Shoko Ranhasi

Shoko Ranhasi Let us share the word of God.

All Scripture is given by inspiration of God, and is profitable for doctrine, for reproof, for correction, for [c]instruction in righteousness, that the man of God may be complete, thoroughly equipped for every good work.

06/08/2026

SHOKO RANHASI – THE BOOK OF EPHESIANS

PART 7(a): Kufamba Sezvakafanira Kudanwa Kwatakaitwa – Walking Worthy of Our Calling

Wednesday 05 August 2026

Rugare ngaruve nemi mose!
〰️〰️〰️〰️〰️〰️〰️〰️ https://www.facebook.com/mamhunzephib
〰️〰️〰️〰️〰️〰️〰️〰️
Shoko ranhasi riri pana Ephesians 4:1 rinoti: "Naizvozvo ini musungwa munaShe, ndinokumbira zvikuru kuti mufambe zvakafanira kudanwa kwamakadanwa nako."

English:
"I, therefore, the prisoner of the Lord, beseech you to walk worthy of the calling with which you were called."
〰️〰️〰️〰️〰️〰️〰️〰️

ZVIDZIDZO:
Regai titende Mwari, Baba vaIshe wedu Jesu Kristu vanotipa hupenyu hwezuva rimwe nerimwe. From chapter 1 to 3 (Part 1 to 6), takadzidza nyaya yekuropafadzwa kwedu kuri munaJesu Kristu: ruponeso, nyasha, kuyananiswa naMwari, kubatana muChurch, kukura pakuziva Mwari, uye kusimbiswa murudo rwaKristu. Takadzidzawo kuti Mwari vakatida, vakatidanira basa sezvatiri basa ramaoko awo, uye vakatipa simba noMweya Mutsvene kuti tirarame upenyu hunovakudza. Nhasi in chapter 4 tichatanga kubata nyaya yemifambiro vatinofanira kufamba nawo savanhu vakadanwa naMwari munaJesu Kristu, kuti tinofanira kufamba sei. Munhu akadanwa naJesu Kristu anofanira kufamba sezvinofanira kudanwa kwaakaitwa, achirarama hupenyu hunofadza Mwari.

1️⃣ Ngatifambai nokuzvininipisa, unyoro, nomwoyo murefu:
Shoko raMwari rinoti: "(1) Naizvozvo ini musungwa munaShe, ndinokumbira zvikuru kuti mufambe zvakafanira kudanwa kwamakadanwa nako, (2) nokuzvininipisa kwose novunyoro, nomoyo murefu, muchiitirana moyo murefu murudo (Ephesians 4:2)." Tirikukumbirwa kuti "tifambe zvakafanira kudanwa kwatakadanwa nako naJesu Kristu," panotarisirwa kuti tive vanhu (a) vakazvininipisa [lowliness], (b) vanyoro (meekness / gentleness], (c) vane mwoyo murefu [longsufering], uye (d) vanoita moyo murefu murudo [bearing with one another in love]. Aya ndiwo maitiro anotarisirwa kune munhu akadanwa naKristu. Nyika inodzidzisa kuzvikudza kuti ndini ndionei, kuzvikwidziridza, uye kutsiva, asi Jesu Kristu anodzidzisa kuzvininipisa, unyoro, kutsungirira, nerudo. Jesu Kristu ndivo muenzaniso wedu mukuru. Shoko raMwari rinotidzidzisa kuti isu savanhu vanonamata Mwari munaJesu Kristu, tive nemoyo waJesu Kristu wokuzvininipisa, kusazvikudza, kuisa vamwe pamberi pedu tichiti vanotikundawo pakunaka, uye kuteerera Mwari kusvika pakuzvipira kwakazara, sezvakaitwa naJesu paakazvininipisa kusvika parufu rwemuchinjikwa (Philippians 2:3-8). Rimwezve shoko roti: James anowedzerawo achiti: "(6) Asi unopa nyasha dzakapfuvura. Saka Rugwaro runoti: Mwari unodzivisa vanozvikudza, asi unopa nyasha vanozvininipisa..... (10) Muzvininipise pamberi paShe, agokukudzai (James / Jacob 4:6, 10)." Haaa hama dzangu tizvininipise pasi peruoko rune simba rwaMwari, sekureva kweshoko kunoti: "Naizvozvo zvininipisei pasi poruvoko runesimba rwaMwari, kuti akukudzei nenguva yakafanira (1 Peter 5:6)."

✍️ Hama dzangu, kuzvininipisa hakurevi kushaya simba, asi kuva nesimba raMweya Mutsvene rokugona kuti kunyange vaitirwa zvakaipa unogona kuzvidzora pakusaitawo zvakaipa, haugumbuki, asi unongotenda kuti zvakafanirweni, kana zvakaitirwawo vakatitangira, naiwo Jesu Kristu vakazviitirwa, tichiziva kuti pazvinhu zvose tinofanira kuita kuda kwaMwari. Munhu munyoro haasi munhu asingagoni k***a, asi munhu anoziva kudzora hasha dzake. Tinofanira kudzidza kutsungirirana murudo, nokuti muChechi mune vanhu vane hunhu hwakasiyana, mafungiro akasiyana, uye zvipo zvakasiyana. Shoko rinoti: "(12) Naizvozvo, savasanangurwa vaMwari, vatsvene navanodikanwa, fukai moyo unetsitsi, nomoyo munyoro, nokusazvikudza, novunyoro, nomoyo murefu; (13) muitirane moyo murefu, muchikanganwirana, kana munhu anemhosva nomumwe; Kristu sezvaakakukanganwirai, muite saizvozvo nemi vo (Colossians 3:12-13)." Kana Jesu Kristu vakatikanganwira zvikuru, nesuwo ngatikanganwiranei, kana vakazvininipisa kusvika parufu rwemuchinjikwa nesuwo ngatidarowo nguva dzose.

