24/05/2023
DIE WEGRAPING. In diepte ondersoek
Die wegraping word op twee maniere beskou:
1. Die wegraping met die wederkoms van Jesus wanneer Hy regeringskap oor die aarde neem
2. Die wegraping, soms ook genoem die geheime wegraping, voor die verdrukkings tydperk en die gebeure in die tydperk van die sewe seëls tot die sewe trompette in Openbaring
Die mees bekende Skrif gedeeltes wat aangehaal as bewys van geheime wegraping voor die verdrukking, is:
1 Thes 4:16 en Luk 17:34-36
1Th 4:16 Want die Here self sal van die hemel neerdaal met ‘n geroep, met die stem van ‘n aartsengel en met geklank van die basuin van God; en die wat in Christus gesterf het, sal eerste opstaan. 17 Daarna sal ons wat in die lewe oorbly, saam met hulle in wolke weggevoer word die Here tegemoet in die lug; en so sal ons altyd by die Here wees.
Luk 17:33 Elkeen wat probeer om sy lewe te red, sal dit verloor; en elkeen wat dit verloor, sal dit behou. 34 Ek sê vir julle: In daardie nag sal daar twee op een bed wees; die een sal aangeneem en die ander verlaat word. 35 Twee vroue sal saam maal; die een sal aangeneem en die ander verlaat word. 36 Twee sal op die land wees; die een sal aangeneem en die ander verlaat word.
Die tweede siening is beroemd gemaak deur John Nelson Darby in 1830 en is verder in Amerika versprei deur die sirkulasie van die Scofield Reference Bible in die vroeë 1900’s.
Maar wat sê die Bybel werklik?
Ons kan alreeds van die Ou Testamentiese profete iets hieroor leer. Kyk byvoorbeeld wat sê Daniël. Hy lei die profesie in deur te waarsku oor ‘n groot verdrukking (vervolging) wat gaan kom wanneer die beskerm engel van Israel, Migael, iets gaan doen:
Dan 12:1-2 Migael, die beskerm engel van Israel gaan Opstaan (terugstaan) en dit gaan ‘n swaar tyd wees soos nog nooit tevore nie. Ontslapes gaan opstaan, party tot eer en ander tot skande
Dan verwys hy later in die hoofstuk na ‘n rede vir die tydperk van verdrukking:
Dan 12:10 Baie mense sal Gereinig, gelouter en gesuiwer word, maar die godddelose sal goddeloos bly. Nie een van die goddeloses sal verstaan nie, maar die verstandige leiers sal verstaan.
Ook verwys Daniël na ‘n tydperk waarin die gruwel in die tempel gaan staan, en koppel die opstanding aan hierdie tydperk:
Dan 12: 11-12 Daar gaan 1290 dae (3,5 jaar) wees wat die gruwel in die tempel gaan staan. Die mense wat geduldig is tot 1335 dae sal dit mee goed gaan == 45 dae verskil. Hierdie 45 dae verskil kan moontlik die tydperk wees van die Bakke oordeel in Openbaring.
Wie beter is daar as Jesus self om vir ons die dinge van die einde te verduidelik?
In Matt 24:15-25 waarsku Jesus beide Israel en die gelowiges dat daar groot verdrukking (vervolging) sal wees.
Sommige mense verkondig egter dat hierdie gedeelte verwys na die inval in Jerusalem in 70 nC maar Jesus open die gesprek met verwysing na die gruwel wat in die tempel gaan staan, dit het nog nie gebeur nie. Let op in vers 20 tot 21 praat Jesus met Israel wanneer hy na die sabbat verwys. In vers 22 noem Jesus die uitverkorenes. Ons weet dat die uitverkorenes hulle is wie Jesus aangeneem as Verlosser en Saligmaker, daarom die afleiding dat hier na die twee verskillende groepe verwys word.
In Matt 24:29-31 Gee Jesus ‘n spesifieke volgorde van gebeure: 1. Na die verdrukking word die son verduister, maan verduister, sterre val uit hemel, dan verskyn Jesus se teken in die hemelruim, dan kom Jesus met groot krag en heerlikheid, dan weerklink die trompet en eers dan word die engele gestuur om uitverkorenes (gelowiges) bymekaar te maak.
