Qale Tsedq ZeTewahdo ቃለ ጽድቅ ዘተዋሕዶ

06/13/2026

በስመ አብ ወወልድ ወመንፈስ ቅዱስ አሐዱ አምላክ አሜን::

መግለጺ ኣብ ጉዳይ መርሶ ኣሕማር ቅዱስ ሚካኤል ቶሮንቶን ምልዓል ቅዱስ ታቦትን::

ካብ ሓሶትን ወረን ርሒቅና: ቃል ቤተ ክርስቲያን ንስማዕ::

"ሀበነ እግዚኦ አዕይንተ አእምሮ ወትረ ኪያከ ይርአያ፥ ወአእዛንነሂ ቃለ ዘባሕቲትከ ይስምዓ"

ኦ ጐይታ ንዓኻ ጥራይ ዝርእያ ኣዕይንቲ ልቦና ሃበና፥ ኣእዛና ውን ከምኡ ናትካ ናይ በይንኻ ቃል ጥራይ ዚሰምዓ ግበረልና

”ወደየ ንተግሣጽ ኣቦኻ ስምዓዮ: ንትምህርቲ ወላዲትካ ድማ ኣይትሕደጎ”(ምሳ 1፡8)፡

ንተግሣጽ ኣቦኻ ስምዓዮ ማለት እግዚአብሔር ዝህቦ ተግሣጽ ሸለል ምባል ማዕረ ክንደይ ዕሽነትን ጥፍኣት ምዃኑ፡ እግዚአብሔር ዝህቦ ተግሳጽ ምስማዕን ምትግባርን ከመይ ዝኣመሰለ መንፈሳዊ ጥበብ ምዃኑ እዩ ዝነግረና::

ቀጺሉ ንትምህርቲ ወላዲትካ ኣይትኅደግ በለ። ወላዲት ዝተባህለት ቤተክርስቲያና እያ።
ብመንፈሳዊ ምሥጢረ ጥምቀት ኣቢላ ብመንፈስ ዳግም ዝወለደትና ቅድስት ቤተ ክርስቲያና ወላዲትና ንብላ። ነዚ ኣመልኪቱ ድማ ጥበበኛ ሰሎሞን “ንትምህርቲ ወላዲትካ ድማ ኣይትኅደግ" ዝበለ ንወላዲት ዝተባህለት ቤተ ክርስቲያን ትምህርታ ሥርዓታ፡ ዶግማኣ ከምኡ'ውን ቀኖንኣ ምሕዳግ ሞት ስለ ዘለዎ ኣይትኅድግ ክብል ይመኽረና።

ኣብዚ ግዜ እንድሕር ርኢና ግና ንመራኸቢ ብዙኃን ኣብ ጥቅሚ ቤተ ክርስቲያን ኣብ ክንዲ ነውዕሎ: ዘየለ ወረን ሓሶትን ክዝርግሑሉ: ንቤተ ክርስቲያን ከጸልሙ: ንኣቦታት ክጸርፉ ዝውዕሉ ብሚድያ እዩ:

ንኣብነት ክርስቶስ ካብ ሞት ምስ ተንስአ: ጽቡቅ ወረ ኣይውረይን ነይሩ: እቲ ወረ ድማ ክርስቶስ ከምዘይ ተንስአ እንታይ ደኣ ደቂ መዛሙርቱ ከም ዝወሰድዎ እዩ ዝውረ ነይሩ: ነቲ ወረ ዘስፋሕፍሑ ዝነበሩ ድማ ሕጊ ኣፍረስቲ ፈሪሳውያን እዮም ነይሮም እዚ ድማ ጉቦ እንዳ ሃቡ እዩ ነይሩ: በዚ ሓሶትን ወረን ድማ ሕዝቢ ኣይሁድ ምእማን ተሸጊሮም: ክርስቶስ ናይ ብሓቂ ተንሲኡ ድዩ ወይስ ደቀ መዝሙርቱ እዮም ወሲዶሞ ብዝብል ሓሳባት ተወጢሮም ነበሩ::

