Oasis Revival Centre/Oase Herlewing Sentrum

15/09/2026

Hartlike goeie môre!

Ek sit graag en hou mense dop, en dit lyk in baie gevalle of mense baie swaar dra aan die lewe. En ja, die lewe het baie uitdagings. Ons as kinders van die Here het wel ‘n groot voordeel in die sin dat ons die Heilige Gees in ons het, gevul met Sy krag en vrede.

Die Woord verklaar:

“Want die koninkryk van God is nie spys en drank nie, maar geregtigheid en vrede en blydskap in die Heilige Gees.”
Romeine 14:17 AFR53.

Ons dink soms dat God se seën hoofsaaklik gemeet word aan dit wat ons het, geld, besittings, gesondheid, sukses en gemak. Maar Paulus sê: God se Koninkryk gaan oor iets baie dieper.

Die Koninkryk van God word sigbaar in ons lewe deur geregtigheid, vrede en blydskap in die Heilige Gees.

GEREGTIGHEID: Ek staan reg voor God, nie omdat ek volmaak is nie, maar omdat Christus my geregtigheid geword het. Ek leef daarom anders, want ek behoort aan Hom.

VREDE: Dit beteken nie dat daar geen storms is nie. Dit beteken dat daar vrede binne-in my kan wees terwyl die storm rondom my woed. Jesus is steeds Here, selfs wanneer my omstandighede onseker is. My geloof en vertroue in Hom word openbaar wanneer die storms van die lewe kom, en jou “huis” bly staan, omdat jou huis gebou is op die rots.

BLYDSKAP: Christelike blydskap is nie bloot ’n emosie wat afhanklik is van goeie nuus nie. Dit is ’n werk van die Heilige Gees in ons. Ek kan deur ’n moeilike tyd gaan en steeds diep binne weet dat God is met my. God het my nie verlaat nie. My lewe is in Sy hand. Hy sal alles in my lewe neem en dit uitwerk tot Sy eer.

Ons jaag so maklik dinge na wat ons gelukkig moet maak. Maar ’n mens kan baie besit en geen vrede hê nie; of min besit en tog gevul wees met die vrede en blydskap van God. Jy kan in beide gevalle vrede hê wanneer jou hart en fokus reg gerig is.

Die Koninkryk gaan nie eerstens oor wat in jou hand is nie, maar oor Wie in jou hart regeer.

Wanneer die Heilige Gees jou lewe vul, begin die Koninkryk van God deur jou sigbaar word: jou woorde verander, jou houding verander, jou reaksies verander, jou verhoudings verander.

Vra jouself vandag:

Is daar geregtigheid in my wandel? Is daar vrede in my hart? Is daar blydskap in my gees?

Moenie vandag net méér van God se seëninge soek nie. Soek méér van God Self.

Die grootste bewys van die Koninkryk is nie wat ek besit, of nie besit nie, maar dat Christus in my regeer.

Mag Sy geregtigheid deur jou skyn soos ‘n sterk lig, mag die Heilige Gees se vrede jou lewe toevou, en mag die Heilige Gees se vreugde jou erfenis wees!

Groete, seënwense en liefde Wernich

14/09/2026

Goeie môre!!

Ek drink baie water elke dag, maklik so 3 liter per dag. Behalwe dat dit gesond is, het my radiator gereeld water nodig🤪

Jesus maak ‘n kragtige verklaring oor water:

“En op die laaste dag, die groot dag van die fees, het Jesus gestaan en uitgeroep en gesê: As iemand dors het, laat hom na My toe kom en drink! Hy wat in My glo, soos die Skrif sê: strome van lewende water sal uit sy binneste vloei.”
‭‭JOHANNES‬ ‭7‬:‭37‬-‭38‬ ‭AFR53‬‬.

Daar is ’n groot verskil tussen ’n dam en ’n rivier.

’n Dam ontvang water en hou dit. ’n Rivier ontvang water, en laat dit verder vloei.

