31/08/2026
🌹VIZITË QË NUK HARROHET🌹
Një ditë e bukur, një udhëtim me vlerë dhe një kujtim që do të mbetet gjatë në zemrat tona…
Më datë 30.08.2026, Sektori i Femrës pranë Xhamisë sonë Dituria Gjenevë, i udhëhequr nga mualimja e xhamisë sonë, hafizja Rejhane Asipi-Aliu, së bashku me motrat tona të dashura, të cilat me përkushtim dhe rregullsi marrin pjesë në aktivitetet e organizuara nga xhamia jonë, realizuan një udhëtim të veçantë drejt Winterthurit.
Qëllimi i këtij udhëtimi ishte pjesëmarrja në një aktivitet të bukur dhe me shumë vlera, të organizuar nga Komuniteti Mysliman Shqiptar në Zvicër, në Xhaminë Shqiptare në Winterthur.
Atje, motrat tona patën nderin dhe kënaqësinë të përjetojnë një ceremoni të veçantë, emocionuese dhe të mbushur me dashuri për të Dërguarin e Allahut ﷺ, në kuadër të aktivitetit edukativo-kulturor:
“Në gjurmët e të Dashurit tonë ﷺ” 🌹
Ky aktivitet, i organizuar nga Departamenti i Gruas pranë KMSHZ-së, iu kushtua figurës, jetës, shembullit dhe vlerave të larta të Pejgamberit tonë të dashur, Muhamedit alejhis-selam.
Ishte një aktivitet i veçantë, i pari i këtij lloji në diasporën shqiptare në Zvicër, i cili u mbështet edhe nga Kryesia e KMSHZ-së.
Ishte një ditë e mbushur me emocione, buzëqeshje, momente të bukura, lot gëzimi dhe, mbi të gjitha, me dashurinë për të Dërguarin e Allahut ﷺ.
Në përfundim të ceremonisë u realizuan fotografi të përbashkëta, si një kujtim i bukur i kësaj dite, ndërsa motrat e xhamisë nikoqire në Winterthur treguan edhe një herë bujarinë dhe mikpritjen e tyre të jashtëzakonshme, duke shtruar një bufe të hapur për të gjithë pjesëmarrësit.
Allahu i shpërbleftë me shpërblimet më të mira!
Një falënderim i veçantë shkon për të gjitha motrat, teologet, mualimet, hafëzet, donatoret dhe organizatoret që kontribuuan në realizimin e këtij aktiviteti të bukur.
Falënderojmë përzemërsisht edhe Xhaminë nikoqire në Winterthur, motrat e saj për mikpritjen dhe ngrohtësinë e treguar, si dhe Kryesinë e KMSHZ-së për mbështetjen dhe përkrahjen e këtij aktiviteti me vlera.
Një urim i veçantë për të gjitha vajzat dhe motrat që morën pjesë në këtë konkurs të bukur e edukativ. Urime fitueseve përzemërsisht, ndërsa të gjitha pjesëmarrëseve u themi: Allahu jua shtoftë diturinë, dashurinë për Pejgamberin ﷺ dhe ju dhëntë suksese në çdo hap të jetës!
Faleminderit nga zemra edhe motrave tona të dashura të Xhamisë Dituria Gjenevë, të cilat iu përgjigjën kësaj ftese dhe e përfaqësuan me dinjitet xhaminë tonë.
Jemi jashtëzakonisht mirënjohës për ju, sepse sa herë që paraqitet nevoja dhe kërkohet pjesëmarrja juaj, ju jeni të gatshme të përgjigjeni me zemër, me dashuri dhe me përkushtim.
Ju nuk po e përfaqësoni vetëm veten tuaj, por po e përfaqësoni me nder dhe dinjitet Xhaminë Dituria, duke dëshmuar se motrat tona janë një pjesë e çmuar, aktive dhe e pandashme e jetës dhe veprimtarisë së xhamisë sonë.
Allahu ju shpërbleftë për çdo hap që e keni bërë, për çdo kontribut që keni dhënë dhe për çdo buzëqeshje që keni sjellë në aktivitetet tona.
Shpresojmë dhe lutemi që udhëtime, vizita, takime dhe aktivitete të tilla të bukura të vazhdojnë edhe në të ardhmen, inshaAllah, duke na afruar edhe më shumë me njëra-tjetrën dhe duke forcuar dashurinë, vëllazërinë dhe bashkëpunimin mes motrave tona në Zvicër.
O Allah, na bashko gjithmonë në punë të mira, na ruaj të bashkuar në dashuri dhe mirësi dhe na bëj prej atyre që e duan, e njohin, e nderojnë dhe e pasojnë të Dërguarin Tënd, Muhamedin ﷺ.
🌹Allahumme salli ve sellim ala sejjidina Muhammedin ve ala alihi ve sahbihi exhme'in.🌹
Me shumë respekt, mirënjohje dhe dua të sinqertë,
Imami, Kryesia dhe Sektori i Femrës
pranë Xhamisë sonë Dituria Gjenevë
Allahu ju bekoftë, ju ruajtë dhe ju shpërbleftë me të mirat e Tij!
