https://www.facebook.com/272597082868317/

CAM-kinders, Germiston (2026)

04/09/2026

GEBREEKTE BRIL
Deur Johan Terblanche

Verlede naweek het ek ‘n groot boom korter gesaag. Terwyl ek bo in die boom was met die kettingsaag het ‘n tak afgebreek. Toe die tak val, het dit my kop oop gesny en my bril wat afgeval het, het gebreek. Nadat my dogter die bloeding gestop het, het ek na my bril gekyk en besef dat dit nie reggemaak kan word nie. Ek sal ‘n ander bril moet kry.

Soms kyk ons na die lewe en omstandighede deur gebreekte brille.
Die eerste bebreekte bril waardeur ons kyk is die bril van ongeloof. Dit gebeur wanneer ons nie glo dat Jesus vir ons is nie of dat Hy nie vir ons kan voorsien nie. Hebreërs 11:6 sê dat dit onmoontlik is om God se wil te doen of te ervaar as ons nie glo dat Hy bestaan en diegene wat Hom soek, beloon nie.

Die tweede gebreekte bril waardeur ons kyk is die bril van verkeerde geloof. Dit gebeur wanneer ons geloof in onsself of in ander mense groter is as ons geloof in Jesus. Verkeerde geloof sê ek kan op my eie regkom of dat iemand anders ons sal help. Volgens Johannes 15:5 kan ons niks op ons eie doen nie. Jeremia 17:5 sê dat die mens wat op ander mense vertrou, verloek sal wees.

Nog ‘n gebreekte bril waardeur ons soms kyk is die bril van vals geloof. Vals geloof is geloof wat nie in ag neem wat die Here van ons verwag nie. ‘n Voorbeeld hiervan is opgeteken in 2 Kronieke 7:14. Baie keer glo ons verkeerdelik dat die Here ons land sal genees maar ons neem nie in ag dat ons eers onnself moet verootmoedig, bid, God se aangesig moet soek, en ons moet bekeer voordat die Here die genesing gaan gee nie.

Hoe stel ons dit reg? Soos wat ek nou ‘n nuwe bril moet kry moet ons ook ‘n nuwe bril van geloof kry en aansit. Ons geloof moet in Jesus Christus wees.

Die Bybel sê dat ons gered word deur geloof. (Sien Johannes 3:16 en Efesiërs 2:8-9)

Volgens 2 Korinthiërs 5:7 en Romeine 1:17 lewe ons deur geloof in Jesus Christus. Dit is Jesus wat ons staande hou in die lewe.
Omdat ons deur die bril van geloof kyk, kan ons die Here nader in gebed en Hy sal in ons behoeftes voorsien volgens Markus 11:22-24.

Ten slotte, kom ons kry ‘n nuwe bril. Kom ons kyk deur die bril van geloof in Jesus Christus. Dan sal die Here ons nie net red nie, maar Hy sal ons vrede en vreugde herstel deur ons gebede te hoor en te verhoor.

Sou u gebed benodig kan u aan ons skryf by [email protected]

Groete,

Johan Terblanche
Christ Alone Ministries

28/08/2026

HUIS TE HUUR
Kinderboodskap deur Johan Terblanche

Baie jare gelede het ek 'n huis verhuur. Na 'n rukkie, en nadat ek baie huurders uitgesit het, het ek die huis verkoop. Ongelukkig wou die huurders wat ek gehad het, óf nie betaal nie, óf die eiendom beskadig, óf albei doen.

Vandag wil ek ons harte vergelyk met 'n huis te huur. Ons kan ook besluit wie in ons harte bly, net soos 'n huiseienaar sy huis kan verhuur aan wie ookal hy wil.
Kom ons kyk eers na 'n slegte huurder. Normaalweg lyk hulle na ordentlike mense. Dikwels betaal hulle die deposito en die eerste maand se huur. Ongelukkig, sodra hulle intrek, hou hulle op om huur te betaal en begin om die eiendom te vernietig. Hulle hou nie die plek netjies nie, en hulle breek alles wat voorkom soos die kaste, deure en ander items. In baie gevalle moes ek die huis oorverf nadat die huurders vertrek het en geld spandeer om loodgieterswerk, elektriese en en ander items te vervang.