Jesus het ons nooit geroep om net ontvangers van Sy teenwoordigheid te wees nie. Hy wil hê dat dit wat Hy in ons doen, ook deur ons na ander sal vloei.

Jesus sê nie net dat ons ’n bietjie water sal ontvang nie. Hy sê:

“STROME van lewende water sal uit sy binneste vloei.”

Dit praat van die werking van die Heilige Gees in en deur ons.

Waar mense droog is, kan jy hoop bring. Waar mense seergekry het, kan jy liefde bring. Waar daar vrees is, kan jy geloof bring. Waar daar duisternis is, kan jy Jesus se lig bring. Waar mense geestelik dors is, kan die teenwoordigheid van God deur jou lewe vloei.

Maar hier is die geheim: Jy kan nie uitstroom as jy nie eers by Jesus kom drink nie.

Jesus sê: “As iemand dors het, laat hom na MY toe kom en drink.”

Ons probeer soms uit ’n leë hart bedien, liefhê, vergewe en sterk wees. Maar Jesus nooi ons terug na die Bron.

Kom drink weer van Sy Woord. Kom drink weer in gebed. Kom drink weer in aanbidding. Kom sit weer in Sy teenwoordigheid.

En wanneer Hy jou vul, moenie die water probeer opgaar nie, laat dit vloei!

Iemand wat vandag oor jou pad kom, het dalk presies nodig wat God reeds in jou geplaas het.

Mag die Here ons lewens nie net ’n reservoir nie, maar ’n rivier van Sy teenwoordigheid en lewende water.

Groete, seënwense en liefde Wernich

13/09/2026

13/09/2026

Wie wil jy hê moet jou doodmaak,
God of die duiwel?
Deur Ps.Wernich Swart

11/09/2026

Goeie môre, geliefdes van God.

Vandag se Woord skryf ek vanuit my eie ondervinding en erkenning van my tekortkominge.

Ons almal ervaar emosies soos woede, vrede, vreugde, moedeloosheid, bekommernis en nog baie meer. Emosies is deel van ons menswees, maar die vraag is: Hoe hanteer ons ons emosies? Hanteer ons ons emosies, of hanteer ons emosies ons?

Jacobus 1:19-20

19 My liewe broers, dít moet julle in gedagte hou: elke mens moet maar te gewillig wees om te luister, nie te gou praat nie en nie te gou kwaad word nie. 20 'n Mens wat kwaad word, doen nie wat voor God reg is nie.

Hierdie Skrif leer ons dat ons nie sommer onmiddellik moet reageer wanneer ons emosies sterk raak nie. Ons moet leer om te stop voordat ons reageer.

Gebruik die STOP-metode:

S – STOP. Moenie dadelik praat of optree nie.
T – TREK asem in. Gee jouself ’n oomblik om rustig te word.
O – OORDINK. Vra jouself: “Wat sou Jesus wou hê moet ek nou doen?”
P – PRAAT of TREE OP. Reageer eers wanneer jy kalm is en deur die Woord gelei word.

Ons sien ook ’n voorbeeld hiervan in die Bybel. Moses het in woede op die rots geslaan, in plaas daarvan om God se opdrag te volg. Sy emosies het sy reaksie beïnvloed.

Daarom moet ons nie toelaat dat woede, vrees, bekommernis of seerkry ons laat besluite neem nie.

Kom ons neem eerder ons emosies na God toe en laat die Heilige Gees ons emosies en reaksies beheer.

Stop. Bid. Dink. Reageer.

Laat God jou emosies gebruik om jou nader aan Hom te trek, eerder as om jou van Hom en ander mense af weg te dryf.

Liefdevolle groete
Ps Lanie

10/09/2026

Good morning blessed children of God.

There are many purposes and aims people live for in life, but the best is to live for Christ.

Ephesians 6:7–8 AMPC says:
“Rendering service readily with goodwill, as to the Lord and not to men, Knowing that for whatever good anyone does, he will receive his reward from the Lord, whether he is slave or free.”

