Hervormde Kerk Louis Trichardt & Zoutpansberg

Hervormde Kerk Louis Trichardt & Zoutpansberg Welkom! Ons is die Hervormde Kerk van Louis Trichardt & Zoutpansberg.

As gemeente van ons Here Jesus Christus, is dit vir ons belangrik om in erns en geloof die Woord van God na te streef, soos wat Hy dit aan ons openbaar het.

10/09/2026

Donderdag

Teksgedeelte: Genesis 11:1-9

Tema: Van Babel tot die Nuwe Jerusalem

Wanneer ons die verhaal van die toring van Babel lees, klink dit aanvanklik amper asof die mens in sy taak sal slaag, om ‘n toring te bou wat tot in die hemel sal reik.

Maar dan verander die toneel skielik.

Ons aandag word weggevat van die toring en gerig op God. Hierdeur sien ons hoe klein die mag van die mens werklik is. Terwyl die mense onder op die aarde sekerlik met groot trots na hulle bouwerk gekyk het, lees ons in vers 5, “Die Here het afgekom om te kyk na die stad en die toring wat die mense vir hulle gebou het.”

In hierdie woorde is daar ‘n bietjie humor. Die mens dink hy bou iets besonders, wat tot in die hemel reik. Maar vir God is dit so klein dat Hy moet "afdaal" om dit behoorlik te bekyk. Vir die mens is hulle handewerk, die toring indrukwekkend, vir God is dit nietig.

Dan sien ons God tree op teen die mens, nie oor dat God bang is die mens word te magtig, of vrees die mens sal soos Hy word nie. Nee, God tree op oor dat Hy genadig is.

Dit klink snaaks – Hy straf, tog is dit genade. Hy jaag die mens wat teen hom rebelleer uit mekaar, juis om te verseker dat hulle nie dieper in rebellie teen Hom sal verval nie. Daarom verwar Hy hulle tale en sorg dat hulle verstrooi word oor die aarde, vers 9. So stuit die Here die mens in hulle sonde, en verseker God dat sy wil geskied. Daarom, wanneer God die mense in Genesis 11 oor die aarde verstrooi, is dit ‘n oordeel, maar terselfde tyd ook genade.

Dit is belangrik om te besef dat die verhaal nie hier stop nie. Want, sien wanneer God die mense in verskillende tale laat spreek en hulle so oor die wêreld heen verjaag, is Hy alreeds besig om sy groter plan, van ons redding en verlossing, uit te voer.

- Volle preek nou beskikbaar op ons Youtube kanaal. https://www.youtube.com/watch?v=Df8pLsFKfs0&t=46s

09/09/2026

Woensdag

Teksgedeelte: Genesis 11:1-9

Tema: Van Babel tot die Nuwe Jerusalem

As ons vir ‘n oomblik terug dink aan Genesis 1-10, dan sien ons dat God se opdrag aan die mense, baie eenvoudig is. In Genesis 1:28 sê God vir die mens: wees vrugbaar, vermeerder en vul die aarde. Hierdie oorspronklike opdrag van God, verval en verander nie oor tyd nie. Ná die sondvloed herhaal God hierdie dieselfde opdrag aan Noag en sy nageslag.

Maar hier, met die toring van Babel in Genesis 11, antwoord die mens as't ware en sê: "Nee Here, ons sal self besluit waar ons woon. Ons sal self besluit wat ons wil doen. Ons sal self besluit wat reg en verkeerd is.” Dít is die wese van sonde. Sonde begin nie by die daad nie. Sonde begin wanneer die mens sê: "Ek sal self besluit wat reg en aanvaarbaar is, ongeag wat God sê.”

Dit is dan natuurlik presies wat alreeds in die tuin van Eden gebeur het. Die slang belowe vir Eva: "Julle sal soos God wees," Genesis 3:5. So luister Eva na die slang en eet van die vrug. Vandag nog begeer die mens om soos God te wees.

Ons sien dit ook baie duidelik by Babel. Die mens het geen wens om aan God gehoorsaam te wees of Hom te verheerlik nie. Hulle sê eerder: "Laat ons vir onsself 'n naam maak."

En daarom is Babel nie bloot 'n verhaal oor 'n toring nie. Dit is 'n spieël waarin ons die toestand van die mens sien, as gevolg van die sondeval. Ons sien alreeds in Genesis 11:1-9, dat die wortel van alle sonde, rebellie teen God en sy opdragte is.

