Siasi 'Imanuela - SUTT, 810 E Princeton Street, Ontario, CA (2026)

04/08/2024

VAEVAE MANAVA MO E KAU TEKINA ‘I MOANA – ‘EPELELI 08, 2024.

Saame 135 “Fakafeta’i kia Sihova ‘i he me’a kotoa pe.”

Ko e Saame ni ‘oku kau ki he Ngaahi Saame ‘o e HELELUIA. ‘Oku kamata ‘aki ‘a e Haleluia, pea ‘oku faka’osi ‘aki ‘a e Haleluia. Pea ko e Haleluia, ko e Hiva fakalangilangi mo fakahikihiki ke fai pe ki he ‘Otua toko taha pe. Pea ko e Fakafeta’i, ko e fakamalo mei he loto hounga’ia mo’oni, pea hange ko ia ‘oku lau ki ai ‘a e Fatu Saame “Fakafeta’i kia Sihova he me’a kotoa pe.”

FAKALOTOLAHI: Tau Fakafeta’i ki he ‘Otua ‘i he’ene Kelesi mo ‘ene Meesi. Fakafeta’i ‘i he’ene fai Manava’ofa mo ‘ene Ma’oni’oni. Pea tau fakafeta’i he me’a kotoa pe ‘oku tau a’usia, taumaiaa ‘oku ‘ata’ataa mei hono fofonga. ‘Oku ne ‘Afio’i ‘a e me’a kotoa pe.

Taniela 3:1-30 “Na’a mo e ulo’i afi ‘oku kei tu’ukimu’a pe p**e ‘a e ‘Otua.”

Kuo ngaohi ‘e Nepukanesa ha imisi koula pea ne fokotu’u ia ki ‘olunga pea fanongonongo ki he kau taki ma’olunga kotoa pe ‘i he ngaahi vahefonua ‘o Papilone ke nau katoa mai ke katoanga’i ‘a e fu’u ‘imisi koula kuo ngaohi ‘e he tu’i.
Na’a nau katoa mai, pea toki fanongonongo ki he kakai kotoa pe ‘o e fonua mo e ngaai matakali kehekehe kotoa pe. Ka nau ka fanongo ki he le’o ‘o e talupite mo e ngaahi me’alea kehekehe pe, kuo pau k e nau fo’ohifo ‘o lotu ki he ‘imisi koula kuo fokotu’u ‘e Kingi Neukanesa.
Na’e talangofua kakato ki ai ‘a e kakai kotoa pe ‘i he fonua mo e P**e’anga Papilone, tuku kehe pe ‘a e Kau Siuta – Setaleki, Mesake, Apiteniko na’e ‘ikai te nau fo’ohifo ‘o lotu ki he ‘imisi koula ‘a Nepukanesa.
Ko e tali ‘a e tu’unga me’a Siuta – ‘E Nepukanesa, ‘oku ‘ikai ha’amau to e tali, he ko e ‘Otua ‘oku mau tauhi ki ai te ne lava ke fakahaofi kimautolu mei he fonise afi kakaha, pea te ne fakahaofi kimautolu mei he nima ‘o e ‘Afiona. Na’e houahu ‘a e tu’i ‘o ne folofola ke tafutafu ‘a e ngoto’umu ke tu’o fitu hono kakaha, pea nau ha’i ‘a e toko tolu Siu ‘o nau li ki he loto fonise afi kakaha.
Na’e vakai’i atu ‘a e toko tolu Siu, kuo veteange honau ngaahi ha’i, ‘oku nau ‘eve’eva he loto afi, pea ko honau toko fa, ‘oku hange mai ia ha ‘alo ‘oha ‘otua. Pea na’e fakahu mai kiautolu ki tu’a. Kuo ‘ikai ha momo’i p**e ‘a e afi ki honau sino, kuo ‘ikai mahunuhunu honau lou’ulu, ‘ikai liliu honau sote, pea ‘ikai ha’anau namu ‘ohuafi.

FAKALOTOLAHI: Ko e ‘Otua Mo’ui. ‘Oku ne mafeia ‘a e me’a kotoa pe kiate kinautolu ‘oku nau TUI mo FALALA kakato ange kiate ia. Ko e afi kakaha e, kuo liunga fitu hono kakaha, ‘oku ‘ikai ha’ane uesia e mo’ui ‘a e Kakai ‘oku nau Tui mo ‘Ofa ki he ‘Otua. Fiema’u pe ke pehe ‘etau TUI ke ‘oua na’a tau vaivai pe afe ngofua ki he ‘Aitoli mo e Faka’otuamate. Ka tau Tui mo Lotu ki he ‘Otua MO’UI.

1 Sione 2:3-11 “Tau laka ‘o hange ko e laka ‘a ‘ene ‘Afio.”

Ko kinautolu ‘oku ‘o Kalaisi pea ‘oku nau mo’ui ‘o fetauhi’aki mo e ‘Otua,’oku nau fakahaa’i mai ko kinautolu ia ‘a e kakai ‘o hono P**e’anga, he ‘oku nau tauhi ‘ene ngaahi tu’utu’uni. Ko e Mo’oni, ‘a kinautolu ‘oku nau tauhi ‘Ene ngaahi tu’utu’uni. Pea ko e founga pe ia e au ‘ilo’i ai ‘a Sisu ko e Mo’oni ‘i he’etau tauhi ‘ee ngaahi tu’utu’uni.
Pea ko Sisu ko e Maama Mo’onia ia, ko ia ‘oku ne pehe ‘oku ne ‘i he Maama ka ‘oku ne fehi’a ki hono tokoua ‘oku ne kei nofo ‘i he fakapo’uli. Ko ia ke tau nofoma’u ‘i he Maama.

FAKALOTOLAHI: Ko e Mo’oni ko Sisu Kalaisi, pea ko hono ‘ilo’i ‘o Sisu Kalaisi ko e Mo’oni ia, ko ‘etau tauhi ‘ene ngaahi tu’utu’uni. Pea ko e Maama mo e Fakapo’uli ‘oku fakamatala’i ia ‘i he’etau ngaue mo ‘etau to’onga mo’ui. Kapau ‘oku tau ‘ofa, ‘oku tau nofo ‘i he Maama, pea kapau ‘oku tau ta’e’ofa mo taaufehi’a, ‘oku tau nofo ‘i he fakapo’uli. Tau laka ‘o taau mo e fanau ‘a e maama, ko ‘etau lalaka ‘i he Mo’oni – he ko e laka ia ‘a ‘ene ‘Afio.

Lau ma’u pe ho’o Folofola. Fakalaulauloto he ‘Ofa ‘a e ‘Otua kuo ne fai ma’au. LOTU.
Shalom.

04/06/2024

VAEVAE MANAVA MO E KAU TEKINA ‘I MOANA – ‘EPELELI 06, 2023.

Saame 133 “Tō hifo hange ha Hahau, ngaohi au, ke kelekele taau.”

Ko e hahau na’e puke ‘e he tumutumu’i Mo’unga Heamone, na’e tafe hifo kotoa pe ‘o ne fakaviviku ‘a Mo’unga Saione mo e ngaahi potu kotoa pe na’e ma’ulalo ‘iate ia, pea a’u atu ki he ngaahi potu mōmoa mo pakukā. Pea kuo nau ma’ui’ui kotoa pe mei he Hahau ‘o Heamone.