Die duiwel is ook 'n slegte huurder. Volgens Johannes 10:10 kom die duiwel om te steel en te verwoes. Ongelukkig lyk die duiwel nie soos 'n vernietiger wanneer hy aanvanklik ‘n hart soek om in te bly nie. In 2 Korintiërs 11:14 lees ons dat die duiwel homself vermom as 'n engel van die lig. Ons lees ook dat die duiwel rondloop soos 'n brullende leeu en soek wie hy kan verskeur of verslind: (1 Petrus 5:8)

Maar jy kry wel goeie huurders. Nie net betaal hulle elke maand hul huur nie, maar hulle sorg ook vir die eiendom. Sommige van hierdie goeie huurders sal seker maak dat die eiendom in 'n goeie toestand is deur self klein probleempies op te los of selfs aan te bied om te help met groter projekte rondom die eiendom.
J
esus Christus kan vergelyk word met 'n goeie huurder. Wanneer ons Hom in ons harte toelaat, sal Hy ons seën en bewaar, Hy sal 'n gebroke hart en gees heelmaak. Hy sal in elke behoefte van ons voorsien en in oorvloed gee. (Johannes 10:10)

Watter huurder wil jy in jou hart hê, die duiwel wat ‘n vernietiger, of Jesus Christus, die hersteller van alle dinge? Laat ons die Here Jesus in ons lewens toelaat en ons sal die voordele van Hom wat binne-in ons woon, pluk.

Groete,

Johan Terblanche
Christ Alone Ministries

21/08/2026

BOODSKAP VAN BO
By Johan Terblanche

Iemand naby ons, gaan deur 'n moeilike tyd sedert sy vrou oorlede is. En hoewel hy daagliks sy Bybel lees en bid, is daar dae dat hy heeltemal alleen en verlate voel.

Verlede Sondag het hy 'n sakkie aartappels oopgemaak en 'n hartvormige aartappel binne-in die sakkie gevind. Hy het vir my 'n foto daarvan gestuur en 'n gedagte het by my opgekom. Miskien het God 'n boodskap vir hom gehad. Miskien wou God net hê hy moes weet dat Hy hom steeds liefhet.

Ek weet dat ons nie hoef te soek na tekens om te bewys dat God bestaan of dat God ons liefhet of dat God ons steeds raaksien en vir ons wil sorg nie. Ek weet dat die Christelike lewe gebaseer is op geloof en ons hoef net te glo, maar daar is tye dat ons twyfel. Dan moet ons dalk rondom ons kyk en sien wat die Here gedoen het. Dit sal nie net die bestaan van God en Sy liefde vir ons bewys nie, maar dit sal ons ook motiveer om Hom te dien.

Kom ons kyk vinnig na wat die skepping ons van die Here ons God vertel.

Amos 4:13 vertel ons dat Hy wat die berge gevorm het, die winde geskep het, en dag en nag gemaak het, is die Here onse God.

Psalm 8:4 vertel ons dat die Here, onse God, die maan en die sterre met Sy vingers in hulle plekke gesit het.

In Job 12:7-9 sien ons dat selfs die diere wat op die aarde rondloop, die voëls wat in die lug vlieg en die visse wat in die see swem, getuig of vertel van God se almag.

In Jesaja 40:26 word ons opdrag gegee om na die hemel te kyk en die Here ons Skepper te sien. Ons sien ook in Psalm 19:1 dat die hemele die heerlikheid van God verkondig, en die uitspansel daarbo verkondig die werk van sy hande.

Handelinge 14:17 vertel ons dat selfs die reën wat Hy vir ons gee en die gereelde oeste, getuig van die goedheid van God.

Indien jy twyfel oor die bestaan van God of bewys wil hê van Sy liefde vir jou, hoekom neem jy nie 'n tree na buite en kyk wat die Here vir jou gegee het nie. Al kry jy nie ‘n hartvormige aartappel nie, kan jy die Here se teenwoordigheid in 'n sagte briesie of in die reën ervaar. Jy kan ook bewus word van God se grootheid terwyl jy na die berge, die see, die sterre of selfs die diere rondom jou kyk.