Alleen as gevolg van hulle sonde, besluit God dan om die mense van Babel se tale te verwar en hulle oor die aarde te versprei. Dit is God se straf, sy oordeel oor die mense van Babel se sonde. Maar, dit is ook terselfdetyd God se genade oor sy kinders.

- Volle preek nou beskikbaar op ons Youtube kanaal. https://www.youtube.com/watch?v=Df8pLsFKfs0&t=40s

08/09/2026

Dinsdag

Teksgedeelte: Genesis 11:1-9

Tema: Van Babel tot die Nuwe Jerusalem

Wanneer ons die verhaal oor die toring van Babel in Genesis 11 lees, sien ons dat dit nie in die eerste plek gaan oor 'n toring en die bou daarvan nie. Dit gaan oor die mens wat besluit het dat hy nie vir God nodig het nie.

En daarom sien ons dat die mens wie die toring bou sê in vers 4, “Kom ons bou vir ons 'n stad met 'n toring waarvan die punt tot in die hemel reik en ons maak so vir ons 'n naam. Dan sal ons nie oor die hele aarde versprei nie.”

Hier moet ons mooi onthou wat die opdrag van die Here regdeur Genesis 1-10 was. God het die mens geskep om Hom te verheerlik; om as sy verteenwoordigers na die wêreld om te sien.

Met die toring van Babel probeer die mense presies die teenoorgestelde doen; hulle wil nie gehoorsaam wees aan God nie – hulle wil hulle eie naam verheerlik.

As ons eerlik is, ontbloot die mense se optrede in Genesis 11, iets van die hart van elke mens, of jy nou gelowig of ongelowig is. Sedert die sondeval in Genesis 3, probeer die mens sy eie naam verheerlik. Die mens wil onafhanklik wees. Die mens wil self besluit wat reg en verkeerd is. Die sondeval het veroorsaak dat die mens konstant van God af wegtrek om onafhanklik van God te funksioneer.

As gevolg van die sondeval, trap ons as gelowiges ook in hierdie g*t. Daarom moet ons baie versigtig wees om nie na Babel te kyk asof ons na van klomp mense lees wat heeltemal anders as ons was nie. Dit is nie waar nie. Die mense in Genesis 11:1-9, is nie primitief en onbeskaafd nie.
Inteendeel. Hulle was intelligent. Hulle was georganiseerd. Vers 3 sê: “Hulle het op 'n keer vir mekaar gesê: “Kom ons maak stene en ons brand hulle hard.” Hulle het toe stene in plaas van klip gebruik en asfalt in plaas van klei.”

Hier moet ons versigtig wees. Die sonde van Babel was nie dat mense slim was nie. Dit was nie dat hulle gebou het nie. Die probleem lê eerder in die woorde in vers 4. Die mens wou: ‘n Toring bou tot in die Hemel. Hulle wou vir hulself ‘n naam maak, eerder as om God se Naam te verheerlik. En hulle wou nie versprei oor die aarde en so gehoorsaam wees aan God se bevel nie.

Dit wat die mense in Babel gedoen het, was doelbewuste opstand teen God. Dít was die probleem. Dit was die sonde.

- Volle preek nou beskikbaar op ons Youtube kanaal. https://www.youtube.com/watch?v=Df8pLsFKfs0&t=27s

07/09/2026

Maandag

Teksgedeelte: Genesis 11:1-9

Tema: Van Babel tot die Nuwe Jerusalem

Daar is iets besonders aan 'n spieël. 'n Spieël vertel vir jou die waarheid oor jouself. Jy kan dalk voor die spieël staan en wens dat jou hare anders moet lyk. Jy kan wens jy lyk 'n bietjie jonger of ouer. Jy kan selfs besluit om die spieël te vermy, omdat jy nie hou van wat jy daarin sien nie.

Maar die spieël verander niks nie. ‘n Spieël wys nie vir jou wat jy graag wil sien nie. Dit wys net vir jou wat reeds daar is.

Baie keer wanneer ons die Bybel lees, vergeet ons dat die Bybel ook soos ‘n spieël werk. Ons is soms geneig om die Bybel te lees en dan te dink “Hoe kon die volk van God dit gedoen het?” Met ander woorde, ons dink “hulle het dit gedoen, maar as ek in hulle skoene was, sou ek nooit dit gedoen het nie.” Of ons dink, “Hoe kon die Jode in opstand teen Jesus gekom het, nadat Hy vir hulle gewys het wie Hy is.” Weereens, is ons eintlik besig om te sê “ek sou beslis nie in opstand teen Jesus gekom het as ek in daardie tyd geleef het nie.”

