NG Gemeente Bospoort

06/12/2025

‘n Kerssangdiens kan sinvol ingerig word rondom die 1700- jarige viering van die Ekumeniese Geloofsbelydenis van Nicéa (325nC).

Dit raakpunt is nie dat St Nicolaas (Sinterklaas, die man met die rooi oorpak en takbokke en slee! wat geskenke deur skoorstene laat afgly), die biskop van Maya, by die Konsillie teenwoordig was nie! Legende lui dat hy uit magteloosheid Arius tydens vurige debat oor die ontstaan van Jesus, en soos wat Arius geglo het, Jesus nie altyd God was nie, met die vuis op die neus geslaan het. St Nicolaas is toe uit die konsilliie verban. Kort voor sluitingstyd het hy berou getoon en is weer toegelaat tot die vergadering!

Nee, daar is n diepgewortelde rede vir n sterk verband tussen Nicéa en Kersfees.

Die grootste teologiese stryd in die bykans 2000 jaar van die bestaan van die Christelike kerk is deur Arius aangewakker toe hy sê die Vader alleen is God. Die Logos of die Seun, is deur God uit niks geskep nog voordat Hy enige iets geskep het. Daar was dus n tyd dat die Seun nie bestaan het nie. Daarom is die Logos die eerste en grootste van alles wat God geskep het. Hy was die naaste aan God van alles wat geskep is, en deur Hom het God alles geskep. Maar net die Vader was God, ewiglik, ongeskep. Deur hierdie lering het Arius geglo dat hy die fundamentele waarheid van die monoteisme handhaaf: daar is net één God, ewig, ongeskep.

Om die goddelike natuur van Jesus Christus te bely, beteken om naas God die Vader, n tweede God te bely, naamlik Jesus Christus. En dit is n ooglopende weerspreking van alles wat ons in die Skrif leer!

Dit was n jong man genaamd Athanasius (hoe benodig ons net nie in die kerk mense met vlymskerp insig nie!) wat buite die Bybel om, vanuit die Griekse filosofie, navore kom met die begrip ‘homoousios’, (homo = dieselfde; oudios = wese).

Daarmee het Athanasius n belydenis oor Jesus Christus bed**k: Jesus is van dieselfde wese as die Vader! Jesus is God! Die woord ‘homoousios’ kan byvoorbeeld uitgedruk word in n kers war deur n ander kers verlig word: twee kerse, maar een en dieselfde lig! Soortgelyk die son en sy ligstrale! Een wese en onskeibaar. Augustinus se beeld is ook aangrypend: ek kan in my verbeelding my verbeelding verbeeld!

Daarom het die Konsillie tot formulering kon oorgaan: “ … en in een Heer, Jesus Christus, die eniggebore Seun van God, gebore uit die Vader voor alle tye; (God uit God) Lig uit Lig, waaragtige God uit
waaragtige God, verwek, nie gemaak nie,een in wese met die Vader; deur wie alle dinge ontstaan het; wat ter wille van ons, die mense, en ter wille van ons saligheid, neergedaal het uit die hemel, vlees geword het deur die Heilige Gees uit die maagd Maria,
en mens geword het, wat selfs vir ons gekruisig is…”

Dit is die diepste rede vir kersfeesviering! God word mens! Een Heer… God uit God, Lig uit Lig, waaragtige God uit waaragtige God, …

29/04/2025

GEVAARPUNT 2: VERSOEKINGS
JAKOBUS 1:12-18.
Om rondom “versoekings” ‘n misverstand te hê of onkunde te toon is om jou oop te stel vir die bittere gevolge wat dit vir jou kan inhou. Daarom is die hoofgedagte in Jakobus 1:12 alreeds ‘n groot aansporing: “Gelukkig (dit beteken: salig, heelheid, vrede) is die mens wat versoeking deurstaan…”. Saam met die woord “deurstaan” kom die volgende “… as hy die toets slaag…”. Dié twee begrippe (“deurstaan”en “slaag”) alleen sê vir ons dat die lewe met sy versoekings weerstand (“staying power”) vereis, en ook nie sonder slaggate is nie. Maar as die mens slaag, is die beloning uitermate ver bo alle verdienste: die oorwinningskrans van die lewe wat God belowe het aan hulle wat Hom liefhet.