Sou u gebed benodig kan u aan ons skryf by [email protected]

Groete,

Johan Terblanche
Christ Alone Ministries

14/08/2026

GEBREEKTE STOEL
Kinderboodskap deur Johan Terblanche

Miskien het jy al geprobeer om op 'n stoel te sit waarvan een p**t gebreek is? Dit is baie ongemaklik en selfs gevaarlik, want die stoel kan omval en sodoende die persoon wat daarop probeer sit, beseer.

Ons almal het al gehoor van die belangrikheid van gebed in 'n Christen se lewe. Ongelukkig is daar tye dat ons gebede soos ‘n stoel met ‘n gebreekte p**t is. Net soos 'n stoel vier pote nodig het, so ook ons gebede. Die vier pote (of elemente) van gebed is lofprysing, bekering, vra en stil word voor God.

Kom ons kyk na hierdie elemente. Eerstens moet ons die Here in gebed loof. Om die Here te loof beteken om die Here te erken en te dank vir alles wat Hy is en alles wat Hy doen. In Psalm 103:1-2 sê Dawid: " Loof die HERE, o my siel, en alles wat binne-in my is, sy heilige Naam! Loof die HERE, o my siel, en vergeet geeneen van sy weldade nie!"

Tweedens moet ons ons van ons sondes bekeer en die Here vra om ons te vergewe. Volgens Lukas 13:5 sal diegene wat nie berou toon en hulself bekeer nie omkom. As ons egter ons sondes bely, sal God ons vergewe en ons reinig. (1 Johannes 1:9)

Derdens, in gebed kan ons die Here vra om in ons behoeftes te voorsien, of ons nou 'n plek nodig het om te slaap, iets nodig het om te eet of hulp met ons take. In Filippense 4:6 word ons beveel om oor niks besorg te wees nie, maar ons begeertes deur gebed, smeking en danksegging aan God bekend te maak. Ons kan ook vir ander bid en die Here vra om in elkeen van hul behoeftes te voorsien. (Sien Jakobus 5:16)

Laastens, en dit is waar ons dikwels faal, moet ons onsself aan die Here onderwerp. Dit beteken dat ons stil moet raak voor die Here, en die Here moet toelaat om ons met vrede, vreugde en liefde te vul. In Psalm 46:10 het die Here gesê: “Laat staan en weet dat Ek God is. In ander vertalings word die woorde “laat staan” vervang met “wees stil.” Gewoonlik, wanneer ons laat staan of stil word voor die Here, kan ons Sy teenwoordigheid aanvoel en deur Hom bemoedig word.

Terwyl dit maklik is om 'n rympie of gebed op te sê, is dit nie noodwendig ware gebed nie. Ons moet oefen om reg te bid, om die Here te loof, om ons van ons sonde bekeer, om die Here te vra om in ons behoeftes te voorsien en om tyd te maak om die teenwoordigheid van ons Here en Verlosser, Jesus Christus, te ervaar.

Groete,

Johan Terblanche
Christ Alone Ministries

07/08/2026

KOFFIE OF TEE
Deur Johan Terblanche

'n Ruk gelede het ons by vriende gekuier. Na 'n rukkie het die vrou ons gevra of ons iets wil drink en die vraag opgevolg met "koffie of tee?" Aangesien ek nie van koffie hou nie, het ek gesê dat ek liewer tee wil hê. 'n Rukkie later het die vrou van die kombuis af teruggekeer met 'n paar bekers. Op al die bekers was die word "koffie" in Engels geskryf. Vir 'n oomblik het ek gedink dat sy my óf nie gehoor het nie, óf sy het vergeet dat ek tee wou hê.

Ek het die beker by haar geneem en toe gesien dat die inhoud nie koffie was nie, maar tee. Ek het tee in 'n koffiebeker gekry. Dadelik het die gedagte by my opgekom: "Verskil dit wat binne ons aangaan van dit wat ander kan sien?"

