27/07/2026
Ons begin die nuwe kwartaal en word geroep om God se Lig in 'n donker wêreld te skyn 🕯
🌱Groeityd🌳
📖Matteus 5:14-16
Tema: Wees Lig🕯️
🖊️Opsomming: Jesus gebruik die metafoor van 'n lamp om te verduidelik hoe gelowiges God se lig in 'n donker wêreld moet laat skyn.
Daar is nie ‘n opname van die preek vandag nie.
📍Hier is ‘n paar vra om jou te help om na dink oor die gedeelte:
❔Ons lewens dien as 'n lig wat vir mense in 'n "donker" wêreld vol seer wys wie God is deur Sy liefde, omgee en hulp te reflekteer. Ons moet in die plekke wat ons beweeg en waar ons leef, ons lig laat skyn om dit as ‘n sagter en beter plek agter te laat. Waar in jou omgewing kan jy “donker” plekke sien? Wie rondom jou voel dalk bang, alleen of hartseer? Waar het iemand nodig om God se liefde te sien?
❔Ons kan in die “donker” wêreld God se lig laat skyn in hoe ons leef. Bv, soos om vriendelik te wees met eensame mense, die waarheid te praat, ander te vergewe, te bid vir die wat swaarkry, en respek te wys. Wat gaan jy prakties hierdie week doen om te skyn? Dink aan spesifieke aksies by die huis, skool of werk. Gaan jy bv. iemand moed inpraat, iemand vergewe wat jou seergemaak het, of vir iemand in nood bid?
❔Ons is soms bang, onwillig of onseker om te doen dit wat God van ons vra. Wanneer ons weet wat God van ons vra om te doen, en ons doen dit nie, sit ons ‘n emmer oor die lig wat ons moet skyn. Bv. As ons moet vergewe, en ons kies om kwaad te bly. Dit verhoed dat mense die lig sien en God prys. Is daar iets wat jou keer dat Jesus se lig ten volle deur jou skyn? Is daar spesifieke struikelblokke, vrese of foute in jou lewe wat jy moet verander sodat God se lig helderder deur jou kan skyn?
❔Dit is nie altyd maklik om God se lig te laat skyn nie. Maar ons hoef dit nie alleen aan te pak nie. Net soos 'n lamp by 'n kragpunt ingeprop moet wees om te werk, kry ons ons krag om te skyn van Jesus af. Is jy tans "ingeprop" by die kragbron? Dink na oor of jy genoeg tyd spandeer in God se Woord en in gebed om jou krag van Hom te kry.
❔Die lig moet ook by die skakelaar aangeskakel wees, sodat die krag deur lamp kan beweeg en die lig kan skyn. Hierdie aanskakeling, is ons gehoorsaamheid wanneer ons doen dit wat God ons vra. Dit is ons keuse. Is daar iets waaraan jy vandag gehoorsaam moet wees? Vra die Gees om jou bewus te maak van SY leiding deur die dag en daarop gehoorsaam te reageer.
❔Die rede waarom ons lig moet skyn, is dat dit dit mense help om God raak te sien, Hom te eer en te loof. Ons lewe, is nie vir onsself nie. Ons lewe, is in elke daad en gedagte, ‘n manier waarop God vereer kan word. Vra God om jou die week te help, dat mense Hom kan eer, deur jou lewe.
💥Praktiese toepassing:
Kry vir jou ‘n kers.🕯️ Elke oggend voor jy die dag begin, skool of werk toe gaan, steek die kers aan en bid dat God jou sal help om jou lig te laat skyn in die dag. Wanneer die dag verby is en jy vanaand stil raak, dink na oor die dag, deel met jou gesin of vriende waar jy donker gesien het en lig kon bring. Gee aan God dan die eer, vir Sy werk in daardie situasie. Deel ook as jy gesukkel het en bid daaroor.
