Taakspan: Vrouebediening NG Kerk Vrystaat

23/10/2020

Goeiemôre dames, lees asseblief die brief vanaf Béneli Pretorius, voorsitter Taakspan: Vrouebediening, wat ook per e-pos aan alle leraars, gemeentes, lidmate, ens gestuur is - let spesifiek op die paragraaf rakende die brande in die Wes-Vrystaat:
Omsendskrywe 2/2020
22 Oktober 2020

Aan alle Vrouelidmate
Ons is in die mooiste mooiste maand van Oktober en ten spyte van die vreemde omstandighede waarin ons ons nou bevind, vertrou ek dat dit goed gaan met die vroue in die Vrystaat. Die Covid-19 inperkings het ons samelewing baie broos gelaat. Ons word gekonfronteer met onbekende omstandighede. Die Covid-19 pandemie het nie net die nood in ons wêreld kom uitlig nie, maar ook groot nood meegebring.
Met die omstandighede wat drasties verander het, gaan ons vir ‘n wyle die Vroeë Kind Ontwikkelings- projek op ys plaas. Met die groeiseisoen op hande, wil ons graag ‘n houer-tuinprojek van stapel stuur. Met die meelprojek wat reeds in die Vrystaat geloods is, wil ons as vroue daarby aansluit deur houers met groenteplantjies te versprei. Ons moedig die dames aan om groente soos spinasie, kool, wortels, tamaties, ensovoorts, in enige houer te plant. Vroue kan ook self die houertuin versorg of die houertuin saam met die bestaande voedselprojek versprei. Die ander opsies is om die groente aan instansies soos ouetehuise, jeugsorgsentrums in die gemeentes en gemeenskap te versprei. Indien Vrouebedieninge in gemeentes meer inligting oor dié werksaamhede wil bekom, of ‘n projek wil inisieer, is julle welkom om met my te skakel.
Ons moedig ook gemeentes aan om betrokke te raak by die projekte wat deur Engo geloots word, ondersteun gerus die Cashback-program. Inligting rakende hierdie projekte verskyn gereeld in Vrypos (nuusbrief van die NG Kerk Vrystaat - indien jy nog nie daarop ingeteken is nie, stuur jou naam, gemeente en e-pos adres aan [email protected] en versoek dat hulle jou inteken). Indien jy ook omsendbriewe wil ontvang, stuur asseblief jou naam, gemeente en e-pos adres aan [email protected]
Elke vrou is deeglik bewus van die oorlewingstryd wat in gemeentes aan die gang is. Daarom doen ons ‘n beroep op die vroue om die predikant, sáám met die inwoners van die pastorie, in besonder in hierdie tyd te ondersteun. Die digitale bediening het nuwe uitdagings meegebring en daarom moet ons meer as ooit soos ‘n Aäron Moses se hande omhoog gehou het, ons predikante se arms omhoog hou.
Omdat daar nog beperkings op byeenkomste is en sekere reëls geld, gaan daar hierdie jaar nie enige Ringskonferensies plaasvind nie. Ons kan ook nie beplan aan ‘n toerustingsgeleentheid vir 2021 nie, daarom sal ons as Taakspan graag betrokke wil wees by die Ringskonferensies wat beplan word vir 2021. Die Ringsverteenwoordigers kan met Marietjie van der Merwe by 076 113 9601 in verbinding tree om die nodige reëlings te tref.
Baie dankie aan die gemeentes wat in die wintertyd hulp verleen het om die nood van die weerlose mense in ons samelewing te verlig. Só dra ons die Lig en hoop uit aan die wêreld...
Brande in die Wes-Vrystaat: Ons as Vrouebediening in die Vrystaat d**k in ons gebede aan die boere in die Wes-Vrystaat wat gebuk gaan onder die brande, talle boere het letterlik al hulle besittings verloor. Daar is verskeie organisasies wat reeds hulp aangebied het en wat ons ook ondersteun.
Daar is ook met ‘n noodboksprojek begin - in hierdie boks kan toiletware, blikkieskos, beskuit, tee, koffie, koekies, suiker, langlewe melk en “oor die toonbank medisyne” gepak word. Die afgeepunt in Bloemfontein is by die NG Kerk Gardeniapark, Jasmynlaan 3. Dit kan Dinsdae tot Vrydae tussen 08h00 - 13h00, vóór of op 30 Oktober 2020 afgegee word, waarna dit dan onder boere versprei sal word.
Enige finansiële skenkings kan aan Vrystaat Landbou se rampfonds gemaak word by:
Bank: Absa
Rek nr: 470 940 670 (tjek)
Tak: 632 005
NB! Verwysing: RAMP + jou naam
Vir direkte skenkings skakel asseblief vir Gys Olivier - Hertzogville 082 575 7028 / Boeta de Waal - Boshof 082 578 5303 / Martin Nel - Dealesville 083 991 2149 / Andre J van Rensburg - Bultfontein 082 573 8867 / Jacques van Zyl - Hoopstad 082 883 2630.
Baie dankie aan elke vrou wat deel is van ‘n Vrouebediening. Mag elkeen van julle júl lig laat skyn, hoop bring en ‘n verskil maak in jou gesin en gemeente.