2️⃣ Tichengete humwe hwoMweya muchisungo chorugare:
Shoko raMwari rinoti: "(3) muchishingaira kuchengeta vumwe bwoMweya muchisungo chorugare. (4) Kuno muviri mumwe, noMweya mumwe, sezvamakadanwa vo mutariro imwe yokudanwa kwenyu; (5) Ishe mumwe, nokutenda kumwe, norubhabhatidzo rumwe, (6) naMwari mumwe, naBaba vavose, uri pamsoro pavose, unobata navose, uri mukati menyu mose (Ephesians 4:3-6)." Paul anotiratidza zvinhu 7 zvinobatanidza kereke yaJesu Kristu zvinoti:(a) muviri mumwe (One Body), (b) Mweya mumwe (One Spirit), (c) tariro imwe (One Hope), (d) Ishe mumwe (One Lord), (e) kutenda kumwe (One Faith), (f) rubhabhatidzo rumwe (One Baptism), uye (g) Mwari mumwe naBaba vavose (One God and Father of all). David akanyora achiti: "Tarirai, kunaka kwazvo nokufadza kwazvo Kana hama dzichigara pamwechete norugare (Psalm 133:1)." NaJesu Kristu vakanyengetera Baba vachiti: "(21) kuti vose vave vamwe; semi Baba muri mandiri, neni mamuri; kuti naivo vave matiri, kuti nyika itende kuti makandituma. (22) Neni ndakavapa kubwinya kwamakandipa; kuti vave vamwe, nesu tiri vamwe (John 17:21)." Haaa imi ngative vamwe, saJesu Kristu naMwari vari vamwe (John 17:11).

✍️ Hama dzangu, satani anoziva kuti kereke yaMwari, navanonamata vakabatana uye vane simba, saka anoshandisa makuhwa, godo, nharo, kuzvikudza, uye kusakanganwirana kuti aparadze kubatana kwevakabatana. Asi isu takadanwa kuva vanhu vorugare. Jesu vakati: "Vakaropafadzwa vanoyananisa nokuti vachanzi vana vaMwari (Matthew 5:9)." Yes ngative vayananisi kwete vanoramba vachikuchidzira moto (Proverbs 26:20). Ngatichenjerei rurimi rwedu, nokuti: "Rurimi rune simba pamusoro porufu noupenyu; Vanoruda vachadya zvibereko zvarwo (Proverbs 18:21)." Ngatiregei kuva vanhu vanoparadza humwe hoMweya mumhuri, mukereke, mumabasa, kana munharaunda; asi ngative vanhu vanovaka muviri waJesu Kristu murudo, nekuti tose tiri mitezo pamuviri umwe, umwe neumwe ari mutezo veumwe (Ephesians 4:25; 1 Corinthians 12:12-31; Romans 12:3-21).

3️⃣ Jesu Kristu vakakunda zvose uye vakapa nyasha kune mumwe nomumwe:
Shoko raMwari rinoti: "(7) Asi mumwe nomumwe wedu wakapiwa nyasha nechiyero chechipo chaKristu. (8) Naizvozvo unoti: Wakakwira kumusoro akatapa vatapwa, Akapa vanhu zvipo, (9) (Zvino kuti: Wakakwira, chinyiko, asi kuti, wakaburuka pakutanga vo kumativi ari pasi panyika? (10) Wakaburuka ndiye wakakwira vo kumusoro-soro kwedenga rose, kuti azadzise zvose.) (Ephesians 4:7–10)." Mashoko aya anotiratidza kukunda kukuru kwaJesu Kristu, vakaburuka kubva kudenga, vakazvininipisa, vakava munhu kuvanhu, vakasakoshesa kufanana kana kuenzana naMwari (Philippians 2:6–8), akafira zvivi zvedu, akavigwa, akamuka pazuva rechitatu, ndokukwira kudenga akagara kuruoko rworudyi rwaMwari (Acts 1:9–11; Hebrews 1:3). Unogona kuzvinyora seizvi:
Pakukunda kwaJesu Kristu pamuchinjikwa nekumuka kuvakafa, akakunda rufu (1 Corinthians 15:54-57; Hebrews 2:14-15), akakunda zvivi (Romans 6:6-11; Hebrews 9:26), akakunda satani (Colossians 2:15; 1 John 3:8), uye akakunda masimba ose erima (Ephesians 1:20-22; Colossians 1:13-14). Shoko rinoti: _"akaparadza vabati namasimba, akavabudisa pachena, akavakunda mauri (Colossians 2:15). Ndivo Jesu Kristu vatinotevera nekudanwa nezita rawo awa vanokunda zvose.

✍️ Hama dzangu, Jesu Kristu havana kungotiponesa chete, asi vakapa mumwe nomumwe wedu nyasha nechipo choMweya Mutsvene. Shoko raMwari rinotidzidzisa kuti mumwe nomumwe ane basa raakapiwa naMwari pamuviri waJesu Kristu; ringava rinoonekwa serakashoreka kana rinokudzwa, mitezo yose inokosha, inofanira kukudzana nekuchengetana, nokuti tese tiri mitezo yomuviri umwe waKristu (1 Corinthians 12:22-27). Mubvunzo mukuru ndewokuti: Zvauri mutezo pamuviri vaJesu kristu, uri kushandisa here zvawakapiwa naMwari? Hatifaniri kuzvienzanisa nevamwe kana kuchiva zvipo zvavo, asi kutenda Mwari nokuda kwechikamu chavakatipa. Zvose zvatinazvo zvinofanira kushandiswa kukudza Mwari nokuvaka muviri waJesu Kristu.

✍️ Tadzidza nhasi shuwa kuti akadanwa naJesu Kristu anofanira kufamba noupenyu hunoratidza kudanwa kwaakadanwa nako. Tinofanira kuzvininipisa, kuva vanyoro, kutsungirirana murudo, kuchengetedza humwe hwoMweya, uye kurangarira kuti Kristu ndiwo vakakunda zvose uye vakapa nyasha nechipo kune mumwe nomumwe wedu. Hupenyu hwedu ngahuve humbowo hunoratidza kuti tiri vana vaMwari chaiwo Wokumusoro-soro.

Swerai munyasha dzaMwari, Baba vaIshe wedu Jesu Kristu. Ngatifambei sezvinofanira kudanwa kwatakadanwa nako. Ngatizvininipisei, tichengetedze kubatana kweChechi, tirarame murugare, uye tishandise nyasha nezvipo zvatakapihwa naKristu kukudza zita rake. Mwari ngavabatsire kuti upenyu hwedu huve hwakafanira Evhangeri yaJesu Kristu. Amen.

