https://www.facebook.com/101350511945519/

Father Boutros - أبونا بطرس, New York State Thruway, Utica, NY (2026)

02/14/2024

مزيف او حقيقي ...
شو هينة تسمع كلمة بحبك كل يوم بس قديش باقية هالبحبك مش معروف كم يوم
صرنا كتير عم نمرجح بالحُب طالع نازل لدرجة انو صار كلمة مبتذلة
في ناس بيكذبو علينا تيسكتونا بيقولولنا بحبك
و في ناس بيكسرو كل شي فينا من جوا و بيموتونا و بيقولولنا بحبك
الحُب يا جماعة ما بيتخبى و الحُب ما بينكشف ، الحُب سِر قَدَسو رب الكون وقت لي قال أحبوا بعضكم بعضا كما انا احببتكم
الحُب مش كلمة عالماشي ، الحب هوي مسيرة بتبلش هون و بتكفي هونيك
الحُب هو تلميذ عم يتعلم من استاذو خايف يضيع كلمة من تم الاستاذ
الحُب هو تاريخ انصبغ بالاعمال الحلوي و القِيَم و المبادىء و الاحترام و التضحية مش بالكلمات الفضفاضة عالفاضي
الحُب اذا ما كان حقيقي بيدَمِر و بيئذي و بيخلق جروحات ما بتشفى الا بالحُب
الحُب الحقيقي هو لي بيخلق من جديد و هوي لي بيبني و هو لي بيشفي و بيخلي القلب ينبض من جديد
خَلَقو يوم للحُب و سَموه valentine و الحُب ما بينحصر بيوم ولا ب valentine ، الحُب هوي كل يوم و كل لحظة و كل ثانية حاسس حالك عم تضحك من قلبك و عم تتنفس حياة لإخر لحظة بهالحياة و كل حُب و انتو بخير آمين ( بونا بطرس )

05/09/2023

فرق كبير ...
مش مهم نظرة العالم لإلك اذا انتا واثق بنظرتك لحالك
نظرة العالم أوقات بتكون نظرة غشاشة و بتخليك تعيش متل ما هني بدُن ، نظرة بتحبسك ، نظرة بتقتلك طموحك ، نظرة بتخليك توقف و ما تكفي المشوار . بس نظرتك بتعمل كل الفرق ، نظرتك بتخليك تحب حالك و توثق بحالك و تآمن انو قادر توصل لهدفك ، نظرتك بتغير الواقع و الظروف و بتخليك تنجح و تملي الدنيي نجاح ، نظرتك بتعطيك قوة انو ما تتأثر بحكي الناس شو عم بيقولو عنك و تصير تسمع انتا شو عم تقول عن حالك ، هالنظرة بتعمل فرق كبير بحياتك و فرق كبير بنفسيتك و اهم شي فرق كبير بصحتك ، بتصير انسان مليان حياة و مليان صحة و مليان فرح ، اكتر ناس تعبانين اليوم هني الناس لي بيظلمو حالُن و بيحكمو عحالُن و ما بيسامحو حالُن ما تكون من هالناس ، دايما شوف انو في شي حلو ، في شمس ، في شتي في لون بحياتك و حياتك مَنا أسود و أبيض و أهم شي تذَكَر شو قَلَك يسوع : جيت تتكون إلك الحياة و الحياة بشكل أحلى و أفضل ، و هيك نظرتك بتعمل كل الفرق ،آمين ( بونا بطرس )

11/14/2022

عايشين ...
في ناس عايشين تيحِبو و بتحِس اذا ما حَبو بيدبَلو
عايشين تيقولولَك أكلت و يتأكدو انك أكَلِت قبل ما ياكلو
عايشين تيُطمنو عَنَك لو كان عَندُن مليون شغلة لاهيِتُن
عايشين تيسمعو كيف كان نهارك و يعيشو معك فرحتو
عايشين تيشوفوك مبسوط و بينبسطو بس يشوفو ضحكتك
عايشين و بيطيرو من الفرح بس يشوفوك ناجح
عايشين تيفتحو عيونُن الصُبح و يسمعو صوتك
عايشين تيشوفو اذا تعبان و يبلشو ينِقو عراسك تترتاح
عايشين تيشوفو اذا وصلت عالشغل و اذا رجعت بخير عالبيت و اذا كان في عجقة عالطريق و اذا بيحضرولك العشا
هودي الناس صارو عملة نادرة ، عملة ما بتنشرى و لا بتنباع ، هودي الناس لي حتى لو كانت جاوي حالك بوَحل الحياة هني لي بيكونو محضرين دموعُن تينضفولك الوحل ، هودي الناس لي ما بيعرفو ينامو الا ما تنام و بتوعى بتلاقِيُن ناطرينَك تتقوم ، هودي الناس مجبولين بالحُب ، بيِبكو معك و بيفرحو معك ، و اذا انتا نجحت هني بيستلمو الشهادة و اذا انتا اكلت هني بيشبَعو و اذا انتا اتطَلَعِت فِيُن بتلاقي دمعة مع ضحكة مع قلب عم ينبض حُب بس لأنو عايشين كرمالك ، و انتا لي قادر تخليُن عايشين ، آمين ( بونا بطرس )