FAKALOTOLAHI: Ko hotau tapuaki ‘oku mei he ‘Otua Toko Taha pe. Pea ‘oku tafe hifo hange ha hahau, pea ‘oku ne fakamolū ‘a e ngaahi loto ‘oku maka mo fefeka, ke hange pe he kelekele kuo taau. “To hifo hange ha hahau ki homau ‘atamai. Ngaohi ke kelekele taau, ‘a e funga maka ni.” (Himi 448).

Taniela 2:24-49 “Tu’ukimu’a ‘a e ‘Otua ‘i he Poto kotoa pe.”

Na’e aoao ha poto ‘i he P**e’anga Papilone ha poto ke ne fakaha ki he tu’i, kia Nepukanesa ‘a e ‘uhinga ‘ene misi mo e me’a na’a ne mamata ki ai. Pea ‘ave ‘e Alioke, ko e p**e ‘o e Ka’ate ki he tu’i ke ne fakatau folofola kiate ia.
Pea pehe ‘e Taniela, Ko e me’a fufuu ‘oku ‘eke ‘e he tu’i, ‘e ‘ikai lava ‘e he kau poto, pe ko e kau maki, pe ko e kau sikalaipe, pe ko e kau asitolonome, ke fakaha ki he tu’i: ka ‘oku ‘i ai ha ‘Otua ‘i Langi ‘oku ne tatala ‘a e ngaahi me’a ‘oku fufuu, pea kuo ne faka’ilo ki he ‘afio ‘ Nepukanesa ‘a e me’a ‘e hoko ‘i he ngaahi ‘aho ‘amui.

Ko e ngaahi me’a ‘e hoko mai ‘amui: (1). Ko e p**e ‘a Nepukanesa ‘e ngata. (2). Ko e P**e’anga Papilone he ‘ikai ke tu’u ‘o ta’engata, ka ko e P**e’anga ‘o e ‘Otua ‘e tupu fakautuutu ‘i mamani. Na’e hakeaki’i ‘e he tu’i ‘a Taniela ke hoko ko e ‘eiki ‘o e vahefonua kotoa ‘o Papilone.

FAKALOTOLAHI: Ko e Poto ko e koloa ia ‘a e ‘Otua, pea ko e poto ‘o e tangata ‘oku mei he ‘Otua. Pea ko ‘etau fekumi kiate Ia ‘i he loto ‘apasia, pea te tau ma’u leva ‘a e poto. Pea ko e poto ko ia ke fakalangilangi’i ‘aki pe ‘a e ‘Otua. ‘Oku ‘ikai ko e Poto ke tau polepole ai mo ‘afungi mo fakaehaua ‘aki ha kakai. Ka ke tau ‘Apasia mo fakavaivai’i kitautolu he ‘ao ‘o e ‘Otua.

Sione 12:44-50 “Ko hoku Maama’anga Koe, Sisu e.”

Ko hono fakmahino mai ‘e Sisu ‘a ‘ene TAHA mo e Tamai. Ko ia ‘oku tui pikitai kiate Ia, ‘oku ‘ikai ko Ia, ka ko Ia na’a ne fakau mai Ia. Pea ‘oku ne fakamahino mai, ‘ilonga ha fa’ahinga me’a ‘oku ne fai, ‘oku ‘ikai ko ia, ka ko e Tamai ‘iate Ia. Pea a’u ai pe ki he’ene ko ‘ene ha’u ki mamani ko e Maama, pea ko kinautolu ‘oku tui pikitai kiate Ia, ‘oku ‘ikai te ne kei nofo ai pe ‘i he po’uli. Pea ‘oku ‘ikai ko ‘ene ha’u ke Fakamaau’i ‘a mamani ka ke Fakamo’ui ‘a Mamani.
Ko ‘ene ngaahi lea kotoa pe, ‘oku mei he Tamai, pea ko Ia pe kuo ne tu’utu’uni ‘a e ngaahi me’a ke ne fai. Pea ko ‘ene ngaahi tu’utu’uni ko e koto Mo’ui Ta’engata.

FAKALOTOLAHI: Ko e sipinga ‘o e Mo’ui, ko e faka’aki’akimui. Ko e me’a kotoa pe ‘oku ne ma’u mo e ngaue kotoa pe ‘oku ne fai – ko e me’a kotoa pe ia mei he’ene Tamai. Na’e ‘ikai te ne polepole ‘o pehe ko ha’ane lea, mafai, poto mo e maama – Ko e me’a kotoa pe mei he’ene Tamai. “Ko hoku Maama’anga Koe, Sisu e, ko hoku Malohinga Koe, Sisu e. Ko hoku ‘Ofa’anga Koe, Sisu e.

Lau ma’u pe ho’o Folofola. Fakalaulauloto he ‘Ofa ‘a e ‘Otua. LOTU.
Shalom.

04/05/2024

VAEVAE MANAVA MO E KAU TEKINA ‘I MOANA – ‘EPELELI 05, 2024.

Saame 133 “’Ilonga hao tapuaki, pea tukuange ke tafe atu.”

Ko e tapuaki ia ke tufotufa atu ke tau fe’inasi’aki ai. Ko e fakaukau pe ia ‘o e Saame ki he Lolo Tapuaki na’e lilingi ki he ‘ulu ‘o ‘Elone na’e tafe hifo ki hono hala kava pea ki he kola ‘o hono kofu. Na’e ‘ikai ke ngata pe ‘i hono ‘ulu, ka na’e tafe hifo ki he konga ‘o hono sino mo hono vala.

Ko e tatau pe ia ‘o Mo’unga Heamone, ‘oku puke ‘e hono tumu’aki ‘a e ngaahi vai mei ‘olunga pea ‘oku ne fakatafe hifo ki lalo, pea ‘oku ma’ui’ui ai mo e ‘akau ‘i he talalo mo’unga.

FAKALOTOLAHI: Ko e ‘Otua ‘oku fonu ‘i he ngaahi tapuaki ke fakakoloa ‘aki kitautolu, pea ‘oku taau ke tau fakatafe atu ‘a e ngaahi tapuaki ‘oku tau ma’u ke lave ai mo ha kakai ‘oku nau fiema’u mo ‘aonga kiate kinautolu. ‘Oua te tau siokita, he ‘oku fiema’u pe ‘etau mo’ui ke fakamaha kae to e fakafonu ‘aki ha ngaahi me’a fo’ou pea te tau tup**ekina ai ‘i he Mo’ui Fonumahuohua ‘i he ngaahi Tapuaki Faka-‘Otua.

Taniela 2:1-23 “’Oku ‘a e ‘Otua ‘a e Poto mo e Mafai.”

Ko e talanoa eni lolotonga ‘a e fakahe ki Papilone. Pea ko e tu’i ko Nepukanesa na’a ne tu’utu’uni ke tamate’i ‘a e kau poto kotoa pe ‘i Papilone koe’uhi ko e ‘ikai ha Potok e ne lava ‘o faha’uhinga’i ‘a ‘ene misi. Pea ‘i he a’u atu ‘a e taki ‘o e Ka’ate kia Taniela, na’e kole ai ‘e Taniela ki he tu’i ke tuku mai ha faingamalie ke nau feinga ai mo hono kaunga tangata ke faka’uhinga ‘ene misi.