🙏🙏🙏🙏
Rambai muri munyasha dzaMwari, Baba vaIshe wedu Jesu Kristu!

NDATENDA
Phib Mamhunze
077 238 7707
+263718662059

06/08/2026

SHOKO RANHASI – THE BOOK OF EPHESIANS

PART 6: Midzi muRudo rwaKristu – Rooted and Grounded in the Love of Christ

Monday 03 August 2026

Rugare ngaruve nemi mose!
〰️〰️〰️〰️〰️〰️〰️〰️ https://www.facebook.com/mamhunzephib
〰️〰️〰️〰️〰️〰️〰️〰️
Shoko ranhasi riri pana Ephesians 3:17 rinoti: kuti Kristu agare pamoyo yenyu nokutenda; kuti imi, munemidzi yenyu nenheyo dzenyu murudo."

English:
"that Christ may dwell in your hearts through faith; that you, being rooted and grounded in love."
〰️〰️〰️〰️〰️〰️〰️〰️

ZVIDZIDZO:
Regai titende Mwari, Baba vaIshe wedu Jesu Kristu vatipa zuva ranhasi, unova mukana vakanaka vokugoverana shoko rawo. Nhasi tichadzidza nyaya yauya after taoneswa chakavanzika cheEvhangeri uye kubatana kwevaJudha nevaHedheni muna Jesu Kristu, Paul zvino anopfugama pamberi paMwari achinyengeterera church. Munamato uyu hausi wekukumbira pfuma yenyika kana kubudirira kwepanyika, asi kuti vatendi vasimbiswe mukati, vagare munaKristu, vazive rudo rwaKristu, uye vazadzwe nokuzara kwaMwari. Zvinotodzidzisa kunyengetera, nekunyengetererana, uye simba rokupfugama tichinyengetera kunaMwari wedu.

1️⃣ Ngatisimbiswe noMweya Mutsvene mukati medu:
Paul anonyengetera achiti: "(14) Nemhaka iyi ndinofugama namabvi angu kunaBaba, vaShe wedu Jesu Kristu (15) avo, rudzi rwose kudenga napanyika runotumidzwa nezita ravo, (16) kuti vakupei pafuma yokubwinya kwavo kukuru, simba kuti musimbiswe noMweya wavo mumunhu womukati (Ephesians 3:14-16)." Simba rinodiwa muvanhu vanonamata Mwari munaJesu Kristu harisi resimba renyama, asi resimba romunhu womukati. Tinogona kuva vakasimba panyama asi mweya wakapera simba. Mwari ngavatipewo simba roMweya Mutsvene iri rizare matiri (Romans 15:13), tisimbiswe naMweya Mutsvene vawo. Ndokusaka shoko raMwari richiti: "asi vanomirira Jehovha vachawana simba idzva; vachabhururuka namapapiro samakondo, vachamhanya vasinganeti, vachafamba vasingaziyi (Isaiah 40:31)." Mweya Mutsvene ndiye anosimbisa kutenda kwedu, anotipa kutsungirira mumiedzo, uye anotichengeta takamira kana nyika ichizununguka, anotinzvengesa muzvakaipa, uye anotinyengeterera (Romans 8:26).

✍️ Hama dzangu, munhu anovimba naMwari anoramba achivandudzwa mazuva ose. Shoko raMwari rinoti: "Naizvozvo hatineti; kunyange munhu wedu wokunze achiparara, munhu womukati unovandudzwa zuva rimwe nerimwe (2 Corinthians 4:16)." Ngatikumbirei Mwari kuti vasimbise mweya yedu, nokuti hondo huru yatinorwa haisi yenyama neropa, asi ndeyomweya (Ephesians 6:12). Shoko rinoti zvakare: "Jehovha ndiye simba rangu nenhovo yangu; moyo wangu wakavimba naye, ndikabatsirwa; naizvozvo moyo wangu unofara kwazvo, uye ndichamurumbidza norwiyo rwangu (Psalms 28:7)." Kana munhu womukati akasimbiswa naMwari, haazungunuswi nyore nemiedzo kana nematambudziko, kana nezvingamanikidza zvipi zvazvo. Asi anoramba akasimba, haarasi kutenda nekutendeka, uye acharumbidza Mwari mumamiriro ose ezvinhu, sezvakaita Job, Shadrach, Meshach and Abednego (Daniel 3), iye Daniel (Daniel 6), even saPaul and Silas vakarumbidza Mwari vari mutirongo (Acts 16:25). Peter vapihwa simba paPentecost, akanga orambidzwa kutaura zvaJesu Kristu shoko rinoti: "(19) Asi Petro naJohane vakapindura, vakati kwavari: Tongai henyu imi, kana zvingava zvakarurama pamberi paMwari, kuti titerere imi kupfuvura Mwari. (20) Nokuti hatigoni isu kurega kutaura zvatakavona, nezvatakanzwa (Acts 4:19-20)." Simba roMweya Mutsvene rinoita kuti tirambe takamira pabasa raMwari kunyange vadzivisi varipo kudzivisa basa raMwari. Nerimwe zvakare shoko vada kurambidza zvakare vanozviramba izvo, shoko rinoti: "(28) achiti: Ko hatina kukurairai zvikuru kuti murege kudzidzisa nezita iri here?, zvino tarirai, mazadza Jerusarema nokudzidzisa kwenyu; muchida kuti ropa romunhu uyu rivuye pamsoro pedu. (29) Zvino Petro navaapostora vakapindura vakati: Tinofanira kuterera Mwari kupfuvura vanhu (Acts 5:28-29)." Kana basa riri raMwari, hakuna kana munhu mumwechete anorimisa, nekuti rinopa vanhu kusatya, zviya zvinonzi hatina kupihwa Mweya vekutya asi vesimba... (2 Timothy 1:7; Romans 8:15), saka hatifanire kutya nokuti Mwari vanesu (Joshua 1:9; Isaiah 41:10).

