EG Kerk Pretoria Oos

10/06/2026

Gedagte vir die dag.

Teksvers: Lukas 24:31 “Toe is hulle (die Emmaüsgangers) oë geopen en hulle het Hom herken, en Hy het uit hulle gesig verdwyn.

Sedert my jeugjare het die verhaal van die Emmaüsgangers wat ’n lang pad saam met Jesus gestap het terwyl hulle Hom nie herken het nie, my aangegryp. Ook die skilder Michaelangelo (1574 – 1610) was deur hierdie gebeure na Jesus se opstanding, soos beskryf in Lukas 24:13 – 35, gefassineer en hy het ’n pragtige skildery geskilder en dit genoem “Aandete te Emmaüs.”

Lukas, wat hierdie gebeure in sy evangelie opgeteken het, vertel dat dié twee manne (verse 33-35) dadelik opgestaan en na Jerusalem teruggegaan het. “Toe staan hulle in dieselfde uur op en gaan na Jerusalem terug en vind die elf en die wat saam met hulle bymekaar was, wat sê: Die Here het waarlik opgestaan en het aan Simon verskyn. Toe vertel hulle wat op die pad gebeur het en hoe Hy aan hulle bekend geword het by die breking van die brood.” (Verse 26 – 33).

Oswald Chambers het gesê: “Jesus kom selde wanneer ons Hom verwag. Hy verskyn wanneer ons Hom die minste verwag en altyd in die mees onlogiese verband. Die enigste manier waarop ’n werker (Christen) getrou aan God kan wees, is deur gereed te wees vir Sy verrassingsbesoek.”

Op watter pad ons ook al vandag is of wandel, mag ons gereed wees vir Jesus wat Homself op nuwe en verrassende maniere aan ons wil openbaar.

Wanneer ons vandag in ’n situasie beland waarin ons eerlik moet sê: “Here, ek weet regtig nie wat om te doen nie,” weet dan dat Hy ook ’n verrassingsbesoek aan u sal bring en u uitred en aan u wysheid sal gee wat om te doen.

Onthou, om die Here Jesus Christus te vind moet ons bereid wees om tyd te maak om Hom te soek.

Seëninge.
(Geskryf deur Yvonne Slabber)

08/06/2026

Gedagte vir die dag.

Teksvers: Johannes 15:5 “Ek is die wynstok, julle die lote. Wie in My bly, en Ek in hom, hy dra veel vrug; want sonder My kan julle niks doen nie.”

Iemand vertel dat hul gemeente die betrokke Sondag ’n Besoekers dag gehad het en baie besoekers het dié dag die erediens bygewoon. Die erediens was nog aan die gang toe een van die besoekers opstaan en uitloop. Iemand wat bekommerd was, het ook opgestaan en na haar gestap. “Jy vertrek vroeg. Is daar ’n probleem?” het hy gevra. Sy was reguit en eerlik: “Ja,” het sy geantwoord, “ek het ’n probleem met die preek! Ek aanvaar nie wat die predikant sê nie. Hy het gesê dat God al die eer moet kry en lof moet ontvang vir alles wat ons in hierdie wêreld vermag. Ek d**k ek verdien iets van die krediet vir my prestasies.” Onnodig om te sê dat hoe die persoon wat haar na buite gevolg het ook al die Woord (... want sonder My kan julle niks doen nie) aan haar probeer verklaar het, het dié besoeker, onwillig om te luister, huis toe gery.

Johannes 5:19 “Jesus het toe geantwoord en vir hulle gesê: Voorwaar, voorwaar Ek sê vir julle, die Seun kan niks uit Homself doen tensy Hy die Vader dit sien doen nie. Want alles wat Hy doen, dit doen die Seun ook net so.” Jesus het ook aan Sy dissipels gesê dat hulle sonder Hom, niks kan doen nie (Johannes 15:5).

Toe my skoonseun my kleindogter (sy dogter) in die huwelik bevestig het, was die tema van sy boodskap aan die bruidspaar: “Sonder My (Jesus) kan julle niks doen nie.”

As kinders van God erken en eer ons die Here as die Een wat ons bystaan om alles reg te doen en reg te kry.

