St Cecilia Sodality, Gaborone Diocese

30/05/2026

MOLETLO O O MOGOLO WA BORARO JO BO BOITSHEPOTSHEPO

Thuto Ya Ntlha | Ekesoto 34: 4b-6, 7-8

Moše a phakela mo mosong, a tlhatlogela mo thabeng ya Sinai jaaka Morena a mo laetse, a tshotse matlapa a mabedi a maboti ka diatla. Ke fa Morena a fologa a le mo lerung, a ema fa go ene, a kua leina la Morena. Jaanong Morena a feta fa pele ga gagwe, a kua a re: “Morena! Morena! Ke Modimo o o boutlwelo-botlhoko le boitshwarelo, o o sa feleng pelo, o o letlotlo la bopelotlhomogi le boikanyego.

Ke fa Moše a akofa a ikobela fa fatshe, a obamela a re: “Fa ruri ke bonye bopelotlhomogi mo matlhong a gago, Morena, a Morena a ke a ye le rona – gonne ke morafe wa dithamo tse di gagametseng – mme o re itshwarele molato wa rona le boleo jwa rona, o re tshole, re nne ba gago.”

Pesalema: Daniele 3: 52, 53, 54, 55, 56

O BOKWE MME O TLOTLOMADIWE KA BOSAKHUTLENG

A o bakwe, Morena Modimo wa borraetsho
O bokwe mme o tlotlomadiwe ka bosakhutleng
A go bakwe leina la gago le le tlotlegang le le boitshepho,
Le bokwe mme le tlotlomadiwe ka bosakhutleng.

O BOKWE MME O TLOTLOMADIWE KA BOSAKHUTLENG

A o bakwe mo tempeleng ya kgalalelo ya gago e e boitshepho,
O disiwe mme o galalediwe ka bosakhutleng go feta sengwe le sengwe.
O bakwe mo setilong sa bogosi jwa gago,
O bokwe mme o godisiwe ka bosakhutleng go feta sengwe le sengwe.

O BOKWE MME O TLOTLOMADIWE KA BOSAKHUTLENG

A o bakwe, wena molekanyi wa matengteng, yo o dutseng mo godimo ga dikheruba.
O bokwe mme o galalediwe ka bosakhutleng go feta sengwe le sengwe.
O bakwe mo lewaping,
O godisiwe mme o galalediwe ka bosakhutleng, go feta sengwe le sengwe.

O BOKWE MME O TLOTLOMADIWE KA BOSAKHUTLENG

Thuto ya Bobedi | Bakorinthe 13: 11-13

Bakaulengwe, itumeleng lo siamisiwe, lo gomotsege; nnang le boitlhômô bo le b**gwe fela lo agisanye! Foo Modimo wa lorato le kagiso o tla nna le lona. Dumedisanyang ka katlo e e boitshepo. Baitshepi botlhe ba a lo dumedisa. Bopelotlhomogi jwa Morena Jesu Keresete le lorato lwa Modimo le kabelanyo ya Mowa o o Boitshepo a di nne le lona lotlhe!

Alleluya | Tshenolo 1:8

Alleluya, alleluya. Tlotlo a e nne ya ga Rara le ya ga Morwa le ya Moya o o Boitshepo, Modimo o o leng teng, e bile ono o le teng, e bile ke o o tlaa tlang. Alleluya.

Efangele | Johane 3: 16-18

Jesu o ne a raya Nikotemo a re:

"Modimo o ratile lefatshe mo go kalo, mo o bileng wa le neela Morwaa-ona yo o tsetsweng a le esi, gore mongwe le mongwe yo o dumelang mo go ene a se ka a latlhega, mme a nne le bophelo jo bo sa khutleng. Kana Modimo ga o a roma Morwaa-ona mo lefatsheng gore a atlhole lefatshe, mme e le gore lefatshe le pholosiwe ka ene. Yo o dumelang mo go ene ga a atlholwe. Yo o sa dumeleng o setse a atlhotswe, ka a se ka a dumela mo leineng la Morwa Modimo yo o tsetsweng a le esi."

23/05/2026

MOLETLO O O MOGOLO WA PHOLOGO YA MOYA O O BOITSHEPO ( PENTEKOSETA)

Thuto ya Ntlha | Ditiro 2: 1-11

E rile letsatsi la Pentekoste le tla, barutwa ba bo ba le mmogo botlhe felong go le gongwe. Ga utlwala ka tshoganyetso mosumo o o tswang legodimong, e kete wa ledimo le le tsubutlang, wa tlala ka ntlo yotlhe e ba nnang mo go yona. Ga ba ga bonala mo go bone diteme tse di kgaoganang, e kete dikgabo tsa molelo, tsa nna mo go mongwe le mongwe wa bone. Mme botlhe ba tlala Mowa o o Boitshepo, ba simolola go bua ka diteme di sele ka fa Mowa o ba buisang ka teng.