08/27/2022

ما فيها شي ...
نيالو لي اكتشف انو ما فيها شي هالدنيي
نيالو لي عم بيحُط راسو عمخَدِتو و ينام لأنو عِرِف انو ما فيها شي هالدنيي
نيالو لي ما بيخَلي مَحَل للجَدَل و المشاكل و بيضحَك كأنو عم بيقول ما فيها شي هالدنيي
نيالو لي عم يعرف يعيش نهارو بفَرَح و بسلام و مش عطلان هم شي لأنو مأكد انو ما بتحرز تزعل بهالدنيي
نيالو لي بيعرف يعِد النِعَم الزغيرة لي عندو ياها و يعرف قديش زغيرة هالدنيي
نيالو لي محَضِر حالو دايما حتى بس يدِق الباب يمشي المشوار دغري و ما ينطُر ولا لحظة بهالدنيي
قديش في ناس غرقانة بهالدنيي و الدني غرقانة فِيا ، غرقانة بالمصاري لي رح تبقى بهالدني ، غرقانة بالصُوَر و التياب و الجمال و كِلو باقي بهالدنيي ، غرقانة بالشهرة و كيف بدا تبَيِن عحساب غيرها و كِلو باقي هون ، غرقانة انو تُعرُض وين راحت و وين إجِت و هي عم بتدور بمطرح واحد اسمو هالدنيي ، يا رب انتا بتعرف كيف تملينا من السما و تفضينا من هالدنيي لأنو إخِر شي كلو رايح و الدنيي رايحة و انتا و هالسما باقي و خَليني معك لأنو ما فيها شي هالدنيي ، آمين ( بونا بطرس )

06/13/2022

كلنا منسأل ...
كلنا منسأل كيفك اليوم
منسأل كيف صحتك
منسأل كيف الأهل و العيلة
و منسأل كيف الشغل
منسأل كمان كيف كان العشا او الغدا
و كمان كيف كان المشوار
منسأل كيف ال gym😄
او كيف كان ال shopping
و كيف كانت السهرة
و كمان كيف كانت الطريق
بس
قلال لي بيسألو كيف صلاتك
كيفك مع الله
كيف كان القداس
كيف كانت السهرة الانجيلية
عم تقرا الانجيل
كيف مسبحتك مع العدرا
هالكيف إخوتي بتخلينا نجاوب من قلبنا لأنو بتخلينا نوقف بيننا و بين حالنا و نشوف اذا عنجد الله موجود بحياتنا دغري منجاوب كيفنا مع الله و اذا عم نشارك بالقداس اكيد رح كون مبسوط انقل خبرتي عن القداس و اذا عم صَلي و عم بُقرا الانجيل اكيد عم بكتشف و عيش خبرة جديدة ، و أنا بقِلكُن بس نكون مناح مع الله كل شي رح يكون منيح بحياتنا لأنو أطلبوا اولاً ملكوت الله و كل شيء يعطى لَكُم ،آمين ( بونا بُطرس )

05/19/2022

وقتا تكون مبسوط ...
وقتا تكون مبسوط بتحس حالك حلو و مرتاح بتحس قلبك بسلام و الدنيي مش سايعتك
وقتا تكون مبسوط بتتقبل كل الناس و بتصلي لكل الناس و بتعكس الفرح وين ما كنت
وقتا تكون مبسوط بيقطع نهارك بسرعة و حتى لو كنت تعبان بتحس حالك مليان حياة
وقتا تكون مبسوط ما بيهمك اذا مغيمة و عم بتشتي او مشمسة و السما زرقا
وقتا تكون مبسوط اللقمة الزغيرة بتشبعك و كل لي بيهِمَك مين عم ياكل هاللقمة معك
وقتا تكون مبسوط بتحس حالك قوي و ما في شي بيهِزَك و بتاخد كل قرار بحياتك بدون ما تندم
تتكون مبسوط لازم اول شي تقرر تكون مبسوط ، تقرر رغم كل شي انو ما حدا بيقدر ياخد فرحتك منك ، تقرر انو تضحك لو موجوع ، تقرر انو تكفي الطريق لو وقعت ، تقرر تخلي راسك مرفوع لو فشلت و تقرر تحكي عن القيامة لو عم تنصلب ، حلو الفرح و بشع الزعل ، نقي الحلو بحياتك و كِب البِشِع ورا ضهرك ، لأنو ما تنسى انو هوي قَلنا بإنجيل يوحنا: فَأَنْتُمْ كَذلِكَ، عِنْدَكُمُ الآنَ حُزْنٌ. وَلكِنِّي سَأَرَاكُمْ أَيْضًا فَتَفْرَحُ قُلُوبُكُمْ، وَلاَ يَنْزِعُ أَحَدٌ فَرَحَكُمْ مِنْكُمْ , آمين ( بونا بطرس )