2️⃣ Jesu Kristu ngavagare pamwoyo yedu - tive nemidzi nenheyo murudo:
Shoko rinoti: "(17) kuti Kristu agare pamoyo yenyu nokutenda; kuti imi, munemidzi yenyu nenheyo dzenyu murudo; (18) muve nesimba rokunzwisisa pamwe chete navatsvene vose, kuti kufara, nokureba, nokukwirira, nokudzika kwakadiniko, (19) nokuziva rudo rwaKristu, runopfuvura kuziva, kuti muzadziswe nokuzara kwose kwaMwari (Ephesians 3:17-19)." Paul anoshandisa mifananidzo miviri yakakosha inoti "makadzika midzi (rooted)" uye "makavakirwa nheyo (grounded) murudo. Anoratidza kuti munhu akadzika midzi muna Jesu Kristu akafanana nemuti une midzi yakasimba, usingazungunuswi nemhepo kana kusanaya kwemvura, asi unoramba uchibereka zvibereko zvakanaka (Jeremiah 17:7-8; Psalms 1:3). Saizvozvowo, munhu ane hwaro hwake muna Jssu Kristu akafanana neimba yakavakwa paruware, ine nheyo dzakasimba; kunyange mvura ikauya, mafashamo akasimuka, uye mhepo dzikavhuvhuta, imba yacho haidonhi nokuti yakateyiwa paruware (Mateo 7:24-25). Rimwe shoko rinoti: _"VAKOROSE 2 : 6 Naizvozvo sezvamakagamuchira Kristu Jesu, Ishe, fambai maari, VAKOROSE 2 : 7 munemidzi yenyu nokuvakwa kwenyu maari, makasimbiswa pakutenda, sezvamakadzidziswa, muchinyanya kuvonga (Colossians 2:6-7)." Naizvozvo, ngatirambei tichigara munaJesu Kristu, tichisimbiswa murudo rwawo uye pakutenda kwawo. Kunyange mhepo yemiedzo, matambudziko, kana mamiriro ezvinhu akaoma zvikauya, hatizozungunuswi, nokuti hwaro hwedu huri pana Kristu, d***o risingaperi.

✍️ Hama dzangu, rudo rwaKristu harungoyerwi nepfungwa dzomunhu. Runopfuura knowledge yedu yose. Ndirwo rudo rwakaita kuti Jesu Kristu vasiye kubwinya kwekudenga, vazvarwe munyika, vatambudzwe, varovererwe pamuchinjikwa, uye vamuke kuti isu tiwane upenyu. Rwunotaurwa naJesu Kristu vachiti: "Hakunomunhu unorudo rukuru kunourwu, kuti munhu arashire hama dzake vupenyu bwake (John 15:13)." Kana tikadzika midzi murudo urwu, hatizotsvaki kufarirwa nenyika tichiita zvinopesana naMwari, asi tichafamba murudo, tichiregerera vamwe, tichiita kuda kwaMwari nguva dzose (Ephesians 4:32), tichidanana (John 13:34-35), uye tichiziva kuti Mwari vanotida kunyange munguva dzemiedzo.

3️⃣ Mwari vanogona kuita zvinopfuura zvose zvatinokumbira kana kufunga:
Shoko rinoti: "(20) Zvino, iye unesimba rokuita zvikuru kwazvo zvinopfuvura zvose zvatinokumbira kana zvatinofunga, nesimba rinobata mukati medu, (21) ngaave nokubwinya mukereke munaKristu Jesu, kusvikira kumarudzi ose nokusingaperi-peri, Ameni (Ephesians 3:20-21)." Ava ndiMwari asina muganhu, vasina magumo, vanoona nokuziva zvatisati taziva kana kuona, muiti vezvinhu zvose. Kana munhu achiona sekunge pasisina nzira munhu apererwa, Mwari vanenge vachiiona, ndipo panonzi zvisingagoneki navanhu, kunaMwari zvinogoneka (Luke 18:27; Mark 10:27). Hapana kana chakaoma kuna Mwari (Genesis 18:14). Zvanzi neshoko Mwari vanesimba "rokuita zvikuru kwazvo," izvo zvinopfuura (a) zvatinokumbira, kana (b) zvatinofunga, (c) zvichitwa nesimba raMwari rinobata mukati medu. Ndihwo huMwari hwaMwari uhwu. Shoko rinoti: "(17) Haiwa, Ishe Jehovha tarirai imi makaita denga rose napasi nesimba renyu guru noruoko rwenyu rwakatambanudzwa, hakuna chinhu chingakukonai imi;...... (27) Tarira, ndini Jehovha, Mwari wenyama yose, kunechinhu chingandikona here (Jeremiah 32:17&27)?" Hakuna chinhu chingaremera Mwari hama dzangu. Imwe tsamba mutumwa vaMari achipupura kuna Maria anoti: "Nokuti kuna Mwari hakuna chinhu chinokona (Luke 1:37)."

✍️ Abraham naSarah vakwegura hawo, pakuziikanwa navanhu pamusikirwo vavakadzi Sarah awe kunzi apfuura nguva yokuti mukadzi ungabereka mwana, Mwari vakavapa mwana. Inzwai mibvunzo yakabvunzwa mumwoyo naAbraham: "Ipapo Abhurahamu wakawira pasi nechiso chake, akaseka, akati mumoyo make, Ko munhu ana makore ane zana ungaberekerwa mwana here? NaSara, wava namakore ana makumi mapfumba­mwe, angabereka here (Genesis 17:17)." Yes nesuwo tine mibvunzo yakadai kuti nesituation zvairi izviz zvichagoneka here..., ngatitii naMwari zvinogoneka. Pamwezve Sarah anoseka, shoko rinoti: "(11) Zvino Abhurahamu naSara vakanga vakwegura, vava namakore mazhinji; nomutoo wavakadzi wakanga watoguma kuna Sara. (12) Sara akaseka mumoyo make akati, Ini ndingazvifa­rira here zvandachembera, naiye tenzi wangu akwegurawo? (13) Jehovha akati kuna Abhurahamu, Sara wasekereiko, achiti, `Ko ini muchembere ndichabereka mwana zvirokwazvo here? (14) Kune chi­nhu chingakunda Jehovha here? Nguva ino, gore rapfuura, ndichadzokera kwauri; Sara achava nomwanakomana (Genesis 18:11-13)?" Imi zvisingagoneki navanhu, zvinonzi zvaguma navanhu kunaMwari zvinogoneka. Sarah kutoseka kuti chembere ino kubereka hazvichagona, pamutovo vokusikwa kwavakadzi zvanga zvisisagoneka, asi akasika system iyoyo ndiye zvakare arikuti "uchava nemwana gore rinouya nenguva ino," kubata kwaMwari kunoshamisa mhani.