Na’a nau lotu ki honau ‘Otua ‘o tautapa kiate Ia ke ne faka’ilo mai kiate kinautolu ‘a e me’a kuo fufuu, telia na’a tamate’i kinautolu mo e toenga ‘o e kau poto ‘i Papilone. Pea na’e toki tatala ‘a e me’a fufuu ni kia Taniela ‘i ha’ane visone po’uli. Pea na’e hanga hake ‘a Taniela ki he ‘Otua ‘o Langi ‘o ne pehe.

Ke malo’ia ‘a e huafa ‘o e ‘Otua mei he ta’engata ‘o ta’engata: he ‘oku ‘o’ona ‘a e Poto mo e Mafai;….‘oku ne foaki poto ki he kau poto mo e ‘ilome’a ki he kau lotomatala: ‘oku ne tatala ‘a e ngaahi me’a ‘oku loloto mo fufuu, ‘oku ne ‘afio’i ‘a e me’a ‘oku ‘i he po’uli, pea ‘oku nonofo mo ia ‘a e Maama.

FAKALOTOLAHI: Ko e ‘Otua ‘oku ‘o’ona ‘a e Poto mo e Mafai. Te ne faka’ilome’a kiate kitautolu kapau te tau lotu mo tauhi kiate Ia ‘i he Ma’oni’oni mo e Haohaoa. Pea ‘oku ne Mafai ki he me’a kotoa pe, na’a mo e me’a ‘i he po’uli mo e ngaahi me’a ‘oku fufuu mei he ‘ilo mo e poto ‘o e tangata. ‘Oku ne Mafeia ‘a e me’a kotoa pe. Ko e ‘Otua ‘oku Tokaima’ananga, ‘oku ne ‘afio’i ‘a e me’a kotoa pe, pea ‘oku ‘ikai ha me’a ‘e fūfūnaki ki hono finangalo.

Ngaue 4:23-31 “Neongo pe ko e ha, ‘e e’a pe p**e ‘a e ‘Otua.”

Na’e hoko hono fakatanga’i e kau ako, ko hono to e fakamalohi’i ange ia ‘enau tui mo ‘enau falala ki he Poto mo e Mafai ‘o e ‘Otua. Pea na’a nau lotu ‘o tautapa ki he Poto mo e Mafai ‘o e ‘Otua ke ‘oua na’a nau holomui pe vaivai hono malanga’i e folofola ‘a e ‘Otua.

Pea ‘i he lolotonga ‘enau lotu, na’e ngalulululu ‘a e potu na’a nau fakataha ai, pea na’e fakafonu kinautolu fakakatoa ‘i he Laumalie Ma’oni’oni, pea nau malanga’aki e folofola ‘a e ‘Otua ‘o ‘ikai ke nau to e ilifia pe manavahe.

FAKALOTOLAHI: Ko hotau ‘Otua ‘oku ‘o’ona ‘a e Poto mo e Mafai. Ko ‘etau vaivai pe, ko e si’i ‘etau tui mo ‘etau falala ki hotau poto mo hotau ivi. Ka ‘oku fiema’u pe ke tau kau fakataha mo e Poto mo e Mafai ‘o e ‘Otua, ka tau malava ‘a e ta’emalava. Pea te tau ikuna’i ‘a e ngaahi fakatanga ‘oku fai mai kiate kitautolu. He neongo pe ko e ha, ha to e poto pe mafai – ‘e kei fakae’a pe ‘e he ‘Otua hono Poto mo hono Mafai, koe’uhi ko hono kakai.

Lau ma’u pe ho’o folofola. Fakalaulauloto he ‘Ofa ‘a e ‘Otua. LOTU.
Shalom.

04/04/2024

VAEVAE MANAVA MO E KAU TEKINA ‘I MOANA – ‘EPELELI 04, 2024.

Saame 133 “Ko e Me’a Lelei ke nofo lelei ‘a e Kainga ‘o Sisu.”

Ko e taha pe eni ‘i he Ngaahi Saame ‘o e “‘Alu Hake” (Ascent). Pea ko e fiefia ia mo e fakafeta’i ‘a e Kau Pilikimi, ka ko e Kau Siu ‘oku nau nofo ‘i he ngaahi feitu’u kehekehe, kuo nau fononga mai ‘o nau fakatahataha mai ki Selusalema ke nau Lotu Fakataha ‘i he Temipale ki honau ‘Otua.

Pea ko e me’a fakafiefia ma’u pe ‘a e fakataha ‘a e Kainga ‘o e ‘Eiki. He ‘oku mahino mai ‘oku nau TAHA ‘i he ‘Eiki, ko Sisu Kalaisi. Pea ‘oku tau Fiefia ai ‘i he’etau TAHA – Ka ko ‘etau TAHA ‘I HE TUI. Pea ‘oku ngaue’aki ‘e he Fatu Saame ‘a e fakakaukau ko ia ki he me’a na’e hoko ‘i hono pani ‘o ‘Elone ki he Taula’eiki Lahi. Na’e pani hono ‘ulu ‘aki ‘a e Loto Tapuaki pea tafe hifo ‘a e lolo ko ia mei hono ‘ulu ‘o a’u hifo ki hono kava pea mo e kola ‘o hono kofu. KO E FAKAUKAU ‘O E TAHA ‘I HE ‘EIKI.

FAKALOTOLAHI: Ko e me’a fakafiefia ‘a e nonofo fakataha ‘a e Famili pe Kainga ‘i he Melino mo e Fe’ofo’ofani. Pea ‘oku makatu’unga kotoa pe ‘i he ‘Eiki ko IA hotau Fakama’opo’opo’anga.

Taniela 1:1-21 “Koe Tapuaki ‘o e Mo’ui Fakatapui ma’ae ‘Otua.”

Ko e Mo’ui Fakatapui mo Tukupa ma’ae ‘Eiki, ‘o a’u ai pe ki he fonua muli. Na’e ‘ikai ke nau tali ke ‘uli’i kinautolu ‘e he ngaahi me’akai lelei mei he Fale ‘o e Tu’i Nepukanesa. Na’a nau kei fakatapuhaa’i ‘enau Mo’ui ma’a honau ‘Otua. Ko ‘enau TUI na’e ‘ikai ke to e ngaue pe malele ngofua koe’uhi ko ha lelei mo ha masani kuo nau mata me’afo’ou ai. Na’a nau kole pe ke nau kai mohuku pe, telia na’a nau maumau’i e Lao ‘a Sihova, ko honau ‘Otua. Ko Taniela, ‘Ananaia, Masaeli mo Mesake.

FAKALOTOLAHI: Kuo tau hiki ‘o nofo ki he ngaahi fonua muli. Pea kuo hoko hono ngaahi Lelei mo hono ngaahi Masani ke ne maumau’i ai e ngaahi Fuakava ‘i he Ngaahi Famili tokolahi. Kuo li’aki ‘e he fa’ahinga honau ngaahi lakanga fakalotu. Kuo tukuange ‘a e ‘Otua na’a tau Tui mo Lotu ki ai, ka kuo tau afe ki he ‘Aitoli mo e Faka’otuamate. Tau fakafeta’i he ‘oku tau kei ‘inasi pe he ‘Ofa mo e Fakamolemole ‘a e ‘Otua.

Ngaue 2:42-47 “Faka’utumauku ke tanaki ‘a e Koloa ‘o Itaniti.”