God se kinders doen Sy wil tot Sy eer. Ons moenie God van Sy eer beroof nie.

Aan God al die eer! Amen!

Seëninge.
(Geskryf deur Yvonne Slabber)

05/06/2026

Gedagte vir die dag.

Teksvers: Filippense 2:8 “en in gedaante gevind as ‘n mens, het Hy Homself verneder deur gehoorsaam te word tot die dood toe, ja, die dood van die kruis.”

Ek lees van twee manne, uit twee verskillende lande, wat mekaar op ’n staptog ontmoet het en saam besluit het om in 1963 die tog na die kruin van Everest aan te pak. Op pad daarheen het albei die begeerte uitgespreek om eerste op die kruin te staan. Hulle het saam met ander klimmers die berg aangepak en toe hulle die laaste paar treë na die kruin moes neem, het die een persoon teruggestaan en gesê: “Gaan jy eerste!” Maar sy uitlandse maat het dit van die hand gewys en gesê: “Nee, gaan jy eerste.” Toe het hulle ooreengekom – mekaar se hande vasgehou en saam die kruin bestyg!

Paulus het die Filippense aangemoedig om dieselfde soort nederigheid uit te leef. Filippense 2:4 “Julle moet nie elkeen na sy eie belange omsien nie, maar elkeen ook na die ander s’n.”

Ons vind vandag dat maatskappye en besighede in hul poging om suksesvol te wees, dikwels ander onderdruk, sodat hulle hul eie doelwitte kan bereik. En o, sien ons dit ook nie in die politieke wêreld nie.

Paulus moedig die kinders van die Here in Filippi aan om die gees van nederigheid te openbaar in hul daaglikse lewe. Hoe dikwels hoor ons iemand sê: “Omdat ek so sê!”

Rusies en geskille kan dikwels maklik opgelos word wanneer ons ons reg om reg te wees, prysgee. Nederigheid bepaal dat ons genade en sagmoedigheid betoon pleks van om ons eie wil af te dwing. Vers 3b “... maar in nederigheid moet die een die ander hoër ag as homself.”

Wanneer ons nederigheid beoefen word ons al hoe meer soos Jesus. Hy het Homself om ons ontwil verneder en gehoorsaam geword tot die dood toe, ja die dood van die kruis (ons openings teksvers). Kom ons lees net een vers verder. Vers 9 “Daarom het God Hom ook uitermate verhoog en Hom ‘n naam gegee wat bo elke naam is.”

Om nederigheid te openbaar en uit te lewe is NIE ’n swakheid nie, dit is voorwaar ’n teken en bewys dat Sy krag in ons hart en lewe werksaam is.

Mag God ons help om gewillig te word om nederig te wees.

Seëninge.
Teksvers: Filippense 2:8 “en in gedaante gevind as ‘n mens, het Hy Homself verneder deur gehoorsaam te word tot die dood toe, ja, die dood van die kruis.”

Ek lees van twee manne, uit twee verskillende lande, wat mekaar op ’n staptog ontmoet het en saam besluit het om in 1963 die tog na die kruin van Everest aan te pak. Op pad daarheen het albei die begeerte uitgespreek om eerste op die kruin te staan. Hulle het saam met ander klimmers die berg aangepak en toe hulle die laaste paar treë na die kruin moes neem, het die een persoon teruggestaan en gesê: “Gaan jy eerste!” Maar sy uitlandse maat het dit van die hand gewys en gesê: “Nee, gaan jy eerste.” Toe het hulle ooreengekom – mekaar se hande vasgehou en saam die kruin bestyg!

Paulus het die Filippense aangemoedig om dieselfde soort nederigheid uit te leef. Filippense 2:4 “Julle moet nie elkeen na sy eie belange omsien nie, maar elkeen ook na die ander s’n.”

Ons vind vandag dat maatskappye en besighede in hul poging om suksesvol te wees, dikwels ander onderdruk, sodat hulle hul eie doelwitte kan bereik. En o, sien ons dit ook nie in die politieke wêreld nie.

Paulus moedig die kinders van die Here in Filippi aan om die gees van nederigheid te openbaar in hul daaglikse lewe. Hoe dikwels hoor ons iemand sê: “Omdat ek so sê!”

