04/29/2020
Pathian Bia: ZUMTU THLACAMNAK HMUAL {1NAK}
JOHN CEU MANG
Ka min in kawhmi ka mi hna nih khan an lung an tthumh i thla an cam i ka hmai kha an kawl i an lam tthalo khan an i mer ahcun, van khin ka run theih lai i an sualnak cu ka ngaihthiam hna lai i an ram cu ka damter lai. 2 Chanrelnak 7:14***
Nihin vawlei cung minung hna nih nifatin kan nunnak ah le hi vawlei harnak le buaibainak ah le a tu lio pulrai zawtnak kong ah hin kan tuah khawh taktak mi thil an um hna lo. Asinain zuamnak le van lei zohnak in kan tuah khawhmi a um, cucu pathian vialte hna lakah a nungmi Pathian, bawi vialte hna lakah Bawi bik Pathian, siangpahrang vialte hna lakah Siangpahrang asi mi Pathian sin khukbil thlacamnak tehi nihin zumtu hna nih vawlei harnak le buaibainak le zawtnak lak le nifatin kan nunnak caah kan tuah khawhmi a si. Hi kan tuah khawhmi te van lei zoh in zumhnak thlacam nun hi zeizong thil vialte nakin hmual a ngeimi le a tthawngmi thlacamnak a si. Hi kan tuah khawhmi thlacamnak hi zeitluk in dah hmual a ngeih i a tthawn ti ahcun hiti hin a si.
Hagar a ttahnak aw a theih piaktu hi Pathian a si. Hagar cu Sarah salnu asi i, Sarah nih fa a ngeih khawh lo caah amah aiah fa ngei dingin a va Abraham sinah lung thiang tein a pekmi a si. Sihmanhsehlaw caan a hung rauh tik i Hagar nih fa a hun pawi taktak tikah cun Sarah le Hagar karlak ah i lung hrinhnak tete a hung chuak. Hi lio Sarah le a salnu Hagar an karlak i buaibainak a um lio ah hin Hagar cu a bawinu Sarah sin hin voikhat zaam cu a zaam cang. Hi a zaam lio caan ah hin Pathian Vancung mi nih a rak ton bal cangmi Bawipa Vancung mi nih a chimh ning bantuk tein a bawinu Sarah sinah a rak kir than. Gen 16:7.9’. Sihmanhsehlaw Hagar nih a caan a phak tikah Fa Ishmael cu a hun hrin ko i caan zeimawzet cu nuam ngaingai in an um tti ko hna. Caan a hung kal deuh ve i Pathian nih Abraham le Sarah a kam vemi hna Fapa Isak cu an hun ngeih ve than tikah Sarah le Hagar karlak ahcun buainak le i theihthiam lonak a hung chuak than. Hi ti Sarah le Hagar an karlak i buainak le rem lonak a hung chuah than tikah cun Hagar le Ishmael cu an chungkhar in chuah an hau cang tikah cuti cun Hagar nih cun a bawinu Sarah inn chungkhar cu a chuah tak. Hagar nih cun a fapa Ishmael cu i puak in “Beer-sheba” ramlak ah a vai lengmang ko. Hi lio caan ah hin an i kenmi Ti nih a dih takah, Ishmael cu a ti a hal tuk cang asinain ti din awk a um ti ttung lo tikah Hagar nih cun a fapa a mithmuh i a tihal in a thih ding kha a duh lo caah burbuk toiah a chiah i lam hla nawn khin zeitik dah a thih lai tiah a hnga i, hi a thih hngak in a um lio caan ah hin a fapa Ishmael zong a tihal in a ttap i, Hagar zong cu lungthin ketkuai taktak in a ttap. {Hi lio Hagar nih lungthin ketkuai in a ttah lio hi Bible ahcun dik tak cun kan hmu lo nain Pathian sinah ttah buin thla a cam ve hrim ko lai tihi zumh a si. A ruang cu Pathian nih a ttahnak aw a theih piak hi a sawhsawh asi lo} Hagar le a fapa cu ti an ttah ko cu Pathian nih a theih hna caah Pathian nih cun Hagar cu a vun chawnh i, “Hagar zeicahdah na lungre a theih? Na thinphang hlah. Pathian nih ngakchiapa a ttah kha a theih cang. Gen 21:17b”. “Cun Pathian nih Hagar cu a mit kha khua a hun hmuhter i tikhor pakhat a hmuh. Gen 21:19a”
Hagar bantukin kannih zumtu Pathian fadawt vialte hna nih nifatin kan nunnak ah le hi vawlei harnak le buaibai, zawtnak le rawhralhnak lakah hin zumhnak in kan tuah khawhmi thlacamnak he, Hagar le a fapa ttahnak aw a theih piaktu hna a nungmi pathian vialte lak Pathian sinah mitthli le ttah buin siseh, thinlung ketkuai in thla kan cam asi ahcun kan thlacamnak hmual Pathian nih akan theih piak lai i, kan hmuh khawh lomi hmuh khawhnak Pathian nih akan pek lai. Kan lungretheihnak le thinphan thlalaunak vialte le taksa, thinlung, thlarau kan tihalnak vialte akan tei piak dih ko lai. Zawtnak chungin luatnak le damnak, harnak le lungretheihnak chungin lawmhnak le daihnak akan hmuhter lai i kan nun ram a damter ko lai. Zumtu Pathian fadawt hna nih kan tuah khawhmi thlacamnak hi hmual a ngeimi le a tthawnmi le Pathian lung a tong i thil zeizong a tuah khomi thlacamnak hmual a si. Bawipa nih sunparnak co ko seh. Amen