Ko e talamu’aki ia ‘o e ‘Uluaki Siasi na’e kamata ‘e he Kau Aposetolo – na’a nau MATU’AKI ME’A TAHA. Na’a nau TUI TAHA pe ki he ‘Eiki ko Sisu Kalaisi. Na’a nau FA’A NOFO FAKATAHA. He na’a nau faka’utumauku hifo hono ako’i ‘a honau kau muimui ki he mo’oni ‘o e ‘Eiki ko Sisu Kalaisi. Na’a nau manako ki he fa’a fakataha ‘o lotu mo pakipaki ma ‘i he Temipale – ko e faka’ilonga ‘enau TUI mo ‘enau mo’ui fe’inasi’aki mo fevahevahe’aki ‘a e me’a pe ‘oku nau ma’u. Ko e faka’ilonga ‘o e TAHA ‘IA KALAISI SISU.

Ko e fa’ahinga na’a nau fakatau atu ‘enau koloa, pea ‘omai hono pa’anga ‘u tufotufa kiate kinautolu ‘o fakatatau ki honau masiva. TA KO E SIASI KE FAKAMANAVAHAKE ‘A E MASIVA, KA ‘OKU ‘IKAI KO HONO FAKAMASIVA’I ‘A E MASIVA. Ko e kakai na’e ‘iai ‘enau koloa, kuo nau fakatau atu ka e lava ke ne ;inasi tatau pe mo hono kaunga fononga. KE FAKAPOTUPOTU TATAU E MO’UI ‘A E KAKAI ‘O E SIASI. Ke ‘oua na’a ‘i ai ha MASIVA pe KOLOA’IA – KA ‘OKU FEFE LOTOFALE ‘O E SIASI HE ‘AHO NI?

FAKALOTOLAHI: Mo’oni pe Punake: “Kofa’a hono lava, ka mau ka’anga e, ‘o mau fāfā he po’uli lahi? FOKI SISU MEI HE LANGI ‘O TOE ALA PE: ‘OKU VAIVAI ‘A E FAI ‘A HO SIASI – Ko e tangi e ‘a mamani, ‘Eiki, ‘Eiki, foki mei he Langi – Fuoloa ‘emau nofo ‘o talitali atu, ‘Afe nai te ke to e ha’u?” (Himi 621).

Lau ma’u pe ho’o Folofola. Fakalaulauloto he ‘Ofa ‘a e ‘Otua. LOTU.
Shalom.

04/03/2024

VAEVAE MANAVA MO E KAU TEKINA ‘I MOANA – ‘EPELELI 03, 2024.

Saame 118:1-2,14-24 “Kuo u ma’u meiate Ia ha ‘aho, keu mo’ui mai ai.”

Ko e fakafeta’i ia ‘a e Fatu Saame ‘i he’ene to e ma’u ha ‘aho ke ne mo’ui ai. He ko e mamahi mo e faingata’a na’a ne mo’ua ai na’e ’ikai pe ha to e ‘amanaki lelei, pea hange pe ko ‘ene talaloto. “Ko ‘eni ia ‘a e ‘aho kuo fokotu’u ‘e Sihova; tau hakahaka ai mo fakafiefia.” (v.24).

Ko e tala fakapalofita ki he ‘Aho ‘o hotau Fakamo’ui, ki he taimi mo e kuonga na’e hoko mai ai ‘a hotau Huhu’i mo Fakamo’ui ‘a ia na’e palomesi te ne hoko mai – ko e Kalaisi, ko e Misaia, Ko e Toko Taha kuo Pani ke ne Fakatau’ataina ‘a e Kakai mei he;enau ngaahi angahala.

FAKALOTOLAHI: Ke tau ngaue mo mo’ui he ‘aho kotoa pe, ko e ‘aho faka’osi pe ia ‘etau Mo’ui. He taumaia ‘oku tau malava ke p**e ki he’etau Mo’ui – ko e ‘aho kotoa pe ko e Fiefia pe mo Failelei. “Kuo u toki ‘ilo ‘oku ‘ikai ha lelei ‘i he nofo, ka ke tau Fiefia pe mo Failelei lolotonga ‘etau mo’ui.” (Koheleti 3:12). “LIVE EACH DAY, YOUR LAST DAY”

Hiva ‘o e Hiva 3:1-11 “Sisu, polo’i au ma’au.”

Ko e Hiva ‘oku talanoa ki he ‘Ofa ‘oku ma’u ‘e he Husepaniti ki hono Uaifi. Na’e ‘ikai te ne ‘ilo ia ‘i hono mohenga. Na’a ne tu’u ‘o hu ki tu’a mei hono fale’o ne ‘alu fano ‘i he kolo mo e ngaahi hala ke kumi ‘a e toko taha ‘oku ‘ofa ki ai ‘ene Mo’ui. Pea ko ‘ene fehu’i ki he kau le’o ‘o e Kolo – “Kuo mou sio koaa kiate ia ‘oku ‘ofa ki ai ‘eku mo’ui?” (v.3).

Ko hono fakapunake ia ‘a e teu ke hoko mai ‘a Sisu ke ta’ane mo hono Siasi. ‘E hoko mai ‘a Sisu ke ta’ane mo e Kau Kalisitiane kotoa pe. “Ke fai ange ‘e he husepaniti ki hono uaifi ‘a e to’onga totonu; pea pehe foki ‘a e uaifi ki he husepaniti.” (1 Kolinito 7:3). “Ko ia ‘oku ‘ikai te ne ‘Ofa, kuo ‘ikai te ne momo’i ‘ilo’i ‘a e ‘Otua.” (1 Sione 4:8).

FAKALOTOLAHI: fakatauange ke polo’i mo fakatapui ‘etau Mo’ui ma’ae ‘Eiki. “Ko hai ‘e lau ‘a e ‘ofa ni fungani ‘a e misiteli taumama’o atu, ko e POLO’I AU ‘O ATONAI – ‘O’OKU IA, PEA ‘O’ONA AU.” (Himi 566). “’E ke mou ‘ilo mu’a ko Sihova pe ko e ‘Otua; Ko ia na’a ne ngaohi kitaua, pea ko kitaua ‘oku ‘o’ona; ‘Io, ko e kakai ‘a’ana, ko e sipi ‘oku ne fafanga.” (Saame 100).

Ma’ake 16:1-8 “Kuo Toetu’u ‘a e ‘Eiki, Haleluia.”

‘Oku tau kei fononga pe he ta’au mo e mafi ‘o e Toetu’u ‘a e ‘Alo ‘o e ‘Otua mei he pekia. Kuo fakamo’oni ‘a ‘ene lea – “Te ne pekia, pea te ne toetu’u ‘i hono ‘aho tolu.” Ko e a’u eni ‘a e Tolu’i Mele ki he fonualoto ko ‘enau teuteu ke takai lolo ‘a e sino ‘o Sisu he kuo ne pekia. ‘Ikai ha’anau ‘amanaki ki he Toetu’u, ka na’a nau ‘ilo’i ko e maka tapuni ‘o e fonualoto, kuo teka’i (fakaava). Ka ko e talanoa ia ‘oku ongo mai mei he Angelo ‘i he Fonualoto – Ko Sisu mei Nasaleti na’e Kalusefai – (1). KUO TOETU’U IA. ‘Oku ‘ikai te ne mate ka kuo ne to e mo’ui. (2). ‘OKU ‘IKAI TE NE ‘I HENI – He ‘oku ‘ikai ha Sino ‘i he Fonualoto. (3). VAKAI KI HE POTU NA’E TELIO AI – Kuo pelupelu mo fatufatu lelei pe ‘a e ngaahi tupuenu ‘o tuku ai.