Rusies en geskille kan dikwels maklik opgelos word wanneer ons ons reg om reg te wees, prysgee. Nederigheid bepaal dat ons genade en sagmoedigheid betoon pleks van om ons eie wil af te dwing. Vers 3b “... maar in nederigheid moet die een die ander hoër ag as homself.”

Wanneer ons nederigheid beoefen word ons al hoe meer soos Jesus. Hy het Homself om ons ontwil verneder en gehoorsaam geword tot die dood toe, ja die dood van die kruis (ons openings teksvers). Kom ons lees net een vers verder. Vers 9 “Daarom het God Hom ook uitermate verhoog en Hom ‘n naam gegee wat bo elke naam is.”

Om nederigheid te openbaar en uit te lewe is NIE ’n swakheid nie, dit is voorwaar ’n teken en bewys dat Sy krag in ons hart en lewe werksaam is.

Mag God ons help om gewillig te word om nederig te wees.

Seëninge.
(Geskryf deur Yvonne Slabber)

03/06/2026

Gedagte vir die dag

Teksvers: 1 Thessalonicense 4:1 “Verder dan, broeders, vra en vermaan ons julle in die Here Jesus dat julle, soos julle van ons geleer het hoe julle moet wandel en God behaag, nog oorvloediger mag wees.”
2020 Vertaling: “Verder dan, broers, vra ons julle, en spoor ons julle ter wille van die Here Jesus aan: Julle is deur ons onderrig oor hoe julle moet leef om God te behaag; julle leef inderdaad reeds hiervolgens, maar julle moet nog al hoe meer so leef.”

’n Trotse moeder vertel dat haar seun baie lief is om te lees. Wanneer hy meer boeke lees as wat deur die skool voorgeskryf word, ontvang hy ’n prestasie sertifikaat. Dit spoor hom aan om nog meer te lees.

In sy brief aan die Thessalonicense motiveer Paulus die gelowiges, nie met ’n toekenning nie, maar met woorde van aanmoediging. Hy skryf (1 Thessalonicense 4:1) “... soos julle van ons geleer het hoe julle moet wandel en God behaag, nog oorvloediger mag wees.” ’n Ander vertaling lui: “Lê julle daarop toe ...” Die Christene van Thessalonika het volgens God se wil gelewe en Hom met hulle lewens vereer, daarom moedig Paulus hulle aan om aan te hou en nog meer vir Hom te lewe – “nog oorvloediger mag wees.”

Ons elkeen gee vandag moontlik ons allerbeste om ons Vader te ken, Hom te behaag en lief te hê. Laat ons daarom Paulus se woorde ter harte neem as aansporing om dapper in geloof te groei en dan voort te gaan om Hom te eer op ons daaglikse geloofspad.

Is daar miskien iemand wat jy met Paulus se woorde van bemoediging kan bemoedig? Kom daar nou iemand in jou gedagtes op? Ons is dikwels getrou om die swakkes te bemoedig en aan te spoor om nie moedeloos te word nie, maar om vas te hou en sy/haar oë op Jesus te vestig. Maar vandag vra ek u om iemand wat voluit vir Hom lewe aan te moedig om vol te hou en selfs oorvloediger heilig (afgesonder vir Jesus) te bly en aan te hou lewe. Skryf vandag ’n boodskappie op jou foon of skakel dié persoon en bemoedig hom of haar – moontlik deur ’n gepaste teksvers uit die Woord. Wie weet, miskien het hy of sy net vandat dié woord van bemoediging nodig.

Deur iemand vandag aan te moedig om vol te hou op die pad kan jy moontlik soos Aäron en Hur wees wat Moses se hande omhoog gehou het. U bemoediging sal kosbaar wees in Christus se oë.

Seëninge.
(Geskryf deur Yvonne Slabber)

01/06/2026

Gedagte vir die dag.

Teksvers: Hebreërs 4:16 “Laat ons dan met vrymoedigheid na die troon van die genade gaan, sodat ons barmhartigheid kan verkry en genade vind om op die regte tyd gehelp te word.”