Seënwense.
Béneli Pretorius
Voorsitter: Taakspan Vrouebediening

20/02/2020

Amanzi - 14-16 Februarie 2020

06/02/2020

Toerustingsgeleentheid 14 - 16 Februarie 2020 by Amanzi: Hier volg meer inligting, sowel as die program vir die naweek, 'n roetekaart na Amanzi is as 'n foto bygevoeg:

5 Februarie 2020
Goeiedag dames

Ek lees onlangs die volgende aanhaling: Choices, chances, changes: You must make a choice to take a chance or your life will never change. Die keuses wat ons in die lewe maak met die Vader as ons Leidsman, die kanse wat ons vat met Jesus as ons Stuurman en die veranderinge wat dit in ons gaan teweegbring met die Heilige Gees wat binne ons werk... dit is ‘n wonderlike vertroosting dat ons nooit alleen is nie!

Die Toerustingsgeleentheid by Amanzi (14 tot 16 Februarie 2020), wat oor minder as twee weke plaasvind, beloof om só ‘n geleentheid te wees. Mag elke dame wat die geleentheid bywoon, geïnspireerd deur die Heilige Gees en Geesvervuld, teruggaan na die onderskeie gemeentes en gemeenskappe om dáár Sy Woord en Werk voor te sit.

Ons gee graag die volgende inligting deur aangaande die Toerustingsnaweek:

1. ‘n ROETEKAART na Amanzi is op bladsy 2 van hierdie brief beskikbaar. Let asseblief daarop dat die pad vanaf Brandfort na Amanzi (± 15km), ‘n grondpad is. Dit is gewoonlik ‘n goeie pad, maar as dit reën kan dit dalk moeiliker begaanbaar wees. Ry asseblief stadig en moenie huiwer om ons te skakel, sou julle enige probleme op dié pad ondervind nie - Marietjie - 076 113 9601, of Béneli - 082 648 0653.
2. REGISTRASIE vind vanaf 15:00 tot 17:00 op 14 Februarie 2020 by die hoofgebou plaas.
3. Die terrein na die eetsaal het trappe - stel asseblief die persone by registrasie in kennis indien u nie die trappe sal kan klim nie - spesiale reëlings kan vir die etes getref word.
4. Die PROGRAM (sien bladsy 2 en 3 van hierdie brief), begin Vrydagmiddag stiptelik om 17:30 in die Sable Saal (kaart sal by registrasie voorsien word).
5. Bring die volgende saam:
• ‘n Bybel
• Muskietafweermiddel (NB!)
• KOSHUISINWONERS: Bring asseblief eie HANDDOEKE en ‘n WAAIER saam
• Die kamers het verkoelers, asook groot waaiers - as jy regtig iemand is wat baie warm kry, bring nog ‘n waaier saam!
• Bring asseblief koffie/tee, melk en suiker saam vir die laataandkuiers
• Daar is ‘n restaurant en winkeltjie op die terrein beskikbaar
• Kleredrag is gemaklik en informeel