FAKALOTOLAHI: Ko e Mate mo Fonualoto – ko e potu ‘o e Fakafo’ou. Ke tuku ai ‘a Mamani, ka tau teuteu atu ki he naunau Fakalangi. Ke tuku ai ‘a e ‘Auha, ka tau teuteu atu ki he Ta’efa’a’auha. Ke tuku ai ‘a e Mamahi mo e Ongosia, ka tau ‘amanaki lelei ki he Fiefia. ‘IO, “Ka ko eni, KUO fokotu’u ‘a Kalaisi mei he pekia ko e polopolo ‘o e fa’ahinga kuo mohe.” (1 Kolinito 15:20). KO E MATAPA ‘O ‘ITANITI KUO FAKAAVA ‘E KALAISI.

Lau ma’u pe ho’o Folofola. Fakalaulauloto he ‘Ofa ‘a e ‘Otua. LOTU.
Shalom.

04/02/2024

VAEVAE MANAVA MO E KAU TEKINA ‘I MOANA – ‘EPELELI 02, 2024.

Saame 118:1-2,14-24 “’Oku ta’engata ‘a e Lelei ‘a Sihova.”

Ko e Saame na’e fa’u ke hiva fetaliaki ‘e ha ongo kau hiva. Ko e fakafeta’i ‘i he fakatau’ataina kinautolu mei Isipite, pea pehe foki mei honau fakahe ki Papilone. Pea ko ‘enau fakalangilangi’i ‘a e ‘Otua. Pea nau ui mo fakaafe ‘a e kakai kehe ke nau fakafeta’i mo fakahikihiki ‘a e ‘Otua – ko honau Huhu’i mo Fakamo’ui. Ko e tali ‘a e kakai – “Fakafeta’i kia sihova, he ‘oku lelei Ia, ‘oku tolonga ‘o ta’engata ‘ene ‘alo’ofa – Ko Isileli e, ke pehe ‘enau lea, “He ‘oku tolonga ‘o ta’engata ‘ene ‘Alo’ofa.” (vv.1-2).
Ko e fakafeta’i ‘oku ongona he ‘aho ni – ‘oku ta’engata ‘a e LELEI ‘a Sihova. Ko ia pe ‘ene fakamo’oni: “Ko hoku ‘ELA Koe, pea teu ‘atu ‘a e fakafeta’i:” “Ko hoku ELOHIMI Koe, pea teu fai ho fakahikihiki’i.” ‘E mou fakafeta’i kia Sihova, he ‘oku Lelei ia; e ‘oku tolonga ‘o ta’engata ‘ene ‘alo’ofa.” (v.28-29).

FAKALOTOLAHI: Ko e fakamatala pe ia ‘o e ‘Otua ‘oku tau Tui mo Lotu ki ai, ko e “LELEI” pea ‘oku ‘ikai ha’atau Lelei, ka ko e Lelei kotoa pe ‘a e ‘Otua kuo tau lavemonū’ia ai. Ko ‘Ene Lelei ee, ‘a ‘Ene foaki mai Hono ‘Alo ke Pekia pea ne Toetu’u ka e lava hotau Huhu’i mo hotau Fakamo’ui.

Senesi 1:20-2:1-4 “Fakatupu ‘i hono ‘imisi, tau fa’ifa’itaki ki hono anga.”

Ko e uki eni ‘i he talanoa ‘a e Tohi Fakatupu, ko hono fakamahino mai ko e tangaa na’e ngaohi ‘i he ‘imisi ‘o e ‘Otua. “Pea na’e fakatupu ‘e he ‘Otua ‘a e Tangata ‘i hono ‘imisi.” (Senesi 1:27).
Na’e makehe ‘a e Tangata he na’e fakateunga ‘aki ia ‘a e NAUNAU FAKAMATELIE (“Pea na’e ngaohi ‘e Sihova Elohimi ‘a e Tangata mei he efu ‘o e kelekele….”), pea mo e NAUNAU FAKALAUMALIE (“…’o ne hō ki hono ava’i ihu ‘a e mānava mo’ui; pea na’e hoko ‘a e ‘Otua ko e kakano mo’ui.” – Senesi 2:7).

Ko e “’IMISI” (Image), ‘oku ‘uhinga ia ki he “TATAU, HANGĒ, HOKOSI.” Pea ko e ha leva ha to e faikehekhe ‘o e ‘Otua mo e Tangata? Ko e Tangata ko e Efu pe, ko e me’a ‘Auha. Ko e ‘Otua ko e Laumalie pea ‘oku Ta’engata ‘o Ta’efa’a’auha. Pea ko e taumu’a ‘a e ‘Otua ki he Tangata ke FA’IFA’ITAKI KI HONO ANGA.

FAKALOTOLAHI: ‘Oku fēfē nai ‘etau tauhi ‘a e IMISI ‘O E ‘OTUA? ‘Oku fiema’u ke hā atu ko e Imisi ‘o e ‘Otua, pea nau to e fanongo ki he Lea mo e Talanoa ‘oku Faka-‘Otua. Ko e Ngaue mo e To’onga Mo’ui ‘oku Fa’ifa’itaki ki he Otua. Faka’ofa e Imisi’i ‘Otua, kae Faka-Setane (Tevolo) ‘a e Ngaue mo e To’onga Mo’ui. Tau feinga ke tau muimui mo talangofua ki hotau talafa’unga, Ko e Imisi ‘o e ‘Otua kitautolu, pea ‘oku taau ke ke tau fakahā atu ‘a e ANGA ‘O E ‘OTUA mei he’etau Mo’ui. Fiema’u ke tau Feohi mo hotau

1 Kolinito 15:50-58 “Ikuna ‘a e Mate, ma’u Mo’ui Ta’engata ‘ia Kalaisi.”

Na’e toki ‘osi eni ‘etau fakamanatu ‘a e Pekia mo e Toetu’u ‘a e Sisu. Pea ko e talanoa malie, ko ‘ene ikuna’i ‘a e Mate mo Fa’itoka. Pea ne Toetu’u ‘o fakatatau ki he Folofola. Ko e halafononga ia kuo ne tofa ke muimui kotoa pe ai ‘a e tangata. Ke Mate pea to e Mo’ui ki he Mo’ui Ta’engata.

Pea ko e Mo’ui Ta’engata (P**e’anga ‘o e ‘Otua) ‘oku ‘ikai ma’ae Kakano mo e Toto. Ko e Misiteli, “’E ‘ikai te tau mohe kotoa pe, ka te tau liliu kotoa pe, ‘i ha fo’i momeniti, ‘i ha fo’i kemo pe, ‘i he ifi fakamui ‘a e talupite pea ‘e fokotu’u ‘a e pekia ‘o ta’efa’a’auha.