Jaanong ga bo go agile Bajuta mo Jerusalema, e le banna ba ba boifang Modimo, ba tswa morafeng mongwe le mongwe o o fa tlase ga legodimo. Ya re mosumo oo o utlwala, batho ba bantsi ba phuthega, ba be ba feretlhega, ka mongwe le mongwe a utlwa ba bua ka puo ya ga gabo. Botlhe ba tseana, ba gakgamala, ba raana ba re: “Kana, ba ba buang ba, a ga se Bagalelea botlhe? Mme go ntse jang, fa mongwe le mongwe wa rona a utlwa ba bua mo puong ya gagwe e a tsaletsweng mo go yona? Re le Bapharatha le Bamedia le Baelame le ba ba agileng mo Mesopotamia le mo Jutea le mo Kapatokia le mo Ponto le mo Asia le mo Feregia le mo Pamefilia le mo Egepeto le kwa dintlheng tsa Lebia tikologong ya Kirene le baeng ba ba tswang kwa Roma, Bajuta le batlhabologi le Bakereta le Baarabia, re ba utlwa ba bua ditiro tse dikgolo tsa Modimo ka diteme tsa rona.”

Pesalema 104: 1ab & 24ac, 29-30, 31 & 34

MORENA ROMELA MOYA WA GAGO, MME O NTSHAFATSE SEFATLHEGO SA LEFATSHE

Baka Morena, mowa wa me!
Morena, Modimo wa me, o mogolo thata.
Ditiro tsa gago, Morena, kana di methalethale jang!
Lefatshe le tletse ditlhodiwa tsa gago.

MORENA ROMELA MOYA WA GAGO, MME O NTSHAFATSE SEFATLHEGO SA LEFATSHE

Fa o tlosa mewa ya tsona, di a swa,
Di boela loroleng lwa tsona;
Fa o roma mowa wa gago, di a tlholega;
O tlhabolola sefatlhego sa lefatshe.

MORENA ROMELA MOYA WA GAGO, MME O NTSHAFATSE SEFATLHEGO SA LEFATSHE

A kgalalelo ya Morena e nnele ruri;
A Morena a itumele ka ntlha ya ditiro tsa gagwe.
A dikakanyo tsa me di natefelele one,
Nna ke tla itumela mo go Morena.

MORENA ROMELA MOYA WA GAGO, MME O NTSHAFATSE SEFATLHEGO SA LEFATSHE

Thuto Ya Bobedi | 1 Bakorinthe 12: 3b-7, 12-13

Bakaulengwe: Ga go ope yo o ka reng: “Jesu ke Morena!” fa e se ka Mowa o o Boitshepo. Go na le dineo tse di sa tshwaneng, mme Mowa o mongwe fela; go na le ditirelo tse di farologanyeng, mme Morena o mongwe fela; go na le dinonofo tsa mefutafuta, mme Modimo o mongwe fela o o dirang tsotlhe mo go botlhe. Mongwe le mongwe o newa ponatshego ya Mowa go nna thusego ya botlhe.

Gonne go ntse jaaka go le mmele o le mongwe o o nang le ditokololo tse dintsi, mme ditokololo tsotlhe tsa mmele, le fa di le dintsi, e le mmele o le mongwe fela: Keresete le ene o ntse jalo. Gonne le rona rotlhe re kolobeleditswe go nna mmele o le mongwe fela ka Mowa o le mongwe fela, le fa re le Bajuta gongwe Bagerika, le fa re le batlhanka gongwe bagololesegi, rotlhe re nositswe Mowa o le mongwe fela.

SEFELA SA PENTEKOSETA (Cf. Sefela 93)

Tla Moya wa Boitshepho – le dineo tsa gago;
Fologa legodimong – Tlaa, Rra bahumanegi;
Wa grasia monei – lesedi la dipelo.

Mogomotsi botlhokong – mothusi mo tlalelong;
Boikhutso mo tirong – tapoloso matsapeng;
Tshediso mo selelong – botshe mo khutsafalong.

O letsatsi le lentle –o bonesa lefifi;
Je le pelong tsa rona – Ga gona bontle bope;
Ga go tshiamo epe –O se yo mo go rona.

Tlhapisa se se leswe – nosa se se omileng;
Fodisa dintho tsotlhe – nolofatsa logwadi;
Thuthafatsa serame – batla se se timetseng.

Badumedi ba gago – a ba bone dineo;
Tsa gago tse di supang – Re fe bontle botshelong;
Re fe poloko losong – tuelo legodimong.

