26/03/2020
CORONA VIRUS – ILIZWI LENKUTHAZO
Thina, Luthando, Bhishopu weDayosisi yaseBhayi, siyabulisa kuye wonke ubani ngegama leNkosi yethu uYesu Krestu. Amen. Sithabatha elithuba lokuba senze lentethwana imfutshane ngalo olusuku lokuqala kwiintsuku ezimashumi mabini ananye zokuzivalela ezindlwini zethu, ngokomlomo nesicelo sika Mongameli welizwe loMzantsi Afrika. Oku kundicingisa ingoma ebifudula idume Kunene yongasekhoyo uSifiso Ncwane, Ükuba nguwe, Nkosi, KULUNGILE”.
Namhlanje ke siqala olohambo lweentsuku ezi 21, sihleli kumakhaya ethu, sizibekele bucala kwizihlobo, abamelwane nezizalwane. Lixesha lokuthi CWAKA phambi koThixo. Yiyo lento ndithe mandike ndijonge kancinane lentetho igqamileyo, ithethwa ngumntu wonke, amazwi athi, “Ngenani emagumbini enu bantu bam; ewe ngenani nizivalele kaloku nike nizifihle okomzuzwana nje, ide ithothe le ngqumbo yake”. (Isaya 26:20). Kwi Good News Edition ibhalwe ngoluhlobo, “Go into your houses, my people and shut the door behind you. Hide yourselves for a little while until God’s anger is over”.
Le yingoma (Chapter 26) yoloyiso ebhalwe ngu Isaya unyana kaAmotsi, owayenguMprofeti kaThixo ngexesha lookumkani abane bakwa Yuda. Ngale ncwadi, uIsaya uzama ukuphelisa ixhala, intandabuzo noloyiko abantu bakwaSirayeli ababenalo. Uyabaqinisekisa ukuba uThixo ukhona, uThixo unabo, yaye uThixo uthembekile. Ewe sonke ngelixesha sizibuza imibuzo engenampendulo. Sizibuza ukuba uphina uThixo, sizibuza ukuba kutheni esiyekelele nje. Kodwa eyona nto ithethwa nguIsaya, eyona nto esiyithethayo namhlanje yeyoba ukhona uThixo, yaye akho sifo, kungekho nanye into emoyisayo. Yena uthembakele.
Le ngoma isikhumbuza ukuba ngubani na uThixo. Ngenxa yokuqanjwa kwalengoma simelwe kukubeka lonke ithemba lethu kuThixo onguMnini nto zonke. Ngenxa yalengoma, maluphele uloyiko. Ngenxa yalengoma, mawahle amavalo, liphele ixhala, ukhona uThixo. Ngenani ke ngoko ezindlwini zenu, nizivalele okomzuzwana nje.
Licebo likaThixo eli kwisicelo sika Yobhi xa ecela ukusitheliswa nguThixo kwingqumbo yakhe, mve ecela kuThixo, “Akwaba ubungandigushayo kwelabafileyo, undisithelise ude ubuye umsindo wakho”., Yobhi 14:13. Onke amaKrestu, bonke abantu bakaThixo, bayamcela uThixo mbombo zone zehlabathi, ukuba uThixo abafihle ukuze basinde kwingqumbo kaThixo. Xa, ephendula eso sicelo uThixo, uthi, ngenani ezindlwini zenu nizivalele nizifihle okomzuzwana.
Yindlela uThixo asebenza ngayo, ukubavalela abantu bakhe xa eza kusindisa uluntu nehlabathi. Ithi Bhayibhile, akungena uNowa emkhombeni eno Shem, Ham no Yafete, nosapho lwakhe neento zonke eziphilileyo, “uYehova wamvalela ngaphakathi”. Gen 7:13 – 16. Kanti xa ezakukhulula uSirayeli eYiputa, ubuya uThixo athi……. “qabani imigubasi…..KE KUNI ZEKUNGAPHUMI MNTU EMNYANGO WENDLU YAKHE KUDE KUSE”. (Ex 12:22). Kubalulekile ukuzivalela ngaphakathi endlwini yakho ukuze usinde kwingqumbo kaThixo, yiva amadoda xa ecebisa uHagare, “hlanganisela kuwe endlwini, uyihlo, nonyoko nabanakwenu nendlu yonke kayihlo”. (Yosh. 2:18).