FAKALOTOLAHI: ‘Oku tau kau kotoa pe ‘i he Fakafeta’i koe’uhi ko e palani Fakamo’ui ‘a e ‘Otua kiate kitautolu fa’ahinga angahala. Pea kuo hoko ‘o Mo’oni ‘etau Malanga’i ‘Ene Folofola. “Pea ke tau tu’u ma’u ta’e ngaue, ‘o mou tup**ekina ma’u ai pe ‘i he ngaue ‘a e ‘Eiki: ‘i ho’omou ‘ilo ni, ko e me’a ki he ‘Eiki, ko ho’omou fakaongosia ‘oku ‘ikai ko e laufanō.” (v.58).
Lau ma’u pe ho’o Folofola. Fakalaulauloto he ‘Ofa ‘a e ‘Otua. LOTU.
Shalom.

03/30/2024

VAEVAE MANAVA MO E KAU TEKINA ‘I MOANA – MA’ASI 30, 2024 (UIKE TAPU)

Saame 31:1-4, 15-16 “Ko hoku taimi ‘oku ‘i ho nima.”

Ko e lotu ‘a Tevita koe’uhi ko hono ngaahi fili kuo nau tu’u malumu mai, ‘e lava pe ke ne to ai ki ha faingata’a, pea ‘e mole ai ‘ene mo’ui. Ka na’e hoko ai pe ‘a e ‘Otua ko hono hufanga’anga. ‘’Eiki, kuo u hufanga ki he ‘Afiona: ‘Oua te ke tuku au keu ma ‘o ta’engata, ka ‘i ho’o totonu ke ke fakahaofi kita.” (v.1). “Fakaongo hifo ho fofonga: Vave mai ke hamusi kita: Ke ke hoko ko hoku fale toinga, ko e koto fale tau ke fakahaofi kita.” (v.2).
Ko e ‘alunga pe ia ‘o e ‘aho ni. Kuo silongo ‘a mamani ‘o fakaongo pe ‘e ikauna’i ai pe ‘e Mate ‘a Sisu. Pea ‘ikai ke mo’oni ‘a e ngaahi me’a na’a ne folofola ‘aki. Te ne pekia pea hili ‘a e ‘aho ‘e tolu pea te ne Toetu’u. Ka ‘oku kei tu’u pe ‘a e ‘amanaki mo e fakatu’amelie ‘i he ‘Otua mo Hono Mafimafi.
“Ko hoku ngaahi taimi ‘oku ‘i ho nima. Hamusi au mei he nima ‘o hoku ngaahi fili, mo hoku ngaahi fakatanga.” (v.15). Kuo ne tekaki ‘ene mo’ui mo ‘ene me’a kotoa pe ki he ‘Otua.

FAKALOTOLAHI: Ko e ‘Otua ko hotau Hufanga mo e Malohi, ko hotau Tokoni ‘i he mamahi matu’aki ofi. Te ne ofi ke fakahaofi mo fakamo’ui ‘a kinautolu ‘oku Tui Pikitai kiate Ia.

Tangilaulau 3:1-9, 19-24 “Ko e ‘Ofa pe ‘a Sihova ‘oku ‘ikai teu ‘auha ai.”

Ko e tangata kuo ne fou ‘i he fakamamahi mo e faingata’a’ia, ‘oku ne sio ki he tokotoko ‘o Hono Houhau ‘oku ne tataki ia mo tokoni’i ia ke ne matu’uekina ‘a e mamahi mo e faingata’a ‘oku ne mo’ua ai. “Ko e tangata au kuo mata mamahi ‘i he me’a ta ‘o ‘ene ‘ita. Kuo ne taki au, ‘o ‘ai keu fou he po’uli, ‘o ‘ikai ‘i he maama.” (v.1-2).

FAKALOTOLAHI: Mo’oni pe Saame – “Neongo ‘ete ‘alu pe he tele’a ‘oku malu’aki ai ‘a e Mate. ‘E ‘ikai teu manavahe ki ha kovi; he ko Koe ‘oku ma feohi. Ko si’o tokotoko mo ‘akau, ‘oku na fakafiemalie’i au.” (Saame 23:4).

1 Pita 4:1-8 “Ke mou kataki mamahi hange ko Kalisi.”

‘Oku faka’amu mai ‘a e ‘Aposetolo ke tau kataki mamahi ‘o hange ko Sisu. He ko ia kuo ne kataki mamahi ‘i he kakano, kuo faka’ata’atā mei he angahala, pea ‘oua te nau to e mo’ui ‘aki ‘a e ngaahi holi ‘a e tangata. KA KO HONO TOE ‘O HOMOU TAIMI ‘I HE KAKANO KE MOU MO’UI’AKI ‘A E FINANGALO ‘O E ‘OTUA. (v.2). “Ka ko eni kuo panaki ‘a e ngata’anga ‘o e me’a kotoa pe: ko ia mou fakama’uma’u mu’a, ‘o mou mo’ui faka’ehi’ehi, koe’uhi ke mou fa’a lotu. Ke mou tauhi ai pe ho’omou fe’ofa’aki. He ko e ‘Ofa ‘oku ne ‘ufi’ufi ha fu’ufu’unga angahala.” (v.8).

FAKALOTOLAHI: Ko e pole ia mo e fakalotolahi – ko hotau toenga taimi ‘i he kakano, ke tau mo’ui’aki e finangalo ‘o e ‘Otua. Pea ke tau Fe’ofa’aki, he ko e ‘Ofa ‘oku ne ‘ufi’ufi ai ha fu’ufu’unga angahala. ‘Io, ko e ‘Ofa ia ‘a Kalaisi, ‘oku ne ‘ufi’ufi ‘a e angahala ‘a mamani kotoa pe.

Matiu 27:57-66 “Teu ‘e Siosifa ‘Alematea ‘a e sino ‘o e Pekia.”

Ko Siosefa Alematea ko e tangata koloa’ia na’e muimui pe kia Sisu, pea na’a ne kole kia Pailato ‘a e sino ‘o Sisu ke ne ‘ave ‘o telio ‘i hono fonualoto. Ko e fonualoto na’e ta ‘i he makatu’u, na’e te’eki ke telio ai ha taha.

FAKALOTOLAHI: Ko eni kuo ‘ave ‘a e sino ‘o Sisu ‘o telio ‘i he fonualoto na’e te’eki ke telio ai ha taha. Na’a ne fakahinohino ki he ongo ako ‘a e ‘Asi ke taki mai kiate ia, na’e te’eki ke heka ai ha tangata. Ko e naunau peia ‘o e ‘Otua, ke polopolo ki ai ‘a e me’a ‘oku fo’ou mo haohaoa. Ka ko e ha nai ha’atau tokoni mo ha’atau ‘Ofa ke fai kia Sisu? Pea mo’oni pe ‘ene folofola – “Kapau ‘oku mou ‘ofa kiate au, te mou tauhi ‘a e ngaahi fekau ‘a’aku.” (Sione 14:15).

Lau ma’u pe ho’o Folofola. Fakalaulauloto he ‘Ofa ‘a e ‘Otua. LOTU.
Shalom.

03/29/2024

VAEVAE MANAVA MO E KAU TEKINA ‘I MOANA – MA’ASI 29, 2024 (UIKE TAPU).

Saame 22 “Ko au ko e kelemutu ‘o ‘ikai ko e Tangata.”