Efangele | Johane 20: 19-23

E rile ka letsatsi leo la Tshipi, go le maabanyane, e bile ditswalo tsa kwa barutwa ba neng ba phuthegetse teng e tswetswe ka ntlha ya go boifa Bajuta, Jesu a tla a ema mo gare ga bone, a ba raya a re: “A kagiso e nne le lona!” Ya re a sena go bua jalo, a ba bontsha diatla le letlhakore. Ya baa gona barutwa ba itumelang, ka ba bona Morena. Jesu a ba raya gape a re: “A kagiso e nne le lona! Ke a lo roma, jaaka Rara a nthomile.” Ya re a sena go bua jalo, a ba budulela, a ba raya a re: “Amogelang Mowa o o Boitshepo! Ba lo ba itshwarelang dibe tsa bone ba di itshwaretswe; mme ba lo ba balelang dibe tsa bone ba di baletswe.”

16/05/2026

SONTAGA SA BOSUPA SA PASEKA

Thuto Ya Ntlha | Ditiro 1: 12-14

Ya baa gona ba boelang kwa Jerusalema, ba tswa mo thabeng e e bidiwang ya Diolefa e e gaufi le Jerusalema, e bokgakala jwa yona e leng leeto la Sabata. Ya re ba sena go tsena, ba tlhatlogela kwa ntlwaneng e e kwa godimo, kwa ba ne ba nna teng, e b**g Petoro le Johane le Jakobo le Andrea le Filipo le Thomase le Baretolomeo le Matheo le Jakobo wa ga Alefeo le Simone-Selote le Juta wa ga Jakobo. Botlhe bao ba nnela ruri mo thapelong ka b**gwefela jwa pelo, ba na le basadi bangwe le Maria, mma Jesu, le bomonnaa Jesu.

Pesalema 27: 1, 4, 7-8

KE DUMELA GORE KE TLAA BONA MOLEMO WA MORENA MO LEFATSHENG LA BATSHEDI

Morena ke lesedi la me le poloko ya me;
ke tla boifa mang?
Morena ke botshabelo jwa botshelo jwa me;
ke tla tshoga mang?

KE DUMELA GORE KE TLAA BONA MOLEMO WA MORENA MO LEFATSHENG LA BATSHEDI

Selo se le sengwe se ke se kopileng mo go Morena,
se ke se eletsang ke go re, ke nne mo Ntlong ya Morena ka
metlha yotlhe ya bophelo jwa me,
go leba bontle jwa Morena
le go akanya mo Tempeleng ya gagwe.

KE DUMELA GORE KE TLAA BONA MOLEMO WA MORENA MO LEFATSHENG LA BATSHEDI

Utlwa, Morena, ke kua ka lentswe le legolo;
nkutlwele botlhoko, o nkarabe.
Pelo ya me e bolela lefoko la gago le le reng:
Batlang sefatlhego sa me.

KE DUMELA GORE KE TLAA BONA MOLEMO WA MORENA MO LEFATSHENG LA BATSHEDI

Thuto Ya Bobedi | 1 Petoro 4: 14-18

Baratiwa: Itumeleng ka fa dipogiso tsa ga Keresete lo di tlhakanetseng le ene ka teng, gore le mo ponatshegong ya kgalalelo ya gagwe lo tle lo itumele, lo ipele. Lo sego, fa lo kgojwa ka ntlha ya leina la ga Keresete, ka Mowa wa kgalalelo wa Modimo o ntse mo go lona. Mo go bone le a kgalwa, mme mo go lona le a galalediwa. Kana go se ka ga nna ope wa lona yo o bogisiwang, e le mmolai gongwe legodu gongwe modira-bosula gongwe yo o itsenyang mo dilong tse di sa mo tshwanelang. Mme fa a bogisiwa, ka a le Mokeresete, a a se ka a tlhajwa ke ditlhong ka ntlha ya leina leo, mme a a galaletse Modimo ka lone.

Efangele | Johane 17: 1-11a

Mo motlheng oo, Jesu o ne a tsholeletsa matlho kwa legodimong a re:

“Rara, nako e tsile; galaletsa Morwao gore Morwao a go galaletse, jaaka o mo neile thata mo nameng yotlhe gore mongwe le mongwe yo ò mo mo neileng a mo nee bophelo jo bo sa khutleng. Mme botshelo jo bo sa khutleng ke fa ba go itse o le Modimo wa boammaaruri o le wesi, le Jesu Keresete yo ò mo romileng. Ke go galaleditse mo lefatsheng ka go fetsa tiro e o e nneetseng go e dira. Jaanong, wena Rara, nkgalaletse mo go wena ka wesi ka kgalalelo e ke neng ke na le yona fa go wena, lefatshe le ise le nne teng.

“Leina la gago ke le senoletse batho ba o ba nneileng, ba tswa mo lefatsheng; e ne e le ba gago, o ba nneile, e bile ba tlhokometse lefoko la gago. Jaanong ba itse gore tsotlhe tse o di nneileng di tswa go wena. Gonne ke ba neile mafoko a o a nneileng, mme ba a amogetse, ba bile ba itse ruri gore ke tswa go wena, ba dumetse gore o nthomile.

