Hervormde Kerk Meyerton

Hervormde Kerk Meyerton Om mense na Jesus te bring. 'n Ware geestelike tuiste vir oud en jonk met' n hart vir barmhartigheid en om die hoop in die gemeenskap te wees.

07/09/2026

Spore van Hoop
7 September 2026

Ons paaie het ‘n invloed

Ter nagedagtenis aan Wendell Berry (1934-2026)

Levitikus 25:1-7

Een van my heel gunsteling skrywers, Wendell Berry, is op 31 Augustus 2026 op 92-jarige ouderdom oorlede. Berry was bekend vir sy produktiewe skryfwerk, sy besonderse Sabbatsgedigte en sy diep nadenke oor rus, die skepping en ons verhouding daarmee. Berry was oorspronklik ’n joernalis in die besige New York, maar het uiteindelik die gejaag van die stad verruil vir die platteland van Kentucky. Elke Sondag het hy op sy plaas gaan stap. Daar, in die stilte van die natuur, het hy naged**k oor die betekenis van rus en die manier waarop ons met die skepping omgaan.

Een van sy treffendste beelde is dié van ’n teerpad en ’n voetpad. ’n Teerpad is ’n kunsmatige pad. Dit word bo-oor die skepping gelê. Heuwels word platgeslaan en landskappe verander om die pad so reguit en vinnig moontlik te maak. Op ’n teerpad gaan dit immers oor spoed – om so vinnig as moontlik by die bestemming uit te kom. ’n Voetpad is anders. ’n Voetpad respekteer die landskap. Dit beweeg oor die heuwel eerder as om die heuwel af te breek. Jy kry ook die kans om die skepping raak te sien en te waardeur, aangesien jy stadig deur die lewe beweeg op ʼn voetpad.

Iets hiervan hoor ons reeds in Levitikus 25:1–7. Israel word beveel om elke sewende jaar die land te laat rus. Nie net die land nie, maar ook die mense en diere wat daarvan afhanklik is. Waarom? Omdat hulle telkens daaraan herinner moes word dat hulle waarde nie lê in wat hulle produseer nie. Hulle waarde lê ook nie in hulle vermoë om te produseer nie. Hulle waarde lê in die Skepper wat hulle gemaak het en hulle liefhet.

Miskien is dit die vraag wat vandag voor ons lê: Is ek ’n teerpad-mens of ’n voetpad-mens? Sien ek die skepping bloot as iets waaruit ek kan voordeel trek? Of sien ek dit as iets wat aan my toevertrou is deur die Skepper? Mag ons leer om stadiger te leef. Mag ons elke tree met groter respek gee. Mag ons onthou: wanneer ons deur God se skepping beweeg, is ons nie op ’n teerpad waar alles vir ons moet wyk nie. Ons loop op ’n voetpad – ’n pad waarop ons met verwondering, respek en liefde behoort te wandel.

Ds Steve Oxton

03/09/2026

Spore van Hoop
3 September 2026

Glo jy?

Ja ons glo en bely elke Sondag in die Erediens "Ek Glo..."

In moeilike omstandighede, hopelose situasies en waar ek menslik nie meer kan nie. Onthou die volgende Skriflesing, Broers en Susters: Sef. 3:17 - “Die Here jou God is by jou, ’n held wat verlos. Hy juig oor jou met gejubel.”

Ons die lesers, gelowiges moet ten diepste glo, gee oor aan die Here. Alles begin by God. Soek in God jou Sterkte. Kry by Hom jou krag. Die Bybel is die enigste Bron wat ware betekenis in ons lewens gee.

Die Ou Testament = Belofte / Profesie
Die Nuwe Testament = Vervulling van Profesie.

Jesus Christus, die Woord, het mens geword en onder ons kom woon. In die Evangelies leer ons van vergifnis en liefde vir mekaar.

God is Skepper – Uit Hom en deur Hom het alles bestaan.
Jesus is Verlosser – Weg, waarheid en lewe
Heilige Gees is Spesiale Vriend – Help ons om te groei in ons Geloof

Jesus is gehoorsaam aan die Vader. Ons word vrygekoop. Ons word nuut gemaak deur Jesus Christus.

By U Vader, loop my beker oor
Op U Here, sal ek vertrou.
Net U Here kan lewe bring.
By U Here kan ek eerlik wees.
Op U Here is my oe gerig
Net U Here kan nuwe lewe bring.

Hier is ek, Here, gebroke in myself.
Here, hier is ek, luister na my hart.

U maak weer heel wat sonde hier gebreek het.
U bring weer hoop en redding ook vir my.

Here, ek besef weer vanoggend U sorg vir klein, vir groot, vir alles, en dag na dag sorg U ook vir my, U kind.