✍️ Yakaitika futi kuna Elizabeth, ngatinzwe shoko: "(7) Vakanga vasinomwana, nokuti Erisabete wakanga asingabereki, vuye vakanga vachembera vose vari vaviri..... (18) Zakaria akati kumutumwa: Izvozvi ndichazviziva seiko? Nokuti ini ndava mutana, nomukadzi wangu wachembera. (19) Mutumwa akapindura, akati kwaari: Ndini Gabrieri, ndinomira pamberi paMwari; ndatumwa kuti nditaure newe, ndikuparidzire mashoko awa akanaka..... (36) Vuye tarira, Erisabete, hama yako, naiye wavanemimbavo yomwanakomana pakuchembera kwake; mwedzi uno wava wechitanhatu kunaiye wainzi haabereki. (37) Nokuti kuna Mwari hakuna chinhu chinokona (Luke 1:7, 18-19, &36-37)." Haaa imi tapanzwa here apa panzi "nokuti kuna Mwari hakuna chinhu chinokona" tapanzwa here apa? Kunyange vachembera Zacharia tenda atumwa naMwari namashoko akanaka. Zacharia akaramba kutenda kusvika aitwa chimumumu kusvika pazuva rokutumidzwa zita kwomwana Joh the Baptist. Anoudzwa kunzi: "Tarira, uchanyarara, usingagoni kutaura, kusvikira zuva rinoitwa zvinhu izvi, nokuti hauna kutenda mashoko angu, achaitika nenguva yawo (Luke 1:20)." Iwe Zechariah, "neiko usina kutenda mashoko aMwari akataurwa kuti achaitika nenguva yawo?" Mwari kana vataura ngatitende kuti kunyange zvanga zvichinzi hazviitike, zvinoitika nekuti vanzi "iye unesimba rokuita zvikuru kwazvo zvinopfuvura zvose zvatinokumbira kana zvatinofunga, nesimba rinobata mukati medu (Ephesians 3:20)."

✍️ Iwo Mwari vakazarura Gungwa Dzvuku vanhu vakafamba pakaoma, mvura kuita maWalls uuuummm, vakamutsa Razaro kuvafi kunyange vanhu vakanga woti 4 days munhu avigwa atove kunhuwa, uye vakamutsa Jesu kubva kuvakafa, ndinovada mhani Mwari ava vezvishamiso, vezvinonzi navanhu hazvichagoni iwo vozviita. Imi Mwari vekushandisa varume vamaperembudzi kukunda hondo yavaSiria pasina kushandiswa zvombo zvehondo, vanhu kunzwa mutsindo vavarume vamapersmbudzi sekungo ngoro dzamabhiza, haaa ndinivada mhani Mwari ava (2 Kings 7). Ndiwo Mwari watinoshumira nanhasi. Imwe tsamba inobva yati: "Haashumirwi namavoko avanhu, saachinge achishaiwa chinhu, zvaari iye amene unopa vose vupenyu, nokufema, nezvose (Acts 17:24)." Tazvinzwa here zvinopijwa naMwari zvinoti (a) hupenyu, (b) kufema, (c) nezvose. Zvimwe zvose zvatingada pakurarama napakunamata Mwari zviri imomo manzi "nezvose," but hupenyu nokufema zvaitwa singled out, hazvibvr kwatiri hama, asi kwavari Mwari. Dzimwe nguva tinonamatira zvinhu zviduku nokuti tinofunga Mwari vane muganhu vepavanogumira, asi Paul anoti Mwari vanogona kuita "zvikuru-kuru kupfuura" zvatinokumbira kana kufunga.

✍️ Ngatiregei kuganhurira Mwari nekusatenda kwedu, imagine for 38 years murume ari paBerthsida achirwara, akamirira kubvongodzwa kwemvura: painzi mapofu, vanorwara, vakaremara, navakavonyana vakanga varipo; vamwe vakatowana vakavawisira mumvura payaibvongodzwa; but for murume uyu zvaisada kubvongodzwa kwemvura, kuporeswa kwakasvika nenzira yaasingafungire (John 5:1-9). Imi what happened kuna Naaman audzwa nemushandikadzi uya musikana kuti "kwedu anopera mhani maperembudzi aya," iye atenda kutoenda kuti anoporeswe, ane kaporeserwo kaaifinga kuti achaitwa, Mwari kwakuonesa wawo mupoersero (2 Kings 5). Apa ndipo pane nyaya: "(10) Erisha akatuma nhume kwaari, akati, Enda, undoshamba kanomwe muna Jorodhani, nyama yako idzokerezve kwauri, uve wakanaka. (11) Asi Naamani wakatsamwa, akabva, akati, Tarirai, ndanga ndichiti, zvirokwazvo uchabuda kwandiri, akamira, akadana zita raJehovha Mwari wake, nokupuruzirapo noruoko rwake, agoporesa maperembudzi (2 Kings 5:10-11)." Tendera Mwari Naaman, Mwari vakuporese nenzira yavataura, kwete yaunoda iwe. Ndinofara varanda vakamuita counselling kusvika atenda kuita zvakataurwa, azvishamba akava akanaka chose ganda rinonzi rakadzoka kuita tender seromwana mucheche (2 Kings 5:12-14). Ngatitende kuita zvarehwa naMwari.

✍️ Jesu vakati: "Kana iwe uchigona kutenda, zvose zvingaitika kunounotenda (Mark 9:23)." Ndipo panofira nyaya dzedu vazhinji pakusatenda the God of impossibilities, Mwari vezvinonzi hazvifoneke apa. Hpenyu hwedu ngahuve hwekuti vanhu vaone kubwinya kwaMwari, kwete kubwinya kwedu (Matthew 5:16; 1 Corinthians 10:31), tikure mukutenda muna Mwari wedu awa. Munhu wese anonamata Mwari muna Jesu Kristu anofanira kuva munhu anopfugama achinyengetera nguva dzose, anosimbiswa noMweya Mutsvene, akadzika midzi murudo rwaJesu Kristu, uye ane chivimbo chokuti Mwari vanogona kuita zvinopfuura zvaanofunga iye. Kukura kwekutenda hakuyerwi nezvatinoziva, asi nekuti Jesu Kristu anogara zvakadii mumwoyo yedu, uye kuti rudo rwavo rwakadzika zvakadii muhupenyu hwedu.