“Ke a ba rapelela; ga ke rapelele lefatshe, mme ke rapelela ba o ba nneileng; gonne ke ba gago. Tsotlhe tse e leng tsa me ke tsa gago, mme tse e leng tsa gago ke tsa me, mme ke galaleditswe ka bone. Nna ga ke tlhole ke le mo lefatsheng, mme bone ba mo lefatsheng. Nna ke tla koo go wena.

09/05/2026

SONTAGA SA BORATARO SA PASEKA

Thuto Ya Ntlha | Ditiro 8: 5-8, 14-17

Filipo a ya kwa motseng mongwe wa Samaria, a ba rerela Keresete.Batho ba tlhokomela dilo tse di bolelwang ke Filipo ka b**gwefela jwa pelo, ka ba utlwa le go bona ditshupo tse a di dirang; gonne ba bantsi ba ne ba na le mewa e e itshekologileng; yona e ne e tswa e goa ka lentswe le legolo. Mme ba bantsi ba ba suleng mefama le ba ba golafetseng maoto ba fodisiwa. Ga ba ga nna boitumelo jo bogolo mo motseng oo.
E rile baapostolo ba ba kwa Jerusalema ba utlwa gore Basamaria ba amogetse Lefoko la Modimo, ba roma Petoro le Johane kwa go bone. Ya re ba sena go fitlha teng, ba ba rapelela gore ba amogele Mowa o o Boitshepo; gonne o ne o ise o wele mo go ope wa bone, ba ne ba kolobeditswe mo leineng la Morena Jesu fela. Ba ba baya diatla, mme ba amogela Mowa o o Boitshepo.

Pesalema 66: 1-3a, 4-5, 6-7a, 16 & 20

DUDUELETSANG MODIMO, LONA BA LEFATSHE LOTLHE

Dudueletsang Modimo, lona ba lefatshe lotlhe.
Opelelang kgalalelo ya leina la ona; galaletsang pako ya ona.
Rayang Modimo lo re:
Ditiro tsa gago di tlotlometse jang ne.

DUDUELETSANG MODIMO, LONA BA LEFATSHE LOTLHE

A ba lefatshe lotlhe ba go obamele, ba go opelele,
ba opelele leina la gago pako.
Tlayang, lo lebe ditiro tsa Modimo;
o boitshega ka ditiro mo baneng ba batho.

DUDUELETSANG MODIMO, LONA BA LEFATSHE LOTLHE

O fetotse lewatle komelelo;
Ba kgabagantse noka ka dinao;
Foo ra o itumelela.
O busa ka gale ka thata ya ona

DUDUELETSANG MODIMO, LONA BA LEFATSHE LOTLHE

Tlayang, lo reetse, lona lotlhe ba lo boifang Modimo;
ke tla bolela se o se diretseng mowa wa me.
A go bakwe Modimo o o se kang wa latlha thapelo ya me.
Le e seng go ntima bopelotlhomogi jwa ona.

DUDUELETSANG MODIMO, LONA BA LEFATSHE LOTLHE

Thuto Ya Bobedi | 1 Petoro 3: 15-18

Baratiwa: Lo itshepise Morena Keresete mo dipelong tsa lona, lo ntse lo iketleeditse go araba mongwe le mongwe yo o batlang boikarabelo mo go lona ka ga tsholofelo e lo nang nayo, mme e nne ka bonolo le ka poi

03/05/2026

Happy belated birthday to our President, May God continue to bless you Mr Molapisi

03/05/2026

02/05/2026

SONTAGA SA BOTLHANO SA PASEKA

Thuto a Ntlha | Ditiro 6: 1-7

E rile mo malatsing ao, fa barutwa ba ntsifala, ga tsoga ngongorego ya ba ba buang Segerika, ba ngongoregela ba ba buang Sehebere, ka batlholagadi ba bone ba sa tlhokomelwe mo tlamelong ya malatsi. Foo ba ba 12 ba bitsa barutwa botlhe ba re: “Ga go a tshwanela gore re ka tlogela Lefoko la Modimo, ra ya go aba dijo. Ka moo, bakaulengwe, itlhopheleng banna ba supa mo go lona, ba ba supelwang gore ba siame, ba ba tletseng Mowa le botlhale, ba re ka ba laodisang tiro e e batlegang eo. Mme rona re tla tshwarelela mo thapelong le mo tirelong ya Lefoko.”

Lefoko le la kgatlha botlhe pitsong, mme ba tlhopha Setefane, monna yo o tletseng tumelo le Mowa o o Boitshepo, le Filipo le Porogoro le Nikanore le Timone le Paremena le Nikolao, motlhabologi wa kwa Antiogia; ba ba emisa fa pele ga baapostolo. Ya re ba sena go rapela, ba ba baya diatla.
Lefoko la Modimo la tota, palo ya barutwa ya ntsifala thata mo Jerusalema, lesomo le legolo la baperesiti la ineela mo tumelong.

