06/06/2026
Gedagte vir die week
07 Junie 2026
Wie het jy lief?
Het jy al ooit beleef dat dit moeilik is om vir iemand lief te wees? Dalk ʼn familielid met wie jy net nie oor die weg kom nie. Hulle is familie so jy moet lief wees vir hulle maar dit bly ʼn uitdaging. Maar wat van mense wat nie familie is nie? Ons het baie maal die geneigdheid om ons met mense te omring vir wie ons lief wil wees en dan poog ons maar net om ander oor die weg te kom. Ons dan dikwels hulle is net te verskillend van my. Hulle het ander waardes, oortuigings of dalk leef hulle in ʼn heeltemal ander klas as ek. Ek kan nie vir hulle lief wees nie.
Dit is hierdie houding wat Christus deur Sy eie liefde kom regstel het. Hy het menslike vorm aangeneem en onder ons kom wandel. Hoewel ons nie vreemdelinge vir die alwetende God was nie, is ons wel baie verskillend van Hom. Die Heilige God sonder fout of vlek het tussen sonde belaaide, opstandige en onheilige mense kom wandel. Verder is ons ook soveel kleiner en eenvoudiger as Hy. Daar is eintlik geen vergelyking nie. Ons het geensins Sy liefde verdien nie. Tog het Hy dit gegee. Hy het onder die slegste en mees verlore mense op aarde gewandel en hulle met Sy liefde en omgee bedien ter wille van die eer van Sy Naam. Het het geweldige barmhartigheid aan die mensdom gewys. En nou roep Hy ons op om soos Hy barmhartig te wees(Luk.6:36).
Ons liefde mag nie beperk wees tot mense wat soos ons is nie. Dit moet baie wyer as dit gaan. Die Here roep ons om vir alle mense lief te wees. Hulle belange op die hart te dra en hulle met die evangelie van verlossing te bedien ongeag wie hulle is. Wees lief vir almal want ons het geweldige genade en liefde ontvang.
Ds AJ Wattel.
