ እዮም። ንቆዲሞስ ግና፡ ከምዚ ዓይነት ህይወት ኣይደለዮን፡ ካብ ምስሉይነት ወጺኡ፡ ንሓቂ ፈሊጡ፡ በታ ሓቂ ሓራ ክወጽእ፡ ህይወት ክረክብ ደልዩ። ነዚ ንምግባር ለይቲውን ናብ ክርስቶስ ምኻድ ዝጠልብ እንተ ኮይኑስ፡ ክኸይድ ኣሎኒ ኢሉ፡ ናይ ለይቲ ተምሃራይ ኮይኑ እዩ። ፈሪሳዊ ባህርይ ዘለዎም ኣገልገልቲ፡ ጨካናት እዮም። ንሰብ ካብ ህይወት ከርሕቑ፡ እንተ ተኻእሎም ከውድቑን ከደናግሩን ክመሳሰሉ መዓት እዮም። ጸሎት ማለት ንፈሪሳውያን፡ ነዊሕ ግዜን ብዙሕ ቃላት ብምጥቃምን እዩ፡ ስለዚ እዮም “ከተምስሉ ጸሎት እተንውሑ” ዝተባህለሎም። ሰባት ወዲ ሃይማኖቶምን ካባታቶም ጒጅለን ክኸውን ደኣምበር፡ መንፈሳዊ ህይወቱ ኣይንታዮምን እዩ፡ ስለዚ እዮም “ንሓደ ሰብ ናብ ሃይማኖትኩም ከተእትውዎም ባሕርን ምድርን እትዞሩ” ዝተባህለሎም፡ ደሓር ድማ ኣብ ህይወት ስለ ዘይነብሩ ደቂ ገሃንም ዝኾኑ ደቀ መዛሙርቲ እዮም ዘፍርዩ። ብርሃን ክርስቶስ ዘይርእዩ ዕዉራት እዮም፡ ትኹል ሓቂ ገዲፎም መገዲ ዝቐይሩ ግጉያት እዮም። ኒቆዲሞስ ግና፡ ንሓቂ እናፈለጠ፡ በዞም ዓዋናትን ዕዉራትን ክምራሕ ኣይፈተወን፡ ክርስቶስ እቲ እንኮ ሓቂ ምዃኑ ብቓሉ ጥራይ ዘይኮነስ ብህይወቱውን ይርእዮ ነይሩ እዩ። ስለዚ ካብ ብዘይ ህይወት ምስ ክብረት ምምልላስ፡ ከብረት ከይረኸብካ ተዋሪድካ ህይወት ምሓዝ ይበልጽ ኢሉ ናብ ክርስቶስ መጸ። ኣሕዋተየ፡ እቲ ኵሉ ንስጋኹም ጥቕሚ ዝኾነ ግናኸ ንክርስቶስ ዘየርእየኩም ዘበለ ኵሉ፡ ካባኹም ስበሩ። (ማቴ 23፡13-22)።
እምበኣርሲ፡ ሎሚ ነቲ ብዘይ ክርስቶስ ምምልላስ፡ ካባና ቆሪጽና፡ ናብቲ ኵሉ ግዜ ንሓገዝና ድልዊ ዝኾነ ጐይታ ኣዚና ክንቀርብን ከነቕልብን፡ ክንሰምዕን ክንእዘዞን ይንገረና ኣሎ። ብዛዕባ ኣምላኽ ክትፈልጥ ዘይኮነስ፡ ንኣምላኽ ኣብ ህይወትካ ክፍለጥ ከም ዘለዎ ምግባር እዩ እቲ ኣውራ ነገር። ኣሕዋተየ፡ ግቡዝ መንፈሳውነት፡ ከም ናይ ፈሪሳውነት፡ ዝኾነ ህይወት፡ ክንለቅቕ ኣሎና። ትንሳኤ፡ ክንገብር የድልየና ኣሎ። ነቲ ዝተሰቕለ ክርስቶስ ዘየርኢ፡ ዝኾነ ይኹን ነገር ብቓሉ መሰረት ክቡንቈስ ኣለዎ ካብ ህይወትና። ነቲ ንእንሰምዖ ቃል ክርስቶስ ዘይንኣምኖ፡ ንእንኣምኖ ዘይምእዘዞ እንተ ኣሎና፡ መንፈሳዊ ሕማምን ዑረትን ሓሚምና ምህላውና ድዩ። ፈሪሳውያን ንክርስቶስ ዘይስዕቡ ክንሶም፡ ንርኢ ኣሎና ስለ ዝብሉ ዝነበሩ፡ በቱ ትምህሩ ግና ዕዉራት ምዃኖም ዝነግር ስለ ዝነበረ፡ “ንሕናኸ ዕዉራት ምዃና ዲና፧” በሉ። (ዮሃ 9፡40)። ኣቱም ብሩኻተይ፡ ንሕና ኣብቲ ቃል ሓቂ ተመስሪትናን ሱር ሰዲድናን፡ በቲ ኣብ ክርስቶስ ኢየሱስ ዘሎ ጸጋ ኣዚና ንደልድል። (2ይ ጢሞ 2፡1)።
ጐይታና ኢየሱስ ክርስቶስ ምስ መንፈስኩም ይኹን። ጸጋ ምሳካትኩም ይኹን። ኣሜን። (2ይ ጢሞ 4፡22)።
@ቀሺ ባሲሎስ