03/26/2022

بَعدُن موجودين ...
بعدُن موجودين الناس لي بيهتمو لو ما بَدُن شي
بعدُن موجودين الناس لي بيأمنو انو اد ما الشر كِتِر بالعالم الكلمة الأخيرة للخير
بَعدُن موجودين الناس لي بيسألو عنَك و مش ناطرين شي مِنَك
بعدُن موجودين الناس لي بعدُن عم بيواجهو قسوة الحياة بضحكة و بنشكُر الله
بعدُن موجودين الناس لي عرفو انك عم تحكي بِضهرُن و ضَلو يسلمو عليك و يتمنولك الخير
بعدُن موجودين الناس لي انجرحو من أقرب الناس لإلُن و ما قدرو يبعدو
بعدُن موجودين الناس لي عارفينك انك ما بتحِبُن و ولا مرة حكيو عَنَك شي غَلَط
بعدُن موجودين ووحياتكُن مش هِبِل و مش أغبيا ، بعدُن موجودين لأنُن تعلمو و قريو بكتُب الحُب و المسامحة و ما خَلو كِتُب الحقد تُنحَط ببيوتُن ، بعدُن موجودين لأنُن كل ما كانو ينجرحو و يبكو كان في حُضن عم بيتكو راسُن عليه عم بيمَليُن حُب و ثقة ، بعدُن موجودين لأنو مِشيو ورا شخص كان عم ينزُف و يِنهان بس كان عم بيسامِح و يدفُق حُب ، بعدُن موجودين و لو قلال بس عارفين حالُن بصيص النور لي قادر يمحي العتمة و بعدُن موجودين .آمين (بونا بُطرس )

02/04/2022

اذا حاطط براسك ...
اذا حاطط براسك انو بكرا تبَلِش ما رح تبَلِش بحياتك
اذا حاطط براسك انو بكرا تتغَيَر رح تبقى متل ما انتا و ما رح تتغير
اذا حاطط براسك انو بُكرا تسامح خَيَك مش رح تسامِح و رح تضل تأجِل
اذا حاطط براسك انو بكرا تنَبِش عشريكة حياتَك بحِس رح تضَلَك أعزب كل حياتك
اذا حاطط براسك انو بكرا تحكي رفقاتك لي صَرلَك زمان مش حاكِيُن مش حا تحكيون و رح تضل ناسيون
اذا حاطط براسك انو بكرا تصَلي بحِس مش رح تصلي الا بس تكون عمخدِة الألم إخِر يوم
شو هالبُكرا لي داوخ الدنيي ، شو هالبُكرا يلي مش معروف كوعو من بوعو ، شو هالبُكرا يلي هوي وهم و مَنو حقيقة ، شو هالبُكرا يلي عم بيخَليك مكربِج بأرضَك و ما عم تعمل خطوة زغيرة ، شو هالبكرا لي بيقتُل القرار و التصميم و بيخَليك عايش أمَل مزَيَف ، إنسى بُكرا و تذَكَر اليوم ، اليوم بإيدَك و اليوم كل شي مقابيلَك و اليوم كل شي واضِح و اليوم انتا هَون ،حُط براسَك تبَلش اليوم لأنو ما منعرِف اذا في بُكرا بس إخِر شي بقِلَك اذا بَلَشت اليوم اكيد رح تقدِر تشوف البُكرا لأنو الله معَك اليَوم و بُكرا و لَإخِر يوم ، آمين ( بونا بُطرس )