ኣብዚ ሕጂ ግዜ ድማ ብዙሓት መእመናንን መእመናትን ንቤተ ክርስቲያን ምእማን ዘሸግሮም ዘሎ ንቤተ ክርስቲያን መሲሎም: ንቤተ ክርስቲያን ክጸርፉ ከጸልሙ ዝውዕሉ: ኣብ ሚድያ ከቢቦምዋ ስለ ዘለው ክንጥንቀቅን ናይ ቤተ ክርስቲያን ቃልን ድምጽን ጥራይ ክንሰምዕ ኣለና: ሔዋን ኣብ ክንዲ ናይ ፈጣርን ሰብኣያን ድምጺ ትሰምዕ: ካልእ ድምጺ ንዓኣ ዝሓልየላ መሲሉ መርዚ ዘለዎ መልእኽቲ ኣብ ዝሰመዓትሉ ግዜ ውድቀት መጸ: ካብ እግዚአብሔርን ገነትን ወጹ::

ንሕና ድማ ናይ ቤተ ክርስቲያን ድምጺ ጥራይ እናሰማዕና ካብዞም ንቤተ ክርስቲያን ከጸልሙ ዝውዕሉ ንላዕሊ ዓብሊልና ዓቅምና የሕይልና ክንሰርሕ ኣለና:: ካብዚ ሓዋርያዊ ሰንሰለት ካብ ቅዱስ ሲኖዶስ ዝወጸ እንድሕር ኮይኑ: እዚ ናይ ቤተ ክርስቲያን ኣይኮነን: ንቤተ ክርስቲያን ዝጸርፍ: ንኣቦታት ንመራሕቲ ሃይማኖት ዝጸርፍ: ንማኅበረ መእመናን ዝጸርፍ ናይ ቤተ ክርስቲያን ኣይኮነን: ነዲኡ ዝጸርፍ ሰብ እንታይ ይበሃል: ዝኾነ ሰብ ኣዲኡ ክትጽረፍ ዝደሊ ኣሎ ድዩ ዋላ ጉድለት ይሃልዋ ኣብ ውሽጢ ጌርካ ኢኻ ትፈትሖ: ወሊዳ ዘዕበየትካ ኣዴኻ እያ: ቤተ ክርስቲያን ተጣዒሱ ተነሲሑ ናብኣ ንኽምለስ ድማ ኩሉ ግዜ ትጽበይ እያ ዘላ::

ብሕጊ ምንባር ግድን ድዩ? ወዲ ሰብ ኣብዛ እንነብራ ዓለም ብሰላምን ተኸባቢሩ ክነብር እንተድኣ ኮይኑ ሕጊ ክህሉ ግድን እዩ። ምፍራስ ሕጊ ዘስዕቦ ጉድኣት ኣዝዩ ብዙሕ እዩ። ጉድኣቱ ምድራዊ ጥራይ ዘይኮነስ ሰማያዊ ጉድኣት’ውን ኣለዎ። እቲ ሰማያውን ሓጋግ ሕግን ዝኮነ እግዚኣብሄር ኣምላኽና፡ ነታ ቀዳመይቲ ስድራቤት (ኣዳምን ሄዋንን) ዝሃባ ሕጊ ብዘይ ምእዛዝ ዘምጽእዎ ጉድኣት ኣዝዩ ከቢድ ምዃኑ ኣብ ዘፍ 3፡14-19 እንተ ተመልከትና፡ ጉድኣቱ ማዕረ ክንደይ ዓቢይ ከም ዝኾነ ይነግረና። ምፍራስ ሕጊ መቅጻዕቲ ስለ ዘስዕብ ወዲ ሰብ እንሆ ተሰካሚ ተዋራራሲ ሓጢኣት ሞት ኮይኑ ይነብር ነበረ። ካብታ ብሓጎስን ብደስታን ንኽነብርዋ ዝተዋሃበቶም ገነት፡ ተደርብዮም ካብ ክብሪ ናብ ሓሳር፡ ካብ ጽጋብ ናብ ጥሜት፡ ካብ ሓጎስ ናብ ሓዘን፡ ካብ ምርቓ ናብ መርገም፡ ካብ ትብዓት ናብ ፍርሃት ከም ዘውደቆም ነንብብ።