Wanneer ons ‘n bekende verhaal soos die toring van Babel in Genesis 11 lees, trap ons ook baie maklik in hierdie strik om te dink “kyk hoe sondig was hulle. Kyk hoe goddeloos was hulle. Ek sal nooit so opstandig wees nie.”

Die realiteit is egter, die toring van Babel is eintlik nie net 'n verhaal oor hulle nie. Dit is 'n verhaal wat 'n spieël voor elkeen van ons kom hou en vir ons kom wys: ons is ook maar baie keer net so sondig soos hulle. Ons tree ook maar baie keer net so goddeloos op soos hulle. Ons is baie keer ook maar net so opstandig teenoor God soos hulle. Daarom, omdat “ons” en “hulle” eintlik baie naby aan mekaar is, het ons ook die genade van ons Here nodig net soos hulle!

- Volle preek nou beskikbaar op ons YouTube kanaal. https://www.youtube.com/watch?v=Df8pLsFKfs0&t=7s

Gaan luister gerus na ons erediens vanoggend uit Genesis 11:1-9. Die tema vir die preek is "van Babel tot die Nuwe Jerus...
06/09/2026

Gaan luister gerus na ons erediens vanoggend uit Genesis 11:1-9. Die tema vir die preek is "van Babel tot die Nuwe Jerusalem."

Die preek is nou beskikbaar op ons Youtube kanaal by https://www.youtube.com/watch?v=Df8pLsFKfs0

28/08/2026

Vrydag

Teksgedeelte: Kolossense 2:6-14

Tema: Die nagmaal bevestig dat ons nou in Christus is

Kolosense 2:6-14 bring ons uiteindelik by die Nagmaal. Die nagmaal is die tafel waar ons opnuut ons afhanklikheid van Christus bely en waar ons weer in ons geloof versterk word om verder in Christus te bly leef.

Die Nagmaal het tog geen doel vir mense wat hulleself wil red nie. Die Nagmaal het slegs ’n doel vir mense wat in Christus bly leef en besef dat ons onsself nie kan red nie. Daarom is ons aansit by die tafel, uiteindelik ’n openbare belydenis van geloof, dat ons by Jesus se kruisiging en opstanding ingesluit is, en nou in Hom ’n nuwe lewe leef.

Elke keer wanneer jy die brood neem en eet, bely jy opnuut dat sy liggaam in jou plek en vir jou oortredinge gebreek is, en dat dit ’n voldoende offer was. Wanneer jy die wyn neem en drink, bely jy opnuut dat sy bloed in jou plek en vir jou oortredinge gevloei het, en dat dit ’n voldoende offer was.

Maar, hoor dan ook die waarskuwing, want indien ons nie in hierdie belydenis deel nie en steeds aan die tafel kom sit, sê Paulus in 1 Korintiërs 11: “Daarom, wie op onwaardige wyse die brood eet of uit die beker van die Here drink, sal skuldig wees teenoor die liggaam en die bloed van die Here. Maar laat elkeen homself ondersoek, en daarvolgens van die brood eet en uit die beker drink. Want die een wat eet en drink sonder om die liggaam van die Here daarin te onderskei, is besig om ’n oordeel oor homself te eet en te drink.”

In hierdie ernstige waarskuwing hoor ons weer ñ keer: ons kom nie na hierdie tafel omdat ons dink: “Ek is goed genoeg” nie, maar omdat ons bely “Christus is genoeg.” Ons kom nie omdat ons onsself kan red nie. Ons kom omdat Christus ons gered het. Ons kom nie om iets by sy volmaakte offer aan die kruis te voeg nie. Ons kom om in geloof herinner en versterk te word in wat Hy reeds vir ons gedoen het.

Slegs vir hierdie rede kom ons na die tafel van ons Here. Daarom ontvang ons die brood. Daarom drink ons uit die beker van danksegging. Daarom leef ons, “in Christus,” vers 6.

27/08/2026

Donderdag

Teksgedeelte: Kolossense 2:6-14

Tema: Die nagmaal bevestig dat ons nou in Christus is

Kolossense 2:6-14 bring ons uiteindelik by die vraag: Hoe kan ons, as gelowiges, so seker wees dat Christus genoeg was, om ons ten volle te red en te verlos?