Amen.

Ds Tiaan Loedolff

02/09/2026

Spore van Hoop
2 September 2026

1 Konings 3:2-28

Wanneer ‘n mens voor ‘n keuse gestel word, is jy vry om te kies wat jy wil. Selfs wanneer jy besluit om nié ‘n keuse te maak nie, het jy gekies om nie te kies nie.

So lyk elke dag van ons lewens – gevul met keuses. Wanneer ons kies, of wanneer ons kies om nie te kies nie, dan meen ons dat dit wat ons gekies het die beste is. Soms dan besef jy later dat jy die verkeerde keuse gemaak het, of dalk ‘n fout gemaak het om nie te kies nie. Sommige verkeerde keuses kan jy regmaak, en met ander se gevolge moet jy die res van jou lewe mee saamleef.

Salomo slaap die aand oor by Gibeon omdat hy daar gaan offer het. Daardie nag vind daar in ‘n droom ‘n ontmoeting plaas tussen hom en God. God vra vir Salomo: “Wat wil jy hê moet Ek vir jou gee?” Salomo kan enige iets kies. Hy gee nie die eerste gedagte wat by hom opkom as antwoord nie. Hy d**k eers goed daaroor na.

Salomo besef dat hy die volk se politieke maar ook godsdienstige leier is. Hy moet die volk ook deur sy voorbeeld lei om te leef soos wat God dit van sy kinders verwag. Salomo vra dan van God om aan hom gehoorsaamheid te gee sodat hy nie vir God teleurstel in die uitvoering van sy roeping nie.

God gee vir Salomo wat hy vra en nou word dit nie meer beskryf as gehoorsaamheid nie, maar eerder as insig in wat reg is en wysheid. Wysheid beteken om gehoorsaam aan God te leef en te doen wat Hy van jou vra.

As die Here vir jou sou vra wat Hy vir Salomo gevra het, wat sal jou maatstaf wees wanneer jy antwoord – sal jy eers d**k aan dit waarby jy kan baat of sal jy eerder iets vra waarby die koninkryk van God kan baat sodat jy kan troos waar daar hartseer is, help waar daar nood is, en God se liefde gaan wys vir die wêreld?

Leef gehoorsaam aan God. Dít is wysheid!

Dr Robert Jones

01/09/2026

Spore van Hoop
1 September 2026

Met lentedag gryp die loflied en gebed van Ina Rosseau my elke jaar aan:

Ons Vader, alles in die lewe
het deur u wil tot stand gekom.
U Gees het oor die vloed geswewe
die aarde is U eiendom.
U't lig geskep naas duisternis,
naas nag 'n dag wat helder is.

Met see en silwer waterstrome,
met dal, gebergte en rivier,
met stapelwolke, blomme, bome
het U u handewerk versier:
U't gras geskep, U is die bron
van elke ster, die maan, die son.

U hande skep die weerligstrale,
die donderwolk wat water dra:
U bring die storms oor velde en dale
en skenk die kalmte ook daarna.
U het die diere bly laat juig;
die reënboog teen die lug laat buig.

Ons dank U, Vader, vir u goedheid,
vir al wat ons van U ontvang:
die aardse lewe met sy soetheid,
maar ook die pynlikheid daarvan.
Ons loof U vir heerlik is,
selfs in ons smart en duisternis.

Gesang 459 (Liedboek vd Kerk)

Dr Daan van Wyk
Gemeente Van der Hoff

31/08/2026

Spore van Hoop
31 Augustus 2026

“Wanneer die linkerhand nie weet nie...”

Matteus 6:1-4

Dit is moontlik om die regte ding om die verkeerde rede te doen. ’n Mens kan gee, help en dien, maar diep in jou hart eintlik die bewondering van ander mense soek. Daarom waarsku Jesus: “Moenie julle godsdienstige pligte in die openbaar nakom om deur mense gesien te word nie.”

Daar is ’n belangrike verskil tussen goeie werke wat mense sien en God daarvoor verheerlik en goeie werke wat gedoen word sodat mense óns kan bewonder. Die verskil lê in die hart.

Jesus gebruik die beeld van die linkerhand wat nie moet weet wat die regterhand doen nie – natuurlik nie letterlik bedoel nie. Hy roep ons op tot barmhartigheid wat so natuurlik en opreg is dat ons nie eers onsself voortdurend daarvoor applous gee nie.

Ons leef vandag in ’n wêreld waarin dit maklik is om alles sigbaar te maak. Byna alles kan afgeneem, gedeel en geplaas word. Daarom bly Jesus se vraag dringend tot ons selfondersoek: Waarom wil ek hê mense moet sien wat ek doen?

