21/06/2026
Eselamu Alejkum!
Paqa dhe Mëshira e Allahut qofshin mbi të gjithë ju!
Të dashur vëllezër dhe motra,
Duke e falënderuar Allahun e Madhërishëm për mirësitë e Tij të panumërta, po e përmbyllim një fundjavë të begatë, të mbushur me aktivitete fetare, edukative dhe shoqërore, të cilat lanë gjurmë të bukura në zemrat e pjesëmarrësve.
E Premte, 19.06.2026
Për ligjëratën para ezanit të namazit të Xhumasë, patëm nderin dhe kënaqësinë të mirëpresim hoxhën e nderuar nga Kosova, Mr. Bashkim ef. Mehani, redaktor përgjegjës për botime pranë Bashkësisë Islame të Kosovës.
Ai mbajti një ligjëratë frymëzuese me temën “Urtësitë e Hixhretit”, duke sjellë para xhematit mësime të çmuara, reflektime të thella dhe porosi të dobishme, të cilat u pritën me shumë interes dhe kënaqësi nga të pranishmit.
E Shtunë, 20.06.2026
Në vazhdën e aktiviteteve tona, u mbajt seminari me temën “Trajtimi i stresit nga perspektiva islame”, ku pjesëmarrësit patën mundësinë të njihen me këshillat dhe udhëzimet islame për përballimin e sfidave të jetës së përditshme. Seminari u vlerësua lart dhe u prit shumë mirë nga të gjithë të pranishmit.
E Diel, 21.06.2026
Sektori i motrave pranë Xhamisë Dituria Gjenevë, zhvilloi aktivitetin e radhës me ligjëratat e rregullta mujore.
Përveç ligjëratës së hafizes sonë të nderuar, Hfz. Rejhane Asipi-Aliu, kësaj radhe motrat patën kënaqësinë të mirëpresin edhe një mysafire të veçantë, Dr. Sara Bekiri-Emini, pediatre dhe njëra ndër nxënëset e dalluara të dala nga mektebi i xhamisë sonë.
Ajo ligjëroi mbi temën “Ndihma e parë te fëmijët”, duke ofruar njohuri të vlefshme teorike dhe praktike për trajtimin e rasteve emergjente te fëmijët. Ligjërata u përcoll me interes të madh dhe u vlerësua jashtëzakonisht nga pjesëmarrëset.
Në emër të imamit, kryesisë dhe mbarë xhematit tonë (vëllezërve dhe motrave), shprehim falënderimet tona më të sinqerta për hoxhën Bashkim ef. Mehani dhe Dr. Sara Bekiri-Emini për kontributin e tyre të çmuar, profesionalizmin, përkushtimin dhe bashkëpunimin e shkëlqyer me xhaminë tonë🌹.
Lusim Allahun e Madhërishëm që t’i shpërblejë me të mirat e Tij më të mëdha, t’ua shtojë diturinë, bereqetin, shëndetin dhe sukseset në këtë botë dhe në Ahiret🤲.
Njëkohësisht, me përfundimin e kësaj fundjave u përmbyll me sukses edhe një kapitull tjetër i rëndësishëm në veprimtarinë e xhamisë sonë, viti shkollor 2025/2026 i mektebit.
Me ndihmën dhe mirësinë e Allahut të Madhërishëm, imami dhe hafizja e xhamisë sonë përfunduan me sukses mësimin me të gjitha grupmoshat e nxënësve të mektebit, duke kurorëzuar edhe një vit të mbushur me dije, edukim, mësim dhe formim shpirtëror.
Gjatë këtij viti, të gjithë nxënësit tanë patën mundësinë të mësojnë dhe të avancojnë njohuritë e tyre mbi fenë islame, leximin e Kur'anit, moralin dhe vlerat e larta njerëzore, duke u rritur në një ambient të shëndoshë edukativ e fetar.
Me këtë rast, shprehim falënderimet tona për të gjithë nxënësit për përkushtimin dhe vijueshmërinë e tyre, si dhe për prindërit që vazhdojnë të jenë mbështetësit më të rëndësishëm në edukimin fetar të fëmijëve të tyre.
