17/02/2025
Is jou ja jou ja, en jou nee jou nee?
deur Izak Loots
“Want elkeen wat die wil doen van my Vader wat in die hemele is, dié is my broer en suster en moeder.” [Matthéüs 12:50]
God se opdragte is nooit goedkoop nie. Want ons God weet waartoe ons in staat is wanneer ons dit sáám met Hom doen.
Hoe lyk jou integriteit voor God?
-Doen jy wat jy sê jy gaan doen?
-Is jou ja jou ja en jou nee jou nee?
-Staan jy op vir die waarheid of bly jy maar eerder stil ter wille van die vrede?
-Raak jy dalk soms hoogmoedig en stel jouself bo ander?
Nog een is om met integriteit te lewe. Soos Jesus gesê het, “laat jou ja, jou ja wees en jou nee jou nee.” Vier riglyne:
1. Moet nooit instem om iets te doen as jy nie 100% seker is dat jy dit sal kan doen nie.
2. As jy dan “ja” sê vir iets, skryf dit in jou dagboek sodat jy kan onthou en kan begin om dit te doen waarvoor jy “ja” gesê het.
3. As jy “ja” gesê het vir iets, en jy het dit vergeet, vra om verskoning, sonder om “wit-leuen” verskonings aan te bied. Onderneem dan om dit dan so gou as moontlik te doen, as dit nog nodig is.
4. Wees eerlik. Eerlikheid is een van die beste maniere om vertroue te bou. Dit maak jou vry en ander besef dat hulle op jou kan staatmaak.
Ons is Koningskinders en God het ons deur Sy Gees kom “nuut” maak. Kom ons wees gehoorsaam en gaan leef as Lig-mense met ‘n sprankelende passie en wees die verskil.
Die heerlkheid van gehoorsaamheid lê dikwels nie in die uitkoms nie, maar in die blote wéte dat jy getrou aan sy stem was. Want gehoorsaamheid bring ongekende vrede in die harte van God se kinders. Dit maak jou vry van jouself, van wêreldse bande, van aardse goed en van skuldgevoelens. Oombliklike gehoorsaamheid, gaan jou meer van God leer. Jy sal sommige bevele trouens nooit verstaan as jy hulle nie eers gehoorsaam nie.
“Maar bo alles, my broeders, moenie sweer nie: nie by die hemel nie, ook nie by die aarde nie en ook geen ander eed nie; maar laat julle ja ja wees en julle nee nee, sodat julle nie onder ‘n oordeel val nie.” [Jakobus 5:12]
Misleiding is gewoonlik teenwoordig as daar so gesweer word. So word die derde en die negende gebod oortree. Ons mag die Naam van die Here nie misbruik nie en ook nie valse getuienis aflê nie.
Christene se karakter en lewe moet so onbesproke wees dat hulle as mense van integriteit geken word. Hulle woord moet hul eer wees. Ja beteken doodgewoon ja en nee beteken nee. Daar word somtyds daarmee gesukkel. Die ou vertaling sê, wat meer is as dit, is van die duiwel.
Die vraag is uiteraard hoe mense ons ken. Stuur ons ‘n boodskap wat sê; ek bel jou later en dan word dit nie gedoen nie. Ek sal by jou ‘n draaitjie kom maak dan word dit ook nie gedoen nie. Dan is jou ja nie meer ja nie. As ‘n mens eenmaal geswig het voor die versoeking om ‘n leuen te vertel word dit al hou moeiliker om konsekwent die waarheid te praat. Wat nie waar is nie, is ‘n leuen.
Daar is nie neutrale grond nie. Ons buig die waarheid soms om by ons te pas.“Ek spreek die waarheid in Christus, ek lieg nie – my gewete getuig saam met my in die Heilige Gees- [Romeine 9:1]“Laat julle woord altyd aangenaam wees, met sout besprinkel, sodat julle kan weet hoe julle iedereen moet antwoord.” [Kolossense 4:6]
Gaan liewer op jou spoor terug en maak reg wat verkeerd is. Dit is ‘n ligter prys om te betaal as om te probeer om die leuen konsekwent te dien of te verdoesel.
A m e n