Daar is egter ’n bevrydende waarheid in Jesus se woorde: “Jou Vader wat sien wat verborge is, sal jou beloon.” Daar is baie liefde en gehoorsaamheid wat nooit deur mense raakgesien word nie. Die stille hulp, die geduld, die vergifnis en die diens waarvan niemand weet nie, maar God sien...

Jy hoef dus nie altyd erkenning te kry nie. Jy hoef nie applous te ontvang om te weet dat jou goeie daad betekenis gehad het nie. Doen goed omdat jy liefhet. Help omdat iemand hulp nodig het. Dien omdat jy ’n kind van God is.

Wanneer mense nie sien nie, onthou: “...jou Vader sien wat verborge is.”

Ds Rudi Janse van Rensburg
Swellendam

Gebed vir die week - Geneem uit Blitspos 2026 08 27Here Jesus, vandag kom ekvoor U met ’n dankbare hart.U is waardig om ...
31/08/2026

Gebed vir die week - Geneem uit Blitspos 2026 08 27

Here Jesus, vandag kom ek
voor U met ’n dankbare hart.
U is waardig om geprys te word,
nou en vir ewig.
Vul my met u teenwoordigheid,
vernuwe my oë om U te sien,
En laat alles wat ek doen
tot eer van U wees.
Amen.

https://www.instagram.com/p/DbhZkvJjFzU/?hl=en

29/08/2026

Spore van Hoop
29 Augustus 2026

Lees: 1 Konings 18:41-46

God is die enigste God vir die volk. Die bose Koning Agab moet dit ook erken. Doen hy dit nie, is daar eintlik bloedweinig iets wat enigeen daaraan kan doen – behalwe God self. Kom Agab nie tot ander insigte, is die stryd teen afgodery eintlik verlore.

Die profeet Elia stuur Agab na die gebeure op Karmel weg om te gaan eet. Ons kan dit interpreteer as gasvryheid. Of, Elia wil hê dat Agab eerder weer sterk moet word. Hy moet sy kragte weer herwin. Dit is immers wat met Elia gebeur het met die kraaie (17:6) en die engel (19:5-8).

Agab moet kan voortgaan met sy werk. Maar dieselfde gesindheid is egter nie by Agab te bespeur nie. Versoening is nie prioriteit by hom nie. Agab se gesindheid is eerder om Elia te waarsku om van die berg af te kom, Elia moet te voet loop in plaas van om op die koninklike wa saam te ry. Die Here begeester Elia dat hy self die pad afhardloop. Van gesindheidsverandering by Agab is daar weinig sprake. Hy bly hardkoppig.

En nou bid Elia sewe maal. Sy slaaf word telkens gestuur om te sien of iets al gebeur het. Na die 7de keer het hy teruggekom met die nuus dat 'n wolkie so groots soos die hand van 'n man verskyn het. Daardie aand begin dit reën. Daar is einde aan ellende. Ja, God is inderdaad die enigste ware Verlosser. God alleen is in beheer. God alleen bring vrugbaarheid terug in die land. Sy grootheid ken geen perke.

U weet, God is inderdaad barmhartig. Ons leer dit vanuit die geskiedenis van die mensdom. Elke boer weet hoe mooi die klank van reën op die sinkdak van ‘n plaashuis is na ‘n lang droogte, selfs na die wintermaand. Dit is musiek in die boer se ore! Daar is weer vreugde in die gemoed. Selfs die lug ruik weer skoon. En dan die besef: reën is God se genade aan die wêreld wat aan Hom behoort.

Ja, die Here luister wel na ons gebede. En, hy verwag gehoorsaamheid van ons – anders as Agab. Ons kan nie net vir onsself omgee nie. Ons kan nie ons geloof net vir onsself hou nie. Wat die hart van vol is moet die mond van oorloop, volgens Matteus 12.

Elia is eerder ons voorbeeld. Die voorbeeld wat pas by die kind van die Here. Hy was iemand wat volhard het om te vertrou. Hy het nederig gebly. Hy het aanhou bid. Soos dit ‘n kind van God betaam.

GEBED: Here God, dankie vir U genade. Dankie dat U genade juis ook my insluit. Dankie vir U trou en liefde. Werk tog deur U Gees nou met elkeen van ons. Amen.

Ds Freddie Nortje

Die kerkraad en lidmate van die gemeente Meyerton betoon hiermee hulle innige meegevoel met die geliefdes, vriende en li...
29/08/2026

Die kerkraad en lidmate van die gemeente Meyerton betoon hiermee hulle innige meegevoel met die geliefdes, vriende en lidmate van ons suster gemeente, na die afsterwe van hulle leraar, Ds Hennie Louw.
Ons bid dat God elkeen van julle met Sy genade omvou en daarmee vertroosting en aanvaarding bring!