Pesalema 33: 1-2, 4-5, 18-19

MORENA, A BOPELONOMI JWA GAGO BO NNE MO GO RONA, FELA KA FA RE GO LEBELETSENG KA TENG

Lona basiami, dudueletsang Morena,
bathokgami ba tshwanetswe ke go baka.
Bakang Morena ka kitara,
lo mo opelele ka harepa e e dithapo di le lesome.

MORENA, A BOPELONOMI JWA GAGO BO NNE MO GO RONA, FELA KA FA RE GO LEBELETSENG KA TENG

Gonne lefoko la Morena le siame,
le go dira gotlhe ga gagwe ke ka boikanyo.
O rata tshiamo le katlholelo;
lefatshe lotlhe le tletse bopelotlhomogi jwa Morena.

MORENA, A BOPELONOMI JWA GAGO BO NNE MO GO RONA, FELA KA FA RE GO LEBELETSENG KA TENG

Bonang, leitlho la Morena le lebile bona ba ba mmoifang,
bona ba ba lebeletseng bopelontle jwa gagwe,
gore a golole mewa ya bone mo losong,
le go ba tshedisa tlaleng.

MORENA, A BOPELONOMI JWA GAGO BO NNE MO GO RONA, FELA KA FA RE GO LEBELETSENG KA TENG

Thuto ya Bobedi | 1 Petoro 2: 4-9

Baratiwa: Tlayang go ene yo e leng lentswe le le tshelang, le le latlhilweng ke batho, mme e le le le tlhophilweng la botlhokwa mo Modimong; ineeleng go agiwa jaaka majwe a a tshelang go nna ntlo ya Mowa, ya boperesiti jo bo itshepileng, go tsisa ditlhabelo tsa Mowa tse di kgatlhang Modimo ka Jesu Keresete.6Gonne go kwadilwe mo Lokwalong ga twe:
“Bona, ke baya lentswe la sekhutlo mo Sione
le le tlhophilweng la botlhokwa;
yo o dumelang mo go lone ga
a kitla a tlhajwa ke ditlhong.”
Ke la botlhokwa mo go lona ba lo dumelang; mme mo go ba ba sa dumeleng:
“Lentswe le baagi ba le latlhileng
le dirilwe letlapa la sekhutlo,”
“lentswe le le kgopang, letlapa la seru;”
bone ba a kgotšwa, ka ba sa utlwe Lefoko; ke sona se ba bileng ba se beetswe.
Mme lona lo losika lo lo tlhaotsweng, lo boperesiti jwa bogosi le morafe o o boitshepo le baruiwa ba Modimo, gore lo tumise ditiro tse dikgolo tsa yo o lo biditseng go tswa mo lefifing, go tsena mo leseding la gagwe le le gakgamatsang

Efangele | Johane 14: 1-12

Mo motheong o, Jesu o ne a raya barutwa ba gagwe a re:

“A dipelo tsa lona di se huduege; dumelang mo Modimong, le nna, dumelang mo go nna! Mo ntlong ya ga Rre go na le maago a le mantsi. Go seng jalo, nka bo ke lo boleletse; gonne ke ya go lo baakanyetsa manno. Mme e tla re ke sena go ya le go lo baakanyetsa manno, ke boe, ke lo itseele gore kwa ke leng teng, le lona lo nne teng. Mme kwa ke yang teng, lo a go itse, le tsela lo a e itse.”

Thomase a mo raya a re: “Morena, ga re itse kwa o yang teng; mme tsela re ka e itse jang?”

Jesu a mo araba a re: “Ke nna tsela le boammaaruri le bophelo; ga go ope yo o ka fitlhang kwa go Rara fa e se ka nna. Fa lo ka bo lo nkitse, lo ka bo lo itse le ene Rre. Mme go tloga jaanong lo a mo itse, lo bile lo mmonye.”

Filipo a mo raya a re: “Morena, re supetse Rara, foo go tla bo go re lekanye.”

Jesu a mo raya a re: “Ga ke bolo go nna le lona, mme a ga o ise o nkitse, Filipo? Yo o mponyeng o bonye Rara. O bua jang fa o re: ‘Re supetse Rara’? A ga o dumele gore nna ke mo go Rara, le Rara o mo go nna? Mafoko a ke a buang le lona ga ke a bue ka bogame; mme Rara yo o nnang mo go nna ke ene yo o dirang ditiro tsa gagwe. Ntumeleng gore ke mo go Rara, le Rara o mo go nna; mme fa go sa nne jalo, ntumeleng ka ntlha ya tsona ditiro. Ammaaruri, ammaaruri ke lo raya ke re: Yo o dumelang mo go nna, le ene o tla dira ditiro tse ke di dirang, e bile o tla dira tse dikgolo bogolo go tse; gonne ke ya kwa go Rara.