Ko ha toko taha ‘oku ne tangi mo tautapa ki he ‘Otua ke fakahaofi ia mei hono luma’i mo fakamamahi’i ia ‘e hono ngaahi fili, pea ko e konga faka’osi ‘o e Saame ni – Ko e fakafeta’i ki he fakahaofi mo fakamo’ui ‘a e ‘Otua. “’E hoku ‘Otua, ‘e hoku ‘Otua, ko e ha kuo ke li’aki ai au? ‘O fakamama’o mei hoku tokoni; mei he le’o ‘o ‘eku kavekalanga atu? (v.1).
“’E hoku ‘Otua, ‘oku ou tangi ‘aho, ka ‘oku ‘ikai ha’o tali. Pea u fai po’uli, ‘o ‘ikai te u tuku ha taimi.” (v.2). “Ka ko au ko e kelemutu ‘o ‘ikai ko e tangata; ko e manuki’anga ‘o e kakai, pea ta’etoka’i ‘e he fonua.” (v.5).
“Tekaki kia Sihova --- ke ne fakahaofi ia; ke ne hamusi ia, he ko hono mamana.” (v.8).

FAKALOTOLAHI: Ko ‘etau tangi mo ‘etau tautapa ki ha tokoni mo ha fakahaofi, pea ‘oku ala mai leva ‘a e ‘Eiki ‘o fai hotau tokoni’i. Ko Sisu na’e ‘ikai ke ne kole ke fakahaofi ia mei he ta, luma’i mo e ‘anuhia. Ka na’a ne ‘ukuma pe mo fakama’uma’u, koe’uhi ke lava hotau Fakamo’ui. “Ko e lahi ho’o ‘ofa na ‘e fatu pea pau. Ho’o tuku ho tu’unga na masani ange fau = KOE’UHI PE KO AU. ’Oiau he fakamasiva’i ha me’a ka lahi fau. Tuku ho’o hoa mo e Tamai, tuku ho naunau = KOE’UHI PE KO AU.” (Himi 455).

‘Aisea 52:13-53:1-12 “Na’e finangalo ‘a Sihova ke laiki Ia.”

Hiva hono fa ‘a e Sevaniti: Fakapotopoto, pea te ne fotu ‘o mahiki hake, pea te ne ma’olunga ‘aupito. Na’e ofongi ‘e he toko lahi he na’e ‘ikai kei ha mai ko ha Maama, pea ko hono fotunga na’e ‘ikai mei hange ko e hako’i Tangata, he hono ta’inga hono fakaalakuu’i ia.

Na’a ne tupu tonu ‘i hono ‘ao, kae hange ha lito ‘i ha huli mei ha kelekele kakā. Ka ne sio ki ai ha taha, ‘oku ‘ikai ha faka’ofo’ofa ke nau manako ai kiate Ia. Ko e toko taha ta’etoka’i mo ‘e’ehi mei ai ‘a e kakai. Ko e tangata falengamamahi, pea maheni mo e mahaki. Ko e ngaahi mahaki ‘atautolu na’a e fua, pea ko ‘etau ngaahi mamahi na’a ne hilifaki kiate Ia, kae lau ‘e kitautolu ko e Mala, ko e toko taha kuo taa’i ‘e he ‘Otua mo ngaohi kovia. Na’e fai hono hoka’i koe’uhi ko ‘etau ngaahi hia. Na’e hilifaki kiate Ia hotau tautea fakamelino, pea ko hono ngaahi ta ko hotau faito’o ia. “Kuo tau he kotoa pe hange ha fanga sipi: kuo tau afe taki taha ‘i hono hala ‘o’ona; pea kuo ‘ai ‘e Sihova ke lave kiate Ia ‘a e hia ‘atautolu kotoa pe.” (v.6).

FAKALOTOLAHI: Fakafeta’i Sisu e ‘Ofa, mahino mai ho’o fou ha ngaahi hala faingata’a. KO HAI KIMAUTOLU KE KE TUKUANGE AI ‘A LANGI MO HONO MASANI- KA KE HIFO MAI KE KUMI KIMAUTOLU – KI HE PALAKU ‘O E ANGAHALA – ‘Io, ka na’a ke lele pe ‘o fa’ufua ‘uma he ko kimautolu ko ho ngaahi foha. Fakafeta’i ‘Eiki, Malo Sisu e ‘Ofa.

Hepelu 10:16-25 “Hu ki he Potu Toputapu koe’uhi ko e Ta’ata’a ‘o Sisu.”

Ko e Kovinaite Fo’ou: Te ne ‘ai ‘ene ngaahi lao ki hotau loto, pea te ne tongi ia ki hotau ‘atamai; hili ia ‘oku ne toki pehe, Pea ko ‘etau ngaahi angahala mo ‘etau ngaahi maumaulao, ‘e ‘ikai te ne to e manatua.
Ko e Hala Fo’ou mo Mo’ui kuo tofa mo’o kitautolu ‘e he Taula’eiki ‘oku Fungani. Kuo ne hu ki he Potu Toputapu pea mo hono Ta’ata’a ke luluku ‘aki hotau konisenisi. Pea ke tau ‘unu’unu kiate Ia ‘aki ‘a e loto mo’oni kuo ma’uma’uluta ‘etau TUI. Pea ke tau Fetoakanga’aki ke Fefaka’ai’ai’aki ki he Fe’ofa’aki mo e ngaue lelei.

FAKALOTOLAHI: Kuo ‘ikai ha’atau to e me’a ki he feilaulau, kuo fai kotoa pe ‘e Sisu ‘aki hono ta’ata’a. Pea ko e me’a pe ‘oku ne fakahinohino mai, KE TAU ‘ALU A, ‘O MA’U ‘A E MO’UI. “’Oku ou ‘ilo ‘a oku Huhu’i ne fua ‘eku ia he funga ‘akau, ‘o ui keu ‘alu ‘o ma’u ‘a e Mo’ui, pea fakafeta’i na’aku ‘alu ‘o ma’u, ka e fefe ‘akoe, ‘akoe, ‘alā.” (Himi 504).

Sione 18:1-19:1-42 “Ko hono Fakamaau’i mo e Kalusefai ‘o Sisu.”

Ko hono Lavaki’i, pea mo hono tataki holo he ngaahi fakamaau’anga ‘o a’u ki he ‘aho. Pea ne hu atu ki tu’a kuo tuku maau mai ai ‘a e KOLOSI, na’a ne lau pe KO HONO KOLOSI (‘a ‘etau ngaahi angahala). Pea ne fua ‘o ne fononga mo ia he Hala Viatololosa, ‘io na’a ne to mo humu ka na’a ne kikitaki pe ke a’u ki he Kalevale, ki he potu ‘ou ui ko e ‘ULU POKO. Pea na’a nau Kalusefai ai ia. Pea ko hono Kolosi na’e tohi ‘i ‘olunga – KO E TU’I SIU ENI – Na’e hiki ke lau ‘e he kakai kotoa pe, ko ‘enau manuki kiate ia.

FAKALOTOLAHI: Ko ‘eni ia ‘a e tumutumu ‘etau fononga mo Sisu ‘i he Uike Tapu. Ko ‘etau a’u ki he Kolosi, pea ‘oku ne fakamanatu mai kiate kitautolu = Ko e ngaue kotoa pe na’a ne fai, na’e taumu’a taha pe ke fai ‘aki hotau HUHU’I mo FAKAMO’UI. ‘IO, ‘E SISU, KO HO’O PEKIA, KO E KOTO VAIKAU’AKI. Malo Sisu….Malo Sisu…Fakafeta’i ‘Eiki…..Fakafeta’i ‘Eiki.