04/08/2026

Spore van Hoop
4 Augustus 2026

Wanneer die Augustus winde waai

Augustus bring koue, snydende winde. Dit herinner ons aan tye in die lewe wat ongemaklik en moeilik is, seisoene wat ons toets en soms selfs moedeloos maak. Tog is hierdie “winde” nie sonder doel nie.

Eerstens, die wind bring verandering. Net soos die natuur voorberei word vir ’n nuwe seisoen, gebruik God moeilike tye om ons te vorm. “Ons weet dat God alles ten goede laat meewerk…” Romeine 8:28. Jou uitdagings kan dus deel wees van God se groter plan.

Tweedens, die wind wys hoe sterk ons staan. ’n Boom met diep wortels bly staan al waai die stormwind. So ook moet ons geloof diep gewortel wees in God se Woord. Moeilike tye wys waar ons moet groei.

Derdens, die wind hou nie vir altyd aan nie. Seisoene verander. “Daar is ’n tyd vir alles…”Prediker 3:1. Wat jy nou beleef, is tydelik.

Laastens, die wind bring nuwe lewe. Soos die wind saad dra, bring God se Gees vernuwing en hoop in ons lewens.

Wanneer jy die “Augustus winde” voel, onthou: God is besig om te werk. Hou vas aan Hom, bly standvastig, en vertrou dat nuwe lewe op pad is.

Gebed:
Here, dankie dat U selfs in die koue en moeilike seisoene by my is. Help my om sterk te staan wanneer die winde waai. Gee my geloof wat diep gewortel is in U Woord. Ek vertrou dat U besig is om my te vorm en voor te berei vir nuwe lewe. Amen.

Diaken Pieter Schreiber

29/07/2026

Spore van Hoop
29 Julie 2026

God wag nie vir jou tot jou kalender leeg is nie

Lees: Lukas 14:18-20

"Ek het 'n stuk grond gekoop... Ek het vyf paar osse gekoop... Ek is pas getroud..." Al drie verskonings klink heeltemal verstaanbaar. Nie een van hierdie mense in Jesus se gelykenis was besig met verkeerde dinge nie. Hulle was gewoon besig met die lewe.

En juis daarin lê die gevaar.

Ons d**k dikwels dat dit groot verkeerde keuses is wat ons van God af wegtrek. Maar baie keer is dit eenvoudig 'n lewe wat té vol geraak het. Werk, gesin, verantwoordelikhede, sport, vergaderings en eindelose kennisgewings vul ons dae totdat daar skaars tyd oorbly om stil te word voor God.

Ons sê maklik: "Sodra hierdie besige tyd verby is, sal ek weer tyd maak vir die Here."

Maar die waarheid is dat die volgende besige seisoen gewoonlik reeds om die draai wag.

Jesus se gelykenis herinner ons daaraan dat God nie wag totdat ons kalender leeg is voordat Hy ons nooi nie. Sy uitnodiging kom juis te midde van die gejaag. Hy wag nie vir 'n rustiger week, 'n beter maand of 'n makliker jaar nie. Hy sê vandag: "Kom, want alles is nou gereed."

Die vraag is dus nie of ons tyd hét vir God nie. Die vraag is eerder of ons bereid is om tyd vir Hom te maak.

Wanneer Jesus sy regmatige plek in ons lewe inneem, verdwyn ons verantwoordelikhede nie. Inteendeel, Hy help ons om dit vanuit 'n nuwe perspektief te hanteer. Werk word aanbidding. Gesinstyd word 'n plek waar liefde groei. Rus word heilig. Selfs ons besigste dae kry 'n nuwe ritme wanneer Christus in die middel daarvan staan.

Moenie wag vir 'n leë kalender om naby God te leef nie. Daardie dag kom waarskynlik nooit. Begin vandag, al is dit met net vyf stil minute. God vra nie eerstens vir meer van jou tyd nie. Hy vra vir jou hart.

En wanneer Hy jou hart kry, begin Hy ook jou tyd herangskik.

Gebed: Here, wys my waar ek verskonings maak. Help my om U eerste in my lewe te stel. Amen.

Ds Stephen de Beer

Address

Corner Of Holliday And Reitz Streets
Meyerton
1961

Opening Hours

09:00 - 10:00

Website

Alerts

Be the first to know and let us send you an email when Hervormde Kerk Meyerton posts news and promotions. Your email address will not be used for any other purpose, and you can unsubscribe at any time.

Contact The Place Of Worship

Send a message to Hervormde Kerk Meyerton:

Shortcuts

Share

Category