Dit is nodig om die volgorde van gebeure, soos Jesus dit uitspel, te besef en glo sodat ons in die waarheid kan staan en nie verlei word deur halwe waarhede en dwaalleer nie. Uit hierdie gedeelte sien ons dat die wederkoms en die wegneem van die gelowiges een gebeurtenis is, met ander woorde; na die vervolging en wanneer daar reeds natuurrampe plaasgevind het.
Die plek in die Bybel waar ons leer van hierdie natuurrampe, is in Openbaring hoofstuk 8 tot 14 gedurende die tydperk van die sewe trompette. Hierdie is so ‘n belangrike tyd in die Eskatologie dat die grootste gedeelte van Openbaring daaraan afgestaan word. Dit is sewe hoofstukke uit 22 .
Verdere gedeeltes wat graag aangehaal word om die skielike/geheime wegraping te motiveer is Matt 24:36:
Matt 24: 36 Niemand weet wanneer die uur en dag is nie. Nie die engele in die hemel nie en ook nie die Seun nie. Net die Vader weet dit. Wanneer ons die gedeelte op sy eie lees, kan dit maklik gebruik word om die geheime wegraping te motiveer. Ons moet egter die totale profesie van die Woord behandel om die ware betekenis te kry. Kom ons kyk wat sê die Bybel verder hieroor:
1. In Matt 24:32-34 Leer Jesus dat ons sal wel aan die tekens kan sien wanneer sy koms naby is. Watter tekens verwys Hy na? Die gruwel in die tempel, natuurrampe en vervolging.
2. In Joh 6:39, 40, 44, 54, verwys Jesus vier keer daarna dat Hy die gelowiges sal opwek in die laaste dag. Die laaste dag is met Jesus se wederkoms wanneer die tyd van die mens se heerskappy verstreke is. Hierna bars God se oordeel los in die Bakke Oordeel.
3. 1 Tess 5:2 noem ook dat die dag van die Here kom soos ‘n dief in die nag maar noem verder in 4-6 dat, omdat gelowiges mense van die lig is, die dag ons nie soos ‘n dief sal oorval nie. Maw, ons sal weet wanneer om om ons Bruidegom terug te verwag.
4. In 2 Pet 2:10 lees ons ook dat die dag van die Here kom soos ‘n dief in nag maar let op die verskil in sy gesprek: Hy verwys na die totale oordeel van God in hierdie konteks en bespreek nie die enkele gebeurtenis van die wederkoms of die wegraping nie. Uit die Ou Testamentiese profesieë en Openbaring leer ons dat die Dag van God verwys na die tydperk van die eskatalogiese gebeure en nie net die wederkoms nie.
As ons dan nou weet dat die dag ons nie onverwags sal oorval nie, is die vraag of daar in die Bybel verwysings is na ‘n tyd of tydperk waarin ons die wederkoms/wegraping kan verwag?
1. 1Co 15:52 sê Paulus: in ‘n oomblik, in ‘n oogwink, by die laaste basuin; want die basuin sal weerklink, en die dode sal onverganklik opgewek word; en ons sal verander word. Daar is argumente wat hierdie laaste trompet probeer verwys na die Israeliese fees van die trompette maar ons moet onthou dat Paulus hier aan die Korintiese gemeenskap skrywe en hulle ‘n mengelmoes van heidense nasies was wat geen besef gehad het van Israel se feeste nie. Dit sou eenvoudig nie vir hulle nie sin gemaak het nie. Onthou dat die Bybel homself bewys en daarom maak dit meer logies sin om die konteks te lees as die sewende trompet in Openbaring waar ons ook kan lees van Jesus se wederkoms. Meer daaroor later.
2. 1Th 4:16 word algemeen aangehaal as die bewys van die wegraping. Want die Here self sal van die hemel neerdaal met ‘n geroep, met die stem van ‘n aartsengel en met geklank van die basuin van God; en die wat in Christus gesterf het, sal eerste opstaan. 17 Daarna sal ons wat in die lewe oorbly, saam met hulle in wolke weggevoer word die Here tegemoet in die lug; en so sal ons altyd by die Here wees. Kom ons lees dit in konteks met die res van Tessalonisense.
