Hervormde Kerk Paarl

03/02/2026

1 Februarie: Ds AM (Andries) Nel (emeritus) verjaar vandag. Baie geluk! by NHKA | Sunday, 1 February, 2026 | Verjaarsdae | 0 comments

03/02/2026

Spore van Hoop
3 Februarie 2026

God se lig ontbloot én genees

Jesaja 66:2

Epifanie is die tyd waarin ons bely dat God Homself nie net aan die wêreld openbaar nie, maar ook aan ons harte. En soos met alle lig, het God se lig ’n dubbele werking: dit verlig én dit belig.

In die gelykenis van die Fariseër en die tollenaar sien ons dat die Fariseër vol selfvertroue in die lig staan. Hy meen dat wat hy sien, goed genoeg is. Die tollenaar, daarenteen, word deur die lig ontmasker. In die lig van Jesus sien hy elke swakheid en tekortkoming in sy lewe raak. Hy sien homself soos hy werklik is. Hy probeer nie wegsteek of regverdig nie. Hy bid net: “Wees my, sondaar, genadig.”

Epifanie leer ons dat ’n ware ontmoeting met God altyd selfkennis meebring. Wanneer God se lig oor ’n mens se lewe val, raak jou tekortkominge sigbaar. Dit is ongemaklik. Dit maak nederig. Maar dit is ook bevrydend. In Jesaja 66:2 word God se genade so beskryf: “Ek het alles gemaak en so het alles ontstaan, sê die Here. Ek slaan ag op die mens in nood, op dié een wat berou het oor sy sonde, wat ontsag het vir my woord.”

Die tollenaar se gebed herinner ons aan hierdie woorde wat eeue vooraf reeds deur God bekend gemaak is en in Jesus Christus aan ons bekragtig is. Eers wanneer ons erken dat ons niks verdien nie, kan ons werklik verstaan wat God se genade alles vir ons inhou. Epifanie wys vir ons ’n God wat nie wag dat ons eers reg is voordat Hy Hom openbaar nie. Hy kom juis na gebroke mense.

Maar hierdie eerlike selfkennis is nie ’n eindpunt nie. Dit is die sleutel wat ’n nuwe lewe ontsluit, Die ou sondige mens kan ons agterlaat en verander al meer na die beeld waartoe God ons geskape het. God se lig roep altyd tot verandering. Nie uit vrees nie, maar uit dankbaarheid.

In Epifanie word ons genooi om in God se lig te staan sonder maskers. Daarom probeer ons nie wegkruip soos Adam en Eva nie, maar ons wil bely: Here, ek sien nou. Ek sien wie ek is en ek sien wie U is.

Dankie, Here dat ek in die besef van my sonde en skuld kan weet dat U genade vir my genoeg is. Verander my hart en denke sodat U beeld al meer in my kan leef.
Amen

Ds Marius Bacon

03/02/2026

https://sh1.sendinblue.com/ai6vt3loxxpfe.html?t=1769863541034

Nuwe jaar nuwe geleenthede

13/02/2025

Agt jaar terug het hierdie blad begin. Ek het hom bietjie afgeskeep maar stof hom nou af en sal probeer om weer daagliks plasings te maak. Die Here het ons geseen om ook deur hierdie medium Sy woord te deel. Dankie vir julle ondersteuning. Deel komentaar as die blad vir jou oor die laaste 8 jaar iets beteken het. Jul deelname is vir my inspirend en ons het selfs vir Trevor in Griekeland wat ons volg. Groete en seen Andre Hanekom.🙏🤗🎉

13/02/2025

Spore van Hoop
11 Februarie 2025

Psalm 95:7 – As julle vandag maar na Hom wou luister

Daar is baie mense wat ‘n helpende hand nodig het, wat kameraadskap soek, of goeie raad. Jy kan ‘n geweldige verskil in hulle lewe maak.

Jy moet jou hart vir God oopstel en sensitief bly vir die Heilige Gees. Hy sal jou lei na die mense in nood.

As jy gewillig is om jou te laat lei, sal God jou bring na hulle wat Hy wil hê jy in liefde moet dien. Daarby sal die Heilige Gees die woorde in jou mond lê en aan jou die bekwaamheid gee om jou taak te verrig. So word jou lewe dinamies en sinvol.

