01/08/2026
🎉 Basaar 2026 – Wat 'n dag om te onthou!
📅 1 Augustus 2026
Wat 'n ongelooflike dag was dit! Ons harte loop oor van dankbaarheid vir elke persoon wat deel was van ons jaarlikse basaar!
Van vroegoggend af was daar 'n heerlike, gesellige atmosfeer waar oud en jonk saam kon kuier. Die dag was gevul met lekker kos, vrolike geselskap en baie opgewondenheid.
🌿 Ons besoekers kon smul aan 'n groot verskeidenheid lekkernye en produkte – van vars groente, plante, ons deli, handgemaakte, gehekelde en gebreide items tot heerlike pannekoek, kerrie en rys, stormjaers, vetkoek, koeldrank, poedings en lekkers en soveel meer.
🎬 Die kinders het hul eie vermaak geniet met 'n Quest, Aqua Attack en nóg 'n fliek op die grootskerm – net soos tydens ons Potjiekosaand.
🎯 Daar was pret vir almal, met skiet vir jonk en oud, en natuurlik die gewilde Lucky Droppings, waar die bokke se "keuse" bepaal het wie die gelukkige wenners sou wees! Baie geluk aan Ben en Jannes wat as die gelukkige wenners aangekondig is!
'n Opregte dankie aan elke vrywilliger, uitstaller, borg, donateur en besoeker wat hul tyd, moeite en ondersteuning gegee het.
Bo alles bring ons die eer en dank aan ons Hemelse Vader. Deur Sy genade en seën kon ons weer 'n besonderse, suksesvolle basaar aanbied. Aan Hom alleen kom al die eer!!
Ons sien reeds uit daarna om julle weer by die volgende geleentheid te verwelkom!
📸 Deel gerus julle gunstelingfoto's van die dag in die kommentaar!