In net die vorige vers 15, verwys Paulus duidelik na die wederkoms van die Here: Ons wat bly lewe tot die wederkoms van die Here sal die ontslapenes hoegenaamd nie voor wees nie. Dus bevestig hy dat die wederkoms en die wegraping op dieselfde oomblik gaan gebeur. Ons vind iets soortgelyks in die tweede brief aan Tessalonisense:
3. Paulus begin 2 Tess2 met die volgende woorde: ...wat betref die wederkoms van die Here... en beskryf dan verder in vers 3 dat die dag van die Here nie sal aanbreek voordat die antichris sy verskyning gemaak het nie. Ons weet ook nou dat die dag van die Here gaan kom met natuurverskynsels en vervolging en dat Jesus se wederkoms eers hierna sal wees en dat die wederkoms en “wegraping” een gebeurtenis is. Dus gaan gelowiges die antichris en alles wat daarmee saamkom, beleef.
4. Nog ‘n gedeelte uit Tessalonisense wat gebruik kan word om die tyd te bepaal kan gevind word in 2 Tess 2:7 waar gepraat word van een wat die wettelose teëhou. Daar word gespekuleer dat hierdie een , die Heilige Gees kan wees of die kerk. Die laaste argument word veral gebruik saam met die leer van die wegraping voor die verdrukking. Bybel skoliere stoei reeds eeue lank om werklik te bepaal wie die een is. Teenargumente tov die Heilige Gees is dat die Heilige Gees, as deel van die goddelike Drie Eenheid alom teenwoordig is en daarom nie weggeneem kan word nie. Teen die argument dat dit die kerk kan wees, getuig dan ook die bewyse dat die gelowiges eers kom haal word nà die bekendstelling van die anti-chris en dus nie die een is wat die antichris teëhou nie. Wat bly oor? My persoonlike opinie is dat Paulus moontlik hier kan verwys na Daniël 12:1 waar die Migael, as die beskerm engel van Israel gaan “optree” . Die Hebreeuse woord vir optree is: ‛âmad wat ook vertaal kan word as om te huiwer, stil te staan, te verdra, staak. Hierdie vertaling maak vir my meer sin omdat Daniël waarsku dat dit ‘n swaar tyd gaan wees.
5. Kom ons kyk hiervandaan verder wat Openbaring self profeteer oor die wederkoms en die wegneem van gelowiges:
I. Een van die maklikste maniere om te leer van die rol van gelowiges in Openbaring is om te kyk waar hulle hulself bevind gedurende die Openbaring gebeure.
In Op 6:9-11 lees ons van die sesde seël wat oopgemaak word. Die gelowiges reeds in die hemel, bid vir die wat nog op die aarde is en hulle kry die antwoord dat daar nog gelowiges wat doodgemaak moet word. Dus is dit die aankondiging van vervolging van gelowiges op aarde, gedurende die tydperk van sewe jaar.
II. Op 7:13, nog steeds in die tydperk van die sesde seël, bevestig die verdrukking en vervolging van gelowiges wat reeds in die hemel is. Dit is diegene wat in die groot verdrukking gesterf het vir hulle geloof. Daar is geen sprake van ‘n wegraping hier nie.
III. Op 11:15-19, leer ons van die sewende trompet, die laaste trompet (1 Kor 15:52). In vers 17 neem Jesus die koningskap terug wat die wederkoms beteken en in vers 18 beloon hy sy troue dienaars. Hulle kan slegs beloning ontvang wanneer hulle in die hemel is. Dit kan verwys na die wegraping. Daar is nog meer bevestiging in die tydperk van die sewende trompet dat God se kinders in hierdie tydperk weggeneem sal word:
IV. Steeds by die sewende trompet: In Op 14:12 kry gelowiges ‘n waarskuwing om in hierdie tydperk te volhard en aan te hou. Hoekom sal die Heilige Gees dit nodig ag om so laat in die eskatologie ‘n waarskuwing aan gelowiges te stuur as daar nie vervolging is nie of die gelowiges reeds voor die verdrukking weggeneem is? Later in Op 14:14-19 lees ons van die twee oeste waarvan die eerste oes die gelowiges is, wanneer Jesus sy sekel insteek om lande af te oes. Dus is hierdie bevestiging van die wegneem/bymekaarmaak van gelowiges gedurende die tydperk van die sewende trompet. Dit wil sê ná die vervolging/verdrukking, ná die rampe van die trompette, ná die koms van die antichris, ná die merk van die dier sy verskyning gemaak het en al die ander dinge wat voor die tyd bespreek is.