Die mens is egter so in homself ingekeer dat hy nie sy eie val voorsien nie. Die mens ontken sy aandeel aan skuld. Daarom dat elkeen wat vir misdaad in die howe aangekla word, van meet af onskuldig pleit. Hy wys altyd vinger, probeer iemand anders aanwys as die oorsaak en skuldige. D**k maar net aan die petaljé in die Paradys! Jakobus sê dat die mens ook nie huiwer om selfs die vinger na God te wys nie! God “in wie daar geen afwyking of skadu van omkering is nie!” (1:17). Soos Paulus die diepste grond vir sonde in Romeine 3:10-18 uitwys as die hart van die mens, bevestig Jakobus dit soortgelyks in 1:14-15. “Elkeen word versoek wanneer hy deur sy eie begeerte meegevoer en verlei word…. Die begeerte bevrug word…geboorte gee aan die sonde….wanneer dit volgroei is… geboorte gee aan die dood.”

Die sinspeling van die siklus “meevoer”, “verlei”, “bevrug” “geboorte”, “volgroei”, “dood” (1:14-15) staan in sterk kontras – duisternis teenoor Lig – met 1:16-17: “Elke goeie geskenk…volmaakte gawe… kom van bo af…van die Vader van die hemelligte.” “Volgens sy wil het Hy ons “verwek” deur die woord van die waarheid… sodat ons eerstelinge van sy skepsels kan wees. Die Skeppingsverhaal (Gen 1) vertel dat die mens die laaste van die geskapenheid is. Die Herskeppingsverhaal wat in Jesus Christus die ganse skepping hernu, begin by die mens wat nou die “eerstelinge van die skepsels” is. Hoe onpeilbaar groot die beloning van absolute oorgawe aan die Here God!

Kragtens Jakobus 5:19-20 moet ons op mekaar let, “en as enigeen van julle afdwaal van die waarheid, en iemand hom laat terugdraai, red hy sy siel van die dood…”. Laat ons dáár wees vir mekaar….

Kom ons bid: “En bring ons nie in versoeking nie, maar verlos ons van die Bose. Want aan U behoort die koninkryk…”Amen.

29/04/2025

GEVAARPUNT 1: BESITTINGS
JAKOBUS 1:9-11.

Twee mense van verskillende sosio-ekonomiese stande word in hierdie drie verse vermeld. Die “broer wat gering is” word nadergetrek en net hy word “broer” genoem. Die ryk man nie. Jakobus roep beide van hulle binne die gemeenskaplike geloof op om nuwe insig in hulleself te kry. Die geringe kan hom op sy hoë aansien beroem. Hy dra iets uiters kosbaars, iets onverhandelbaar, in sy lewe met hom saam: net God bepaal wanneer hy sal sterf. “My tye is in U hand” (Ps 31:16).

Die ryke, daarteenoor, met al die skatte tot sy beskikking, kan nie ‘n enkele dag by sy lewe byvoeg nie: sy tye is nie in sy hand nie! Die ryk man moet dus leer dat hy hom moet verheug oor sy verganklikheid. Juis dit moet hom tot nederigheid stem. Die ryk man word hier egter nog verder geteken: ‘n pragtige veldblom trek baie aandag danksy die veelkleurigheid van sy blomblare, maar verweer en verdor in die kortstondige duur van sy glorie.

Gelowiges, kyk na mekaar met nuwe oë! Ware rykdom is hier die gemeenskaplike grond: God wat aan jou die lewe gee en van jou rekenskap sal eis.

Kom ons bid: “Valsheid en leuentaal, hou dit ver van my. Moet my nie armoede of rykdom gee nie; breek my porsie brood vir my af, sodat ek nie oorversadig raak en U misken en sê, “Wie is die Here?” nie, of verarm en steel, en die naam van my God geweld aandoen nie.” (Spreuke 30:8-9).