Om hierdie vraag te beantwoord, moet ons teruggaan na die betekenis van die kruis. Ons sukkel baie keer om te begryp dat ons sondes vergewe is, spesifiek omdat ons nie daarvoor gestraf is nie.

Hier is dit belangrik om te besef, dat ons sonde is nie maar net afgeskryf is nie. God het nie maar net van ons sonde vergeet nie. Aan die kruis maak God nie asof sonde nie saak maak nie. Die kruis is juis waar God ons sonde straf- in sy Seun. Daarom roep Jesus aan die kruis uit: “My God, my God, waarom het U My verlaat?”

Aan die kruis gaan Christus nie net deur pyn nie. Hy dra ons oordeel. Hy dra die volle gewig van God se geregtigheid oor ons sonde. Daarom word ons in Kolossense 2, weereens deur Paulus opgeroep om as kinders van God, in hierdie oorwinning van Christus aan die kruis, te leef, omdat ons weet dat ons daarby ingesluit is.

Die vraag vir my en jou is: as Christus werklik die volle oordeel gedra het, wat probeer ek nog betaal? As Christus werklik aan die kruis gesê het: “Dit is volbring,” waarom leef ek nog asof my verlossing van my afhang? Waarom probeer ek nog vir God bewys dat ek genoeg is? Waarom probeer ek nog iets by Christus se werk byvoeg? Waarom probeer ek nog self die prys betaal vir my eie sonde?

Christus het dit alles klaar vir ons gedoen.

Presies dit is Paulus se boodskap: Jesus Christus wat ons aan die begin nodig gehad het, is die Een wat ons elke dag nodig het. Die genade wat ons van God ontvang het, is die genade waarin ons moet voortgaan. Die geloof waarmee ons vir Christus ontvang het, is die geloof waardeur ons in Hom moet bly leef, vers 6.

26/08/2026

Woensdag

Teksgedeelte: Kolossense 2:6-14

Tema: Die nagmaal bevestig dat ons nou in Christus is

In Kolossense 2:9 kom Paulus by die hart van sy argument. Hy sê “Want in Hom woon die hele volheid…” Paulus sê: In Christus is daar volheid; nie maar net gedeeltelike redding nie. Paulus sê nie: “Christus doen sy deel en nou moet jy die res doen” nie. Paulus sê: In Hom is daar volheid. Met ander woorde: alles wat nodig is vir lewe en verlossing, is reeds in Christus aan ons geskenk.

Omdat daar in Christus volheid is, vers 9, kan ons, vers 6, in Hom bly leef. Ons hoef nie buite Christus te gaan soek na dit wat ons kort nie. Ons hoef nie Christus te ontvang en daarna nog iets anders by te voeg om volledig voor God te wees nie. Nee, in Christus is daar volheid, daarom is Christus nie net die beginpunt van ons verlossing nie. Hy is ons hele verlossing.

Dink weer aan die motorsleutel: die motorsleutel was nie net nodig om die motor een keer aan te skakel nie. Net so, is Christus ook nie net die Een wat ons aan die begin van ons geloof nodig gehad het nie. Hy is die Een wie ons elke liewe dag nodig het. Die Een in wie ons hele lewe vasstaan.

In Christus sterf ons saam met Hom; ons is dood vir die sonde. In Christus staan ons saam met Hom op; ons is nou lewend vir Christus. In Christus word ons geregverdig (ons staan sonder enige skuld voor God.) En, in Christus word ons aangeneem as kinders van God.

Dit beteken, as gelowiges, hoef ons nie onsself heeltyd te bewys, te red, of aanvaarbaar vir God te maak nie. Want in Christus is die werk klaar.

Hierdie sekerheid wat aan ons geopenbaar word, is niks anders as ’n reuse bevryding, want nou rus my verlossing nie op iets wat ek nog eers moet doen of moet bewys nie. My redding, verlossing en vergewing van sondes, rus op Christus se werke alleen.

25/08/2026

Dinsdag

Teksgedeelte: Kolossense 2:6-14

Tema: Die nagmaal bevestig dat ons nou in Christus is

Die probleem waarmee die gemeente in Kolosse geworstel het, is die feit dat baie mense vir die gelowiges begin vertel het, “Ja, Christus het, maar nou moet julle nog self iets aanhou byvoeg.”