Masithobeleni ke umthetho owiswe nguRhulumente wethu, othi masizigcine ezindlwini ezintsuku zingamashumi amabini ananye. Kodwa, mve kakuhle uThixo ngomlomo ka Isaya, uthi iyakuba ngumzuzwa nje. Ngamanye amanzwi ayizoba lixesha elide, sizigcinile ngaphakathi ezindliwni zethu. IiCawa zivaliwe, kodwa ayizoba lixesha elide. Asikwazi kubangcwaba abantu bethu kakuhle okwakaloku nje, kodwa ayizoba lixesha elide. Asikwazi kundwendwela abo sibathandayo, kodwa izakuba lixeshana nje elifutshane. Abanye bethu abazokwazi ukuya emisebenzini, kodwa izakuba lixeshana nje elifutshane.
Ngumzuzwana! Zonke izinto ezisivisa kabuhlungu, zonke izinto ezimbi, iba zezomzuzwana. Qwalasela eziziqendwana:
“Ngokuba yinto yephanyazo umsindo wakhe”. (Ndumiso 30:5)
“Ndakushiya okwephanyazo elincinane”. (Isaya 54:7)
“Selilixesha elifutshane ize ningandiboni”. (Yohane 16:16)
“Kuba ndigqiba kwelithi iintlungu zelixesha lakalokunje, azinakulinganiswa nobuqaqawuli obo buzakutyhilwa”. (Roma 8:18)
“Kuba ubukhaphukhaphu bembandezelo yethu eyeyomzuzwana…”. ( 2 Korinte 4:17)
Nalapha kwesi sahluko sithetha ngaso, uthi koba lixeshana nje elifutshane. Eyona nto ibalulekileyo kukubeka lonke ithemba lethu kuThixo, kuphele amaxhala, kuphele uloyiko. Emva kokuzivalela lomzuzwana, uThixo uzakulihlangula ihlabathi, abantu bakhe mbombo zone zehlabathi, bovakalisa ubukhulu beenceba zakhe, athi umculi wasekhaya kwelaculo 23, “Yesu Langa lompefulo, Akumnyama xa ukhoyo”.
Ngoko ke hlalani nizivalele nisazi nje ukuba uThixo ukhona, uThixo unathi, uThixo usakusisindisa. Zigcineni eluthandweni lwakhe. Akwaba ningafumana ithuba lokuthandaza, nithandazele abo bafunyenwe sesisifo, ngakumbi uPapa wamaRoma nabo bonke abachaphazelekayo. Nithandazele abongi nabongikazi, nithandazele iingcali ukuze zifumane ichiza lesi sifo, nithandazele uMongameli weli lizwe noburhulumente balo. Ningasilibali nathi emithandazweni yenu. Qinani ke, nomelele nisazi nje ukuba uThixo akasicekisanga, uThixo uyasithanda, uThixo unathi. Amen
Masithandaze
Nkosi, senzele inceba………Krestu senzele inceba………Nkosi senzele inceba
Bawo wethu oseZulwini, Malingcwaliswe igama lako, Ubukumkani bakho mabufike, Intando yakho mayenziwe, Emhlabeni kwanje ngaseZulwini. Sipe namhlanje isonka sethu semihla ngemihla. Usixolele izono zethu, Njengokuba nathi sibaxolela abasonayo. Ungasingenisi ekuhendweni, Usisindise enkohlakalweni. Ngokuba ubukumkani bobako, namandla noZuko ngonaphakade. Amen.
Thixo, Somandla onenceba, ekuxomekeke kuwe ubomi nokuba kukufa: Sipe siyakubongoza uncedo nosindiso ngelixesha lesisifo se corona esihlungisayo nembubo, usingcwalisele thina esisibeto, ukuze sithi sikwimbandezelo ebuhlungu siziguqulele kuwe iintliziyo zethu, ngoYesu Krestu iNkosi yethu, ohleliyo elawula nawe noMoya oyiNgcwele. Amen.
Ubabalo lweNkosi yethu uYesu Krestu, notando lukaThixo nobudlelwane boMoya oyiNgcwele, malube nati sonke ngonaphakade. Amen.