Swerai munyasha dzaMwari, Baba vaIshe wedu Jesu Kristu. Ngatisimbaradzwe noMweya Mutsvene, tidzike midzi murudo rwaJesu Kristu, tizadzwe nokuzara kwaMwari matiri, uye tirarame nokutenda kuti Mwari vanogona kuita zvikuru-kuru kupfuura zvose zvatinokumbira kana kufunga. Kwaari ngakuve kubwinya mukereke yawo Mwari nomuna Kristu Jesu kusvikira kumarudzi ose nokusingaperi. Amen (Ephesians 3:21).

🙏🙏🙏🙏

Rambai muri munyasha dzaMwari, Baba vaIshe wedu Jesu Kristu!

NDATENDA

Phib Mamhunze
077 238 7707
+263718662059

06/08/2026

SHOKO RANHASI – THE BOOK OF EPHESIANS

PART 5: Chakavanzika chaKristu Chaziviswa – Mystery of Christ Revealed

Friday 31 July 2026

Rugare ngaruve nemi mose!
〰️〰️〰️〰️〰️〰️〰️〰️
https://www.facebook.com/mamhunzephib
〰️〰️〰️〰️〰️〰️〰️〰️
Shoko ranhasi riri pana Ephesians 3:6 rinoti:
"Kuti Vahedheni vave vadyi venhaka pamwe chete nesu, nomuviri mumwe nesu vagovani vechipikirwa chake pamwe chete nesu muna Kristu neEvhangeri."

English:
“that the Gentiles should be fellow heirs, of the same body, and partakers of His promise in Christ through the gospel."
〰️〰️〰️〰️〰️〰️〰️〰️

ZVIDZIDZO:
Ngatitende Mwari, Baba vaIshe wedu Jesu Kristu, avo vakatizarurira zvakavanzika zvavo kubudikidza naJesu Kristu. Takadzidza kuti takaponeswa nenyasha, Jesu Kristu ndiye rugare rwedu, uye akatiita mhuri imwe chete yaMwari. Nhasi Ishr vachitendera tirikudzidza kuti zvose izvo hazvina kuitika netsaona, asi zvaiva chakavanzika (mystery) chakanga chakavigwa for generations, asi zvino chakazarurwa naMwari kubudikidza noMweya Mutsvene. Chinangwa chaMwari kubva pakutanga chaiva chokuti marudzi ose auyiswe kuna Jesu Kristu uye ave mhuri imwe chete.

1️⃣ Chakavanzika Chakazarurwa naMwari:
Shoko raMwari Paul anoti musungwa vaJesu Kristu nokuda kwedu, isu vahedheni, ane nyasha dzaakapihwa pamusoro pedu kuti atigovere evhangeri yaMwari (Ephesians 3:1-2), taiva vahedheni kare (Ephesians 2:11-12; 1 Corinthians 12:2), hatichisisiri vaeni kana vatorwa kuna Mwari (Ephesians 2:19). Shoko rinoti: "(3) kuti zvakanga zvakavanzika zvakandiziviswa pakuzarurirwa, sezvandakambokunyorerai namashoko mashoma; (4) kana muchirava iwo, mungavona kuziva kwangu zvakavanzika zvaKristu; (5) zvakanga zvisina kuziviswa vanakomana vavanhu panedzimwe nguva, sezvazvakazarurirwa vaapostora vatsvene, navaporofita zvino muMweya (Ephesians 3:3-5)." Shoko rokuti "mystery - chakahwanzika" harirevi chinhu chisingagoni kuzivikanwa, asi chinhu chakanga chakavigwa naMwari, zvino chaziviswa panguva yake yakakodzera.

✍️ Zvanzi naPaul "sezvazvakazarurirwa vaapostora vatsvene, navaporofita zvino muMweya," ndizvo zvinonzi naPeter: "(10) Ndirwo ruponeso rwomweya yenyu. Ruponeso urwu rwakabvunzisiswa nokunzverwa kwazvo navaporofita, vakaporofita, zvenyasha dzamaizoitirwa imi, (11) vachinzvera kuti nguva ndeipi kana yakadini, yakataurwa noMweya waKristu, wakanga uri mukati mavo, nguva yaakapupura kare zvokutambudzika kwaKristu, nokubwinya kunozotevera izvozvo. (12) Avo, vakaratidzwa kuti vakanga vasingazvibatiri ivo, asi imi, pazvinhu izvo zvamakataurirwa zvino naivo vakakuparidzirai Evhangeri noMweya Mutsvene wakatumwa achibva kudenga; zvinhu izvo vatumwa vanoda kuzvicherekedza (1 Peter 1:10-12)." Ndinokumbira kuti Iye Mweya Mutsvene akambozarurira vaApostora navaporofita zveEvhangeri yohushe, yokuponeswa kwedu, uakabvunzisiswa, ngaatizarurirewe zveshoko raJesu Kristu, tisvinudzwe meso omwoyo tione kwazvo, nokunzwisisa kwazvo zvaMwari wedu. Sezvazvinonzi vakakomborerwa vanorava (Revelations 1:3), ngatishingirire pakurava shoko rirambe riri matiri (1 Timothy 4:3; Joshua 1:8), tibatsirwe norugwaro rwaMwari rwakafuridzirwa (2 Timothy 3:16-17), Mweya Mutsvene atibatsire kuti shoko rawo Mwari rigare mukati medu (Colossians 3:16), mumagwaro ndimo munotionesa kuti tine hupenyu husingaperi munaJesu Kristu (John 5:39).