25/04/2026

SONTAGA SA BONE SA PASEKA

SONTAGA SA MODISA O O MOLEMO LE DIPITSO

Thuto Ya Ntlha | Ditiro 2: 14a, 36-41

Ke fa Petoro a ema le ba ba 11, a tsholetsa lentswe, a bua nabo a re: “Jaanong a lelapa lengwe le lengwe la Iseraele le itse ruri gore ene Jesu yo lo mmapotseng, Modimo o mo dirile Morena le Keresete.”

E rile ba utlwa, ba tlhabega mo pelong, ba be ba raya Petoro le baapostolo ba bangwe ba re: “Banna ba ga etsho, re ka dirang?”
Petoro a ba raya a re: “Tlhabologang, mme a mongwe le mongwe wa lona a kolobediwe ka leina la ga Jesu Keresete go bona boitshwarelo jwa dibe tsa lona, mme lo tla amogela neo ya Mowa o o Boitshepo; gonne tsholofetso e raya lona le bana ba lona le botlhe ba ba kwa kgakala, e b**g botlhe ba Morena, Modimo wa rona, o tla ba ipiletsang.”
A supa, a ba a ba kaela ka mafoko a mantsi a mangwe a re: “Ineeleng go pholosiwa, lo tswe mo mofuteng ono o o kgopo!” Ke fa ba ba amogetseng lefoko la gagwe ba kolobediwa, mme ka letsatsi leo phuthego ya oketsega ka batho ba ba ka nnang 3 000.

Pesalema 23: 1-3a, 3b-4, 5, 6

MORENA KE MODISA WA ME, GA NKITLA KE TLHOKA SEPE

Morena ke modisa wa me,
ga nkitla ke tlhoka sepe.
O mpothisa mo mafulong a matalana,
o nkgogela kwa metsing a tapoloso. O lapolosa mowa wa me.

MORENA KE MODISA WA ME, GA NKITLA KE TLHOKA SEPE

O ntsamaisa mo ditseleng tsa tshiamo ka ntlha ya leina la gagwe.
Le fa ke tsamaya mo mogorogorong wa moriti wa loso,
ga nkitla ke boifa bosula bope; gonne o na le nna.
Tsamma ya gago le seikokotlelo sa gago di a nkgomotsa.

MORENA KE MODISA WA ME, GA NKITLA KE TLHOKA SEPE

O baakanya bojelo fa pele ga me
go lebagana le baba ba me;
o ntlotsa tlhogo ka lookwane;
senwelo sa me se tletse, se a penologa.

MORENA KE MODISA WA ME, GA NKITLA KE TLHOKA SEPE

Ruri molemo le boitshwarelo
di tla ntshala morago ka malatsi otlhe a bophelo jwa me;
ke tla nna mo Ntlong ya Morena
go ya bosakhutleng.

MORENA KE MODISA WA ME, GA NKITLA KE TLHOKA SEPE

Thuto Ya Bobedi | 1 Petoro 2: 20b-25

Baratiwa, fa lo bogisiwa mogang lo dirang molemo, mme lo go itshokela, gone foo go lebosega fa pele ga Modimo; gonne lo bileditswe gona moo. Keresete le ene o bogisitswe ka ntlha ya lona, a lo tlogelela sekao gore lo gate motlhala wa gagwe; yo o neng a sa dira boleo bope, le tsietso ga e a ka ya fitlhelwa mo molomong wa gagwe. E rile a kgalwa, a se ka a ba a kgala; ya re a bogisiwa, a se ka a bôpa, mme a ineela fela mo go ene yo o atlholang ka tshiamo. O ne a belegela maleo a rona ka boene ka mmele wa gagwe kwa sefapaanong, gore rona re nne ba ba suleng ntlheng ya boleo, mme re tshelele tshiamo; lo fodisitswe ka dintho tsa gagwe. Gonne lo ne lo ntse jaaka dinku tse di timetseng, mme jaanong lo boetse go Modisa le Molebeledi wa mewa ya lona.

Efangele | Johane 10: 1-10

Mo motlheng oo, Jesu o ne a raya Bafarasai a re: “Ammaaruri, ammaaruri ke lo raya ke re: Yo o sa tseneng ka kgoro ya lesaka la dinku, mme a tlolela go sele, ke legodu le senokwane. Mme yo o tsenang ka kgoro ke modisa wa dinku. Modisa wa kgoro o a mmulela, dinku di utlwa lentswe la gagwe, o bitsa dinku tse e leng tsa gagwe ka maina, a di bolotse. Fa a sena go bolotsa dinku tsotlhe tse e leng tsa gagwe, a di etelele pele, dinku di mo sale morago; gonne di itse lentswe la gagwe. Moeng ga di ka ke tsa mo sala morago, mme di tla mo tshaba, ka di sa itse mantswe a baeng.”