Vandag wil ek 'n vraag vra: "Lyk dit of jy oraait is en goed doen, terwyl jy eintlik seergemaak voel?" Baie keer, en om verskeie redes, wil ons nie hê dat ander moet sien wanneer ons ly of wanneer ons seergemaak word nie. Dit kan wees dat ons geboelie word, dat ons verwerp word, dat ons gebruik of dat ons selfs mishandel word. Soms wil ons nie deel wat binne-in ons aangaan nie, want ons voel skaam of verleë. Of dit kan selfs wees dat ons voel dat ons verdien om sleg behandel te word.

Die probleem is dat, terwyl mense koffie aan die buitekant lees, of 'n kind sien wat goed doen, ons dalk gevul kan wees met tee, of stukkend voel. Vandag wil ek jou aanmoedig om los te breek van die pyn en die seer. Weet dat die Here naby aan die gebrokenes van hart is. (Psalm 34:14)

Wanneer jy seer het, bid tot die Here en werp jou sorge (seer of bekommernisse) op die Here. Hy sal jou onderhou en nie laat wankel nie. (Psalm 55:23)

Vra die Here om jou te leer hoe om elke situasie te hanteer. In Jakobus 1:5 lees ons dat God wysheid sal gee aan diegene wat Hom daarvoor vra.

Laastens, vra ander soos jou ouers, prediker of onderwyser vir raad. Spreuke 11:14 sê vir ons dat ons die stryd kan wen met die hulp van raadgewers.

Laat ons nie voorgee dat ons koffie is terwyl ons tee is nie, of voorgee dat ons oukei is terwyl ons nie is nie, maar laat ons hulp van die Here en ander soek, sodat ons die uitdagings van die lewe kan oorkom.

Indien u gebed of leiding nodig het, is u welkom om 'n e-pos te stuur na [email protected].

Seënwense

Johan Terblanche
Christ Alone Ministries

31/07/2026

ENJIN BENODIG Deur Johan Terblanche

Gister het ek op die internet rondgesnuffel en gekyk na motors wat te koop is. Ek het op 'n advertensie afgekom waarin die verkoper sê: "Voertuig is in perfekte toestand. Benodig slegs 'n enjin en ratkas."

Is dit nie so dat selfs die kleinste kind weet dat 'n motor 'n enjin nodig het of nie sonder 'n enjin kan ry nie? ‘n Motor sonder ‘n enjin kan egter nog beweeg, maar moet gestoot of gesleep word. Dit verg egter baie moeite en plaas groot druk op diegene wat stoot of sleep.

Ongelukkig is daar ook baie mense wat dink hulle is in perfekte toestand, maar hulle kort 'n enjin. Hierdie mense moet dikwels gestoot of gesleep word om die Here te dien. Die grootste probleem is egter dat hulle nie Jesus in hul lewens het nie.

Laat ek probeer verduidelik. Daar is baie mense (beide jonk en oud) wat van buite goed lyk. Hulle doen die regte dinge soos om kerk of Sondagskool by te woon en hulself te gedra. Sommige van hulle lees en ken selfs dele van die Bybel uit hul kop en weet amper alles wat daar is om te weet oor die Here, maar hulle het nog nooit 'n ontmoeting met die Here gehad nie. Hulle het Jesus nog nooit toegelaat om die middelpunt van hulle lewens te word nie.

Ongelukkig kan 'n lewe sonder Christus ondraaglik of onmoontlik word. Stel jou net voor dat jy al jou probleme self moet oplos en elke swaar vrag self dra.

Die Bybel sê vir ons dat dit die Here is wat ons krag gee om alles te doen. (Filippense 4:13) Ons sien ook dat die Here die wat moeg is, krag gee. (Jesaja 40:29) En wanneer ons erken dat ons swak is en nie langer kan aanhou trek of stoot nie, sal Jesus se krag in ons werk. (2 Korintiërs 12:9)

Laat ons nie probeer om vorentoe te gaan sonder die Here Jesus Christus nie, want dan is ons soos iemand wat 'n motor sonder 'n enjin stoot of trek.

Laat ons die Here in ons daaglikse lewe toelaat deur Jesus Christus se gawe van verlossing te aanvaar sodat ons ook kan sê: “Die Here is my sterkte en my skild; op Hom het my hart vertrou, en ek is gehelp; daarom jubel my hart en sal ek Hom loof met my gesang." (Psalm 28:7)

Indien u gebed of leiding nodig het, is u welkom om 'n e-pos te stuur na [email protected].