እግዚኣብሔር ነቶም ሕጉ ኣፍሪሶም ካብኡ ዝረሓቑ ሕዝቢ “ናባይ ተመለሱ እሞ ኣነ ድማ ክምለሰኩም እየ’’ ከምዝበሎም፡ ካብ ሕጊ ቤተ ክርስቲያን ርሒቅና ዘለና ብንስሓን መንፈሳዊ ጣዕሳን ተመሊስና: ንእግዚኣብሔርን ቤተ ክርስቲያንን ብቅንዕናን ትሕትናን ከነገልግል ንሕዝብና ክንድብስ ሕጂ’ውን ግዜ ንጠቀመሉ። ሕጊ ፈሪሱ ከሎ ‘’ኃጢኣት የብልናን እንተ በልና ግና ንገዛእ ርእስና ንጥብር ኣሎና እታ ሓቂ ኸኣ ኣባና የላን’’ (1 ዮሓ 1፡8)

ንሕና ድማ ከም ክርስትያን ክንበኪ ዘለና ናብ ልዑል እግዚአብሔር እዩ: ኣብ ግዜ ጾም ከም ዘለና መሰረት: ብጾምን ጸሎትን ክንተግህ፡ ካብ ናብ ሚድያ መጺና ዘየለ ንዛረብን ንበኪን: እቲ ዝበለጸ ኣብ ውሽጢ ቤተ መቅደስ እንተ ዝበኪ ብንስሓን ጣዕሳን ኩሉ ነገር ይቕየር እዩ።

ቅድስቲ ቤተ ክርስቲያንና ኣብ እዋን መከራ እትዕንብብ ዕንበባ እያ። ኣእማን ኣብ ዝውርወሩላ ቤተ መቅደስ እትሓንፅ: ኵናት ኣብ ዝስኩዕላ ከም ቅዱስ ያሬድ እተዝይም መርዓት እያ። እንተ ኽኢልና ጸገም እንድሕር ኣሎ ኣብ ጎና ኮይና ንፍትሓዮ: እንተ ዘይክኢልና ድማ ጸገማ ካብ ምዃን ስቕ ንበል። እንተ ንኣሰ ነፍስና ፈቲሽና ንስሓ ኣቲና ናይ ባዕልና ክዳን ንሕጸብ ሽዑ ጊዜ ኩሉ ሰላም ክኸውን እዩ።

ስለዚ እምበአር ትምህርቲ ወላዲትና ብምሕዳግ ኣብ ናይ ሞት ጐዶና ዘለና ሎሚ ኪንምለስ ኣዴና ትጽውዓና ኣላ። ተግሳጽ ኣቦና ክንሰምዕ ትምህርቲ ወላዲትና ከይንሓድግ እግዚአብሔር ምስትውዓልን መንፈሳዊ ጥበብ ይዓድለና።

"ሀበነ እግዚኦ አዕይንተ አእምሮ ወትረ ኪያከ ይርአያ፥ ወአእዛንነሂ ቃለ ዘባሕቲትከ ይስምዓ"

ኦ ጐይታ ንዓኻ ጥራይ ዝርእያ ኣዕይንቲ ልቦና ሃበና፥ ኣእዛና ውን ከምኡ ናትካ ናይ በይንኻ ቃል ጥራይ ዚሰምዓ ግበረልና

- ቃለ ጽድቅ ዘተዋሕዶ (ወግዓዊት መርበብ ሓበሬታ ናይ ኤርትራ ኦርቶዶክስ ተዋሕዶ ቤተ ክርስቲያን ሃገረ ስብከት ሕቡራት መንግስታት ኣሜሪካን ካናዳን)

06/11/2026

ክብረ በዓል ቤተክርስቲያን ልደታ ለማርያም ብኽብ ዝበለ ሥነ ሥርዓት ተባዒሉ::

ኣብ ሃገረ ስብከት ኣሜሪካን ካናዳን፣ ንኡስ ሃገረ ስብከት ምዕራብ ኣሜሪካ ኣብ ዴንቨር እትርከብ ቤተ ክርስቲያን ልደታ ማርያም ዓመታዊ ናይ ልደት ኣዴና ቅድስት ማርያም ክብረ በዓል ብዕለት 1ን 2ን ግንቦት 2018 ዓ .ም.ግ (8-10 ግንቦት 2026 ዓ .ም. ፈ) ብመሪሕነት ብጹዕ ኣቡነ ኤልያስ ጳጳስ ሃገረ ስብከት ሕቡራት መንግሥታት ኣሜሪካን ካናዳን
ብድምቀት ተጸምቢሉ።

