10/13/2024
Skilbrei ungdomssenter er framleis ein god stad å kome til.
Det er blitt langt mellom nyhendebreva som vi deler på Skilbrei ungdomssenter si nettside. Eg må undrast: kvar vert tida av?? Eg skulle ønske at eg hadde ei afrikansk tilnærming til ordet tid, der seier dei at tida kjem. Eg har nok helst kjensla av at tida fær av stad. Men no har eg teke meg tid, og sett meg ned for å skrive nokre ord frå oss på Skilbrei. Kanskje har du sakna å få litt informasjon om kva som skjer på huset?
Framleis klara vi å samle ca. 200 barn og unge gjennom året til leir på senteret. Formålet med senteret er Jesus til barn og unge. Vi har framleis vinter, sommar og haustleir for 2.-4. klasse og 5.- 7. klasse. Det er ein trufast gjeng som kjem på desse leirane og når dei er blitt for store til å reise på barneleir, er det tilbod for dei hjå Tabu gjengen som er ungdomsarbeidet vårt i området. Desse ungdommane samlast fire helger i året på Skilbrei.
Styret verdset dette arbeidet høgt, då det er Jesus til born og unge som er målet for Skilbrei. Men det gjev også styret utfordringar, når det er høve til å leige ut huset til kommersielle formål og vi kan tene gode pengar på å leige ut til sesongarbeidarar for Nortura, og styret må takke nei til alle desse inntektene. Det lar seg ikkje kombinere med utleige over fleire månadar og samstundes ivareta leirarbeidet. Vi kjenner nok på ei uro over tapte inntekter, med samstundes har Herren sørga for Skilbrei så langt. Vi har sterk tru på at det vil han framleis gjere.
Det er forunderleg å sjå at tross fleire store prosjekt siste åra innom hus, så er ikkje pengekassa tom på senteret. Når vi ser på kva vi har av faste utgifter til forsikring, straum, kloakk og vatten, søppel, rekneskapsføring mm., så er vi oppe i eit 6 sifra beløp. Desse summane minner meg på at då har vi ikkje teke med personalkostnader. For tida er det to personar på lønningslista på senteret. Anne Margrethe Skjold Olsen er vår trufaste og dyktige medarbeidar inn mot kjøkken på alle leirane. Ho kombinera 75 % jobb på sjukeheimen på Skei med leirarbeidet på Skilbrei. Ho gjere ein svært god jobb, og ho har vore trufast over mange år på senteret. Ho jobbar på timebasis.
Den andre personen som utfører vasking på senteret, er Valjet Bislimi. Ein ung dyktig mann frå Kosovo som har eige firma innan reingjering og Skilbrei leiger han inn. Han utføre jobben sin særs samvitsfullt og godt. Han lika seg godt på senteret, og av og til tek han med seg dottera på 2 år og ektefellen sin til Skilbrei. Så jobbar dei saman og vaskar til glede for oss som skal leige ut huset.
Lars Inge Kårstad har hatt eit års permisjon frå jobben som vaktmeister på Skilbrei. Han sa i vår opp jobben, og vi på Skilbrei takkar Lars Inge for all den jobben han utførte for senteret med vaktmeisteroppgåver dei siste åra.
Sommaren vart ei god tid og med gode inntekter for senteret. Vi hadde fleire tamilske grupper som samlast til treff, det var tre storfamiliar som møttest for familieleir i ei veke, og vi fekk UWC Hauglandssenteret som hadde «summerschool» for 18 elevar i 14 dagar i strekk.
Senteret er perfekt til storfamiliesamling, og den eine familien har alt booka seg innatt til neste sommar. Den eine storfamilien som kom, var 4 søstrer som kom med ektefelle og born. Dei brukte alltid å leige ulike overnattingsstader i landet til samling kvar sommar. Det fyrste dei sa var: «Å her var det reint og fint, det er vi ikkje vane med». Så det var ei stjerne for oss, som vi vart glade for.
Andre gjester er konfirmantane i Gaular, og fleire «Skilbreivener» som har feira konfirmasjon på senteret våren 2024.
Styret for Skilbrei ser stadig oppgåver som skulle vore utført på senteret. Huset er 51 år denne hausten, og det er alltid noko som skal takast tak i. I sommar sette vi gang med storarbeid på framsida av huset. Vegen bort til garasjane og kjøkkeninngangen har over tid sege ut og ned. Snøbrøyting har vorte krevjande då vegen har vore i slik dårleg stand. Styre fekk leigd inn Maskinentrepenør Kjell Einar Viken, og han gjorde ein stor jobb med å utbetre vegen og gjorde ein god jobb som vi er svært godt nøgd med. Mykje jord masse er bytta ut med stein og grus, og det beste av alt er at vegen no er asfaltert. Området framføre matsal, møte og kjøkken fram står som eit heilt nytt område og vi ser fram til å sette fram benkar og bord til våren. Då blir det fint å grille pølser på leirane og sette seg på benkane i sommarsol. Det må seiast at sjølv om Kjell Einar er rask og handlekraftig og rette mannen på rette staden, så kosta prosjektet ein god del av dei midlane vi hadde til rådigheit. Vi har likevel tru på at vi skal klare å finansiere jobben med å lage ein akebakke bak garasjane, og vi håpar at arbeidet kan starte opp i vinter. Vi treng ein akebakke som er trygg og utan at det plutseleg kjem ein bil køyrande opp til senteret. No akar borna i vegen, og det er ikkje bra.
Ja, det skjer faktisk litt på senteret som du ser. Og litt meir skal det også skje.
Vi vil invitere deg til Skilbreibasar Lørdag 2. november kl. 16.
Då er du velkomen til eit sosialt og kjekt arrangement for heile familien. På programmet står det åresal med fine og gøye gevinstar, deilig Sunnfjords kakebord og aktivitetar for borna.
Du får høyre andakt av Runhild Øvreås og helsing frå regionleiar Olav Rune Skutlaberg.
Vi håpar at vi ser deg gode Skilbreiven.
Du er hjartelege velkomen. Skilbrei treng sine gode vener og vi håpar at vi sjåast denne dagen.
På vegne av styret:
Marthe Hauge Aase