Seënwense

Johan Terblanche
Christ Alone Ministries

24/07/2026

VETPLANT
Deur Johan Terblanche

In ons tuin het ons 'n vetplant genaamd 'n Boom-Aeonium of Aeonium arboreum. Ons het dit omtrent 6 jaar gelede geplant vanweë sy groen roosagtige rosetblare wat op die punte van gladde stingels groei. In al hierdie jare het die plant egter nooit blomme gedra nie.

Gedurende middel-winter het die plant skielik heldergeel blomme gedra wat uit een van die rosette gevorm het. Nou, om eerlik te wees, ek was verbaas toe ek die blomme die eerste keer sien. Ek kon my oë nie glo nie.

Dit het my aan 'n paar Bybelkarakters laat dink. Ons lees dat Moses 40 jaar in die woestyn gewoon het voordat God hom geroep het om die Israeliete uit Egipte te lei. (Handelinge 7:30)

Dawid moes jare wag nadat hy gekies is as koning om die koning van Israel te word. Dawid was 'n tiener toe hy geroep is om die koning te word, maar het eers die koning geword toe hy 30 jaar oud was. (2 Samuel 5:4)

God het in Genesis 12 vir Abraham en Sara 'n kind belowe toe Abraham 75 jaar oud was, maar Isak is eers gebore toe Abraham 100 jaar oud was. (Genesis 21:5).

Nadat Jesus in Betlehem gebore is, moes Hy wag tot Hy 30 was om Sy bediening te begin. Toe, eers op 33-jarige ouderdom, het Hy gedoen wat Hy veronderstel was om te doen. Op 33-jarige ouderdom het Jesus gesterf sodat ons vrygemaak kon word.

Ons het ses jaar gewag voordat die vetplant geblom het. En toe dit gebeur het, was ons almal bly, maar verbaas. Die Here het elkeen van ons geroep om iets buitengewoons te doen. Soms gebruik God ons wanneer ons klein is. Ek het al baie klein of jong kinders gesien wat deur God gebruik word om vir ander te bid. Maar dan is daar ander wat eers hul volle potensiaal in Christus bereik wanneer hulle ouer is. Sommige wag tot hul laat tienerjare en word dan jeugleiers. Ander wag selfs langer en het predikers geword toe hulle baie ouer was.

God het 'n plan en 'n doel vir jou. (Jeremia 29:11). Maar soms moet ons geduldig op die Here wag. Alles wat Hy belowe het, is nie vir nou bedoel nie en die Here sal wag totdat ons volwasse genoeg is om te hanteer wat Hy vir ons wil gee of te doen waarvoor Hy ons geroep het. Laat ons dan geduldig wees, want op die regte tyd sal die Here Sy plan in ons tot vervulling bring.

Indien u gebed of leiding nodig het, is u welkom om 'n e-pos te stuur na [email protected].

Seënwense

Johan Terblanche
Christ Alone Ministries

17/07/2026

OPDRAANDES Deur Johan Terblanche

Gedurende ons Desembervakansie het ons deur verskeie bergpasse in die Wes-Kaap gereis. Op een pas het ons 'n fietsryer opgemerk wat die bergpas opsukkel. Bo-op die berg het ons by 'n uitkykpunt gestop. Terwyl ons “padkos” geëet het, het die man op die fiets by ons verby gekom. Van hier af was dit makliker vir hom omrede dit afdraande was.

Ons staar ook dikwels opdraandes of moeilike tye in die gesig. Of jy nou 'n skolier, 'n student of begin werk het, kan jy seker wees dat jy moeilike dae sal trotseer, wanneer dit sal voel asof jy 'n fiets teen 'n bergpas opry. Maar net soos moeilike tye oor jou pad sal kom, sal jy ook makliker dae hê, wanneer alles eenvoudig in plek val.

Nou weet ek nie watter moeilikhede voor jou lê soos berge nie, maar daar is 'n paar dinge wat ons moet onthou.