Gedurende 2009 het ’n passasiersvliegtuig in New York se Hudson rivier beland. Die loods, wat die noodlanding veilig en sonder ’n enkele ongeval uitgevoer het, is later uitgevra oor daardie oomblikke in die lug toe hy met ’n kritieke lewens besluit gekonfronteer is. Hy het geantwoord: “’n Mens kan só daarna kyk. Ek het oor die afgelope 42 jaar klein maar gereelde deposito’s in die bank van ervaring, onderrig en opleiding belê. Op daardie spesifieke dag was die balans groot genoeg sodat ek ’n baie groot onttrekking kon maak.”

Elke mens sal die een of ander tyd met ’n krisis te doen kry. Miskien kom dit as gevolg van ’n aflegging by die werk, die uitslae van mediese toetse of die dood van ’n geliefde. Dit is in tye soos hierdie dat ons diep in die reserwes van ons geestelike bankrekening van geloof sal moet delf. Wat gaan u en ek daar kry wanneer ’n krisis kom? Sal ons ’n diepgewortelde verhouding van geloof en vertroue vind in God ons Vader en in Jesus? Sal ons kan terugkyk na tye toe ons na God gevlug het in ’n noodsituasie, siekte of watter probleem daar ook al was? Elke keer wanneer ons na Hom toe vlug en Hy ons deurdra en ons Hom eer, maak ons ’n definitiewe deposito in ons geestelike Geloof-bank. Getuienisse uit ons verlede, dra vandag krag om ons aan te moedig om God vir die onmoontlike te vertrou omdat ons in die verlede Sy genade gesmaak en ervaar het.

2 Korinthiërs 8:9 “Want julle ken die genade van onse Here Jesus Christus, dat Hy, alhoewel Hy ryk was, ter wille van julle arm geword het, sodat julle deur sy armoede ryk kan word.”

Efésiërs 2:4 – 8 “Maar God, wat ryk is in barmhartigheid, het ons deur sy grote liefde waarmee Hy ons liefgehad het, ook toe ons dood was deur die misdade, lewend gemaak saam met Christus — uit genade is julle gered — en saam opgewek en saam laat sit in die hemele in Christus Jesus, sodat Hy in die eeue wat kom, kan betoon die uitnemende rykdom van sy genade in goedertierenheid oor ons in Christus Jesus. Want uit genade is julle gered, deur die geloof, en dit nie uit julleself nie: dit is die gawe van God.”

Wat ’n wonderlike, ryke geestelike balans!

Ons hou ook vas aan die Bybelse belofte dat God getrou is om Sy Woord te volbring. Hebreërs 4:16 ““Laat ons dan met vrymoedigheid na die troon van die genade gaan, sodat ons barmhartigheid kan verkry en genade vind om op die regte tyd gehelp te word.”

Mag u hierdie kosbare Woord en belofte uit Sy Woord as deposito in u geestelike bankrekening deponeer want om Sy Woord en belofte van die verlede te onthou, versterk ons vir die toekoms.

Seëninge.
(Geskryf deur Yvonne Slabber)

29/05/2026

Gedagte vir die dag

Teksvers Lukas 9:62 “En Jesus antwoord hom: Niemand wat sy hand aan die ploeg slaan en agtertoe kyk, is geskik vir die koninkryk van God nie.”

Dit is moeilik om totsiens te sê vir familie, vriende, aan ’n bekende en gunsteling blyplek, aan ’n beroep of lewenswyse. Lukas 9:57 beskryf die manier waarop Jesus se dissipels Hom behoort te volg. Iemand wat van voorneme is om Hom te volg sê vir Hom (vers 61): “Here, ek sal U volg, maar laat my eers toe om afskeid te neem van die wat in my huis is.” Daarop antwoord Jesus hom: “Niemand wat sy hand aan die ploeg slaan en dan omkyk, is geskik vir die koninkryk van God nie.” Vra Jesus regtig dat Sy volgelinge moet groet en afsien van alles en almal wat vir hulle lief en kosbaar is? Nee! Maar Jesus sê: “Volg jy My.”