ብጹዕ ኣቡነ ኤልያስ ኣብ ዘለውሉ ድሮ ዋዜማ ዓርቢ ሰዓት 4: 00 ኣጋምሸት ምስቶም ካብ ዝተፈላለያ
ግዝኣታት ክፍለ ሃገራት ኣሜሪካ ከብዕሉ ዝመጹ ሊቃውንት ውሉደ ክህነት ድማ ብሓባር ንታሪኽ ክብርን ቅድስናን ኣዴና ቅድስት ድንግል ማርያም ዝምልከት ጣዕመ ዜማ ዘለዎ ዋዜማ ድሕሪ ምብጻሕ ብጸሎት ተዛዚሙ።

ንጽባሒቱ ለይቲ ሰዓት 1:00 ቤተ ክርስቲያን ተደዊሉ ብምንቃሕ ሊቃውንት ንክብሪ በዓል ኣዴና ቅድስት
ድንግል ማርያም ዝምልከት ንልቢ ዝምስጥ ሥርዓተ ማኅሌት ተምሳል መላእክትን ኮይኖም ከብጽሑ ድሕሪ ምሕዳሮም: ብመሪሕነት ብጹዕ አቡነ ኤልያስ ሥርዓተ ቅዳሴ በጽሐ: ብዝወጸ መርሓ ግብር መሠረት ድኅሪ ቅዳሴ፡ ናይ ዕለቱ ትምህርቲ ብመርጌታ ዘለአለም ካብ ፖርትላንድ ኦሬጎን ‘’ዮም ፍሰሐ ኮነ በእንተ ልደታ ለማርያም’’ ብዛዕባ ልደታ ናይ ቅድስት ድንግል ማርያም ዝምልከት ኣርእስቲ ትምህርቲ ብዕምቆት ቀሪቡ:: ካብዚ ብምቕጻል ብጹዕ አቡነ ኤልያስ ቃለ ቡራኬን ማዕዳን ሂቦም::

ከምኡ ውን ነዚ ክብረ በዓል ድምቀት ዝወሰኸሉ 7 መንእሰያት ንመዓርገ ዲቁና: 1 ዲያቆን ድማ ንመዓርገ ክህነት ቀቢኦም:: ካብዚ ብምቅጻል ኣማሓዳሪ ቤተክርስትያን ልደታ ለማርያም ቀሲስ ብሥራት ኣስማት ዑዱማት ኣጋይሽን ምስ ምእመናንን ምእመናትን ቤተ ክርስቲያን ኣላልዮምን ኣመስጊኖምን።

ብምቕጻል ታቦተ ሕጉ ብጳጳስ ብጹዕ ኣቡነ ኤልያስ ብኽብሪ ተዓጂቡ ኣብ ቀጽሪ እቲ ቤተ ክርስቲያን ብለባስያን ቤተ ክህነትን ሊቃውንትን: ብመንእሰያት ትምህርቲ ሰንበት ድሙቕን መሳጥን መዝሙራት እናኣቕረቡ: ኣዴታትድማ ብዕልልታን ምኅለላን ብኃባር ድኅሪ ምዕዋዶም፡ ሰላመ ኣብ ተባሂሉ ጸሎተ ምህለላ በጽሐ። ታቦተ ሕጉ ናብ መንበሩ ብክብሪ ምስ ተመልሰ: ብሰበካ ጉባኤን ሕዝብን ዝተዳለወ ናይ ዕለቱ መኽፈልቲ ብምኽፋል ድማ መደብ ናይቲ በዓል ብናይ ብፁዕነቶም ቡራኬን ሥርየትን ተፈጸመ።

06/10/2026

መመረቅታ ቤተ ክርስቲይን ደብረ ሣህል ቅዱስ ሚካኤል ባፍሎ ኒዮርክን ከባቢኣን ብክብ ዝበለ ሥነ ስርዓት ተባዒሉ።

ኣብ ሃገረ ስብከት ሕቡራት መንግስታት ኣሜሪካን ካናዳን እትርከብ ደብረ ሣህል ቅዱስ ሚካኤል መመረቅታ ሓድሽ ህንጻ ቤተ ክርስትያን ብዕለት 9-10ግንቦት 2026 ዓ/ም/ፈ (2-3ግንቦት 2018 ዓ/ም/ግ) ብመሪሕነት ብጹዕ ኣቡነ ኤልያስ ጳጳስ ሃገረ ስብከት ኣሜሪካን ካናዳን ብድምቅ ዝበለ ሥርዓት ተጸንቢሉ::

