13/06/2026
😢💕🙏
Met diepe hartseer skryf ons hierdie plasing oor mev. Maryna Duminy, ’n vrou wie se lewe gekenmerk is deur diens, liefde, wysheid en ’n onwrikbare toewyding aan die kinders van ons gemeenskap.
Vir baie jare was sy nie net ’n skoolhoof of juffrou nie, maar ’n vormer van harte, ’n bouer van karakter en ’n mentor vir generasies kinders!
Die Duminy-familie se verbintenis met die Hoërskool, strek oor baie jare. Al drie haar kinders het deel geword van ons skoolgeskiedenis, en vandag dien haar dogter, Anneke steeds met toewyding as ’n gewaardeerde lid van ons personeel.
Maryna was een van daardie seldsame mense wat ’n gemeenskap ryker laat bloot deur deel daarvan te wees. Haar vriendelikheid, opregte belangstelling in mense, en haar liefde vir kinders het haar geliefd gemaak by almal wat haar geken het.
Vandag treur ons saam met haar familie. Ons treur saam met die talle oud-leerders, haar kollegas en al die inwoners van Ficksburg wie se lewens deur haar aangeraak is.
Maar ten spyte van die hartseer vier ons ook ’n lewe wat goed geleef is;
‘n lewe wat ’n nalatenskap nalaat wat nie deur tyd uitgewis kan word nie!
Ons harte gaan uit na Anneke en die res van die Duminy-familie in hierdie moeilike tyd. Mag die Here julle dra, vertroos en versterk.
Rus sag, mev. Maryna Duminy. Ficksburg sal jou onthou!