28/04/2025

DIE BRIEF VAN JAKOBUS
SONDAG 27 APRIL 2025.
Tussen Jakobus 1:1-8 (“Volhard in die geloof al is die omstandighede hoe moeilik”) en die einde Jakobus 5:19-20 (“Red wat verlore gaan, soek dié wat sterwe…”), is daar 14 gevaarpunte waarteen Jakobus ons waarsku. Eers moet ons onsself aan elkeen van hierdie gevaarpunte toets en ons lewens orden, en daarna moet ons na mekaar omsien en mekaar in liefde reghelp en red. Elkeen van die gevaarpunte het ‘n negatiewe pool en ‘n positiewe pool.
Gevaarpunte:
1. Besittings (1:9-11)
2. Versoekings (1:12-18)
3. Reaksie op die Woord (1:19-27)
4. Diskriminasie (2:1-13)
5. Goed doen/goeie dade (2:14-26)
6. Beheers jou tong (3:1-12)
7. Posisiesoekerigheid (3:13-18)
8. Verleiding van die wêreld (4:1-10)
9. Veroordeling van ander (4:11-12)
10. Onafhanklikheid van God (4:13-17)
11. Uitbuiting (5:1-6)
12. Moedhou en volharding (5:7-11)
13. Geloofswaardigheid (5:12)
14. Swaarkry, siekte en sonde (5:13-18)
Einddoel: 5:19-20. Neem geestelike verantwoordelikheid vir mekaar.
Elkeen van die gevaarpunte sal elke dag aan die orde gestel word.
Seën vir jou op reis om wysheid van die Here te verwerf.

29/11/2024

Die Kersgebeure het ‘n konteks waarbinne dit afspeel: die magte van die duisternis wat alles wil beheer! Maar die Lig skyn in die duisternis, en die duisternis het dit nie oorweldig nie! Sondagaand 1 Desember 2024 om 18:30.

31/03/2024

Opstandingsmôre het slegs twee simbole, die doeke waarin die liggaam van Jesus toegedraai was, en die leë graf waarvan die rots by die opening weggerol is. Hier sien ons dus die doeke, en die opening, gesimboliseer deur die wit rose, wat dui op nuwe lewe buite die graf. Links is die houer van reukolie en speserye wat die vroue uit liefde voorberei het, maar ongeopend staan! Christus het waarlik opgestaan!

31/03/2024

Op Goeie Vrydag illustreer Carina en Gerrit vir ons die teenwoordigheid van die dood (swart) en die bloed (rooi), terwyl die rose die hart van God vir die mens simboliseer!

31/03/2024

Baie dankie aan Carina en Gerrit Griesel wat op n nie-opvallende wyse, maar keurig en verrykkend die liturgiese ruimte vir ons rondom die kruis versier. Julle het n diep geestelike waarheid vir ons sigbaar tentoon gestel.

25/12/2023

Die gebeure rondom die geboorte van Jesus (Lukas 2:1-20) oorweldig my vanoggend in hierdie stille uur! God werk bo-oor die keiser Augustus en goewerneur Sirenius en Annas en Kajafas die hoëpriesters (3:2), terwyl Hy hulle insluit in sy plan, en Hy stuur n engel na mense wat lankal opgegee het op Hom! Die herders!

Hulle, saam met tollenaars, pr******te en vissers, het lankal opgegee op God, heil, tempel, offers. Hulle is doodgewoon deur die samelewing as onrein geag, nie welkom in die tempel en hul offers sou ook nie aanvaar wees nie! Hulle moet buite staan!

Dan gaan God by die binnekringmense verby en n engel verskyn aan juis aan herders. Vir hulle was dit n uiters groot skok - so onvoorstelbaar ondenkbaar onverwags oorweldigend!

Die engel kalmeer hulle en kondig aan: “Ek bring vir julle….” God het julle raakgesien! “…’n goeie boodskap… wat vir die hele volk… ‘n bron van groot vreugde sal wees!”

Die engel verseker hulle dat God hulle nie gaan bedreig nie! Kyk! God gee vir hulle die Verlosser, die Christus, die Here! En die teken is: Dit is n pasgebore Baba, ‘n weerlose kwesbare Kind!

Terwyl hulle hierdie boodskap probeer verwerk, daag daar 10 000e engele op wat hierdie boodskap beaam!

Dit inspireer hulle om onmiddellik tot aksie oor te gaan! Hulle vertrek haastig daarheen en vind Maria en Josef en die Kindjie, wat in n krip lê!

En dan begin die herders vertel wat oor hierdie Kindjie aan hulle meegedeel is! Selfs Josef en Maria moet hoor wat die engele aan die herders oorgedra het!