V. Op 20:4-5 is ‘n duidelike bevestiging van die vervolging van gelowiges gedurende die tydperk van die antichris want hier is bevestiging dat hierdie gelowiges nie die beeld van die dier aanbid het nie en ook nie die merk ontvang het nie.
Uit al die bogenoemde kom ons tot die slotsom dat ons nie verseker die dag en uur van die wederkoms kan bepaal nie maar wel die seisoen. Tekens wat die wederkoms/wegraping vooraf sal gaan is die koms van die antichris, son en maan verduistering, water in bloed, die merk van die dier en grootskaalse vervolging van die die gelowiges en Israel. Die gelowiges gaan weggeneem word vòòr die bakke oordeel van God Op 14:7, want hulle is nie vir die oordeel bestem nie. Hier kom1 Tess 5:9 in konteks: God het ons tog nie bestem om gestraf te word nie, maar om deur ons Here Jesus Christus verlos te word
Gaan daar geleentheid wees vir mense om te bekeer? Daar is ‘n lering wat verkondig dat mense hulle gaan bekeer gedurende hierdie tydperke. Dit is nodig om te verstaan dat God, ten spyte van sy woede, nog steeds genadig is en dat die seëls en die trompette gebeurtenisse juis God se manier is om die mense tot bekering te roep, voordat Hy sy oordeel uitstort. Die mens is egter verhard en weier om te bekeer. Kyk wat sê Openbaring self in hierdie verband:
Gedurende die trompette: Op 9:20-21 Die ander mense wat nie deur hierdie plae doodgemaak is nie, het hulle egter nie bekeer nie.....
Op 16:9 Gedurende die bakke oordeel: Die mense het hulle nie bekeer nie en nie aan Hom(God) die eer gegee nie.
Die afleiding is dus dat, al is daar nog kans vir bekering, die goddelose steeds gaan weier en eerder sal volhard in hul sondige bestaan. Daar is ook ‘n gedeelte in Amos 8:11-12 wat profeteer dat, moontlik gedurende die bakke oordeel, daar ‘n honger sal wees na God se Woord maar dit sal nie gevind word nie.
Hoekom die dwaalleer tov die wegraping?
1. Daar is ‘n waarskuwende profesie in die Bybel vir die tyd waarin ons leef: 2Pet 3:3 Dit moet julle veral weet, dat daar aan die einde van die dae spotters sal kom wat volgens hulle eie begeerlikhede wandel 4 en sê: Waar is die belofte van sy wederkoms? Want vandat die vaders ontslaap het, bly alles soos dit was van die begin van die skepping af.
Satan misbruik die Bybel tot sy eie voordeel net soos Hy gemaak het met die versoeking van Jesus. Die vyand gebruik die dwaalleer van die wegraping voor die verdrukking, tot voorbereiding vir verdere verleiding teen die einde van die tye. D**k net hoeveel mense gaan begin twyfel aan die wederkoms as hulle onder verdrukking en vervolging staan en groot geword het met die idee dat hulle nie aan vervolging blootgestel gaan word nie.
2. Verwarring tussen die oordeel van God oor die sondige wêreld en God se woede.
Dit wil voorkom asof die voorstanders van die wegraping voor die verdrukking nie die betekenis van verdrukking verstaan nie en dit aan God se oordeel probeer koppel. Die Engelse woord “tribulation” kan moontlik aanleiding gee hiertoe. In die Nuwe Testament verskyn die woord negentien keer vanaf die Evangelies tot by Openbaring waarvan sestien gekoppel kan word aan die swaarkry van gelowiges. Die griekse woord is: θλίψις thlipsis wat vertaal word as druk, aangetas, pyn, swaarkry, vervolging of moeilikheid, met geen verwysing na woede(van God) of oordeel (van God) nie.
Op 6:16 met die oopmaak van die sesde seël roep die mense uit vir beskerming teen die toorn(woede) van Jesus want die dag vir die oordeel van God en Jesus het aangebreek. Hierdie is die aankondiging dat God se oordeel op hande is en sy woede nou sigbaar word. Dit is nog nie die tyd vir die oordeel nie. Ons kan die konteks verstaan wanneer ons besef dat God se oordeel eers gedurende die bakke is. Eers in Op 14:7, in die tyd van die sewende trompet, verklaar die engel dat dit die tyd vir God se oordeel is. Die tyd van die bakke oordeel.
Die verdrukking (tribulation), kom dus nie van God nie, maar van die anti-chris.