01/03/2022

بِكل زاوية ...
بكل زاوية من بيوتنا في ذكريات و في قصص
بكل زاوية عشنا خبرية بعدنا منتذكرها لهلق
بكل زاوية في دمعة لإيام ما كانت حلوي و في ضحكة لإيام كانت روعة
بكل زاوية في كلمات ما بتروح من بالنا و في نصايح خَلِتنا نكون رجال و نكفي المشوار
بكل زاوية في صُوَر ما بتنمحى و في أسامي لو بَطَلِت عم تنذَكَر ما بتنتسى
بكل زاوية في درس تعَلمناه و في لقمة أكلناها و كانت اطيب لقمة
بكل زاوية في ناس كانت عم تتطَلَع عليك و عينا دايما عليك تَتِكبَر
بس في زاوية غير كل الزوايا هالزاوية يلي عليها كل القصص و كل الذكريات يلي بس تروح عليها بتحس حالك بالسما هالزاوية زاوية الصَلا يلي ركعنا فِيا و يلي ضَوينا شموع و يلي غَمضنا عيوننا و المسبحة كانت عم تاخدنا طلوع ، هالزاوية يلي كتبت حكاية ايمان و حُب و كتبت قصة بيت بآمِن بالرَب ، زاوية الله بيدَبِر وزاوية ما تخاف هوي معك و زاوية ما تفقد الأمل ، هالزاوية هيي لي بتهدي البيت و بتخلي الفرح و بتزيل المشاكل ، عم بسأل حالي اليوم ليش في ناس تعبانة و زعلانة و ما عم تحكي مع بعضها و يئسانة يمكن لأنو صَرلُن زمان ما ركعو بهالزاوية أو بطلِت هالزاوية موجودة بالبيت ، يا حَجَر الزاوية يسوع بارك كل البيوت و خلينا نركع من جديد بالزاوية تنحِس انو السما بعدا هون و بكل زاوية ،آمين ( بونا بطرس )

12/03/2021

هيدي نعمة ....
إنك تفَتِح عيونك كل يوم و تشوف انو بعد في شي تعملو هيدي نعمة
انك تقوم من تختك الصُبح و تشكر الله انك بِصحة منيحة هيدي نعمة
انك تفتَح تلفونك و تلاقي في ناس مصبحينَك هيدي نعمة
انك تشرب فنجان القهوة مع حدا و خاصة مع امك او بيك هيدي اكبر نعمة
انك توصل عشغلك بخير و تكون عندك أمل انو اليوم يوم جديد هيدي نعمة
انك تجوع بنُص النهار و تاكل لقمة تسند عقلبك هيدي نعمة
انك ترجَع عبيتَك بخير و تلاقي انو في سقف فوقك هيدي نعمة كبيرة
النعمة موجودة بس بَدَك مين يشوفها ، قولكم صابنا العمى و صرنا عم منفَتِش عغير نِعَم بحياتنا بس صدقوني كل شي من الله نعمة و لي بيشكر ربنا عالنِعَم الزغيرة و ما بينِق بيبَلِش يلاحِظ انو النِعَم عم تكبَر بِحياتو و لي من الله يا ما احلاه و نحن من ملئه أخذنا نعمة فوق نعمة و نهاركن مليان نِعمة ، آمين ( بونا بطرس )

11/19/2021

نيالو ...
نيالو لي بعدو قادر يعطي و ما يُنطُر شي بالمقابل
نيالو لي بيعطي من قلبو و ما بيعطي من جيبتو
نيالو لي بيعطي و بيختفي و ما بيهِمو حتى انو تشكرو لأنو بيعرف كيف رح ينشَكَر
نيالو لي بعدو بِآمِن انو العَطا مش بس مصاري و أكل كمان غَير قُصَص و أهَم
نيالو يلي ما بيفَكِر مرتَين بس بدو يعطي لأنو العطا مجبول جَبِل فيه
نيالو يلي بعدو بيبكي بس يشوف ناس بِحاجة و يشوف انو هوي قادر يلبي هالحاجة
نيالو لي بعدو ما بيقدِر ينام الا بس يحِس انو عِمِل لي لازم ينعمل و غَمَض عيونو
نيالو يلي اذا بيعطي شي للكنيسة ما منشوف اسمو اكبر من الشي لي عطاه بس بيشوف اسمو بِكتاب السما
ما تندَم ولا مَرَة انو عطيت حتى لو لي عطيتو ما بيستاهِل ، رَبنا شايف عطاءك
شو حِلو انك تكون مآمِن انو عَندك حساب غير كل الحسابات الفانية هالحساب ما بينحَسب عال ١٥٠٠ و لا عال ٣٩٠٠ و لا على سعر الصرف ، عالحساب هوي حياة أبدية ، مش مأخَر ابدا انك تفتح هالحساب اليوم و تعرف انو لي بيعطي الله بيعطيه و لي كريم الله بيِكرمو و حساب السما بعُمرو ما بيتسَكَر ، لا تكنزو لكم كنوز على الأرض حيث يفسِدُها ... بل اكنزو لكم كنوز في السماء و نيالو لي بيعطي للسما ، آمين ( بونا بُطرس )

Father Boutros - أبونا بطرس

02/14/2024

05/09/2023

11/14/2022

08/27/2022

06/13/2022

05/19/2022

03/26/2022

02/04/2022

01/03/2022

12/03/2021

11/19/2021

Address

Website

Alerts

Contact The Place Of Worship

Shortcuts

Share

Category