08/05/2024
Uit vandeesweek se Blitspos
Jesus se hemelvaart
Nadat Hy dit gesê het, is Hy opgeneem terwyl hulle dit sien, en ’n wolk het Hom weggeneem, sodat hulle Hom nie langer kon sien nie. Terwyl Hy weggaan en hulle nog stip na die hemel kyk, het daar skielik twee mans in wit klere by hulle gestaan. Dié sê toe vir hulle: “Galileërs, waarom staan julle so na die hemel en kyk? Hierdie Jesus wat van julle af na die hemel toe opgeneem is, sal net so terugkom soos julle Hom na die hemel toe sien opgaan het.” (Handelinge 1: 9-11, AFR1983)
Die gebeure van die hemelvaart kan met die eenvoudige, bekende – alhoewel steeds gebrekkige – beeld van ’n aflosresies vergelyk word. Tydens Jesus se hemelvaart het Hy vir ons ’n aflosstokkie in die hand gegee. Jesus plaas ons Goddelike roeping, die verkondiging en die uitbouing van die koninkryk van God, in mense se hande. Hemelvaart, as voorloper vir Pinkster, is deels die ontstaansmoment van die kerk – dis hierdie moment waarin die kerk haar roeping ontvang. Dis ons hande waarin Jesus die aflosstokkie los, en nou moet ons daarmee hardloop.
Maar dalk leef iets van wat in die dissipels se harte geleef het op daardie dag, ook in ons harte. Daar staan hulle met die aflosstokkie in die hand en staar na die hemel, lank nadat Jesus uit hul sig verdwyn het – verward, oorweldig en stomgeslaan. Waarskynlik het hulle ’n horde vrae in hul gedagtes, ’n stuk twyfel en ’n gevoel van onbevoegdheid vir die resies wat voorlê.
Dalk voel jy ook onbevoeg vir die aflosstokkie wat Jesus hierdie Donderdag met sy hemelvaart in jou hand gaan plaas. Dalk d**k jy dat jy dit te maklik gaan laat val, of weet jy nie of jy dit reg gaan kan aangee nie, maar gelukkig weet God. God ken ons tekortkominge en foute en tog kies Hy steeds om die aflosstokkie in ons bewerige hande te plaas.
Gelukkig, anders as in ’n gewone aflos, laat Jesus ons nie aan ons eie genade oor nie. Hy los verantwoordelikheid in ons hande, maar anders as ’n atleet wat alleen moet hardloop met die stokkie in sy hand, belowe Hy die dissipels en ons, dat Hy krag sal gee en dat Hy altyd naby aan ons sal bly. Dat Hy ons nooit sal los nie. En Hy kom dan ook sy belofte na!
Ons lees dit in Markus 16: 20: ...en die Here het met hulle saamgewerk en hulle prediking bekragtig deur die wondertekens wat daarop gevolg het....
En in Matteus 28: 20: En onthou: Ek is by julle al die dae tot die voleinding van die wêreld.
Is dit nie ongelooflik nie dat God kies om deur mense te werk? Dat God kies om iets so belangrik in ons hande te laat? En ja, ons gaan die stokkie soms laat val. Ons, en verskeie mense voor ons, ook die Kerk, het die stokkie al laat val en sal dit weer doen. Maar met hulle,
en ook met ons, begin God telkens oor en sit Hy geduldig weer die aflosstokkie in ons hande terug.
Mag ons elkeen op Hemelvaartdag, maar ook elke dag, onthou dat God kies om deur ons in hierdie wêreld wonders te vermag. En dat Hy deur ons sy koninkryk nou reeds op aarde laat deurbreek. Mag die nalatenskap van sy hemelvaart in ons lewe tot Lewe kom.
Ds Rue Hopley, Pretoria-Oos