Selfs voordat die berge gevorm is, was God daar. (Psalm 90:2)

Soms neem die Here jou op 'n ander en makliker roete om die opdraandes, moeilikhede en probleme te vermy. Psalm 32:8 sê vir ons dat die Here ons wil onderrig en die pad wil leer wat ons moet gaan, maar ons moet gehoorsaam aan Hom wees en bereid wees om Hom te volg waar Hy ons ook al lei.

Ongelukkig is daar tye wat ons die opdraandes van die lewe moet trotseer, want God wil ons bo-op die heuwel of berg ontmoet. In Eksodus 24:12 het God vir Moses gesê om teen die berg op te klim en daar vir Hom te wag.

Ons kan egter verseker wees dat die Here met ons is teen die opdraandes. In Jesaja 41:10 lees ons: “"Wees nie bevrees nie, want Ek is met jou; kyk nie angstig rond nie, want Ek is jou God. Ek versterk jou, ook help Ek jou, ook ondersteun Ek jou met my reddende regterhand.”

Wanneer ons die opdraandes oorkom, sal ons 'n plek vind waar ons die Here kan dien. In Eksodus 3:12 sien ons dat die Here met ons sal wees, en ons sal Hom op die berg dien.

Laat ons die opdraandes verduur en dit trotseer, want die Here gebruik dit om ons te vorm. Die Here is in staat om alles ten goede te laat meewerk vir die wat Hom liefhet, die wat volgens sy besluit geroep is” (Romeine 8:28).

Indien u gebed of leiding nodig het, is u welkom om 'n e-pos te stuur na [email protected].

Seënwense

Johan Terblanche
Christ Alone Ministries

10/07/2026

DRAADJIES Deur Johan Terblanche

Ek het onlangs gelees dat die helfte van alle kinders een of ander vorm van ortodontiese behandeling sal benodig om hul tande en kake reg te stel. (Ortodonsie is 'n spesialisveld vir die diagnose en behandeling van misvormde tande en kake.) In meeste gevalle waar daar probleme met tande of kake is kan dit reggestel word met tydelike draadjies. Ongelukkig kan baie ouers dit nie bekostig om ortodontiese behandeling vir hul kinders te kry nie.

Draadjies word nie net gebruik om skewe tande reguit te maak nie. Dit help ook om oor- of onderbyte reg te stel waar die onderste en boonste tande nie oplyn nie, wat dit moeilik maak om te byt. Gewoonlik word draadjies tussen die ouderdomme van tien en veertien aangebring wanneer die meeste van die volwasse tande uit is, maar die kakebeen steeds groei. Ongelukkig is dit ook die ouderdom wanneer kinders of tieners op hul kwesbaarste is vir kritiek en portuurdruk, wat dikwels veroorsaak dat kinders verleë of skaam is om draadjies te dra.

Om draadjies te hê is nie maklik nie. Dikwels veroorsaak dit dat kinders selfbewus en verleë raak. Dit kan ook kaakpyn en seerheid van die tande en tandvleis veroorsaak, veral na verstellings. Die draadjies kan ook die binnekant van 'n persoon se wange en lippe sny, wat weer infeksie en selfs mondswere kan veroorsaak. Verder moet 'n persoon harde kossoorte vermy en spesiaal aandag gee wanneer hy of sy tande borsel en vlos. Draadjies word gewoonlik vir 18 tot 24 maande gedra, maar uiteindelik is dit alles die moeite werd.

Ons dra dalk nie draadjies nie, maar ons staar dikwels moeilike, uitdagende of pynlike situasies in die gesig. Dikwels moet ons toetse van alle soorte trotseer. Job, in die Bybel, het deur verskriklike tye gegaan. Job het sy rykdom, eiendom en al sy vee verloor het. Toe het hy al sy kinders (7 seuns en 3 dogters) verloor toe die huis waarin hulle gewoon het, ineengestort het. Toe word hy nog siek ook. (Sien Job hoofstukke 1 en 2) Maar uiteindelik het God vir Job dubbel gegee wat hy voorheen gehad het.

In Job 42:10-17 sien ons dat Job uiteindelik meer vee (plaasdiere) as voorheen gehad het. God het hom ook weer sewe seuns en drie dogters gegee.

