Gereformeerde Kerk Welkom

04/09/2026

Gedagte vir die dag.
06 September 2026
Vervolging in Nigerië
In vandag se wêreld is daar feitlik geen stukkie inligting waartoe ons nie toegang het nie. Met die druk van ʼn paar knoppies kan jy byna enigiets uitvind. Maar al het ons toegang tot al hierdie inligting kies ons dikwels om in ons eie bubble te bly en nie te vêr daarbuite te gaan nie. Daar is so baie dinge waaroor ons onkundig bly. Een van hierdie is ons bewustheid van die vervolging van ons gelowige broers en susters regoor die wêreld. Hoewel ons ons eie tipe vervolging beleef, ʼn stille afkeur van Christelike waardes en ʼn regering wat toenemend wil werk om die Christelike geloof stil te maak, is die vervolging in baie ander land nie so sag aan die werk nie. In Nigerië word daar daagliks teen ons broers en suster gediskrimineer. Hulle word as tweede klas mense gesien. En as jy na die noorde van Nigerië beweeg word die vervolging al meer en meer gewelddadig. Die militante Islamitiese groepe is jaarliks verantwoordelik vir die sterwe van meer as 4000 gelowiges. En in die laaste 14 jaar is meer as 52 250 Christene doodgemaak vir hulle geloof.
Twee hoof militante groepe Boko Haram en Islamitiese Staat Wes-Afrika se doel is om Christendom totaal uit te roei in die noordelike provinsies van Nigerië. Christus is vir hulle totaal onaanvaarbaar en enigiemand wat Hom dien leef daagliks in vrees vir hulle lewens. Christus het in Matt 10:22 belowe dat die wêreld ons sal haat ter wille van Sy Naam. Laat ons in ons gebede veral aan die vervolgde Christene regoor die wêreld dink. Nigerië is maar net 8e op die lys van lande met die ergste vervolging vir Christene. Die Here vergeet geeneen van SY kinders nie, laat ons ook nie in ons bubble vasgevang raak en van hulle vergeet nie.
Ds. AJ Wattel

04/09/2026

30/08/2026

Gedagte vir die week.
30 Augustus 2026
’n Graf as eerste Besitting
Die lewe van ons geloof vader Abraham was een van vreemdelingskap. Hy het gelowig op die Here se roep gereageer en weg getrek uit sy tuisland na vreemde land waar hy ook as vreemdelinge geleef het. In die laaste 80 jaar van sy lewe(ongeveer) het hy in die beloofde land as swerwer geleef sonder om ooit ʼn stuk daarvan te besit nie. Behalwe een stukkie. ʼn Graf in Hebron. Ja in Gen. 23 lees ons van ʼn transaksie wat plaasgevind het waarin Abraham ten duurste ʼn graf vir sy familie gekoop het as die eerste en enigste stuk van die beloofde land wat Hy besit het.
Nou is dit vir ons ietwat ironies. Abraham leef die hele tyd met geloof in die beloftes van die Here sonder om ooit ʼn deel van daardie land te kry en hier is die enigste deel wat Hy kry ʼn graf. Hoe kan ʼn graf dan die seën belofte van die Here se vervulling wees. Maar in hierdie sien ons eintlik die verdere vervulling van God se verbondsbelofte. Want Abraham was nie tevrede daarmee om sy vrou of self in iemand anders se graf neer te lê nie. Hy wou die grond self besit as ʼn teken van die ewige beloftes van God. Abraham het nie net gehoop om God se beloftes van ʼn aardse erfenis vir hom en sy nageslag nie maar ʼn ewige erfenis. Dit was Sy uiteindelike hoop en dryf. Nie om goed van God te ontvang nie maar lewe. Hy wat tevrede om verder self in tente te woon met die wete dat sy ewige woning gevestig is.
In 1 Kor. 5 skryf Paulus juis hieroor. Oor die hoop in die ewige lewe wat ons dra. Abraham se eerste besitting in die beloofde land was ’n graf. Dit herinner ons daaraan dat ons hoop nie lê in wat ons hier op aarde besit nie, maar in die ewige erfenis wat God belowe het. Ons mag vandag in tente woon maar soos Abraham leef ons deur die geloof en nie deur dit wat ons sien nie. Ons wag op die dag wanneer Christus ons uit die graf sal opwek en ons ons ewige woning by Hom sal ontvang.
Ds. AJ Wattel