There are times when we give our best and nobody seems to notice. We serve, help, encourage, sacrifice and remain faithful, yet there is no thank you, no recognition and sometimes not even appreciation.

But Paul gives us a completely different perspective. He says that we should not do it for people, but rather do it for the Lord.

When your motivation is to please people, their reaction determines your joy. If they appreciate you, you feel encouraged. If they ignore you, you become discouraged.

But when you do it “as to the Lord,” everything changes.

Your workplace becomes a place of worship. Your serving becomes worship. Your generosity becomes worship.
Your faithfulness becomes worship. Even the small things nobody sees become an offering to God.

And here is the beautiful promise:

God sees what people overlook.

Paul says that whatever good anyone does, he will receive his reward from the Lord.

People may forget what you did. God doesn’t. People may never repay your kindness. God can.

People may never recognise your faithfulness. Heaven has already noticed it.

So today, whatever God places in your hands, do it wholeheartedly to the best of your ability. Don’t serve for applause. Don’t work only when someone is watching. Don’t allow another person’s lack of appreciation to steal the joy of doing good.

Your reward does not ultimately come from people, it comes from the Lord.

Do it for the Lord. People may not always notice your faithfulness, but God does, and He is your Rewarder.

DO EVERYTHING YOU DO, TO PUT A SMILE ON GOD’S FACE AND BRING HIM JOY!

God love you!!

Blessings and love Wernich

09/09/2026

Goeie môre geliefdes vd Here.

Dit is wonderlik dat Jesus ons in ‘n intieme verhouding met die Vader geplaas het. Dit is die belangrikste verhouding wat jy en ek kan hê.

Die Woord verklaar:
“En in daardie dag sal julle My niks vra nie. Voorwaar, voorwaar Ek sê vir julle, alles wat julle die Vader sal vra in my Naam, sal Hy julle gee. Tot nou toe het julle niks in my Naam gevra nie. Bid en julle sal ontvang, sodat julle blydskap volkome kan wees.”
Johannes 16:23–24 AFR53.

Wat ’n geweldige kragtige belofte wat Jesus hier aan ons gee: “Bid en julle sal ontvang.”

Jesus leer ons dat ons deur Hom toegang tot die Vader het. Ons hoef nie van ’n afstand af na God te roep en te wonder of Hy ons hoor nie. Ons kan na die Vader gaan in die Naam van Jesus.

Maar om “in Jesus se Naam” te bid, beteken meer as om net die woorde “in Jesus se Naam” aan die einde van ons gebed te sê.

Dit beteken dat ek na die Vader kom op grond van wie Jesus is, wat Hy vir my gedoen het, en in ooreenstemming met Sy wil en karakter.

Jesus sê:

“alles wat julle die Vader sal vra in my Naam, sal Hy julle gee.”

Daar is geloof in hierdie woorde! Ons gebed is nie bloot ’n godsdienstige ritueel nie. Gebed glo en verwag in geloof met hoop dat God kan antwoord.

Miskien dra jy vandag iets waarvoor jy al lank bid. Miskien is daar ’n deur wat moet oopgaan, ’n behoefte waarin voorsien moet word, ’n verhouding wat herstel moet word, wysheid wat jy nodig het, of ’n situasie wat menslik onmoontlik lyk.

Moenie ophou bid nie.

Jesus sê nie: Dink daaroor. Hy sê nie: Bekommer jou daaroor nie. Hy sê: BID!

En dan voeg Hy iets besonders by:

“…sodat julle blydskap volkome kan wees.”

Die Here wil hê dat ons die vreugde moet ervaar van ’n lewe waarin ons sien: My Vader hoor my. My Vader ken my. My Vader sorg vir my.

Ons antwoord is nie altyd presies soos ons dit verwag nie, en God se tyd is nie altyd ons tyd nie. Maar ons kan met vertroue bid omdat ons weet Wie ons Vader is.