ብዕለት 9 ግንቦት ካብቲ ዝነበረ ቤተ ክርስትያን ናብቲ ሓድሽ ቤተ ክርስቲያን ብሊቃዉንትን ዲያቆናትን ኣቦታትን ኣዴታትን መዘምራንን ሰዓት 5 ድሕሪ ቀትሪ እንዳዘመሩን እንዳዓለሉን ንታቦት ብክብሪ ኣእተውዎ: ብድሕርዚ ብብጹዕ ኣቡነ ኤልያስ ጳጳስ ሕቡራት መንግስታት ኣሜሪካን ካናዳን ስርዓተ ተቀብዖ ሓድሽ ቤተ ክርስትያን ተፈጸመ::

ካብዚ ብምቅጻል ዋዜማ ሰዓት 5:30 ድሕሪ ቀትሪ ቆይምም ንክብሪ ታቦትን ሕንጸተ ቤተ ክርስትያንን ዝገልጽ ጣዕመ ዜማ ዘለዎ ዋዜማ ድሕሪ ምብጻሕ ብጸሎት ተዛዚሙ: ንጽባሒቱ ለይቲ ሰዓት 1:00 ቤተ ክርስቲያን ተደዊሉ: ካብ ኣሜሪካን ካናዳን ዝመጹ ሊቃውንት ብምንቃሕ ንልቢ ዝምስጥ ሥርዓተ ማኅሌት ተምሳል መላእክትን ኮይኖም ከብጽሑ ድሕሪ ምሕዳሮም ብመሪሕነት ብፁዕ ኣቡነ ኤልያስ ሥርዓተ ቅዳሴ በጽሐ: ብዝወፀ መርሓ ግብር መሠረት ድኅሪ ቅዳሴ፡ ብተመሃሮ ትምህርቲ ሰንበት ናይ ነኣሽቱን ማእከሎትን ዓበይትን መዝሙር ቀረበ፡ ድሕሪኡ ድማ ናይ ዕለቱ ትምህርቲ ብሊቀ ብርሃናት ቀሲስ ይብራህ ጎይትኦም ነቲ ዘመንን ዕለትን ዝሰማማዕ ትምህርቲ ቀሪቡ::

ካብዚ ብምቕጻል ብፁዕ አቡነ ኤልያስ ጳጳስ ሃገረ ስብከት ሕቡራት መንግስታት ኣመሪካን ከናዳን ፡ ቃለ ቡራኬን ኣባታዊ ምክርን ማዕዳን ሂቦም: ብምቕጻል ታቦተ ሕጉ ብጳጳስ ብጹዕ ኣቡነ ኤልያስ ብኽብሪ ተዓጂቡ ኣብ ቀጽሪ እቲ ቤተ ክርስቲያን ብካህናትን ሊቃውንትን ብመንእሰያት ትምህርቲ ሰንበት ድሙቕን መሳጥን መዝሙራት እናኣቕረቡ ኣዴታት ድማ ብዕልልታን ምኅለላን ብኃባር ድኅሪ ምዕዋዶም፡ ሰላመ ኣብ ተባሂሉ ጸሎተ ምህለላ በጽሐ። ድሕሪኡ ድማ ብሰበካ ጉባኤን ሕዝብን ዝተዳለወ ናይ ዕለቱ መኽፈልቲ ብምኽፋል ድማ መደብ ናይቲ በዓል ብናይ ብፁዕነቶም ቡራኬን ሥርየትን ተፈጸመ።