22/08/2026

Gedagte vir die week
23 Augustus 2026
Verwerpte Belydenisse – Belhar Belydenis
Ons het nou gekyk na al die belydenisskrifte wat in die Gereformeerde kerk aanvaar word. Tog is dit nie dit volle som van die belydenisse wat bestaan nie. Daar is verskeie belydenisse wat ook bestaan wat egter nie deur die Kerk aanvaar word nie. Die mees prominente een in Suid-Afrika is die Belhar belydenis.
Die Belhar belydenis is in 1986 deur die NG Sending kerke opgestel en in 2008 is die formeel deel gemaak van NG Kerk se belydenisse. Hierdie geskrif is hoofsaaklik opgestel as ʼn Bybelse antwoord op Apartheid met die doel om eenheid tussen rasse in die kerk te bring. Met hierdie motivering is daar nie noodwendig ʼn verskil nie, maar die skrif verstaan wat agter die motivering staan is daar wel ʼn verskil. Artikel 4 van daardie belydenis verwoord hierdie verkeerde verstaan van die Skrif in ʼn stelling oor God se wese wat nie reg is nie. Dit sien God in besonder as die God van die a***s en verontregtes.
Die Here is nie die God vir alle a***s en verontregtes nie. Die Skrif maak baie duidelik dat die Here die God van Sy verbondsvolk is(Gen. 17:7-8). Die belofte van ʼn verlossende verhouding met God is nie vir alle mense nie maar net vir die wat Hy uitgekies het. Met wie Hy sy verbond sluit. Ons hoor in die belydenis van Belhar eerder die stem van rewolusie en menslike oortuigings as die Stem van die Skrif. Die doel van ʼn belydenis is om die Woord van God na te spreek. Dit is die stem wat verkondig dat die Seun van God mens geword het, sy hele aardse lewe gely het en aan die Kruis Homself as offer gegee het om ons van die sonde te bevry. Nie van aardse verdrukking nie. Daarom word die belydenis van Belhar nie as ʼn belydenis deur die GKSA aanvaar nie.
Ds. AJ Wattel

21/08/2026

Gedagte vir die week.
16 Augustus 2026
Ons Belydenisse – Die Dordtse Leerreëls
Soos met die Nederlandse Geloofsbelydenis en die van Nicea het die Dordtse Leerreëls uit ʼn stryd in die Kerk ontstaan. Hierdie keer was die stryd egter oor die werk van God in die uitverkiesing. Die uitverkiesingsleer was tot en met daardie punt van die geskiedenis geensins openlik betwyfel of dit werklik die manier is waarop God Sy volk bepaal nie. In die vroeë 17e eeu het veral Jacobus Arminius egter in die geheim vir Sy studente begin leer dat die uitverkiesing nie alleen uit God se vrye besluit is nie maar omdat Hy in sekere persone geloof vooruit gesien het en daarom hulle gekies het. Geloof was nie voluit ʼn gawe van God nie en die mens moes God se genade self aanvaar. In 1610 het die voorstanders van hierdie leer ʼn Formele Protes geskryf waarin hulle die Skrifgetroue leer bevraagteken het.
In 1618/19 het die Sinode van Dordtrecht gesit en hierdie Remonstransie bespreek en weerlê. Hulle het dit baie noukeurig gedoen volgens die 5 hoofstukke van die Remonstransie en dit het vir ons ʼn kosbare wapen geword wat met die woord TULIP kan verduidelik. Dit gee vir ons die ware leer van die Skrif.
• T- (total depravity) Hoofstuk een van die DL lê die totale verdorwenheid van die mens uit. Die Skrif leer dat die mens totaal verlore is en nie hulself kan red nie. Daarom ook nie kies om in God te glo nie.
• U – (unconditional election) Hoofstuk twee van die DL bespreek die aard van God se uitverkiesing. Dit is onvoorwaardelik vir die mens. Die mens kan nie iets voor die tyd doen om deur God uitverkies te word nie. Dit is Suiwer uit God se wil en genade dat ons gekies word.
• L – (Limited atonement) Hoofstukke 3 en 4 word saak behandel. Die eerste punt is daar dat hoewel Christus se kruisoffer van genoegsame waarde is om alle mense te red, is dit nie vir alle mens toegepas nie. Net die uitverkorenes wat deur God alleen bepaal word kry die versoening in Christus.
• I – (irresitable grace) Die tweede deel van hoofstukke 3/4 gaan oor die Genade van God wat nie teengestaan kan word nie. As die Here iemand gekies het sal hulle tot geloof kom en hulle kan nie die kragtige werking van die Heilige Gees weerstaan nie. Dit bevestig weereens dat God alleen die werker en bepaler is in die verlossing en uitverkiesing.
• P – (perseverance of the saints) Die laaste hoofstuk behandel die volharding van die gelowiges wat deur die Gees tot geloof gebring is. Die Here bewaar hulle aan wie Hy ʼn ware geloof gegee het sodat hulle nooit uit sy genade val nie. As jy gered is, is jy gered.
Ds. AJ Wattel

17/08/2026

Nagmaalsete | 16 Augustus
Die gemeente het na die erediens, 'n heerlike en gesellig ete saam geniet. Dankie vir almal wat betrokke wat in die reëlings, julle moeite word waardeer.

15/08/2026

En so is ons Wyk 2 en 4 aan die werk om Sondag se gemeente-Nagmaal
vleis 8 gerolde varknek voor te berei. 🥩❤️ Annabie en Marthie (Bekkie) — ons twee is sommer ’n lekker span! 😄🙌 Dankbaar vir elke hand wat help en vir die geleentheid om saam te dien. Alles tot eer van ons Vader! 🙏Koster Flip Kotze maak seker ons werk🤣