Ek as binnekringmens, dekadelange begenadigde om vertroud te wees met die Kersboodskap, miskien oorbekend met tempel, heil en offer, hoor vanoggend: God gebruik boodskappers aan beide kant van die spektrum - engele aan die bokant en herders aan die onderkant - om ons opnuut te verras met die varsheid waarmee God reddend in ons wêreld intree! En God laat ons sien wat gebeur met mense wat raakgesien en aangeraak word: die skaapwagters het by hulle terugkeer, God verheerlik en geprys oor alles wat hulle gesien en gehoor het!

17/12/2023

17/12/2023

Ned. Geref. Gemeente Bospoort
17 Desember 2023.
Tema: “…en om ons voete op die pad van vrede te plaas…”

Lees: Lukas 1:72-80

1.​OORGEE...
• Welkom by ons erediens vanoggend om 10:00. Dit is vir die mensdom ‘n heugelike geleentheid om die Adventboodskap aan te hoor: “God bring groot dinge te weeg... ‘n nuwe wêreldheerskappy waarin magsvergryp beïndig word...en met innige ontferming na sondaarmense....”
• Ons gelese gedeelte is Lukas 1:72-80: “ Ontferming aan ons voorvaders (Luk 1:72)… God se innige ontferming … aan ons”.
• Volgende Sondag 24 Desember 2023 erediens om 10:00 soos gebruiklik.
• Kersdiens op Maandag 25 Desember 2023 om 10:00 soos gebruiklik.
• Sondag 30 Desember 2023 erediens om 10:00 (anders as op kerkalmanak).
• Daar is geen middernagdiens op Maandag 31 Desember 2023 nie.
• Kerssangdiens vanaand om 19:00 by die Gereformeerde Gemeente Uitschott.

2.​OMGEE....
• Vir diegene wat in die volgende twee weke verjaar, sê ons: Baie hartlik geluk en ‘n mooi jaar!
Saterdag 16 Desember​​ Ida Schoeman​; Vrydag​​ 22 Desember ​​Godfried Pretorius; Vrydag​​​ 22 Desember​​ Ds Francois Jonker; Sondag​​ 24 Desember ​​LIda Pretorius; Woensdag​​ 27 Desember​​Christiaan Pieters; Saterdag​​ 30 Desember​​Johan Viljoen snr; Sondag​​ 31 Desember​​Jacobus du Preez;
Maandag​​ 1 Januarie​​ Ina Buys
Maandag​​1 Januarie​​ Japie van Vuuren; Woensdag​​3 Januarie​​ Anneli Krüger; Vrydag​​ 5 Januarie​​ Hennie Greef.

• Soos gebruiklik in vakansietyd, is daar nie tee na kerk nie!

3. UITGEE
Ons scriba, Tersia, is met verlof vir die volgende twee weke. Ons gun haar ‘n aangename rus.
• By die deure sal ons weekliks ‘n kleurpamflet beskikbaar stel met ‘n aktuele onderwerp in. Dit val onder die tema van Veerkragtige Lewensritme. Hierdie week se tema is vir elkeen van ons van groot belang: “Leer om woede te hanteer!” Neem gerus een per gesin.
• Ons dank die Here vir wonderlike reën wat geval het. Aanvanklik was dit eers min, maar Vrydagnag het ons ongeveer ‘n duim (25 mm) reën gehad. Ons d**k aan al ons boere wat ernstig besig is om te plant!
Lied 461:1 “Na ploegtyd en na saaityd
na onvermoeide vlyt,
kom steeds die blye oestyd
deur U goedgunstigheid...”

4. DEURGEE

ONS GEMEENTE SE BANK BESONDERHEDE VIR DANKOFFERS:
Bank:​​​​Nedbank
Tak:​​​​Hartbeesfontein​
EFT bank kode:​​198765
Bank rek naam:​​Ned. Geref. Gemeente Bospoort,
Rek. nr.​​​1717 105 254
Verwysing:​​​U naam en van
NWK lid nommer vir inry van graan offers: C890616NGK. Dankie vir elkeen wat langs hierdie weg mildelik bydra tot die instandhouding van die gemeentelike bediening en die uitbreiding van die koninkryk van die Here.