09/06/2026
Leesrooster: 09 Junie 2026
Goeiemore
Mag daar nou vir jou ‘n paar stil oomblikke wees, en mag God ons ontmoet waar ons is.
Sielkundiges leer ons dat een van die redes hoekom ons stresvlakke so hoog is, is omdat ons te veel dinge probeer beheer - ook dinge wat buite ons beheer is. Daar is baie dinge wat buite ons beheer is, een daarvan is: ander mense en hulle optrede. Jy kan nie jou buurman, jou kollegas of jou familielede beheer nie. Jy kan nie die toekoms beheer nie, nog minder het jy enige beheer oor die verlede en dit wat verby is.
HIerdie gebrek aan beheer laat mens partykeer op een van twee uiteenlopende maniere reageer:
Jy kan òf al hoe meer fanaties raak oor beheer, met die gevolg dat jou liggaam later die prys betaal vir hierdie onoplosbare spanning,
òf jy kan aan die ander kant, opgee en jouself as ‘n magtelose slagoffer van omstandighede sien.
Maar die Bybel gee vir ons ‘n derde moontlikheid wanneer ons gekonfronteer word met dinge buite ons beheer, en dit is om oor te gee, let wel, nie op te gee nie, maar OOR TE GEE aan God.
Ons lees in Psalm 46 vers 11:
Bedaar en erken dat Ek God is, hoog bo die nasies, hoog bo die aarde. (1983)
Wees stil en weet Ek is God. Ek regeer oor nasies, oor die hele aarde. (Die Boodskap)
Laat staan en weet dat Ek God is. (1953)
Kort voor die Tweede Wêreldoorlog, skryf Reinhold Niebuhr ‘n gebed wat later wêreldwyd bekend sou word as “The Serenity Prayer”.
Julle sal dit herken aan die eerste paar reëls wat so klink:
“O Heer, skenk my die gemoedskalmte om te aanvaar wat ek nie kan verander nie…”
Niebuhr skryf die gebed as ‘n oproep om die realiteite van ‘n gebroke wêreld te konfronteer, nie uit eie krag nie maar deur volledig staat te maak op God se genade. Dit is dus eintlik ‘n gebed van oorgawe, nie opgee nie, maar óórgee. Wat so ‘n oorgawe behels, word mooi beskryf in die res van die gebed, en aangesien die vollengte gebed nie so bekend nie, lees ek dit graag in sy geheel vir ons:
O Heer, skenk my die gemoedskalmte
om te aanvaar wat ek nie kan verander nie,
die moed om te verander wat ek kan,
en die wysheid om die verskil te ken.
Skenk my die vermoë om een dag op ‘n slag te leef,
om oomblik vir oomblik te geniet,
om swaarkry te aanvaar as ‘n weg na vrede,
om soos U die sondige wêreld te neem vir wat dit is,
en nie soos ek dit wil hê nie,
maak my vol vertroue dat U alles ten goede sal laat meewerk
wanneer ek my aan U Wil onderwerp;
sodat ek in hierdie lewe ‘n mate van geluk sal kan ervaar
en in die lewe hierna
uitermatig gelukkig by U sal wees.
Amen
Om die behoefte aan beheer oor te gee, beteken nie dat ek opgee nie.
Dit beteken nie dat ek passief net ‘n toeskouer van my eie lewe word nie. Om oor te gee is om die UITKOMS aan God oor te laat.
Ek moet steeds elke dag my deel doen, dit beteken:
ek moet doen wat reg is in elke omstandigheid.
maar daarna moet ek vertrou dat die uitkoms in die Sorgsame God se Hande is. Ek moet vertrou dat Hy met genade en met deernis en met groot krag sal klaarmaak, dit wat nie in my hande is nie.
O Heer,
Skenk my hierdie kalmte,
skenk my die vermoë om geloof bo my vrees te stel,
vanoggend, vanmiddag, vanaand, en more weer.
Amen