06/10/2026

ክብረ በዓል ደብረ ሰላም መድኃኔ ዓለም ቤተ ክርስቲያን ግራንድ ራፒድስ ሚሺጋን ብድምቀት ተኸቢሩ።

ክብረ በዓል ናይታ ኣብ ክፍሊ ግዝኣት ሚሺጋን ከተማ ግራንድ ራፒድስ እትርከብ ቤተ ክርስቲያን ደብረ ሰላም መድኃኔ ዓለም፣ ካብ ዝተፈላለያ ከተማታት ኣሜሪካ ዝመጹ ካህናትን መማህራንን፡ መንእሰያት ቤት ትምህርቲ ሰንበትን፡ ምእምናንን ምእምናትን ኣብ ዝተረኽብሉ ካብ 23-24 ሚያዝያ 2018 ዓ.ም.ግ (05/01/2026 - 05/02/2026 ዓ.ም. ፈ) ብመሪሕነት ብፁዕ ኣቡነ ኤልያስ ጳጳስ ሃገረ ስብከት ኣሜሪካን ካናዳን ብድምቀት ተጸምቢሉ።

እዚ ብምእመናን ካብ ነዊሕ ጊዜ ምድላዋት ክግበረሉ ዝጸንሐ ዓመታዊ ናይ ንግደት ክብረ በዓል፣ ዓርቢ ሰዓት 4:00 ድኅሪ ቀትሪ ዋዜማ ተቖይሙ። ብፁዕ ኣቡነ ኤልያስ ኣብ ዘለውሉ ምስቶም ካብ ዝተፈላለያ ግዝኣታት ዝመጹ ሊቃውንት ውሉደ ክህነትን ብሓባር ንታሪኽ ክብርን ቅድስናን መድኃኔ ዓለምን ቅዱስ መስቀልን ዝምልከት ጣዕመ ዜማ ዘለዎ ዋዜማ ድሕሪ ምብጻሕ፣ ስብሐተ እግዚአብሔር በጺሑ ብጸሎት ተዛዚሙ።

ንጽባሒቱ ቀዳም ለይቲ ሰዓት 2:00 ቤተ ክርስቲያን ተደዊሉ ብምንቃሕ፣ ሊቃውንቲ ንክብሪ መድኃኔ ዓለምን ቅዱስ መስቀልን ዝምልከት ንልቢ ዝምስጥ ሥርዓተ ማኅሌት ብትግሃትን ተምሳል መላእኽትን ኮይኖም ከብጽሑ ድሕሪ ምኅዳሮም፣ ብመሪሕነት ብፁዕ ኣቡነ ኤልያስ ጸሎተ ቅዳሴ ተሠሪዑ።
ብተማሃሮ ቤት ትምህርቲ ሰንበት መዝሙር ምስ ቀረበ ነቲ ዕለት ዝምልከት ትምህርቲ ብቀሲስ መሓሪ ቀሲስ ኪዳነማርያም ተዋሂቡ። ድኅሪ ቅዳሴ ድማ ብፁዕ አቡነ ኤልያስ ጳጳስ ሃገረ ስብከት ሕቡራት መንግስታት ኣመሪካን ከናዳን ቃለ ቡራኬን ኣባታዊ ምክርን ማዕዳን ሂቦም። ነዚ ዕለት ድምቀት ዝወሰኸሉ ድማ: ሓደ ዲያቆን ዝነበረ መዓርገ ክህነት ተቀብአ::

ካብዚ ብምቕጻል ታቦተ ሕጉ ብብፁዕ ኣቡነ ኤልያስ ብዓቢይ ክብርን ኣገባብን ተዓጂቡ፣ ብመሪሕነት ሊቃውንትን፡ መስቀልን ጽንሐሕን ዝኃዙ ለባስያንን ውሉደ ክህነትን፡ ማኅበረ ምእመናንን ምእመናትን ተዓጂቡ ኣብ ቀጽሪ ቤተ ክርስቲያን ዘይሩ ኣብ ዝተዳለውሉ ዓውደ ምሕረት ቆመ: መንእሰያት ቤት ትምህርቲ ሰንበት ድሙቕን መሳጥን መዝሙራት እናኣቕረቡ፣ ኣዴታት ድማ ብዕልልታን ምኅለላን ብኃባር ድኅሪ ምዕዋዶም፣ ሰላመ ኣብ ተባሂሉ ሊቃውንቲ ለዘብ ብምልዛብ ኣሸብሺቦም።

ናይቲ ዓመታዊ ናይ 2026 ዓ.ም.ፈ ንግደት ክብረ በዓል ፍጻሜ ብጸሎተ ምህለላን፣ ብናይ ብፁዕነቶም ኣባታዊ ቡራኬን ሥርየትን ብሰላም ተፈጸመ።

06/07/2026

ሌላን ዙር ሓድሽ ገዳም ተስፋ ስዱዳን ገዳም ደብረ ሲና:
A tour of the new monastery Hope of the Exiled Debre Sina Monastery.