Mag jul voorspoedig reis. Bid saam met ons vir hierdie naweek, dat elke spreker, sanger, tegniese personeel en die personeel van Amanzi, kalm sal wees en dat julle wat die kamp bywoon, deur die Hemelse Vader gelei sal word om Sy Woord te ontvang en daarmee uit te gaan na die wêreld.

Seëngroete.

Marietjie van der Merwe
Sekretaresse: Taakspan Vrouebediening

PROGRAM
TOERUSTINGSNAWEEK - AMANZI
VRYDAG 14 FEBRUARIE 2020

15:00 - 17:30 REGISTRASIE BY ONTVANGS
17:30 - 17:40 Konferensie opening (Sable Saal)
17:40 - 18:00 Verwelkoming en administratiewe reëlings (Sable Saal)
18:00 - 18:15 Voorstel van VVB
18:15 - 18:30 Lofprysing
18:30 - 19:30 Dr Frederick Marais
19:30 - 20:15 Aandete
20:15 Aandprogram: Boslapa - ‘n lekker verassing! Dr Frederick Marais/Ella Kotzé

SATERDAG 15 FEBRUARIE 2020

07:30 - 08:30 Oggendwyding - By drie Kruise op die koppie
08:30 - 08:45 Lofprysing
08:45 - 09:45 Dr Frederick Marais
09:45 - 10:00 Aanbieding deur Engo
10:00 – 10:30 Tee/Koffie
10:30 - 10:45 Lofprysing
10:45 - 11:45 Dr Frederick Marais
11:45 - 12:45 Engo - Vroeë Kindontwikkeling
13:00 - 15:00 Middagete, rus en kuier
15:00 - 15:15 Lofprysing
15:15 - 16:15 Dr Frederick Marais
16:15 - 16:45 Teebreek
16:45 - 17:00 Lofprysing
17:00 - 18.00 Dr Frederick Marais
18:00 - 19:00 Gemeenteprojekte
18:30 - 20:00 Aandete en kuier
20:00 Ella en Ellané

SONDAG 16 FEBRUARIE 2020

08:00 - 08:30 Bedankings
08:30 - 09:00 Lofprysing
09:00 tot klaar Nagmaal - Dr Frederick Marais

04/12/2019

Taakspan: Vrouebediening: Omsendskrywe 4/2019

Aan alle Vrouelidmate

Die uurglas van 2019 is vinnig besig om uit te loop. Baie dankie aan elke vrouelidmaat wat ‘n verskil gemaak het om lig vir die wêreld te wees.

Engo het hulle dank en waardering uitgespreek met die hulp wat hulle ontvang het tydens die lappopprojek vir die lappopfunksie. Die funksie was ‘n reuse sukses met die mooiste poppe wat die tafels versier het. Die poppe is tydens die geleentheid opgeveil en die fondse wat ingesamel is, was ten bate van die Jeugsorgsentrums. Baie dankie aan almal wat ook betrokke was by die “Vir Ons Kinders-projek 2019”. Dit is regtig vir ons ‘n voorreg om in vennootskap met Engo te wees.

Die hoogtepunt van 2019 was die droogte-bederfboks-projek vir boervrouens in die Noord-Kaap. Hierdie projek het nie net ‘n gebaar van “ek d**k aan jou“ meegebring nie, maar het vroue in beweging gebring. Dankie aan elke vrou wat met entoesiasme ‘n pakkie gepak het, of op welke wyse ookal ‘n bydrae gemaak het. Dankie dat ons die voorreg gehad het om die vragte vol van omgeeharte van die Vrystaatse Vroue, aan die vroue van die Noord-Kaap te kon gaan aflewer! Dit was voorwaar ‘n kosbare ervaring om so deel te wees van die gemeenskap van gelowiges. Die Vader se liefdevolle hart en hand was duidelik sigbaar in die projek as ons hoor van die verskil wat dit vir die Karoovroue maak. Kom ons hou aan om vir uitkoms vir ons medegelowiges in die droogtegeteisterde gebiede te bid.