Jesu a bua nabo ka setshwantsho seo; mme bone ba se ka ba tlhaloganya gore ke eng se a se buang nabo.

Foo Jesu a bua gape nabo a re: “Ammaaruri, ammaaruri ke lo raya ke re: Ke nna kgoro ya dinku. Botlhe ba ba tlileng pele ga me ke magodu le dinokwane, mme dinku ga di a ka tsa ba utlwa. Ke nna kgoro. Fa mongwe a tsena ka nna, o tla bolokiwa; o tla tsena, a tswa, e bile o tla bona mafulo. Legodu le tla fela go utswa le go bolaya le go senya. Nna ke tsile gore di baane le botshelo, di be di nne le letlotlo.

19/04/2026

SONTAGA SA BORARO SA PASEKA

Thuto Ya Ntlha | Ditiro 2: 14, 22-33

Ke fa Petoro a ema le ba ba 11, a tsholetsa lentswe, a bua nabo a re: “Lona banna ba Jutea le lona lotlhe ba lo agileng mo Jerusalema, itseng selo se, lo tlhwaele mafoko a me tsebe:
“Lona banna ba Iseraele, utlwang mafoko a: Jesu wa Nasaretha, monna yo lo mo supeditsweng ke Modimo ka dinonofo le dikgakgamatso le ditshupo tse Modimo o di dirileng ka ene mo gare ga lona jaaka lo itse ka losi, ene yoo yo o neetsweng losong ka maikaelelo a a beilweng ke Modimo le ka kitsetsopele ya ona, lona lo mmapotse, lwa mmolaya ka diatla tsa baikepi; ke ene yo Modimo o mo tsositseng, o sena go funolola maralalo a loso; gonne go ne go sa kgonege gore lo mo golegele ruri. Gonne Dafita o ne a bua ka ga gagwe a re:
“ ‘Ke ne ke bona Morena fa pele ga me ka gale, ka a le ka fa letsogong la me le le jang, gore ke se theekele. Ka moo pelo ya me e ne ya itumela, loleme lwa me lwa ipela, le yona nama ya me e tla ikhutsa mo tsholofelong; gonne ga o kitla o tlogelela felo ga baswi mowa wa me, le gona ga o nke o leseletsa Moitshepi wa gago a senngwa ke go bola. O nkitsisitse ditsela tsa bophelo, o tla ntlatsa boitumelo ka sefatlhego sa gago.’
“Banna ba ga etsho, nka bua le lona ka maikutlo a a phuthologileng ka ga Dafita rraetsho-mogolo gore o sule, a ba a fitlhwa, mme phupu ya gagwe e sa le mo go rona le gompieno. Jaanong e re ka e ne e le ene moporofeti, mme a itse gore Modimo o kile wa mo ikanela gore o tla nnisa Keresete yo e leng wa leungo la letheka la gagwe ka fa nameng mo sedulong sa gagwe sa bogosi, a bua ka ga tsogo ya ga Keresete ka go e bona pele gore mowa wa gagwe ga o a tlogelwa mo felong ga baswi, le yona nama ya gagwe ga e a senngwa ke go bola. Jesu yoo Modimo o mo tsositse, mme rona rotlhe re basupi ba gona. Jaanong o godisitswe ka letsogo le le jang la Modimo, a amogela Mowa o o Boitshepo mo go Rara o a o solofeditseng, a tshêla se jaanong lo se bonang, lo se utlwang.

Pesalema 16: 1-2a & 5, 7-8, 9-10, 11

MORENA, O TLAA RE ITSISE TSELA YA BOTSHELO

Modimo, mpoloke, gonne ke ikanya wena!
Ke reile Morena ka re: Ke wena Morena wa me.
Morena ke kabelo ya boswa jwa me, le ya senwelo sa me;
O tshegeditse kabelo ya me.

MORENA, O TLAA RE ITSISE TSELA YA BOTSHELO

Ke tla baka Morena yo o nkgakolotseng.
Ee, le mo bosigong diphilo tsa me di a nkaela.
Ke ntse ke emisitse Morena fa pele ga matlho a me; ga nkitla ke tshikinyega,
ka a nkeme ka fa letsogong le le jang.

MORENA, O TLAA RE ITSISE TSELA YA BOTSHELO

Ka moo pelo ya me e a itumela, le moya wa me o a ipela;
mmele wa me le ona o tla ikhutsa o iketlile.
Gonne ga o kitla o tlogela mowa wa me go tsena mo bobipong,
le e seng go leseletsa moitshepi wa gago go bona go bola.

