05/12/2026
Si’i Kaunga Fononga mo e ‘Eiki,
Ko e koloa folofola eni mei he Halanga Tapuaki ke ne tataki ‘etau fononga. Fakatauange ‘e hoko mai ha tapuaki pea tataki kitautolu’e he ‘Otua Mafimafi he hala ‘o fakatatau ki he finangalo ‘o e ‘Otua.
‘Ofa atu mo e lotu,
Mōnite, Me 11: Lau Folofola – Saame 68: 1-10, 32-35.
Ki’i Ama: Saame 68: 5-6, “Ko e tamai ki he tamai mate, Mo e fakamaau ‘oku tokanga ki he fefine uitou; Ko e ‘Otua ia ‘i hono ‘afio‘anga toputapú. ‘Oku ‘ai ‘e he ‘Otuá ‘a e teka noa ke nofo fale, ‘Okú ne tukuange ‘a e ha‘isia ke tu‘umālie; Ngata pē ‘i he angatu‘ú ‘oku nau nofo ai pē ‘i he fonua mamaté.”
Pou ʻAo: Kuo tau a`u mai ki he uike `oku faka`ilonga`i ai `i he Tohi Mahina faka-Kalisitiané `a e `Aho `o e Hā`ele Haké ‘i he Tu’apulelulú. ‘Oku fakamatala’i `e Toketā Molitoní `a e Hā’ele Haké, “Sīsū ne hā`ele hake. Mo`usioa pe `a e kakai. Hifo mai `a e `Aó, `o `ave ki he matapa `o langi. `Aukau mai fa`ahinga tapu, `O nau tali he vavaá, Ke momoi `Ene `alu, Ki he Kolo Ta`engata” (Himi 611: 1). Pea ‘oku tokoni `a e ngaahi lēsoni ‘o e uiké ke fakaa`u mai `a e nāunau ko iá, `o hangē ko e Saame `oku tau fakalaulauloto ai he ‘ahó ni. “Ko e Hiva ki he Ikuna `a e Fonua He Taú,” pea mo e uki ke fai `a hono fakahikihiki ke taau mo hono fu`u mafí. Ko e `Otua kuó ne laiki `a e tukui fonuá mo honau ngaahi `otuá. Ko e fu`u mafi ai pe ko iá `okú ne holoholo `a e lo`imata `o e tamai maté, peá ne taukapo`i `a e fefine uitoú, “teka noa” mo e “ha`isia.” Ko e lotu mo`oní, ko e kaungā ‘inasi fakataha mo e `Otua `o e mo`ulaloá. Kuo tau a`u mai ki he kuonga `oku liliu ai `a e tūkunga `o e sosaietí `o toe lahi ange `a e kau “mo`ulaloá.” Mahino `aupito ia `i he ngāue ‘oku fai ‘e he ICE ki hono fakaehaua e totonu fakakonisitutone ‘a e kau nofo fonuá ‘o tatau pe mo kinautolu ‘oku ‘ikai ke nofo fakalaó. Kuo ‘alu eni ke mahina ua e tau mo Iran pea kuo toe ‘alu ai ki ‘olunga e totongi ‘o e koloá koe’uhi ko e hiki ‘a e loló pea `okú ne uesia e tu’unga faka’ekonomika fakamamani lahi. ‘Oku tau fakamālō pe he ki’i taimi ‘oku fai ai e felotoi ke alea’i ha melino he vā ‘o Iran, ‘Isileli mo ‘Ameliká ni pea tatau pe mo e vā ‘o Palesitaine (Lepanoni) mo ‘Isilelí. Pea neongo `oku `ikai ke tau ma`u ha sitetisitika tonu, ka `oku hokohoko `aho `a e mole `a e ngaahi mo`ui `o lahi mo e pekia `a e to`u lotolotó, pea tokolahi ange `a e kau tamai maté, mo e kau uitoú. `Oku a`u mai mo e liliu `i he mo`ui fakaesinó pea fakalalahi `a e kau mahamahakí pea mo kinautolu si’otau ngaahi ‘ofa’anga ‘oku mo’ua he ngaahi mahaki ‘oku te’eki ai ma’u hano faito’ó ‘o hangē ko e kanisā. Ka `oku kei a`u tonu pe `a e fakalotolahi `a e fatu Saamé kiate kitautolu `o fakamanatu mai `oku tau fononga mo e fu`u Mafi `o e Ikuná, ka ko e Taukapo ki he vaivaí mo e li`ekiná. Kuo pau pe ke tau fou `i he faingata`a, ka `oku “Fakaivia (kitautolu) ‘e he Ngaahi Me’a’ofa Fungani ‘a e ‘Otuá: (pea) Taki ‘e he Laumālié he lotolotonga e Tauha’a ‘a e faingata’á”. ‘Oku tau fakafeta’i pē, he lolotonga hono fepalekina kitautolu `e he faingata`a `o e fili `oku `ikai ke tau sio ki aí, ‘oku kei tu’u pe ‘etau falala mo e fakatu’amelie ‘i he `Otua `okú ne kau ma’u pē mo e kau faingata`iá. Pea tau loto lahi ai, ke kau mo Ia, `o fai ha ki`i ngāue si`i ke ne hākeaki`i ha taha kuó ne a`usia `a e faingata`a `o e kuongá ni. Tuku ki he Laumālie Mā`oni`oní ke ne taki ‘etau fonongá `i he `aho ko `eni, pea faka`ilo mai ha ngāue si`i te tau lava ke fakamahino ai ‘etau kaungā ngāue mo e `Otua `o e mo`ulaloá.
‘Ānau, Lotu mo e ‘Aukai: Tokoni mai keu kei fakamo`oni ki he ivi mo e mafai `o e `Afioná, pea ha sino `a e fakamo`oni ko ia `i he `eku mo`ui `i he `aho ni pea mo e `aho kotoa pe `o `eku mo`ui. `Emeni.
-------------------------------------------------