✍️ Hama dzangu, Mwari vachiri kuzarura chokwadi chavo kune vanomutsvaka. Jesu vakati: "Kana munhu achida kuita kuda kwake, uchaziva kana dzidziso ichibva kunaMwari, kana ndichazvitaurira ndimene (John 7:17)." Ngative vanhu vanotsvaka kunzwisisa Shoko raMwari, kwete kungoriverenga chete. Mweya Mutsvene ndiye anotitungamirira muchokwadi chose (John 16:13). Zvakanga zvakavanzika kare, zvino zvazarurwa muna Kristu.

2️⃣ Tava Vadyi Venhaka Pamwe Chete Muna Kristu:
Shoko raMwari rinoti: "Kuti Vahedheni vave vadyi venhaka pamwe chete nesu, nomuviri mumwe nesu vagovani vechipikirwa chake pamwe chete nesu muna Kristu neEvhangeri (Ephesians 3:6)." Mashoko aya aMwaru anotiratidza zvinhu zvitatu zvikuru zbinoti (a) tava vadyi venhaka pamwe chete (fellow heirs), (b) tava mitezo yomuviri mumwe (members of the same body), (c) tava vagovani vezvipikirwa zvaMwari (partakers of His promise). Izvi ndizvo zvakavimbiswa Abraham kuti marudzi ose enyika acharopafadzwa kubudikidza kurudzi rwake (Genesis 12:3; Galatians 3:14, 29). Paul amboparidzira vaIsrael vakaramba shoko, shoko rinozoti: "Ipapo Pauro, naBharnabhasi vakataura vasingatyi, vakati: Zvakanga zvakafanira kuti shoko raMwari ritange kutaurirwa imi, asi zvamariramba, muchiti, hamufanirwi novupenyu bwusingaperi, tarirai, zvino toenda kuvahedheni (Acts 13:46)." Isu takafanirwa nohupenyu husingaperi, uhwo hwakarambwa kare navamwe.

✍️ Hama dzangu, muna Jesu Kristu hakuna munhu mukuru kana mudiki, hakuna muJudha kana muGiriki, hakuna muranda kana wakasununguka, hakuna murume kana mukadzi; nokuti tose tiri vamwe muna Kristu Jesu (Galatians 3:28). Hatichazivikanwi nerudzi, mutauro, nyika yatinobva, kana mamiriro edu enyama, asi tava vana vaMwari kubudikidza nokutenda munaJesu Kristu (Galatians 3:26; John 1:12-13). Sezvo tava vana, tavawo vadyi venhaka vaMwari pamwe chete naKristu. Shoko rinoti: "Zvino kana tiri vana, tiri vadyi venhaka; vadyi venhaka yaMwari, vadyi venhaka pamwe chete naKristu; kana tichitambudzika pamwe chete naye, tichakudzwa vo pamwe chete naye (Romans 8:17)." Naizvozvo ngatirambei takasimba mukutenda, tichifamba sezvinofanira vana vaMwari, tichiziva kuti takagamuchirwa mumhuri yaMwari, tine nhaka isingaori, isingasvavi, uye isingaperi, yakachengeterwa isu kudenga (1 Peter 1:3–4). Ngatiraramei sekudanwa kwatakadanirwa, tichiratidza mufananidzo waKristu mumabasa edu ose akanaka (Ephesians 4:1; Matthew 5:16).

3️⃣ Nyasha dzaMwari Dzakatipa Basa Rokuparidza Evhangeri:
Paul achitaura pamusoro peEvhangeri yaJesu Kristu anoti: "(7) yandakaitwa mushumiri wayo nechipo chenyasha dzaMwari, chandakapiwa nokubata kwesimba rake. (8) Ini, muduku kwazvo kuvatsvene vose, ndakapiwa nyasha idzi, kuti ndiparidzire vahedheni fuma isinganzwerwi yaKristu (Ephesians 3:7–8)." Kunyange Paul aimbova mutambudzi weChechi yaJesu Kristu, achisunga nokutambudza vatsvene (Acts 8:3; Acts 9:1–6), Mwari vakamunzwira nyasha, vakamushandura, vakamuita mudziyo wakasanangurwa kuti atakure zita raJesu kuvahedheni, kumadzimambo, nokuvanhu vaIsraeri (Acts 9:15). Nokudaro Paul akazvipira kubasa raakapiwa, achiti: "Asi hakuna chimwe chezvinhu izvi chinondidzosera shure, uye handiverengi kuti upenyu hwangu hunokosha kwandiri, kuti ndipedze rwendo rwangu nomufaro, nebasa randakagamuchira kuna Ishe Jesu, rokupupura kwazvo Evhangeri yenyasha dzaMwari (Acts 20:24)." Ndokusaka akakumbirawo vatsvene kuti vamunyengeterere, "kuti apiwe shoko pakushamisa muromo wake, azivise chakavanzika cheEvhangeri asingatyi" (Ephesians 6:19-20). Izvi zvinotidzidzisa kuti nyasha dzaMwari hadzingotiponese chete, asi dzinotitumawo kuti tive zvapupu zvaJesu Kristu kwose kwariri, kungave mumabasa, kudzimba, munharaunda, mumhuri etc.

✍️ Hama dzangu, nyasha hadzina kupiwa kuti tigare nadzo chete, asi takaponeswa kuti tishumire Mwari nokushandira vamwe. Jesu Kristu vakati kuvadzidzi: "Endai munyika yose muparidzire zvisikwa zvose Evhangeri (Mark 16:15)." Isu tiri mitezo mizhinji pamuviri mumwe chete, uye mutezo mumwe nomumwe wakapiwa basa rawo. Shoko rinoti: "(4) Nokuti sezvatinemitezo mizhinji pamuviri mumwe, asi mitezo yose hainebasa rimwe chete; (5) saizvozvo isu, tiri vazhinji, tiri muviri mumwe chete munaKristu, mumwe nomumwe ari mutezo wavamwe (Romans 12:4-5)." Saka Mwari vakaisa mutezo umwe neumwe sezvavakada, kuti mutezo umwe neumwe ubate basa rawo, pasina unoshora umwe, kana kuvenga umwe, kana kuzvikudza kupfuura umwe (1 Corinthians 12:14-27). Naizvozvo ngatishandisei zvipo, nguva, nesimba zvatakapihwa naMwari kuvaka nguva dzose kubatsira vanoshaiwa, kusimbisa vatsvene, uye kuunza vanhu kuna Jesu Kristu, "... kuti pazvinhu zvose Mwari akudzwe naJesu Kristu... (1 Peter 4:10–11)." Ngatiregei kuviga zvipo zvedu, asi tive vashandi vakatendeka, tichiziva kuti basa redu munaShe harisi pasina (1 Corinthians 15:58).