MORENA, O TLAA RE ITSISE TSELA YA BOTSHELO

O tla nkitsise tsela ya botshelo;
go kgora boitumelo, go fa pele ga sefatlhego sa gago,
le go ja monate
fa letsogong le le jang la gago ka bosakhutleng.

MORENA, O TLAA RE ITSISE TSELA YA BOTSHELO

Thuto ya Bobedi | 1 Petoro 1: 17-21

Jaanong e re ka lo mmitsa Rara yo o atlholang ka fa tirong ya mongwe le mongwe, a sa gobelelele ope, tsamayang ka poifo mo sebakeng sa boeng jwa lona, ka lo itse gore mo tsamaong ya boithamako ya lona e lo e bonyeng mo go borraeno, ga lo a gololwa mo go yona ka dilo tse di nyelelang, jaaka selefera le gouta, mme e le ka madi a a molemolemo a ga Keresete, e le a kwana e e se nang nyatsego le fa e le sebala, yo o sa leng a itsiwe pele, lefatshe le ise le tlholwe, mme a bonadiwa mo metlheng ya bofelo ka ntlha ya lona ba lo dumetseng ka ene mo Modimong o o mo tsositseng mo baswing, wa mo naya kgalalelo, gore tumelo ya lona le tsholofelo di nne mo Modimong.

Efangele | Luka 24: 13-35

E rile ka letsatsi la ntlha la beke, barutwa ba babedi ba ya kwa motsaneng wa Emause, o bokgakala jwa ona go tswa Jerusalema e neng e le dimaele tse di le robedi. Ba buisanya ka ga dilo tsotlhe tseo tse di dirafetseng. Ya re ba ntse ba buisanya, ba botsanya, Jesu ka esi a atamela, a tsamaya nabo. Mme matlho a bone a bo a siregile, mo ba se kang ba mo itse. A ba raya a re: “Mafoko a ke afe a lo a buisanyang lo ntse lo tsamaya?”

Mme ba ema, ba hutsafetse. Yo mongwe wa bone, e b**g Keleopa, a mo araba a re: “A ke wena moeng o le wesi mo Jerusalema yo o sa itseng tse di dirafetseng teng mo malatsing ano?”

A ba raya a re: “Dilo dife?”

Ba mo raya ba re: “Tsa ga Jesu wa Nasaretha, yo e neng e le monna wa moporofeti yo o thata mo tirong le mo lefokong fa pele ga Modimo le batho botlhe, ka fa baperesiti ba bagolo le ba lekgotla le legolo ba rona ba mo neetseng ka teng go atlholelwa loso, ba mmapola. Mme rona re ne re solofetse gore ke ene yo o tla gololang Iseraele. Le gona, kwa ntle ga dilo tsotlhe tse, kajeno e setse e le letsatsi la boraro, dilo tse di ntse di dirafetse. E bile basadi bangwe ba ga rona ba re gakgamaditse, ba ba neng ba phaketse, ba ya kwa phupung. Mme e rile ba sa fitlhele setoto sa gagwe, ba boa ba re, ba bonye pono ya baengele ba ba reng: ‘O tshedile.’
Mme bangwe ba bone ba ba nang le rona ba ya kwa phupung, ba fitlhela go ntse fela jaaka basadi ba boletse; mme ene ba se ka ba mmona.”

Foo Jesu a ba raya a re: “Ao, basena-tlhaloganyo ke lona, ba lo pelo di bonya go dumela tsotlhe tse baporofeti ba di buileng! A Keresete o ne a sa tshwanela go boga dilo tseo le go tsena mo kgalalelong ya gagwe.” Jaanong a simolola ka Moše le ka baporofeti botlhe, a ba rarabololela tse di builweng ka ga gagwe mo Dikwalong tsotlhe.

Jaanong ya re ba atamela motsana o ba yang go ona, mme ene a dira jaaka e kete o fetela pele, ba mo emelela ba re: “Lala le rona; gonne go maitsiboa, letsatsi le setse le fetile.” Foo a tsena, a nna nabo. Ya re a ntse nabo fa dijong, a tsaya senkgwe, a leboga, a se nathoganya, a se ba abela. Ke fa matlho a bone a sirologa, mme ba mo itse; a ba a nyelela mo ponong ya bone. Jaanong ba raana ba re: “A dipelo tsa rona ga di a ka tsa tuka mo teng ga rona, fa a ntse a bua le rona mo tseleng, a re tlhalosetsa Dikwalo?”

Mme ba nanoga ka yona nako eo, ba boela kwa Jerusalema, ba fitlhela ba ba 11 ba phuthegile le ba ba nang nabo, ba ba reng: “Ruri, Morena o tsogile, o bonywe ke Simone!”

Jaanong bone ba babedi ba bolela tse di dirafetseng mo tseleng le ka fa ba mo itsileng ka teng ka go nathoganya senkgwe.