Lau ma’u pe ho’o Folofola. Fakalaulauloto he ‘OFA ‘a e ‘Otua. LOTU.
Shalom.

03/28/2024

VAEVAE MANAVA MO E KAU TEKINA ‘I MOANA – MA’ASI 28, 2024 (UIKE TAPU)

Saame 116:1-2,12-19 “Fakahaofi koe ‘e Sisu mei he Mate.”

Ko e Hiva Fakafeta’i ‘i he hounga’ia he ‘Ofa ‘a e ‘Otua, hange pe ko ia ‘oku ‘uluaki ongona ‘i he kamata’anga pe ‘o e Saame ni. “’Oku ou ‘ofa au kia Sihova, koe’uhi kuo ne ongona hoku le’o mo ‘eku hufia.” (v.1). ‘Ikai ke ngata pe ‘i he’ene ‘Ofa, ka ‘oku ne to e hounga’ia ‘i hono fanongoa hono le’o ‘i he’ene Lotu.
Pea hange ko ‘ene fehu’i – “Teu totongi fefe kia Sihova ‘a e fu’u hulu ‘ene ‘ofa kia kita?” (v.12). “Teu feia ki he ‘Afiona ‘a e feilaulau fakafeta’i, ‘ou hu’ekina ‘a e Huafa ‘o e ‘Eiki.” (v.17).

FAKALOTOLAHI: Ko ‘etau fononga ‘i he Uike Tapu mo e fakalaulaulotoki he ‘Ofa na’e fai ‘e he ‘Otua ‘i hono ‘Alo ke ne hifo mai ‘o pekia ka tau mo’ui ai. Pea mo’oni fau ‘a e Fatu Saame – Te tau totongi fefe ‘a e fu’u hulu pehe ‘ene ‘Ofa kiate kitautolu. E ‘ikai ke lava ‘o fetongi ‘aki ha koloa pe ko ha’atau ngaue, pe fakatau ‘aki ha pa’anga – he ‘ikai pe ke kakakunga ha me’a ‘i mamani mo e ‘Ofa kuo ne fai. He ko e feilaulau ko ia ‘oku fu’u hulu noa, pea ‘oku fe’unga hono mahu’inga mo mamani katoa.

‘Ekisoto 12:1-14 ‘Ko e ‘Uluaki Katoanga Pasova.”

Ko e ‘Uluaki Katoanga Pasova na’e fai ia ‘e he Kakai Isileli ‘i he ‘amanaki ke nau mavahe mei Isipite. Na’e taki taha ‘a e famili ‘a e Lami Ta’emele mo Haohaoa. Na’a nau tamate’i ia ‘o nau ma’u me’atokoni faka’osi ‘aki hono kakano, pea nau vali ‘aki hono toto ‘a e ngaahi kau matapa honau ngaahi fale.
Ko e tautea faka’osi na’e fai kia Felo mo e kau Isipite, ko hono tamate’i ‘e he ‘Angelo ‘o e Mate ‘a e ‘Uluaki Foha kotoa pe ‘i he loto fale kotoa pe ‘i Isipite, pea kau ai mo e Fale ‘o e Tu’i. Pea ko e Fale pe ‘o e Kau Isileli na’e vali ta’ata’a honau ngaahi matapa. Ke FAKALAKA AI ‘A E ‘ANGELO ‘O E MATE pea ko e ‘uhinga ia ‘o e PASSOVER ko e “PASS” “OVER” ‘a e ‘Angelo Faka’auha mei he Fale ‘o e Kau Isileli.

FAKALOTOLAHI: Ko hotau hufanga’anga, ko e Ta’ata’a ‘o e Lami Feilaulau, Ta’emele mo Ta’ehano’ila. Ko Sisu Kalaisi, na’e lilingi he funga kolosi ke ne ‘ufi’ufi ‘etau angahala, kae fakalaka ‘a e Mate mei he’etau Mo’ui.

1 Kolinito 11:23-26 “Ko e ‘Ohomohe ‘a e ‘Eiki.”

Ko hono fakahoko ‘e Sisu ‘a ‘enau ‘ohomohe faka’osi mo ‘ene kau ako ‘i he po ko ia na’e fai ai hono lavaki’i. Na’a ne to’o ‘a e ma, pea ne fakafeta’i ia, pea ne pakipaki ‘o ne ‘oange ki he’ene kau ako ‘o ne me’a – Ko hoku sino eni, ‘a ia ‘oku ma’a kinautolu, mou fai pehe ko e fakamanatu kiate Ia.
Na’a ne to’o foki ‘a e ipu, pea hili ‘ene fakafeta’i ia na’a ne ‘oange ki he;ene kau ako ‘o ne me’a – Ko hoku toto eni, ko e toto ‘o e Fuakava Fo’ou, ‘ilonga ha’amou inu ia, mou fai pehe mo’oku fakamanatu. Pea ko ‘enau kai ‘a e ma mo inu ‘a e ipu, ‘oku nau fakaha ‘a e pekia ‘a e ‘Eiki kae’oua ke ne toe hoko mai.

FAKALOTOLAHI: Ko ‘eni ‘a e Kai Mo’oni mo e Inu Mo’oni ki he’etau fononga. Pea ‘oku fiema’u ke fai ‘aki ‘a ‘etau Tui ki hotau ‘Eiki ko Sisu Kalaisi, ko e ‘Alo ‘o e ‘Otua, na’a ne pekia pea ne toetu’u, ko hotau Huhu’i.

Sione 13:1-17, 31e-35 “Ko hono fufulu ‘e Sisu ‘a e va’e ‘o e Kau Ako.”

Ko e faka’ilonga tu’ukimu’a ‘o e Sevaniti, ko e to’o ‘a e pesoni vai mo e no’o ‘a e tauveli. Ka ‘oku makehe ange ko hono fai ‘e he ‘Eiki mo e Lapai, ka e takoto pe ‘a e kau ako ia. Pea fakahinohino ai pe ‘e Sisu, ‘oku nau ui ia ko e ‘Eiki mo e Lapai, pea ko ia eni ‘a e ‘Eiki mo e Lapai ‘oku ne fufulu honau va’e. Pea ‘oku totonu leva ke nau fefufulu’aki homou va’e ‘omoutolu.

FAKALOTOLAHI: Kuo lava nai ha P**e Ako, pe P**e Ngaue ke ne fai ha ngaue fakasevaniti ‘o hange ko ia ‘oku fai ‘e Sisu? Tau pole ke tau fai pehe, ke tau Sevaniti ki he toko taha kotoa pe. Pea ke tau sevaniti mo ‘ofa kiate kinautolu ‘oku si’i hifo ‘iate kitautolu. Ko e to’onga mo’ui ia ‘oku pole’i ‘aki kitautolu ‘i he Uike Tapu.

Lau ma’u pe ho’o Folofola. Fakalaulauloto he ‘Ofa ‘a e ‘Otua. LOTU.
Shalom.

Siasi 'Imanuela - SUTT

04/08/2024

04/06/2024

04/05/2024

04/04/2024

04/03/2024

04/02/2024

03/30/2024

03/29/2024

03/28/2024

Address

Opening Hours

Website

Alerts

Contact The Place Of Worship

Shortcuts

Share

Category