Moenie vandag jou probleem groter maak as jou God nie. Vertel jou probleem hoe groot jou God is!

🙏 Vra.
🙏 Glo.
🙏 Vertrou.
🙏 Hou aan bid.

ONTHOU VANDAG:
Gebed verander nie net omstandighede nie, maar gebed bring jou in die teenwoordigheid van die Vader Wie die grootste prys ooit vir jou lewe betaal het, die lewe van Sy Enigste Seun.

Groete, seënwense en liefde, Wernich

08/09/2026

Hartlike goeie môre.

Dit is so ‘n groot voorreg om as kind van God deur ons Hemelse Vader gelief te wees.

Die Woord verklaar:

Romeine 5:1 AFR53: “Omdat ons dan uit die geloof geregverdig is, het ons vrede by God deur onse Here Jesus Christus.”

Daar is dae wat ek baie bewus is van my eie tekortkominge. Dae wanneer ek terugdink aan dinge wat ek anders moes gedoen het, woorde wat ek eerder moes teruggehou het, of oomblikke waarin ek eenvoudig die Here teleurgestel het. En dan is dit so maklik om te wonder: “Hoe kan God my nog liefhê en aanvaar?”

Miskien ken jy ook daardie gevoel.

Ons kyk so maklik na onsself en dink dat ons eers beter moet doen, harder moet probeer of geesteliker moet wees voordat ons met vrymoedigheid voor God kan staan. Maar vanoggend wil ek jou herinner aan iets wat my eie hart telkens weer tot rus bring:

My posisie voor God word nie bepaal deur hoe goed ek gister gevaar het nie, maar deur wat Jesus vir my aan die kruis gedoen het.

Dit is waar regverdiging so kosbaar word.

Regverdiging beteken nie dat God sê ons het nooit gesondig nie. Dit beteken dat God die skuldige sondaar, wat sy vertroue in Christus stel, regverdig verklaar op grond van wat Jesus gedoen het.

Ons staan dus nie reg voor God omdat ons goed genoeg geword het nie, maar omdat Jesus genoeg was.

Romeine 3:23–24 leer dat almal gesondig het, maar dat ons “sonder verdienste geregverdig word deur sy genade, deur die verlossing wat in Christus Jesus is.”

Dink daaraan: skuldig in onsself, maar regverdig verklaar in Christus. Veroordeel deur sonde, maar vrygespreek deur genade, nie deur prestasie nie, maar deur geloof.

Die kruis het nie gemaak asof ons skuld nie bestaan nie. Jesus het ons skuld werklik gedra.

2 Korinthiërs 5:21 sê:

“Want Hy het Hom wat geen sonde geken het nie, sonde vir ons gemaak, sodat ons kan word geregtigheid van God in Hom.”

Dit verander hoe ek vandag leef. Ek hoef nie elke oggend te probeer om God se aanvaarding te verdien nie. Ek begin my dag vanuit die waarheid dat ek in Christus aanvaar is.

Wanneer die duiwel jou verlede voor jou kom neersit, wys jy hom na die kruis. Wanneer skuldgevoel jou vertel: “Jy is nie goed genoeg nie,” antwoord die Evangelie: “Jesus is genoeg.”

Regverdiging beteken egter nie dat sonde nou onbelangrik is nie. Inteendeel! Omdat ek geregverdig is, begin die Heilige Gees my heilig en ek begeer om die Here deur my woorde en dade te verheerlik. Regverdiging verander my posisie voor God; heiligmaking verander al hoe meer my lewe voor mense.

Jy leef nie reg om geregverdig te word nie; jy leef reg omdat jy deur geloof in Christus geregverdig is.

Ek probeer nie om God se aanvaarding te verdien nie. In Christus is ek geregverdig, daarom leef ek vandag uit genade, vrede en dankbaarheid.

Mag die Here vanmôre oor jou lewe glimlag en jou seën!

Groete, seënwense en liefde Wernich