4️⃣ Kubudikidza nekereke yaJesu Kristu, huchenjeri hwaMwari hunofanira kuziviswa:
Shoko raMwari rinoti: "(10) kuti zvino vabati navanesimba kudenga va ziviswe nekereke kuchenjera kukuru kwaMwari (11) sechirevo chokutanga-tanga chaakatema munaKristu Jesu, Ishe wedu; (12) maari tinokutsunga kwedu nokupinda kwedu tisingatyi, nokutenda kwake. (Ephesians 3:10-12)." Mwari vakasarudza kuti kereke ive chiedza chenyika uye munyu wenyika (Matthew 5:13-16). Vanhu vanofanira kuona Jesu Kristu kubudikidza nohupenyu hwedu, isu vanonamata Mwari muna Jesu Kristu. Peter anoti: "Asi imi muri rudzi rwakasanangurwa, vuPirisita bwamambo, rudzi rutsvene, vanhu vaakazviwanira, kuti muparidze kunaka kwaiye wakakudanai, kuti mubve parima muvuye kuchiedza chake chinoshamisa (1 Peter 2:9)." Yes tinofanira kuparidza kunaka kwaMwari kubudikidza namabasa edu, mararamiro edu ngaaparidze Jesu Kristu. Tiri zviedza murudzi rwakakombama sekureva kweshoko kuti: "(15) kuti muve vanhu vasina chavangapomerwa, navasina kusarurama, vana vaMwari vasine mhosva pakati porudzi rwakakombama, rwakatsauka rwamunopenya pakati parwo sezviedza panyika; (16) makabatisisa shoko rovupenyu; kuti ndive nechandinga zvirumbidza nacho nezuva raKristu, ndizive kuti handina kumhanya pasina, kana kubata pasina (Philippians 2:15-16)." Kutobatisisa shoko rohupenyu ndiko kuri kutodiwa hama dzangu kuti chiedza chedu chivenekere vanhu wose vaone kunaka kwaJesu Kristu.

✍️ Hama dzangu, tiri zvapupu zvaJesu Kristu munyika, hupenyu hwedu hunofanira kuparidza Jesu Kristu kunyange tisati tataura kana shoko rimwe zvaro. Vanhu ngavaone mabasa edu akanaka vagokudza Baba vedu vari kudenga (Matthew 5:16). Ngative tsamba dzaKristu dzinoverengwa navanhu vose (2 Corinthians 3:2-3). Kunyange vaya vanotipomera zvinonzi neshoko: "mufambire wenyu uve wakanaka pakati pavahedheni; kuti pavanokupomerai vachiti munoita zvakaipa, varumbidze Mwari nezuva rokushanyigwa, kana vachivona mabasa enyu akanaka (1 Peter 2:12)." Yes vanhu ngavaone mabasa edu akanaka nguva dzose.

5️⃣ Ngatirege kuvora mwoyo pakutambudzika:
Shoko raMwari rinoti: "Saka ndinokumbira kuti murege kupera moyo nokutambudzika kwangu pamusoro penyu; ndiko kukudzwa kwenyu (Ephesians 3:13)."
Paul akanga ari mujeri, asi haana kuona kutambudzika sokuti Mwari vamusiya, akaziva kuti kutambudzika kwake kwaishanda pakufambira mberi kweevhangeri.
James anotiyambira achiti tifare kwazvo kana tichiwira mumiedzo yakasiyana-siyana, nyaya iri pakuti kuedzwa kwekutenda kwedu kunobereka kutsungirira (James 1:2–4). Peter anobva ati: "Asi kana muchitambudzika nokuda kwokururama, makaropafadzwa; musatya kutyisa kwavo, vuye musakanganiswa (1 Peter 3:14)." Kutambudzika kupi nokupi ngakuuye, asi tirambe takarurama.

✍️ Hama dzangu, nzira yokutevera Jesu Kristu haisi nyore nguva dzose, si Mwari vanoshandisa kunyange miedzo kuti vatikudze, vatiwandudze, vatichenese, uye vasimbise kutenda kwedu (Romans 8:28). Jesu Kristu vanoti: "(20) Rangarirai shoko randakareva kwamuri, ndichiti: Muranda haazi mukuru kunashe wake. Kana vakanditambudza ini, vachakutambudzai nemivo, kana vakachengeta shoko rangu vachachengeta nerenyu vo. (21) Asi izvi zvose vachakuitirai nokuda kwezita rangu, nokuti havazivi vakandituma (John 15:0-21)." Ngatisanete kuita zvakanaka (Galatians 6:9), nokuti nguva yokukohwa ichasvika kana tikaramba takatendeka.

✍️ Chakavanzika chaMwari chazarurwa munaJesu Kristu, marudzi ose akakokwa kuti ave mhuri imwe chete yaMwari. Takapiwa nyasha kwete kuti tigare nadzo chete, asi kuti tishumire, tiparidze evhangeri, uye tiratidze uchenjeri hwaMwari kubudikidza neChurch. Ngatirambei takabatana muna Kristu, tichifamba mukudana kwatakadanirwa, tisingaori mwoyo kunyange pakati pematambudziko.

Swerai munyasha dzaMwari, Baba vaIshe wedu Jesu Kristu. Ngatifarei kuti takagamuchirwa mumhuri yaMwari, takaitwa vadyi venhaka pamwe chete naKristu, uye takapiwa mukana wokuzivisa nyika fuma isingaperi yaJesu Kristu. Ngatiraramei upenyu hunokudza Mwari kusvikira Ishe vedu vadzoka.

🙏🙏🙏🙏
Rambai muri munyasha dzaMwari, Baba vaIshe wedu Jesu Kristu!

NDATENDA

Phib Mamhunze
077 238 7707
+263718662059

Address

Harare

Website

Alerts

Be the first to know and let us send you an email when Shoko Ranhasi posts news and promotions. Your email address will not be used for any other purpose, and you can unsubscribe at any time.

Shortcuts

Share

Category