Gebed: Staan my by, o Heilige Gees van God, sodat ek dié kan help wat my bediening nodig het. Here Jesus, hou u liefde brandend in my hart, want ek daar daarsonder u werk nie doen nie. Amen – Genade vir elke oomblik, Solly Ozrovech

Ds Chantelle Maree

06/08/2024

Spore van Hoop
6 Augustus 2024

Lees Genesis 37

Mens sou d**k dat ons in die Bybel die voorbeeld van volmaakte gesinne sou hê. In die geval van Jakob en sy seuns het ons eerder met die onvolmaakte gesin te doen. 'n Pa wat een seun voortrek bo die res. Elke kind weet hoe pynlik dit is as jy besef jou boetie of sussie is jou ouers se witbroodjie en jy nie.

Josef, die voorgetrekte is 'n klikbek wat slegte stories oor sy broers by hulle Pa aandra. Hy is ook aanmatigend en verwaand teenoor die res van die gesin.

Die broers is jaloers en agteraf. Hulle is leuenaars teenoor hulle Pa. Uiteindelik haatdraend en moorddadig teenoor hulle broer.

Dit is 'n verskriklik verpletterde Pa, totaal afwesige Ma's, arrogansie tussen broers en broedermoordenaars waarvan ons hier lees.

Maar God het 'n plan. Hy laat die ergste sonde, liefdeloosheid en verwaandheid ten goede meewerk. Deur geloof in God kom daar oorlewing, herstel, skuldbelydenis, vergifnis en 'n nuwe lewe.

In ons land en wêreld val huwelike en gesinne uitmekaar. Afguns, jaloesie, agteraf gekonkel, selfs openlike haatdraendheid kenmerk so baie huwelike en gesinne. Waar gesinne uitmekaar val, val die samelewing uitmekaar.

Dis nooit te laat om na die Here te keer nie. Hy het 'n plan. Hy maak harde harte sag, oortuig tot skuldbelydenis, maak vergifnis moontlik. En daar kom heling en nuwe lewe.

Mag God ons huwelike en gesinne genadig wees!

Dr Daan van Wyk (jr)

05/08/2024

Spore van Hoop
29 Julie 2024

“Die eerste gesin...”

Genesis 4:1-16

Die tragiese verhaal van die eerste gesin waarvan ons in die Bybel lees. Adam en Eva wat toegelaat het dat sonde deel van hulle lewe raak, is nou ouers en omdat sonde deel van hulle lewe is, is Adam en Eva nie volmaakte ouers nie.

Ons sien die tragiese uitwerking wat die sondeval tussen broers gebring het. Ons sien hoe onvolmaak die skuldige mens hom tot God wend. Maar soos `n goue draad deur hierdie verhaal is God wat die volmaakte Ouer is ten spyte van hierdie tragiese gebeure.

Ons lees net van Adam en Eva as ouers aan die begin van die verhaal waar Eva geboorte gegee het aan die seuns. Maar verder in die verhaal word hierdie afwesige ouers nie eens genoem nie. God tree die hele tyd in as die volmaakte ouer wat probeer beredder waar Adam en Eva deur die jare verbrou het.

Hierdie is `n verhaal vir ons as ouers om te moet hoor, want dit roep ons op: Wees betrokke in jou kind se lewe met onvoorwaardelike liefde. Volg die voorbeeld van Godself in hierdie verhaal wat deur die hoogte- en laagtepunte hulle ondersteun. Selfs die bittere seer oomblikke daar vir jou kind te wees – maak nie saak wat nie: “My kind bly my kind”. Want as ons nie ons plig as ouers nakom wat ons eens voor God gemaak het dat ons ons kinders in die weë van die Here sal grootmaak nie, dan gaan die wêreld daarbuite dit doen – `n wêreld waar die sonde “hurk by die deur” en wag vir sy prooi.

En dan `n verdere oproep vir elkeen: “Ons moet mekaar liefhê” – of dit nou ons fisiese gesin is, of ons geestelike gesin is. Moenie toelaat dat afguns en rusie en verdeeldheid deel van die gesin raak nie. Moenie toelaat dat slegte gevoelens so opwel binne jou en dit loslaat oor jou suster en broer nie. Ons het gesien watter seer dit kan bring in dié verhaal – fisies en emosioneel.