In die Chinese taal is daar nie ’n sinoniem vir die Afrikaanse woord “totsiens” nie. Die twee Chinese karakters wat gebruik word om dié woord te vertaal beteken eintlik “sien jou weer.” Wanneer ons ons lewe aan Jesus toewy kan dit moontlik wees dat mense ons sal verstoot en verwerp. Dit beteken egter nie dat ons vir ons familie en vriende “totsiens” (of tot weersiens) moet sê in die sin dat ons ons afskei nie. Om totsiens te sê beteken dat ons God nou eerste in ons lewens stel en Hom heelhartig volg en volgens Sy Woord se voorskrifte sal lewe. Dan eers sal ons weer uit die regte perspektief na mense en ons geliefdes kan kyk. Die begeerte van ons hart sal wees om Jesus te volg en in Sy weë te wandel. Só dikwels kan ouers of vriende ’n jong bekeerling wat Jesus wil volg, terughou en verhinder deurdat hulle sy “nuwe lewe in Christus” minag.

Ek d**k altyd aan ’n tandemfiets. Daar is twee persone – die een wat agter sit moet net trap terwyl die Een wat die voorste sitplek inneem volle beheer het oor die fiets – die rigting wat die rit inneem asook die spoed waarteen die fiets beweeg. Wanneer gevaar dreig of ’n rooi lig genader word, sal die persoon in voorste sitplek volle beheer oorneem. Wanneer ons Jesus as Verlosser en Redder aanneem, neem ons die agterste sitplek op die geestelike tandemfiets in en wanneer ons die Heilige Gees toelaat om ons te lei en besluite te neem, sal dit vir ons ten goede en tot ons seën wees.

Wanneer ons Jesus volg neem ons nie meer die leiding in ons lewe nie. Mag God ons help en lei en mag ons vandag deur Sy genade, Hom in gehoorsaamheid volg.

Seëninge.
(Geskryf deur Yvonne Slabber)

27/05/2026

Gedagte vir die dag.

Teksvers: 1 Korinthiërs 6:20 “Want julle is duur gekoop. Verheerlik God dan in julle liggaam en in julle gees wat aan God behoort.”

Nadat my eggenoot oorlede is het ek 3 maande later besluit om na Polokwane te verhuis sodat ek nader aan my dogter en skoonseun en ander familie kon wees. Toe kom die groot “inpak.” O wee! Ek was verbaas en verras toe ek op ’n ou tjekboek asook munte (½ c, 1c, 5c en ander munte) uit ’n vorige eeu ontdek! Ek het my herinner wat ek vroeër jare met ’n sikspens kon koop! Ek onthou ook dat wanneer ek vir my ma ’n brood by die Chinese winkel moes gaan koop (in die vroeë vyftigerjare) is ek met ’n pennie beloon en kon 3 Chappies koop!

Vandag is hierdie muntstukke van geen waarde nie, alhoewel munt versamelaars hulle steeds as waardevol beskou – selfs dié wat verweer en in ’n slegte toestand is.

Moontlik voel u vandag verweer, oud en afgeskeep. Moontlik het die storms van die lewe u behandel asof u waardeloos is. Ongeag hierdie omstandighede is u vir God kosbaar. Ek kan met u saam voel in medelye – veral toe ek by die sterfbed van my tweede lewensmaat moes staan. Ek het ook nikswerd, nutteloos en afgerem gevoel. Die pad vorentoe was donker en onseker want ek was toe reeds 80 jaar oud. Ek het in die afgelope byna 4 jaar God op ’n “ander manier” leer ken. Nie op grond van my denke, my liggaamskragte, kleredrag of prestasies nie, maar deur Sy genade het Hy my nooit gelos of weggestoot nie. Een teksvers wat my daagliks deurdra is Jesaja 64:4 “Van ouds af tog het niemand dit gehoor of verneem nie, geen oog het ‘n God gesien wat werksaam is vir wie op Hom wag nie, behalwe U.”

Ek kan getuig dat elke kind van God kosbaar en duur gekoop is met Sy Bloed, want jy is kosbaar in Sy oë.

Christus se dood is die maatstaf van God se liefde vir jou.