Lusim Allahun e Madhërishëm që mundi, përkushtimi dhe angazhimi i secilit të shpërblehen me të mirat e Tij dhe që dituria dhe Kur'ani, të jenë dritë dhe udhëzim në jetën e tyre.
Me shpresën dhe lutjen që pas pushimeve verore të rikthehemi me energji të reja, me më shumë nxënës, me më shumë sukses dhe me rezultate edhe më të mira në aspektin edukativ, fetar dhe njerëzor, i urojmë të gjithë nxënësve dhe familjeve të tyre pushime të mbara, të qeta dhe të begata.
Allahu i ruajtë fëmijët tanë, familjet tona dhe na mundësoftë që të takohemi përsëri në shëndet, gëzim dhe me vullnet edhe më të madh për të mësuar dhe vepruar në të mirë. Amin.
Po ashtu, mbrëmjen e sotme (e diel, 21.06.2026), u përmbyll edhe një aktivitet tjetër i rëndësishëm që tashmë është bërë pjesë e pandashme e jetës së xhamisë sonë, takimet e rregullta me rininë.
Para namazit të Akshamit, siç është bërë traditë tashmë 5 vite me rradhë, imami ynë i nderuar, Mr. Rijad ef. Aliu, zhvilloi takimin e radhës me grupin rinor të xhamisë sonë (djem dhe vajza).
Meqenëse ky ishte takimi i fundit për vitin edukativ 2025/2026, në vend të ligjëratës së zakonshme u organizua një bashkëbisedim i hapur dhe vëllazëror me të rinjtë, në një atmosferë të ngrohtë e miqësore, ku të pranishmit patën mundësinë të shprehin mendimet, sugjerimet, përvojat dhe vërejtjet e tyre, duke diskutuar së bashku mënyrat se si aktivitetet rinore mund të avancohen edhe më tej në të ardhmen.
Takimi u shoqërua edhe me një kafe apo pije freskuese të ofruar nga xhamia enkas për rininë, duke e bërë mbrëmjen edhe më të këndshme dhe më afruese mes të rinjve dhe institucionit të xhamisë.
Me këtë rast, u bë një reflektim i shkurtër mbi rrugëtimin e këtij viti, duke falënderuar Allahun e Madhërishëm për çdo sukses e mirësi dhe duke shprehur shpresën që viti i ardhshëm 2026/2027 të jetë edhe më i begatë, më frytdhënës dhe më i dobishëm për rininë tonë në aspektin edukativ, akademik, moral dhe shpirtëror.
Në fund, të rinjtë shprehën mirënjohjen dhe falënderimet e tyre të sinqerta për imamin dhe hafizen e xhamisë sonë për përkushtimin, angazhimin e vazhdueshëm dhe punën e palodhshme që kanë treguar ndër vite në edukimin dhe mbështetjen e rinisë.
Po ashtu, ata shprehën falënderimet e tyre edhe për Kryesinë e Xhamisë Dituria, e cila ka qenë vazhdimisht përkrahëse e aktiviteteve rinore, duke kontribuar në krijimin e një ambienti të shëndoshë, edukativ dhe frymëzues për brezat e rinj.
Njëkohësisht, ju njoftojmë se këto ishin aktivitetet e fundit para pushimeve verore. Shpresojmë dhe lutemi që pas pushimeve të rikthehemi me energji edhe më të madhe, me projekte dhe aktivitete edhe më të dobishme për xhematin tonë, in sha Allah😊.
Në fund, lusim Allahun Fuqiplotë që secilit prej jush t’ia bëjë të mbarë pushimet verore, kudo që të ndodheni, në vendlindje apo në vende të tjera. Allahu ju ruajt juve dhe familjet tuaja, ju dhëntë shëndet, siguri, qetësi dhe bereqet në çdo hap të jetës suaj. Amin🤲.
Me respekt dhe konsideratë🤗,
Imami dhe Kryesia e Xhamisë Dituria Gjenevë.