Kom ons volg die voorbeeld van God in hierdie verhaal. God, die volmaakte ouer. God, die Een wat naby is wanneer ons verbrou. God, die Een wat jou nie verlaat nie. En bowenal, mag ons die genade van God in Jesus Christus in hierdie Ou Testamentiese gedeelte raaksien en ons eie maak. Ook ons loop vandag rond met `n teken deur God gegee: die teken van die kruis van ons genade.

Ds Rudi Janse van Rensburg
Swellendam

17/07/2024

Spore van Hooop
16 Julie 2024

Psalm 150

Halleluja! Loof God in sy heiligdom, loof Hom in sy magtige hemelkoepel; loof Hom oor sy kragtige dade, loof Hom na die omvang van sy grootheid! Loof Hom met die geskal van ramshorings, loof Hom met harp en lier; loof Hom met tamboeryn en koordans, loof Hom met snaarinstrument en fluit; loof Hom met die klank van simbale, loof Hom met die slag van simbale! Alles wat asem het, moet die Here loof! Halleluja!

Sing ons werklik halleluja? Nie ’n vlietende oomblik of ’n los gedagte nie – maar is ons ganse lewenstyl gekenmerk deur hierdie lofuiting aan God?

Prys ons God ten spyte van dinge wat skeefloop in ons lewe? Hierdie vraag word spesifiek aan ons wat deel uitmaak van die kerk, gevra. Psalm 150 begin by die volk van God as die digter sê: “Loof God in sy heiligdom.” Die heiligdom is die tempel van ouds, waar die volk van God bymekaar gekom het. Ons – die kerk van die Here Jesus Christus – kan God nog sinvoller as die digter van Psalm 150 loof. Vir ons is vers 2 ’n profetiese vers: loof Hom oor sy kragtige dade, loof Hom na die omvang van sy grootheid”. Want God het vir ons Sy seun Jesus Christus gegee as voorbeeld van iemand wat n hallelujah sing ten spyte van...

In die kerk moet ons so speel, so sing, so bly wees oor die evangelie en Christus wat ons verlos dat ons die wêreld aantrek. Dit moet wees soos metaal wat na ’n magneet aangetrek word. Ja, die kerk is ’n prysende gemeenskap en nooi so ander om mee te doen.

Lofprysing veroorsaak dat jou aandag op God gevestig is, om Hom met jou hele hart te prys, om jou dankbaarheid, jou bewondering vir sy goedheid en barmhartigheid te betuig.

Watter voorbeeld van lof is ons vir ons kinders? Sing jy ’n hallelujah ten spyte van...? As jy jou hallelujah sing, as jy jou sin en betekenis vind in jou lofprysing, dan sal jou kinders jou voorbeeld volg… en dan kan die wêreld aanklink vind by ons en ons kan getuig: Halleluja! Loof God in sy heiligdom, loof Hom in sy magtige hemelkoepel; loof Hom oor sy kragtige dade, loof Hom na die omvang van sy grootheid!... Alles wat asem het, moet die Here loof! Halleluja!

Ds Retha Losper

13/07/2024

Spore van Hoop
13 Julie 2024

Moet nie moed opgee nie

Ons gaan baie keer in ons lewens deur verskillende storms, sommige is groter as ander. Daar kom ‘n tyd in ons lewe wat ons voel ons kan net nie meer nie, ons wonder dan ook waar is die Here in alles.

Wanneer ons voel ons kan net nie meer nie, wanneer dinge op sy donkerste is, wanneer ons geen uitkoms meer sien nie, en op die grond gaan sit van moegheid, en wil opgee dan d**k ek aan Paulus in 2 Korintiërs 4:16-18.

Paulus kon dit regkry om self in die moeilikste omstandighede nooit moed op te gee nie, juis omdat hy die geheim geken het. Hy het geweet dat die aardse swaarkry verdra kan word omdat God se kinders die belofte het dat dit sal verby gaan en dat dit boonop vir hulle sal uitloop op ‘n heerlikheid wat vir altyd sal aanhou.

Ons moet onthou God is die hele tyd by ons. Hy is daar vir ons, maak nie saak deur watter storm ons gaan nie, God laat ons nie in die steek nie, en Hy omvou ons met Sy liefde.

Diaken Pieter Schreiber
ADV Vise-voorsitter

12/07/2024

Spore van Hoop
12 Julie 2024

Matteus 21:12-17

Jesus stap by die tempel in Jerusalem in en reinig die tempel van al die handelaars. Jesus maak dan die uitspraak “My huis sal ʼn plek van gebed wees, maar julle maak dit ʼn rowersnes.”