Shalom! Vrede vir u.
(Geskryf deur Yvonne Slabber)

22/05/2026

Gedagte vir die dag

Teksvers: Psalm 37:23 & 24 “Deur die HERE word die gange van ‘n man bevestig, en Hy het ‘n welbehae in sy weg. As hy val, dan stort hy nie neer nie; want die HERE ondersteun sy hand.”

Die kloktoring van Westminister, wat die bekende Big Ben horlosie huisves, is ’n ikoniese landmerk in Londen, Engeland. Die algemene mening is dat die melodie van die kloktoring se klokkespel ontleen is aan die wysie “I know that my Redeemer liveth” uit die Messias van Händel. Later is dié woorde bygevoeg: “Here, wees u ons gids in hierdie dae sodat deur U krag geen voet sal gly nie.”

Ek het hierdie beskrywing van die Big Ben kloktoring onthou toe ek Psalm 37 lees (vers 23 en 24 – ons openings teksverse). Die HERE help dié man en vrou op wat Hom volg en met sy of haar lewe eer en dra hom deur.

Let op hoe nou God betrokke is by Sy kind se lewe, ook wanneer dié kind struikel en val draai God nie Sy aangesig weg nie – nee! Hy help hom op. “Hy ondersteun sy hand.” Hoe absoluut wonderbaar buitengewoon is dit nie! Nie net help die Skepper van die heelal ons op wanneer ons val nie, Hy is ook diep begaan oor elke oomblik van ons lewe en ons toekoms. Paulus het hierdie wonderlike ervaring beleef en nooi ons met vertroue: “Werp al julle bekommernis op Hom, want Hy sorg vir julle.” (1 Petrus 5:7) Solank as wat die versekering van Sy sorg in ons hart leef, sal u en ek die moed en geloof hê om alles wat oor ons pad kom, saam met Hom deur te voer.

Iemand het gesê: “Daar is geen mens veiliger as die een wat God in Sy hand hou nie.”

Vrede vir u.
(Geskryf deur Yvonne Slabber)

20/05/2026

Gedagte vir die dag.

Teksvers: Psalm 91:15 “Hy sal My aanroep, en Ek sal hom verhoor; in die nood sal Ek by hom wees; Ek sal hom uitred en eer aan hom gee.”

Ek lees van ’n jong man wat opgewonde die vrymoedigheid geneem het om aan ’n bekende aktrise ’n briefie van bewondering te stuur. Hy het nooit ’n reaksie of antwoord van haar ontvang nie. Hy het bly hoop maar is teleurgestel.

Uit genade antwoord God ons altyd. Hy is die Allerhoogste. Psalm 91:1 “Hy wat in die skuilplek van die Allerhoogste sit, sal vernag in die skaduwee van die Almagtige.” Hy is hoog en verhewe en Sy krag is onbeperk, nogtans het ons toegang tot Hom. Hy verseker ons, as Sy kinders in vers 15 “Hy sal My aanroep, en Ek sal hom verhoor; in die nood sal Ek by hom wees ...”

Daar is ’n antieke legende wat vertel van ’n koning wat wewers gehuur het om vir hom tapisserieë en klere te maak. Hy het vir die wewers sy en patrone gegee asook duidelike instruksies om hom te raadpleeg sodra ’n probleem opduik. ’n Jong wewer was gelukkig en suksesvol terwyl die ander aanhoudend probleme ondervind het. Toe hulle hom vra waarom hy so suksesvol is, het hy geantwoord: “Het julle nie opgelet hoe dikwels ek die koning ingeroep het nie?” Hulle het geantwoord: “Ja, maar hy is baie besig en ons het ged**k jy oortree deur hom so dikwels te steur.” Die seun het geantwoord: “Ek het hom slegs op sy woord geneem en hy was al te gewillig om my te help.”

Ons God, onse Vader, is soos daardie koning – net baie, baie groter – en gewillig om ons te help wanneer ons Hom VRA. Hy is liefdevol en sagmoedig en luister aandagtig wanneer ons Hom aanroep. Hy hoor die geringste onder ons se gebede. Ja, ook die gebede oor die klein dingetjies waarvoor ons hulp en leiding vra want ons is altyd in God se gedagtes.

Seëninge.
(Geskryf deur Yvonne Slabber)

15/05/2026