ናይ መጀመርታ ኤርትራ ገዳም ኣብ ዓዲ ስደት ነዚ ይመስል::
A look at the very first Eritrean Monastery in the diaspora.

Eritrean Orthodox Tewahdo Church Diocese of the USA & Canada!!ናይ ኤ...

05/29/2026

Blessed Annual Feast of our Lady the Virgin Mary’s at Debre Mitmaq in Egypt!

Gunbot 9, 2018 (May 17, 2026) history was made with the grand inauguration of the Tesfa Sedudan Debre Sina Monastery in the USA. Led by His Beatitude Abune Elias, Bishop of the USA & Canada, the monumental event coincided with the 18th Annual Diocese Assembly. The historic celebration was celebrated with Mr. Gebrehiwet (Eritrean Embassy Executive Affairs Officer), Managing Director of the diocese Fr. Michael Teklay, Diocesan Administration, sub-dioceses, the administrator of Holy Trinity parish in DC Abba Gebreselassie & numerous fathers, scholars, & faithful congregants.

The historic day commenced with opening prayers by His Beatitude, followed by a procession where the Ark was escorted to its new home for the anointing ceremony. As midnight arrived, church bells echoed across the monastery. Church scholars gathered inside, spending the night chanting vibrant hymns & songs of praise until dawn. Following the reading of miracles, the Divine Liturgy was celebrated under Abune Elias’s leadership.

Following the liturgy & hymns performed by local Sunday School youth, a special message of congratulations from His Holiness Abune Basilios I, the 6th Patriarch of Eritrea was read:

"First of all, the leaders of this diocese..have worked together to pass on the Orthodox Tewahdo faith of ‘the Only-Begotten’..to the new generation without distortion in these few years under the leadership of His Beatitude Abune Elias.. working diligently to establish the first great monastery in the United States."

His Holiness emphasized the urgency of safeguarding the younger generation from secularism by fostering a strong, operations-and-technology-driven diocesan infrastructure.

Fr. Michael Teklay expressed profound gratitude to the Monastery Committee & regional churches (IN, Cincinnati, Columbus, & KY), highlighting the incredible reconciliation & development achieved under Abune Elias over the last 4 years. Fr. Merhawi Beyene later delivered a moving sermon, urging the faithful to cherish & care for this sacred sanctuary.
The groundbreaking day concluded with certificates of appreciation, ordination of 18 new deacons & a final, joyous Ark procession.

05/28/2026

Christ is risen! Truly He is Risen!

The 21st Annual Sunday School Conference has arrived!
Under the theme verse:
"Draw near to God and He will draw near to you"
James 4:8

The conference will be hosted by Debre Genet Kidane Mihret Indianapolis Indiana on the same weekend it is every year! July 31st-Aug 2nd.

May God allow the conference be in the likeness of our saintly fathers assembly.
Come in peace!

05/28/2026

ክርስቶስ ተንሥአ እሙታን፦ በአማን ተንሥአ እሙታን፦

ናብ መበል 21 ዓመታዊ ጉባኤ ዘብጸሓና እግዚኣብሔር ክብርን ምስጋናን ይኹኖ፦

“ንኣምላኽ ቅረብዎ፡ ንሱ ውን ክቐርበኩም እዩ”
ያዕ 4:8

ኣብ ትሕቲ ዝብል መሪሕ ቴማ መበል ፳፩ ዓመታዊ ጉባኤ ቤት/ት/ሰ/ሃ/ስብከት ሕቡራት መንግስታት ኣሜሪካን ካናዳን ካብ ሓምለ 31 ፡ ነሓሰ 2 (July 31-Aug 2) ኣብ ቤተክርስቲያን ደብረ ገነት ኪዳነ ምሕረት ኢንዲያናፖሊስ ኢንዲያና ክካየድ እዩ።

ኣምላከ ቅዱሳን ጉባኤ ሓዋርያት ኣቦታትና ይግበረልና።
ብሰላም የራኽበና፦

05/27/2026

መመረቕታ ናይ መጀመርያ ገዳም ወጻኢ ኤርትራ | Inauguration of the 1st Monastery outside of Eritrea