Ek weet nie waardeur jy gaan of wat jou in die vererleentheid stel nie. Miskien voel jy soos iemand wat pas draadjies gekry het. Jou pyn, hartseer en probleme wat jy moet dra, maak jou kwaad of ontstel jou. Maar soos draadjies uiteindelik die moeite werd is, kan jy ook verseker wees dat God jou hartseer in vreugde kan verander, en jou toetse, beproewinge en verdrukkinge in oorwinning.

Ons lees immers in 1 Korintiërs 10:13 dat die Here nie sal toelaat dat ons bo ons vermoëns getoets word nie, en terwyl ons getoets word, is Hy daar om ons deur te dra.

Indien u gebed of leiding nodig het, is u welkom om 'n e-pos te stuur na [email protected].

Groete en God seën

Johan Terblanche
Christ Alone Ministries

03/07/2026

PARAMEDICI Deur Johan Terblanche

'n Paar dae gelede het ek verby 'n ongelukstoneel gery en 'n span paramedici gesien wat langs die pad aan 'n pasiënt werk. Een het die pasiënt borskompressies gegee terwyl 'n ander een gereed gestaan het met 'n sakklepmasker om lug in die pasiënt se longe te forseer. Agter hulle het 'n ambulans gereed gestaan met deure wawyd oop om die pasiënt na die naaste noodeenheid te neem sodra hy gestabiliseer is. Dit het my laat dink aan die werk van 'n paramedikus en wat ons by hulle kan leer.

In Suid-Afrika word moet jy studeer en 'n diploma verwerf voordat jy 'n paramedikus kan word. Verder moet jy vir mense omgee, medelye hê en bereid wees om ander eerste te stel. Jy moet ook in enige situasie kalm kan bly.

Jy moet ook bereid wees om lang ure en skofte te werk, in afgeleë plekke te werk en in ongemaklike plekke te kan werk. Jy moenie bang wees om in beperkte ruimtes of op hoogtes te werk nie.

Voordat Jesus weg is om vir ons 'n plek in die Hemel voor te berei, het Hy ons opdrag gegee om te gaan en dissipels te maak. (Sien Matteus 28:19) Om dissipels te maak word die beste beskryf as om ander te red van die ewige dood en hel deur hulle na Jesus Christus te lei.

Ons moet ander vertel dat hulle weens sonde nie God se koninkryk of die hemel kan binnegaan nie. Dan kan ons hulle die goeie nuus vertel; dat Jesus hulle sondes op Homself geneem het, in hulle plek gesterf het en sodoende die prys vir hulle sondes betaal het. (Sien Romeine 3:23, 1 Petrus 2:24)

Maar om te doen wat God ons geroep het om te doen of om ander na Christus te lei, moet ons God se Woord (Bybel) bestudeer of weet wat die Woord sê.

Ons moet ook vol liefde en medelye wees met ‘n hart wat omgee vir ander. (Sien Johannes 13: 34-35 en Filippense 2:4)

Ons moenie bang wees om vir ander te vertel van Jesus nie, want God is met ons. Hy sal ons leer en lei om ander van Hom te vertel en na Hom te lei. (Matteus 28:20 en Psalm 32:8)

Ons moet voorbereid en gereed wees om ter eniger tyd te getuig of vir ander te vertel van God se verlossingsplan. (Sien 2 Timoteus 4:2)

Ons moet selfs bereid wees om in moeilike of ongemaklike situasies oor God se verlossingsplan te praat. Die Bybel sê vir ons dat as ons skaam is vir Jesus Christus, sal Jesus Hom ook vir ons skaam. (Markus 8:38)

’n Paramedikus kan ’n persoon se lewe net vir ’n kort tydjie verleng, maar wanneer ons iemand aan die Here voorstel, kan daardie persoon die ewige lewe verkry.

Indien jy gebed of leiding nodig het, is jy welkom om 'n e-pos te stuur na [email protected].

Seënwense

Johan Terblanche
Christ Alone ministries

CAM-kinders

04/09/2026

28/08/2026

21/08/2026

14/08/2026

07/08/2026

31/07/2026

24/07/2026

17/07/2026

10/07/2026

03/07/2026

Address

Website

Alerts

Shortcuts

Share

Category

Listing takedown request