Die reëlings vir die toerustingsgeleentheid te Amanzi tydens die naweek van 14 - 16 Februarie 2020 vorder goed. Ons het ‘n groot verwagting vir die naweek, bid asseblief saam met ons vir ‘n geseënde geleentheid. NB! Onthou ook asseblief van die uitstaande gelde wat teen die einde van Desember 2019 betaalbaar is - sien bankbesonderhede onderaan hierdie brief.

In die Kersseisoen is dit die gebed van die Vrouebediening dat almal gedurende die feestyd die vrede en vreugde van Christus sal ervaar. Mag elkeen van julle jul lig laat skyn, hoop bring en ‘n verskil maak in jou gesin, gemeente en omgewing.

Groete.
Béneli Pretorius
Voorsitter: Taakspan Vrouebediening

Bankbesonderhede vir Toerustingskursus - Februarie 2020
Rekeningnaam: NG Kerk Vrystaat
Bank: Nedbank Besigheidsdienste
Rekeningnr: 1 178 097 218
Takkode: 198 765
NB! Verwysing: VVB20 en gemeente se naam
Stuur inskrywingsvorm en betalingsbewys per e-pos na: [email protected]

21/11/2019

Projek Bederfbokse van hoop, troos, seën en genade. Die bokse is op 19 November 2019 by die Sinodale Kantoor in Bloemfontein deur Viking Transport gelaai en na Carnarvon vervoer, lees die volledige berig in Vrypos uitgawe 36.
Lees ook die berig wat Donderdag op Netwerk24 verskyn het by https://www.netwerk24.com/Nuus/Droogte/roerend-om-bederfboks-te-ontvang-se-boervrou-20191120

Description

21/11/2019

Projek Bederfbokse van hoop, troos, seën en genade. Die bokse is op 19 November 2019 by die Sinodale Kantoor in Bloemfontein deur Viking Transport gelaai en na Carnarvon vervoer, lees die volledige berig in Vrypos uitgawe 36. Lees ook die berig hieroor by https://www.netwerk24.com/Nuus/Algemeen/tonne-liefde-vir-boervroue-stroom-van-bloem-na-karoo-20191119

Description

28/10/2019

Toerustingsgeleentheid Februarie 2020: Ons herinner aan hierdie gewilde kamp wat tydens die naweek van 14 - 16 Februarie 2019 by Amanzi naby Brandfort, plaasvind. Die spreker tydens dié geleentheid is dr Frederick Marais wat aan die Communitas Netwerk verbonde is. Let wel, die besprekings vir hierdie geleentheid sluit nou op Maandag 4 November 2019. Klik op die volgende skakel vir die inskrywingsvorm (http://www.ngkerkvrystaat.co.za/documents/algemeen/Inskrywingsvorm%20-%20Toerustingskamp%2014-16%20Feb%202020.pdf)
NB! Alvorens julle enige gelde inbetaal, moet julle eers vir Marietjie van der Merwe op 076 113 9601 kontak om seker te maak van die beskikbaarheid van akkommodasie. Plekke is beperk, bespreek só spoedig moontlik. Die bespreking kan bevestig word met die betaling van ‘n 50% deposito nadat julle eers met Marietjie bevestig het - die uitstaande bedrag moet teen die einde van Desember 2019 betaal wees.
Let wel: Dagbesoekers wat Saterdag en Sondag se verrigtinge wil bywoon (nie oorslaap nie), betaal R450pp en diegene wat slegs Saterdag se verrigtinge wil bywoon, betaal R225pp. Kontak asseblief vir Marietjie van der Merwe op 076 113 9601 in dié verband.