25/12/2022
Kersboodskap
In die naaktheid van Sy pyn; gegesel, verbrysel en vervloek aan die kruis, op Hoofskedelplek, sien ek die Ster van Bethlehem.
In die ongemak, pyn en al die asyn, hoor ek 'n onseker klop aan 'n deur van 'n stal en vergader daar, uit die Ooste van wysheid, hulle wat van Hom in die hemelruim bespied het deur te ontsyfer wat die sterre, in hul opgewondenheid, nie kon versteek nie.
Hulle, van ander oortuiging, bring geskenke van goud en wierook en mirre.
Later, in desperate weemoed, terwyl Hy vra: Abba, hoekom is U weg, hoor ek klinkhelder Abba aan Sy herders basuin: Vrede op aarde en in die mense 'n welbehae!
Helaas, toe Hy Sy gees gee, is Hy in daardie grys oomblik onbewus van Hemelwesens wat in afgryse toekyk maar tog soos een man roep: Raadsman, Sterke God, Ewige Vader, Vredevors!
En vanoggend sing dit in my hart, want ek weet my versekering lê in die heerskappy van hierdie wêreld, wat op Sy skouers rus en aan Hom toevertrou is.
Hierdie Immanuel; my Jesus.
Juig, want ons herdenk 'n Redder wat in ander gestalte gestuur is om in Bethlehem van Juda die eerste lig te sien.
Vier fees en wees vrolik want ons gebruik vandag as 'n herdenkdag van dit wat ons Kersfees noem.
Glimlag, in Sy nederigheid, en hou partytjie want die ganse wêreld moet weet 'n Verlosser is gebore en dat Hy tot in ewigheid leef!
Gaan groot, want God het groot gegaan!
Mag hierdie Kersdag vrede vir jou bring.
Mag hierdie oomblik, in sy grootsheid, jou tot seën wees, terwyl ons hande vat, selfs met vreemdes, en opreg uit dankbare harte wat lewe, sê: Geseënde Kersfees!