Die tempel van God, het vir mense soos die handelaars, plek van oneerlikheid geword. Geld en rykdom het belangriker geword as die voorreg om God in Sy Huis te aanbid. Selfsug en oneerlikheid het die plek van aanbidding ingeneem!

Jesus sê “My huis sal ʼn plek van gebed wees…”, dan wys Jesus na Jesaja 56:7. Hier sê God: “ook al die nie-Israeliete en alle volke wat hulle tot God bekeer, ook vir hulle sal die tempel van God ʼn plek van aanbidding wees.

Jesus reinig die tempel en herstel die tempel weer as ʼn plek van vreugde en aanbidding van God. In die ou tyd, mag die blinde, verlamde en kreupele volgens 2 Sameul 5:8 nie in die tempel gekom het nie.

Maar Jesus bring verandering en verwelkom alle bekeerlinge van alle volke, ook die kreupeles en die blindes in die tempel van God. Elke bekeerling kan die vreugde en hoop van aanbidding en oorwinning in Jesus ervaar.

Jesus wil hiermee ook vandag vir jou en my iets sê. Jesus bring verandering. Hy kom bevry en reinig elkeen wat in Hom glo. Jesus vra nie volmaaktheid van gelowiges nie. Jesus is Verlosser vir onvolmaakte mense, sondige mense, mense van alle volke, mense met gebreke, mense wat geoordeel is as onrein, mense wat deur ander gehaat word, elkeen wat wel glo in Jesus as Verlosser.

Jesus bring waarlik hoop vir elkeen wat in Hom glo as Verlosser!

Here dankie, U maak nie onderskeid tussen mense op grond van gebreke en tekortkominge nie. U is Verlosser van elkeen wat glo in Jesus. Amen

Ds Ferdie Nortje

09/07/2024

Spore van Hoop
9 Julie 2024

Wat ‘n wonder!

‘n Groep wetenskaplikes het besluit hulle het God nie meer nodig nie. “Ons kan self mense kloon en liggaamsdele maak, het hulle gesê.” God het toe gesê: “Goed, kom ons hou ‘n mens maak-kompetisie soos in die dae van Adam.” Die wetenskaplike het ingestem en afgebuk om vir homself ‘n handvol stof op te tel. God het geglimlag en gesê: “Nee, nee, kry jou eie stof.”

Ons aanbid ‘n wonderlike God wat die aarde en alles daarop en daarin gemaak het

Het jy geweet dat die aarde die enigste planeet is wat oor al die voordele vir lewe beskik? Ons planeet is in, die “Gouelokkie-sone”. Die naam kom van die verhaal Die _Drie Beertjies_ . Gouelokkies ignoreer die twee bakkies pap wat te groot, te klein, te warm of te koud is en kies die een wat "net reg" is. Nou die feit dat die aarde in die Gouelokkie-sone is, beteken dat dit presies ver genoeg van die son is, om nie te warm te wees en nie te koud te wees nie.

As die aarde een graad nader was aan die son, sou ons verkool het en as ons een graad verder weg was, sou ons gevries het. As die aarde se kors enigsins dikker was, sou dit te veel van ons suurstof absorbeer en sou ons nie kon asemhaal nie.

So sou ek kon aan en aangaan oor die uniekheid van die planeet wat God spesiaal net vir ons gemaak het, om op te pas en te geniet.

Wanneer laas het jy jou so “verloor” in God se natuur dat jy Hom so naby aan jou kon voel en ervaar? Wanneer laas het jy gaan stilstaan, diep asem gehaal, afgebuk en aan ‘n roos geruik? Of met ‘n koppie koffie gesit en gekyk wat se voëltjies baljaar in jou tuin? Wanneer laas het jy jou verkyk aan die reëndruppels op ‘n spinnerak? Wanneer laas het jy jou verlekker in die glimlag van ‘n kind?

Ons is so bederf met God se skepping elke dag reg rondom ons. Kom ons verwonder ons elke dag aan iets spesiaal wat die Here spesiaal vir ons gegee het om te geniet.

Ds Janine Bevolo-Manders

08/07/2024

https://sh1.sendinblue.com/aeg1afloxxpfe.html?t=1719425265574

Nege en negentig persent van die Ringsvergaderings is nou afgehandel. Om ongeveer 'n derde van die Ringsvergaderings te kon bywoon, bly 'n voorreg en genade.