Omdat hierdie verwarring bestaan word 1 Tess 5:9 verkeerd aangehaal. God het ons tog nie bestem om gestraf te word nie, maar om deur ons Here Jesus Christus verlos te word. Wanneer ons die tyd van Jesus se wederkoms en die bymekaar maak van gelowiges reg verstaan, kom hierdie vers in konteks met die Bakke Oordeel en nie die res van Openbaring nie.
Gaan daar enigsins beskerming van gelowiges wees?
In Op 2 tot 3, die briewe aan die sewe gemeentes, blyk daar tog sprake van beskerming vir sekere gelowiges maar ook vervolging vir ander: Op 2:10 word Smirna gewaarsku dat hulle vervolg gaan word en in Op 3:10 kry Filadelfia die versekering dat hulle beskerm sal word. In die 1983 vertaling lees ons in Op 12:14 dat die vrou (kerk of Israel ) versorg sal word. Wie word vervolg en wie beskerm? Dit is die Vader se besluit volgens Op 13:10
Hoekom gaan daar vervolging van die gelowiges wees?
1. Jesus self is vervolg en Hy leer ons in Mat 10:24 “‘n Leerling is nie bo die meester nie en ‘n dienskneg ook nie bo sy heer nie”. Wat maak vandag se gelowiges beter as Jesus? Wat maak vandag se gelowiges beter as al die ander gelowiges deur die geskiedenis wie vervolg is? Wat maak die westerse gelowige anders as hulle wie tans in die midde-ooste, Indië, China en elders, vervolg word. Is ons nie dalk so gebreinspoel deur die “goedvoel evangelie” dat ons glad nie meer besef wat dit beteken om op te offer vir ons geloof nie?
2. Die Bybel is vol waarskuwings van vervolging. Hier is slegs twee daarvan:
i. Miskien ken ons nie die ware betekenis van ‘n godvrugtige lewe nie en dit is die rede hoekom ons nie vervolging verstaan nie. 2Ti 3:12 En almal wat ook godvrugtig wil lewe in Christus Jesus, sal vervolg word.
ii. Dalk is die westerse gelowige bang vir die toetsing wat saam met vervolging kom? Die toets of ons werklik waardig is om saam met Jesus verheerlik te word: 1Pe 4:12 Geliefdes, verbaas julle nie oor die vuurgloed van vervolging onder julle wat tot julle beproewing dien, asof iets vreemds oor julle kom nie; 13 maar namate julle gemeenskap het aan die lyde van Christus, moet julle bly wees, sodat julle ook by die openbaring van sy heerlikheid met blydskap kan jubel.....19 So laat dan ook die wat volgens die wil van God ly, hulle siele aan Hom as die getroue Skepper toevertrou met goeie dade.
3. Daar is ‘n groter doel met vervolging:
I. Suiwering: Dan_12:10 Baie sal gereinig en gesuiwer en gelouter word, maar die goddelose sal goddeloos handel; en geeneen van die goddelose mense sal verstaan nie, maar die verstandiges sal verstaan.
II. Verheerliking: Rom_8:17 en as ons kinders is, dan ook erfgename, erfgename van God en mede erfgename van Christus, as ons naamlik saam met Hom ly, sodat ons ook saam met Hom verheerlik kan word.
III. Beloning: Op 20:4 En ek het trone gesien, en hulle het daarop gaan sit, en aan hulle is die oordeel gegee; en ek het die siele gesien van die wat onthoof is oor die getuienis van Jesus en oor die woord van God, en die wat die dier en sy beeld nie aanbid het nie, en die merk op hulle voorhoof en op hulle hand nie ontvang het nie; en hulle het geleef en as konings geregeer saam met Christus die duisend jaar lank.
Toegang tot die hemelse koninkryk is nie goedkoop nie. Ons moet waak teen ons verslawing aan die tydelike, vleeslike lewe
1Co 15:19 As ons net vir hierdie lewe op Christus hoop, dan is ons die ellendigste van alle mense.
Die slotsom is dus dat daar geen wegraping is voor die verdrukking nie en dat die gelowiges eers opgeneem(weggeruk) sal word met die blaas van die sewende trompet.
Saamgestel deur Wiekus de Beer
Ek verklaar dat daar geen outeursregte op hierdie skrywe is nie en dat dit vryelik, sonder die doel tot enige wins, versprei mag word