Dit is presies waarteen Paulus ons waarsku. Daarom skryf Paulus baie dringend, vers 8 “Pasop dat niemand julle meevoer deur 'n filosofie en leë bedrieëry, wat gegrond is op menslike tradisie en teorieë oor die kosmiese elemente, en nie op Christus nie.” Sodra ons begin dink en glo, dat Christus alleen nie genoeg is vir my redding, my verlossing en die vergewing van my sondes nie, begin ons wegbeweeg van die Evangelie, eerder as wat ons dan, vers 7 “in Hom gewortel is en in Hom opgebou en versterk word in die geloof.”

Die probleem wat bestaan wanneer ons dink en glo, Christus het en nou ek moet self die res doen, is dat die fokus stelselmatig begin wegskuif van Christus wat reeds aan die kruis het, na ek wat nou self verder alles moet...

Wanneer ons dit dink en glo, is dit asof ons die motorsleutel net wil gebruik om die motor aan te skakel, maar dan gooi ons die motorsleutel weg en probeer om self, op ons eie krag en wysheid, verder te ry.

Dit is egter nie wat God deur Paulus aan ons openbaar nie! Paulus skryf juis: “…leef so in Hom.” Wanneer Paulus sê “leef in Hom”, is hy besig om te sê: Staan vas in die geloof. Bly in Christus volhard.

24/08/2026

Maandag

Teksgedeelte: Kolossense 2:6-14

Tema: Die nagmaal bevestig dat ons nou in Christus is

As ons vir ‘n oomblik aan ‘n motorsleutel dink, weet ons waarvoor ’n motorsleutel gebruik word. Jy klim in jou motor. Jy sit die sleutel in. Jy draai die sleutel, en dan skakel die motor aan. Sonder die sleutel, sal die motor nie kan beweeg nie. Juis daarom kan jy nie in jou motor klim, die motor aanskakel met die sleutel en dan die sleutel uittrek en weggooi voordat jy verder ry nie. Nee. Jy het die motorsleutel nodig om die motor aan te skakel, en jy het die sleutel nodig wanneer jy verder ry.

Dieselfde is volgens Paulus waar vir ons as gelowiges. Ons kan nie dink dat ons die Here nodig het om ons sondes te vergewe en dan kan ons maar op ons eie verder probeer om onsself te red nie.

Paulus sê in vers 6: “Aangesien julle dus Christus Jesus die Here aangeneem het, bly leef in Hom.” Hoor wat Paulus sê: Soos julle begin het, moet julle aanhou leef.

Hoe het ons begin? Ons het, deur die Heilige Gees, vir Christus Jesus, die Here, aangeneem, vers 6. Paulus sê: nou moet ons op dieselfde manier bly voortgaan deur in Hom te bly leef.

Met ander woorde: Ons het nie met Christus begin om daarna van Hom af weg te beweeg nie. Ons het nie genade ontvang om later op julle eie krag verder te leef nie. Ons het nie Christus aan die begin nodig gehad en Hom daarna agtergelaat nie. Soos wat ons vir Christus aangeneem het, so moet ons in Hom bly leef.

Ons maak baie maklik die fout om te dink: “Die Here het my gered, nou moet ek self my redding aanhou verdien en behou deur my optrede; die Here het my vergewe, nou moet ek seker maak dat ek goed genoeg leef om daardie vergifnis te behou; Jesus het die deur oopgemaak na God, nou moet ek self sorg dat ek deur die deur bly.”

Maar Paulus sê: “Nee!” Ons kan nie nou maar dink en maak asof alles verder van my afhang nie! Jesus Christus wat ons aan die kruis reeds gered het, is dieselfde Christus in wie jy moet bly leef. Die genade wat ons van God ontvang het, is dieselfde genade waarin ons moet voortgaan. Die geloof waarmee ons vir Christus ontvang het, is dieselfde geloof waardeur ons in Hom moet bly volhard.

Daarom, vers 6 “…bly leef in Hom.”

Address

37 Stubbs Street
Louis Trichardt
0920

Opening Hours

Tuesday 09:00 - 14:00
Thursday 09:00 - 14:00
Sunday 08:30 - 11:00

Telephone

+27607324323

Website

Alerts

Be the first to know and let us send you an email when Hervormde Kerk Louis Trichardt & Zoutpansberg posts news and promotions. Your email address will not be used for any other purpose, and you can unsubscribe at any time.

Contact The Place Of Worship

Send a message to Hervormde Kerk Louis Trichardt & Zoutpansberg:

Shortcuts

Share

Category